Gyenesise 14
14
Abram ko de Lɔto
1Sɔ mmerɛ ne, Sinari hene Amrafɛl,#14.1: AMRAFƐL: Anaakyɛ: Babilɔnia. Elasare hene Arioke, Elam hene Kedolaoma ne Goyim hene Tidal, 2bɛɛfale koɛ bɛtetale Sodom hene Bera, Gomora hene Biresa, Adema hene Sinabo, Seboyim hene Semebere, ɔne Bɛla hene (bɔ besa bɛfrɛ ye Soa) ne. 3Sɔ ahemvo nnu hemɔ boaboale b’ɛlɔen noa bɛbɔle nu wɔ Sidim bɔnza (bɔ besa bɛfrɛ ye Ngyee Po) ne anu. 4Né baso Kedolaoma afoɛ buru ne nyɔ mumua, nakoso bɛyɛle ye nwo lɔen afoɛ bɔ ɔtɔ so buru ne nza ne anu. 5Na afoɛ bɔ ɔtɔ so buru ne nna ne anu, Kedolaoma ne ahemvo mɔ bɔ bɛwɔ ye bue nu ne, bɛɛbole Refaimfoɛ wɔ Asterote Kanaim, Susimfoɛ wɔ Ham, Emimfoɛ wɔ Sawe Kiriatim, 6na bɛɛbole Horifoɛ wɔ bɛ bokaa Sɛre so toonn beedwuli Ɛl Paran bɔ opingye ɛserɛ so ne. 7Afei besale bɛ si bɛwale Ɛn Misepate (bɔ besa bɛfrɛ ye Kadese ne), na belili Amalɛkefoɛ maen ne amukoraa ne Amorifoɛ bɔ bɛte Hasason Tamar so ngonim. 8Afei Sodom, Gomora, Adema, Seboyim ne Bela (bɔ besa bɛfrɛ ye Soa) hene mɔ dwɔsole, 9na bɛ ne Elam hene Kedolaoma, Goyim hene Tidal, Sinari hene Amrafɛl, yeɛ Elasare hene Arioke bɛhone koɛ wɔ Sidim bɔnza nu; ahemvo nna yeɛ bɛ ne ahemvo nnu bɛhone ɔ. 10Né ngono pee bɔ nu ayɛ pikaa wɔ Sidim bɔnza ne anu, yiti mmerɛ bɔ Sodom ne Gomora ahemvo mɔ bɛ́nwati bɛ́kɔ nen, ebiemɔ totɔle ngumaa ne anu, na bɛ ngaa ne koso bɛnwatili bɛhɔle mmokaa aseɛ ne aso dɔ. 11Yiti bɛ pɔfoɛ nemɔ sesale Sodom ne Gomora nningyein mukoraa, ɔne b’aleɛ mukoraa, na besili nu bɛhɔle. 12#Gye 13.10-12 Besa bɛhyele Abram aliɛma bienzua awa Lɔto bɔ né ɔte Sodom ne; na bɛsesale ye nningyein bɛbokale so bɛ ne ye hɔle.
13Ebie nwatili fili koɛ ne anoa, na ɔɔbɔle Hebriniɛ Abram amaneɛ. Né Abram te pingye Amoriniɛ Mamre eluii mmakaa ne. Né Mamre aliɛma mɔ Ɛseko ne Anere bɛte Abram koɛ nu bokafoɛ. 14Na Abram tele kyɛ bahye oliɛma bienzua awa nnure nen, ɔboaboale koɛhonɛfoɛ ɛyaa nza ne buru ne mmɔtwɛ bɔ banya koɛ nu ndeteyɛɛ, bɔ bɛwole bɛ wɔ ye awuro noa, na ɔpole so alaa oodwuli Dan. 15Abram hyɛle ye mmenia ne anu kure kure kɔngɔen maa bɛhɔle ye pɔfoɛ nemɔ so. Ɔbole bɛ, na ɔfoane bɛ toonn oodwuli Hoba bɔ ɔwɔ Damasko sorɔ ne. 16Afei ɔfale nningyein ne amukoraa, oliɛma bienzua awa Lɔto ne ye nwo nningyein, mmrasua mɔ ne mmenia (bɔ bahye bɛ nnure) ne, na osa wale.
Mɛlkisɛdɛke yira Abram
17 #
Heb 7.1-10
Mmerɛ bɔ Abram lili Kedolaoma ne ye mmango hene mɔ so ngonim na osa ba ne, Sodom hene ooyiale ye wɔ Sawe bɔnza (bɔ bɛfrɛ ye Ɛhene bɔnza) ne anu. 18#Edw 110.4 Na Salem hene Mɛlkisɛdɛke bɔ né ɔte Anwuro Anwuro Nyameɛ sɔfo nen, ɔfale paanoo ne bobe nzaa brɛle Abram. 19Oyirale ye kyɛ,
“Anwuro Anwuro Nyameɛ,
bɔ ɔbɔle anwuro ne aseɛ ne, óyira Abram;
20na animnyam hã Anwuro Anwuro Nyameɛ,
bɔ wafa wɔ pɔfoɛ mɔ wawura wɔ sa ne!”
Na Abram mane Mɛlkisɛdɛke nningyein ne amukoraa nu buru nu ngyɛmuɛ ko. 21Afei Sodom hene sele Abram kyɛ, “Fa mmenia nemɔ ma me, na wɔ wora fa nningyein ne.” 22Nakoso Abram sele Sodom hene ne kyɛ, “Mata ndaen mahyire AWURADE, Anwuro Anwuro Nyameɛ bɔ ɔbɔle anwuro ne aseɛ ne, 23kyɛ, mengɔfa wɔ gyese, anaa mbaboa nyamaa, anaa wɔ nikyee biala, ná anga kyɛ, ‘Me yeɛ mama Abram anya ye nwo ɔ.’ 24Mengɔfa nikyee fee, sana bɔ mmerandeɛ nemɔ ali ne ngome; yeɛ afei ma Anere, Ɛseko ne Mamre bɛfa me mmenia bɔ bɛ ne me hɔle ne bɛ koɛ nu nzesadeɛ deɛ.”
Pilihan Saat Ini:
Gyenesise 14: EBP
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Esahie Bible © Bible Society of Ghana, 2018.