Luka 16
16
Tsulɔnukpa kutumpɔfo lɛ he abɛ lɛ
1Yesu saa kɛɛ ekaselɔi lɛ akɛ, “Niiatsɛ ko ni yɔɔ, ni eyɛ tsulɔnukpa, ni abafolɔ enaa ahã lɛ akɛ eekpãtã enii ahiɛ. 2Ni etsɛ lɛ ni ekɛɛ lɛ akɛ, ‘Mɛni minuɔ yɛ ohe nɛɛ? Baabu onukpayeli lɛ he akɔntaa ejaakɛ onyɛŋ onukpa lɛ oye dɔŋŋ.’ 3Ni tsulɔnukpa lɛ kɛɛ yɛ eyiŋ akɛ, ‘Akɛni minuŋtsɔ shɔ̃ɔ onukpayeli lɛ yɛ midɛŋ nɛɛ, te mafee tɛŋŋ? Minyɛŋ shi matsa, ni sisɛ̃mɔ hu miifee mi hiɛgbele. 4Mile nɔ ni mafee ni kɛ akpa mi onukpayeli lɛ ni mɛi ahere mi yɛ amɛshĩaiaŋ.’ 5Ni etsɛ enuŋtsɔ nyɔjiatsɛmɛi lɛ fɛɛ kɛba ekomekome, ni ebi klɛŋklɛŋ mɔ lɛ akɛ, ‘Nyɔmɔ enyiɛ ohiɛ minuŋtsɔ lɛ?’ 6Ni ekɛɛ, ‘Mu tɔi oha.’ Ni ekɛɛ lɛ akɛ, ‘Hemɔ owolo lɛ ni ota shi mramra ni oŋma nyɔŋmai enumɔ.’ 7No sɛɛ lɛ, ebi mɔ kroko hu akɛ, ‘Shi bo hu enyiɛ ohiɛ?’ Ni ekɛɛ, ‘Ŋmaa flɔtɔi oha.’ Ni ekɛɛ lɛ akɛ, ‘Hemɔ owolo lɛ ni oŋma nyɔŋmai kpaanyɔ.’ 8#Efes 5.9; 1 Tes 5.5 Ni nuŋtsɔ lɛ jie tsulɔnukpa kutumpɔfo lɛ yi akɛ eye sane lɛ ŋaa mli. Ejaakɛ je nɛɛŋ bii lɛ kɛ amɛyinɔbii lɛ yeɔ yɛ ŋaa mli fe la bii lɛ.
9 #
Luk 14.14; Mat 6.20; 10.40; 19.21 “Ni mi hu miikɛɛ nyɛ akɛ, Nyɛŋɔa kutumpɔo ninamɔ lɛ nyɛkɛfea shieŋtsɛmɛi nyɛhãa nyɛhe, koni, be ni nyɛbɛ nɔ ko dɔŋŋ lɛ, amɛhere nyɛ yɛ naanɔ bui lɛ amli. 10#Luk 19.17 Mɔ ni yeɔ nɔ ko bibioo mli anɔkwa lɛ, eyeɔ babaoo hu mli anɔkwa; ni mɔ ni yeee nɔ ko bibioo mli anɔkwa lɛ, eyeee babaoo hu mli anɔkwa. 11No hewɔ lɛ, kɛ nyɛyeko kutumpɔo ninamɔ lɛ po mli anɔkwa lɛ, nɔ ni ji anɔkwa ninamɔ lɛ, namɔ aaatu no awo nyɛdɛŋ? 12Ni kɛ nyɛyeko mɔ kroko nɔ mli anɔkwa lɛ, nyɛ diɛŋtsɛ nyɛnɔ lɛ, namɔ kɛaahã nyɛ? 13#Mat 6.24 Wenuu ko nyɛŋ nuŋtsɔmɛi enyɔ asɔ̃mɔ; ejaakɛ no lɛ eeenyɛ mɔ kome ni eeesumɔ mɔ kome lɛ, aloo eeekpɛtɛ mɔ kome he, ni eeegbe mɔ kome lɛ he guɔ. Nyɛnyɛŋ Nyɔŋmɔ kɛ ninamɔ nyɛsɔ̃mɔ.”
Yesu kã Farisifoi lɛ ahiɛ
14 #
Mat 23.14
Farisifoi lɛ hu ni ji shika suɔlɔi lɛ nu nii nɛɛ fɛɛ, ni amɛye lɛ ahi. 15#Luk 18.9-14; Lal 7.11; Abɛi 6.16, 17 Ni ekɛɛ amɛ akɛ, “Nyɛ ji mɛi ni nyɛbuɔ nyɛhe bem yɛ gbɔmɛi ahiɛ; shi Nyɔŋmɔ lɛ, ele nyɛtsuiaŋ; ejaakɛ nɔ ni ji gojoo yɛ gbɔmɛi ateŋ lɛ, yɛ Nyɔŋmɔ hiɛ lɛ nihiinii ni.
16 #
Mat 11.12, 13 “Mla lɛ kɛ gbalɔi lɛ yɔɔ nɔ kɛbashi Yohane nɔ; kɛjɛ nakai be lɛ nɔ nɛɛ aashiɛ Nyɔŋmɔ maŋtsɛyeli lɛ he Sanekpakpa lɛ, ni mɔ fɛɛ mɔ boteɔ mli ekãa naa. 17#Mat 5.18 Shi ejaraaa akɛ ŋwɛi kɛ shikpɔŋ aaaho aya fe nɔ ni Mla lɛ mli kuli kome aaaje mli.
18 #
Mat 5.32; 19.9 Mɔ fɛɛ mɔ ni shwieɔ eŋa ni eyaŋɔɔ mɔ kroko lɛ efite gbãlã, ni mɔ fɛɛ mɔ ni ŋɔɔ mɔ ni ewu eshwie lɛ lɛ, lɛ hu efite gbãlã.”
Niiatsɛ lɛ kɛ Lazaro
19“Nuu niiatsɛ ko ni yɔɔ, ni ewoɔ atade tsuru kɛ atade yɛŋ fɛɛfɛo, ni ekɛ ŋɔɔmɔnii kpakpai ayeli naa tsuijurɔ daa gbi. 20Ni ohiafo ko hu yɛ ni atsɛɔ lɛ Lazaro ni akɛ lɛ ebaŋmɛ egbo lɛ naa kɛ ehe faji obɔ̃, 21ni ebaa etsine akɛ ena ŋmaa fufuji ni jɛɔ niiatsɛ lɛ okplɔ̃ lɛ nɔ shwieɔ shi lɛ eye; shi gbei tete baa balɛmɔ̃ɔ efaji lɛ anɔ. 22Ni ohiafo lɛ bagbo, ni ŋwɛi bɔfoi bawo lɛ kɛtee Abraham mlishi; ni niiatsɛ lɛ hu bagbo ni afu lɛ. 23Ni be ni eyɔɔ hejaramɔi amli yɛ gbohiiaje ni eyaawo ehiɛ nɔ lɛ, ena Abraham yɛ shɔŋŋ, kɛ Lazaro ni hɔ emlishi. 24Ni ebo ekɛɛ, ‘Ataa Abraham, naa mi mɔbɔ ni otsu Lazaro ni ekɛ ewao naa ayatsɔ nu mli ni ekɛbajɔɔ mililɛi he, ejaakɛ miina nɔ yɛ lalilɛii nɛɛ amli!’ 25Shi Abraham kɛɛ, ‘Mibi, kaimɔ akɛ bo lɛ oye ejurɔ yɛ owalabe mli, shi Lazaro na nɔ; shi agbɛnɛ aashɛje emii yɛ biɛ, ni bo lɛ, aapiŋ bo. 26Ni enɛɛmɛi fɛɛ sɛɛ hu lɛ, jɔɔ kpeteŋkple ko kã wɔ kɛ nyɛ teŋ, koni mɛi ni taoɔ ajɛ biɛ aya nyɛŋɔɔ lɛ akanyɛ, ni mɛi hu ni taoɔ ajɛ afoŋ kɛba wɔŋɔɔ lɛ akanyɛ.’ 27Shi niiatsɛ lɛ kɛɛ, ‘Belɛ miikpa bo fai mɔ, ataa, ni otsu lɛ mitsɛ we lɛ; 28ejaakɛ miyɛ nyɛmimɛi enumɔ, bɔ ni afee ni eyaye odase kɛbɔ amɛ kɔkɔ koni amɛ hu amɛkaba piŋmɔhe nɛɛ.’ 29#2 Tim 3.16 Ni Abraham kɛɛ lɛ akɛ, ‘Amɛyɛ Mose kɛ gbalɔi lɛ yɛ jɛi; amɛbo amɛ toi!’ 30Shi lɛ lɛ ekɛɛ, ‘Dabi, Ataa Abraham, shi kɛji mɔ ko jɛ gbohii ateŋ tee amɛŋɔɔ lɛ, no amɛaatsake amɛtsui.’ 31Shi Abraham kɛɛ lɛ akɛ, ‘Kɛ amɛbooo Mose kɛ gbalɔi lɛ toi lɛ, no lɛ kɛji mɔ ko te shi kɛjɛ gbohii ateŋ tete lɛ, amɛyiŋ tsɔŋ.’ ”
Pilihan Saat Ini:
Luka 16: NEGAB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Bible in Ga Language © Bible Society of Ghana, 2020.
