Génesis 7
7
Diluviu kanqan
1Tsaypitam Dios Yaya Noéta nirqan: <<Kanan tiempuchö llapan runakunapitam japallayki munanqänö kawaykanki. Tsaynö kawanqaykipitam warmikiwan tsurikikuna warmintin arcaman yaykuyanki. 2Püru kaq wätakunata#7.2 Püru kaq wätakunaqa Diosta adorar altarchö waykananpaq wätakunam kayarqan. Mayqan wätakuna püru kanqanta y impüru kanqanta musyanaykipaq liyinki Lev. 11.1-47; Deut. 14.3-20. qanchis chinata qanchis orquta arcaman yaykatsinki. Peru impüru kaqtam sïqa chinan orqullata yaykatsinki. 3Tsaynölla yaykatsinki qanchis chinan orqu llapan casta päriqkunata kay patsachö mana ushakäyänanpaq. 4Kananpita qanchis junaqtam chusku chunka (40) junaq chusku chunka paqas mana päraypa tamyatsimushaq. Tsay tamyawanmi kay patsachö llapan kawaq kaqkunata ushakätsishaq>>.
5Tsaymi Noéqa Dios Yaya ninqannölla llapanta rurarqan.
6Diluviu kanqan witsaymi Noéqa soqta pachak (600) watayuq kaykarqan. 7Diluviupita salvakäyänanpaqmi arcaman Noé yaykurqan warminwan, tsurinkunawan y llumtsuyninkunawanpis.#Mat. 24.38-39; Luc. 17.27. 8Tsaynöllam arcaman yaykuyarqan püru kaq y impüru kaq llapan casta wätakuna, päriqkuna y lätaypa puriqkunapis. 9Dios Yaya ninqannöllam tsay wätakunata chinan orquta Noé yaykatsirqan.
10Dios Yaya ninqannöllam qanchis junaqchö diluviu qallaykurqan. 11Tsay päsarqan wata qallanqanpita juk killa ushaskir chunka qanchis junaqmi. Tsay witsaymi Noé kaykarqan soqta pachak (600) watayuq. Patsa rurinpitam atska yaku pashtamurqan. Tsaynömi ciëluchö yakuta tsaparaykaq punkupis kichakarqan.#2Ped. 3.6. 12Tsaymi chusku chunka (40) paqas y chusku chunka junaq mana päraypa tamyamurqan.
13Tamya qallaykunqan junaqmi Noé kimsan tsurinkunawan arcaman yaykuyarqan. Tsurinkunapa shutinkunam karqan Sem, Cam y Jafet. Tsaynöllam kimsan llumtsuyninkunawan Noépa warminpis yaykuyarqan. 14Paykunawanmi yaykuyarqan tukuyläya chucaru wätakuna, manshu wätakuna, lätaypa puriqkuna y tukuyläya päriqkunapis. 15Tukuyläya wätakunatam arcaman Noé ishkay ishkay yaykatsirqan. 16Dios Yaya ninqannöllam cada casta chinan orqu wätakunata yaykatsirqan. Yaykuskiyaptinnam arcapa punkunta Dios Yaya wichqaskirqan.
17Tsaypitanam chusku chunka (40) junaq y chusku chunka (40) paqas mana päraypa tamyarqan. Tsaynö tamyar patsaman yaku juntarmi arcata wampütsir qallaykurqan. 18Tsaynö waran waran tamyar juntaptinmi arcaqa wampurnin pallarikarqan. 19Alläpa yaku juntarmi llapan kay patsachö jatusaq jirkakunatapis tsaparqan. 20Llapan altu jirkakunata tsapaskirpis qanchis metru mastaraqmi päsarqan.
21Tsaychömi llapan runakunapis, päriqkunapis, manshu kaq y chucaru kaq wätakunapis y lätaypa puriqkunapis shinqar wañuyarqan. 22Kay patsachö kawaqkunapis llapan shütaqkunam shinqar wañuyarqan. 23Arcaman Noéwan yaykuqkunallam salvakäyarqan. Mana yaykuq kaqmi sïqa runakunapis, wätakuna, päriq kaqkuna, lätaypa puriqkunapis llapan ushakäyarqan. 24Tsay yakum pachak pitsqa chunka (150) junaq kay patsata tsapararqan.
Pilihan Saat Ini:
Génesis 7: qxn
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2011, Wycliffe Bible Translators, Inc. All rights reserved.