Matta 4
4
Sərtakə tə Dzə Yesu
(Mar 1:12-13; Luk 4:1-13)
1Ahir nga Shanguɗə Karti tə təra na Yesu gwa takəu, ga sərtakə gwa dzə nyi. 2Cha hanyi fwaɗəkumənyi cho səmdzən, ngə cha ngatə huɓa. 3Ngə sərtakə tə shili ga nar nyi, “Ma cha nakə Zər Hyel ka, shandə hangu inə ka gwazhilakəu.”
4Kəl ngə Yesu tə wum ga nar nyi, “Tsəfətsəfə nyi ku likatəkatə Hyel, ‘A ndə da kwa ngya ka sərsum tanyi wa, kəl tsa'a na kala ɓwanya nda Hyel kwa dəka.’ ”
5Kəl ngə sərtakə tə təra na Yesu gwa Urshalima, mələm karti, ga hətə nyi gyatə mbwa nda ndiya na dzəgam nə Mbwa'alə Hyel. 6Ngə cha nar nyi, “Ma cha nakə Zər Hyel ka, sənda kərnghə səya tangna, aka tsəfətsəfə nyi cha,
‘Hyel kwa ɓwanya nə chama nyi
nda kwa tsautə ngha,
tsa ka da dəgəya mada hya ka tə hangu.’ ”
7Ngə Yesu tə ɓəlakə nyi, “Tsəfətsəfə nyi tsəu ‘Ngwa ka da dzə Hyel Tlakə nghə wa.’ ”
8Əsəkə tsəu, ngə sərtakə tə təra na Yesu gyo kəra mə dzəgaməu, ga char nyi dəhə təlkur dunəya, ana səli nyi. 9Ngə sərtakə tə na, “Kwa la'a kə dəhə sə ingə wa, yo nə ngha maka uzhi ga hətə ɗa səli.”
10Ngə Yesu tə ɓəlakə nyi, “Təkə naya Shantan, aka tsəfətsəfə nyi cha, ‘Ka hətə nyi səli nə Hyel Tlakə ngha, kəl nacha zhang tanyi ko mər mavakur nə nyi.’ ”
11Ngə sərtakə tə təkə na Yesu, ngə Chama Hyel i tə səya ga vala nyi.
Yesu tə Ghəya Tlər nyi avu Galili
(Mar 1:14-15; Luk 4:14-15)
12Nda Yesu tə ngatə ənda səya tə nji Yohana ndər mər baɓtisma ga fəu nyi ku jarum, ngə cha hya'atə ga ɓəl ya tə hə'i Galili. 13Ngə cha ngyar Nazarat, cha shili ngya vu Kafarnahum, vanya mələm ləha dza fa'a Galili atə hə'i Zabuluna ana Naftali. 14Aka nja nyabiya sənda Ishaya ndər mətakər tə na, 15“Njir hə'i Zabuluna ana njir hə'i Naftali, nahi nda tə lakur fa'a Galili a biya tiya dəl Urdun, ana Galili hə'i nji'inda pa'a njir Yahuda. 16Nji'inda na ngya ku kutla, nda kwa la'a vimbəlmbəla nda kwa mbəl gagaɗa. Vicham kwa mbəl təkəra nji'inda na ngya ku shanguɗər tah.”
17Aku bəji nda ngə Yesu tə ghəya bəzə mafakəu, Cho na, “Tubi ma, aka təlkur huɗamələm ɗatə ləhəu.”
Yesu tə Nga Njir Timi Kalfi Fwaɗəu
(Mar 1:16-20; Luk 5:1-11)
18Nda Yesu kwa zhuli biya nya fa'a Galili, ngə cha la'a ndə na zamə nyi, Shiman nda njo nga Bitrus ana zamə nyi Andrawus nda kwa timi na hiɗi ku fa'a nda aka njir timi nda. 19Ngə Yesu tə nar nda, “Nəu ɗa ma, yo shandə hi ka njir nga nji shili da ya.” 20Təma nda ngyar hiɗi kənda ga, nəu nyi.
21Nda cha tsaɗar dzə biyama, cha la'a ndə na zamə nyi səkəu, Yakubu zər Zabadi, ana zamə nyi Yohana nda kwa ɓatlə hiɗi kənda, ku param ka Adan nda Zabadi. Ngə cha nga nda. 22Təma nda ngyar param kənda ana Adan nda, ga nəu nyi.
Yesu tə Vala Nji Ɗanghəu
(Luk 6:17-19)
23Yesu tə zhulitə hə'i Galili dəhəu, cho dlədləɓə nə nji ku vi pətlənya, cho bəzə Mafakə Mənakə nə təlkur. Cho mbandə nji na shiləka, ana tar yiyingkur pampaməu. 24A təwa əngə nja zəndə nyi tə hə'i Suriya dəhəu. Ngə nda shili na nyi njir tar yiyingkur ana shiləkə pampaməu, ana nji'inda na ɓwaɓwatər kumər dzə dəhəu, ana tsəu njir tləka, nji'inda səu kwa chi nda, ana nji'inda dzanda kuɗəkuɗənyi, Yesu tə mbandə nda dəhəu. 25Dlama nji tə nəu nyi hya'ati vu Galili, ana hya'ati ku hə'i nda njo nga Mələm Kuma, ana Urshalima, ana hə'i Yahudiya, ka njir hə'i nda biyatə ya dəl Urdun.
Pilihan Saat Ini:
Matta 4: hbbNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Wycliffe Bible Translators, Inc. and © The Nigeria Bible Translation Trust 2018
