Luka 18
18
Agole me Apuserut kede Ngangolkop
1Yesu di do oko tatamo ne josiao mege agole kame pwonyo gi be poore di kilego nakanaka abongo weko. 2En ewaco ne gi be, “Bin tie i bomba moro ngangolkop kalikame woro Rubanga, doko di likame eparo pi dano moro da. 3Apuserut moro bin tie i bomba nono, kame oudo wire but ngangolkop nono di ebako ne doge be, ‘Okwe konya kede ngat kame ango atie pido kede.’ 4Pi kare moro, ngangolkop nono oudo dagi winyo kop me apuserut nono; do i cen mere, en eko do yamo i cunye kene be, ‘Bed bala ango likame alworo Rubanga arabo aparo pi dano moro, 5do pi kite kame apuserut ni ocobuno ango kede, abino konye i pido mere. Pien ka li, wire mere buta bino oola.’ ”
6Di Rwot oko waco be, “Winyunu gikame ngangolkop kame li kede ateni waco. 7Wun iparunu be likame Rubanga bino ngolo kop kiber pi konyo jo mege kame en eyero, jo kame kok bute iceng kede iwor? Iparunu be eyaro gal kede konyo gi? 8Awaco ne wu be, eyaro ngolo kop kiber pi konyo gi awakawaka. Bed bala kamanono da, iparunu be ka Wot ka dano odwogo ebino udo yei tie i lobo?”
Agole me Ngaparisayo kede Ngarar Esolo
9Yesu di bobo oko waco agole ni ne jo kame bin genere ken gi be gin kipoore, di kicao jo icegun. 10En ewaco be, “Cuo are bin ooto i tempulo ilega, ngat acel kikom gi oudo Ngaparisayo, do ngat acel oudo ngarar esolo.
11“Ngaparisayo bin oyai malo di eko cungo, eko cako ilega eliling di ewaco be, ‘Rubanga, ango apwoyi, pien ango likame acal kede jo apat, bala joyak, jo kalikame timo gi me ateni, joadote, akadi bala ngarar esolo moroni. 12Ango akanyo kec tien are i sabiti acel, doko akwanyo irabu me acel me tomon me gi dedede kame ango audo.’
13“Do ngarar esolo nono oko gire cungo i tenge, di likame etingo akadi wange malo, en eko bapo kore di ewaco be, ‘Rubanga, Okwe kisa maki i koma, ango ngadubo!’
14 #
Matayo 23.12; Luka 14.11 “Awaco ne wu be, icuo noni ooto ture di kotere be epoore i nyim Rubanga do weko Ngaparisayo nono; pien ngat kame tingere kene kobino dwoke piny, do ngat kame mwolere kobino tinge malo.”
Yesu Omio Idwe Atino Winyo
(Matayo 19.13-15; Marako 10.13-16)
15Jo oko donyo kelo kiton imukerun but Yesu me wek eket cinge i kom gi. Kakame josiao oneno kede kamano, gin kiko cokocoko gi be kiweki. 16Do Yesu oko lwongo gi bute di eko waco be, “Wekunu idwe atino bin buta, kur igengunu gi; pien Ajakanut ka Rubanga tie pi jo kame cal bala gin. 17Ateteni awaco ne wu be, ngat kalikame gamo Ajakanut ka Rubanga bala atin atitidi, likame ebino donyo iye.”
Icuo Kobaro
(Matayo 19.16-30; Marako 10.17-31)
18Ngatel moro me Iyudayan oko penyo Yesu be, “Apwony Aber, atim nyo me wek aud kuo kame bedo nakanaka?”
19Yesu oko penye be, “Pinyo komio in ilwonga be ngat aber? Likame tie ngat aber kwanyo Rubanga kenekene. 20#Yai 20.12-16; Iswilia 5.16-20Mam in ingeo cik gi: ‘Kur itimo adote, Kur ineko, Kur ikwalo, Kur imio ijura me abe, Wor papa ni kede toto ni?’ ”
21En eko dwoko be, “Gigi dedede ango abedo lubo cako di pwodi ango atin awobi.”
22Kakame Yesu owinyo kede kamano, en eko waco ne be, “Tie pwodi gi acel korem ni; oti icat gi dedede kame in itie kede, iko popoko ne jocan sente kame iudo, di iko bino bedo kede abar i malo, di do iko bino luba.” 23Do kakame icuo nono owinyo kede kope nogi, cunye oko dubere; pien oudo ebaro twatwal.
24Yesu oko ngine di oko waco be, “Donyo i Ajakanut ka Rubanga tin tek benyo ne jo kobaro! 25Eyoyot ne aguragura donyo ki wang piso kalamo ngabar donyo i Ajakanut ka Rubanga.”
26Jo kame bin owinyo kope nogi oko penyo Yesu be, “Ngai do kame twero udo alako?”
27Do Yesu oko dwoko ne gi be, “Gi kalikame twerere kibut dano, twerere kibut Rubanga.”
28Di Petero oko waco ne be, “Neningo, wan otieko weko miere wa di oko lubi.”
29Di Yesu oko waco ne gi be, “Ateteni awaco ne wu be, likame tie ngat kame oweko ture, amotoko dako mere, arabo imiegu mege, arabo jonywal mege, akadi idwe mege da, pi Ajakanut ka Rubanga, 30kalikame bino udo atot kibut Rubanga i kare noni, kede eko bino udo kuo kame bedo nakanaka i kare koyaro bino.”
Yesu Owaco Kop me To mere Tien me Adek
(Matayo 20.17-19; Marako 10.32-34)
31Yesu oko tero josiao tomon kiwie are tenge kargi ken gi, di en eko waco ne gi be, “Winyunu, wan otienu ot Yerusalem, di gi dedede kame bin inabin owandiko i kom Wot ka dano ko bino cobere. 32Kobino jale i cing jo kalikame Iyudayan; di oko bino nyware, di oko timo ne tim me lewic, kede oko ngungulo lau i kome. 33Gin kibino dane di kiko neke da, do ingei ceng me adek, en ebino yaruno.”
34Do josiao mege likame oko niang gikame en ewaco akadi acel; pien oudo kokano dwong me kope nogi kibut gi, omio gin likame kiko niang gikame en ewaco.
Yesu Oyabo Wang Emuduk koudo Kware
(Matayo 20.29-34; Marako 10.46-52)
35Kakame Yesu onoko kede Jeriko, oudo icuo moro tie kuno kame wange oto, kame oudo tie bedo i nget yongayo di ekware. 36Kakame ewinyo kede ekodet di tie beo, en eko penyere pi mito ngeno gikame oudo tie timere.
37Gin kiko waco ne be, “Yesu me Nasaret en ino kame tie beo no.”
38En eko lwongere kede dwan amalo be, “Okwe Yesu Wot ka Daudi, mi kisa maki i koma!”
39Jo kame bin otelo yongayo oko retakino en be elingi; do en eko meede ameda kede lwongere di ewaco be, “Okwe Wot ka Daudi, mi kisa maki keda!”
40Yesu oko cungo di eko waco ne gi be kikel emuduk nono bute; kakame lonono onoke kede, en eko penye be, 41“Imito be atim ni nyo?”
En eko waco be, “Rwot, amito be wanga gei bobo neno.”
42Yesu oko waco ne be, “Wek wangi yabere, yei ni ocangi.”
43Cucuto nono di do ecako neno piny di eko lubo Yesu, di emio Rubanga deyo. Kakame ekodet oneno kede gino, kiko pako Rubanga.
Pilihan Saat Ini:
Luka 18: BILKDC13
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Baibuli I Leb Kumam © Bible Society of Uganda, 2013.
