Gyenesise 18
18
Nyameɛ fa baa bienzua hyɛ Abraham bɔ
1Ɛlɛho bie eyia ketee, né Abraham te ye ɛtena sua ne anoa nu, na AWURADE yele ye nwo ali hyirele ye wɔ nekaa bie bɔ opingye Mamre eluii mmakaa ne. 2Ɔmane ye nye so, na onwuni kyɛ mmienzua nza bie gyigyi ye nyunu moa dɔ. Onwuni bɛ nen, ofili ɛtena sua ne anoa nu berɛ otuli amirika ooyiale bɛ, na ɔkotole bɛ, 3na ɔhane kyɛ, “Me Mene, sɛ alo me anwu me anwumvoin de a, nzaade mesrɛ wɔ, nnesã w’akoaa nwo kɔ. 4Maa mmrɛ ɛmɔ nzue kãa, ná ɛmɔnwunzi ɛmɔ gya bo, ná afei ɛmɔale bɛ nwome wɔ bakaa ne abo. 5Ɛmɔawa ɛmɔ akoaa berɛ, yiti ɛ́mɔma ngɔmbena nikyee kãa ma ɛmɔhã bɛ noa, ma ɔma ɛmɔ anwoserɛ koraka né ɛmɔahɔ.” Na bebuale kyɛ, “Yɔ kyɛbɔ aha ne.” 6Na Abraham hane ye nwo hɔle Sara berɛ wɔ ɛtena sua ne anu oosele ye kyɛ, “Ma wɔ nwo yɛ nyera ná fa esam paa kongo nza, fete ná fa yɛ taterɛ.” 7Afei Abraham tuli amirika hɔle nandwie nemɔ anu ɔɔhyele nandwie ba ko bɔ ɔyɛ nyemene, bɔ ye naen kɔyɛ mmerɛ, ɔfa mane ye somvoɛ, na ye koso ɔhane ye nwo oohuni ye, na obiale ye fa yɛle aleɛ. 8Afei Abraham fale nandwie nyɔfonesue nye loe, nyɔfonesue ne nandwie akrɔngrɔma bɔ bafa bayɛ aleɛ ne, ɔfa siele ɛwɔfoɛ nemɔ anyunu berɛ, na ogyinane bɛ nwo wɔ bakaa ne abo maa bedidili.
9Bebisale ye kyɛ, “Ɛye Sara wɔ ni?” Na obuale kyɛ, “Ɔwɔ ɛtena sua ne anu dɔ.” 10#Gye 18.10; Rom 9.9 Na ɔhane#18.10: ƆHANE: Anaakyɛ: AWURADE hane. kyɛ, “Nahorɛ nu, kyɛ nza mmra wɔ wa afoɛ bieku bekye sɔa ala ne, né ɛye Sara anya baa bienzua.” Na né Sara gyi ye si dɔ wɔ ɛtena sua ne anoa nu ótie. 11Né Abraham ne Sara banyi bayɛ nworowaa; na né Sara mmu ye sa ko. 12#Gye 17.17; 1 Pet 3.6 Yiti Sara serele ye ti anu hane kyɛ, “Mayɛ aworowaa bɔ me hu wora wayɛ aworowaa ye, aso bekye yeɛ mebaagye me nye ɔ?”
13Na AWURADE bisale Abraham kyɛ, “Nzu ati yeɛ Sara serele na ɔhane kyɛ, ‘Aso bekye bɔ mayɛ aworowaa ye yeɛ mebaawo ɔ?’ 14#Yer 32.17; Mat 19.26; Mak 10.27; Luk 1.37; Rom 9.9Aso nikyee bie wɔ berɛ bɔ ɔyɛ se ma AWURADE hɔ ɔ? Na mmerɛ bɔ mahyɛ ne, afoɛ bieku bekye sɔa ala, ngosa ngɔwa wɔ wa, na Sara konya baa bienzua.”
15Né Sara suro, yiti ɔsale kyɛ, “Nnzerele.” Nakoso ɔhane kyɛ, “Daabi, ɛserele.”
Abraham pa kyerɛ ma Sodomfoɛ
16Afei mmenia nemɔ dwɔsole kyɛ bɛ́kɔ, na bɛfale bɛ nye behyirele Sodom; na Abraham ne bɛ sili nu kyɛ ɔkwaagua bɛ ate. 17Na AWURADE sele kyɛ, “Aso mva bɔ mebaayɔ ye mvea Abraham anaa? 18#Gye 12.3; Aso 3.25; Gal 3.8 Susu amba kyɛ, Abraham boso ama kɔyɛ maen pirikua bɔ ole tumi, na ɔnate ye so yeɛ ewiase maen mukoraa bekonya saleɛ ɔ. 19Mapa nu maye ye, kyɛ ɔ́hyɛ ye mma ne ye boso ama bɔ bɛkɔwa nziɛ ye ma bɛnate AWURADE atee so, ma bɛyɔ bɔ ɔtengyɛ, ɔne bɔ ɔte pɛpɛɛpɛ ɔ; amaa ɔnate so AWURADE ama ɛbɔ bɔ wahyɛ Abraham ne awa nu.” 20Na AWURADE hane kyɛ, “Ɔnate kyɛ abubue bɔ bɛbɔ begua Sodom ne Gomora so ne sone soma, na bɛ bɔne te piri paa ne ati, 21ngodwu ngɔɔnea sɛ bɔ bayɔ ne, ye nwo abubue yeɛ waadwu me nyunu ne anaa. Na sɛ nna sɔ yeɛ ɔte hɔ a, ngonwu ye.” 22Yiti sɔ mmenia ne#18.22: MMENIA NE: Anaakyɛ: mmenia nyɔ ne. kakyili bɛ nwo, betu bɛtengyɛle kyɛ bɛkɔ Sodom, nakoso Abraham de, né ɔtɛ gyi AWURADE nyunu berɛ. 23Afei Abraham pingyele ye, na obisale ye kyɛ, “Aso ɛkɔfa bɛ bɔ bɛtengyɛ ne ɛkɔfra amumuyɛɛfoɛ so ɛkɔsɛkye bɛ anaa? 24Yɛfa ye kyɛ mmenia aburannu bɔ bɛtengyɛ wɔ kuro ne anu. Yiti ahaa ɛngɔfa wɔ nye ngɔto mmenia aburannu bɔ bɛtengyɛ wɔ kuro ne anu ne, na ɛngɔyakyi ye sɛkyelɛ anaa? 25Wɔ de, ɛngɔyɔ sɔ nikyee ne le, kyɛ ɛkɔfa mmenia bɔ bɛtengyɛ ɛkɔfra amumuyɛɛfoɛ kɔsɛkye bɛ ɔ; bɔ ɔkɔmaa mmenia bɔ bɛtengyɛ ne b’ayieleɛ koyie bɛ kyɛ amumuyɛɛfoɛ ɔ. Ah! Ɛngɔhora sɔ yɔ! Yiti aseɛ ye aso amukoraa Ndɛenbualɛniɛ ne, ongobua ndɛen bɔ ɔtengyɛ hɔ ɔ?” 26Na AWURADE buale kyɛ, “Sɛ menya mmenia aburannu bɔ bɛtengyɛ wɔ Sodom kuro ne anu a, ɔnate bɛ ti mengɔsɛkye kuro ne.” 27Na Abraham buale kyɛ, “Amba, ɔwɔ nu kyɛ nde mvuture ne nzoen de, nakoso ndɛ gyi me gya nu kyɛ me ne AWURADE yɛkodwudwo. 28Mmenia aburannu bɔ bɛtengyɛ ne, sɛ so nnu fi so ɛ? Yiti ɔnate nnu bɔ bafi so ne ati ɛkɔsɛkye kuro ne amukoraati anaa?” Na obuale kyɛ, “Sɛ menya aburanna ne nnu wɔ berɛ a, mengɔsɛkye ye.” 29Na Abraham sá bisale AWURADE kyɛ, “Na sɛ enya mmenia aburanna berɛ ɛ? Na ye koso obuale kyɛ, “Ɔnate aburanna ne ati mengɔyɔ sɔ.” 30Na Abraham hane kyɛ, “Ɛhe de mesrɛ wɔ, AWURADE, nnɛfɛ yaa, na maa ndwudwo kãa. Sɛ enya mmenia aburasa berɛ ɛ?” Na obuale kyɛ, “Sɛ menya mmenia aburasa berɛ a, mengɔyɔ sɔ.” 31Na ɔhane kyɛ, “Ndɛ gyi me gya nu kyɛ me ne AWURADE yɛkodwudwo. Sɛ enya mmenia aburanyɔ berɛ ɛ?” Na obuale kyɛ, “Ɔnate aburanyɔ ne ati mengɔsɛkye ye.” 32Afei ɔhane kyɛ, “Mesrɛ wɔ, AWURADE, nnɛfɛ yaa. Maa nga edwirɛ komapɛ twe he ala: Na sɛ enya mmenia buru berɛ ɛ?” Na obuale kyɛ, “Ɔnate buru ne ati mengɔsɛkye ye.” 33Na AWURADE ne Abraham bedwudwole beyiele nen, ofili berɛ hɔle; na Abraham koso osa hɔle ye awuro.
Pilihan Saat Ini:
Gyenesise 18: EBP
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Esahie Bible © Bible Society of Ghana, 2018.