Kub 7
7
Entandiko y'okusandaara kw'amaizi
1Nubwo MUKAMA yagambiire Noha ati: “Taaha omu lyaato, iwe n'eka yaawe, habwokuba niiwe wenka ou ndozire oli muhikiriire omu bantu ab'akasumi kaawe. 2Otwale musanju musanju ha bisoro ebitarukuzirwa ekisaija n'ekikazi kyakyo, kandi otwale ekikazi n'ekisaija ha bisoro ebirukuzirwa. 3Kandi otwale musanju musanju ha binyonyi eby'omu mwanya, ekisaija n'ekikazi, nukwo oruganda rw'ebintu ebi ruleke kuhwerekererra kimu omunsi. 4Habwokuba omu kasumi ak'ebiro musanju, ninyija kunaga enjura omunsi, egwere ebiro makumi ana, nyamusana n'ekiro; buli kyomeezi kyona eki nakozire, ninyija kukihwerekereza nkimale omunsi.” 5Noha yakora byona MUKAMA ebi yamuragiire.
6Amaizi kusandaara omunsi, Noha akaba ahikize emyaka rukaaga. 7#Mat 24:38,39; Luk 17:27.Uwe na batabani be, na mukazi we, na bakabaana be, baataaha omu lyato, nukwo bataitwa amaizi. 8Ha bisoro ebitarukuzirwa, na ha bisoro ebirukuzirwa, ha binyonyi na ha buli kintu ekinyakwekururra ha itaka, 9bibiri bibiri, ekisaija n'ekikazi byataaha omu lyato hamu na Noha, Ruhanga nkooku yamugambiire. 10Obu haahingwireho ebiro musanju, amaizi gasandaara omunsi.
Noha n'abantu be nibataaha omu lyato
11 #
2Pet 3:6. Noha obu akaba ahikize emyaka rukaaga, ha kiro ekya ikumi na musanju eky'okwezi kwa kabiri, ensoro zoona ez'okuzimu zikaiguka, ebihengeezi eby'iguru byakinguka. 12Enjura yafukumuka omunsi okumara ebiro amakumi ana, nyamusana n'ekiro. 13Ha kiro eki kyonyini, Noha na batabani be: Seemu, Haamu na Yafeesi, muka Noha na bakabaana be, baataaha omu lyaato, 14bbo, ebisoro byona ebya buli mulingo, ente, na byona ebyekurra ebinyakwekururra hansi ebya buli mulingo, ebinyonyi byona ebya buli mulingo, 15abantu n'ebyomeezi byona bikataaha omu lyaato hamu na Noha, bibiri bibiri. 16Kandi ebi ebyataahire ekisaija n'ekikazi, byona ebinyakwina omubiri, bikataaha nkooku Ruhanga yaragiire Noha; nubwo MUKAMA yamukingira omu lyato.
17Amaizi gaasandaara omunsi kumara ebiro makumi ana; gakeeyongera kukanya, gaahimba eryaato, lyaruga haitaka, lyasereera. 18Amaizi gaagenda nigeyongera muno mu nsi, eryaato lyaseereera ha maizi eruguru. 19Amaizi gaayeyongerra kimu omunsi, gaamira ensozi zoona eziraihire; 20gaayeyongera kukanya ha ruguru y'ensozi, gaazimira mita nkaaga na musanju. 21Byona ebinyakunyina omubiri, ebinyakwikara omunsi, byafa; enyonyi, ente, enyamaiswa, ebyekurra, na byona ebihuruuka omunsi, n'abantu boona; 22byona ebikaba biri ha bwerre ebinyakunyina orwoya orw'obwomeezi, ebi nyakwikiza omu nyindo, byafa. 23Ruhanga yahwerekereza buli kintu kyona ekyomeezi ekikaba kiri omunsi: abantu, ebisoro, ebyekurra, ebinyonyi eby'omu mwanya; byahwerekerezibwa, byahwa omunsi. Noha wenka nuwe yasigaireho, n'abo aba akaba ainabo omu lyaato. 24Amaizi gaamara omunsi ebiro kikumi mu ataano.
Pilihan Saat Ini:
Kub 7: BRR2008
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Bible in Runyoro/Rutooro Interconfessional Translation © Bible Society of Uganda, 2008.