GÉNESIS 13
13
Abrampish Lotpish ch'icanyashcami
1Abramca Egiptomantaca paipaj huarmindij, tucui imalla charishcacunandijmi, Neguevman huichiyarca. Lotpish paihuanmi huichiyarca. 2Abramca achca animalcunayuj, achca cullquiyuj, achca curiyuj yallitaj charijmi carca. 3Abramca Neguevmantaca asha asha caipi chaipi causashpami Bet-elcama rirca. Bet-elhuan, Haihuan chaupipi ñaupaman pai carpa huasita shayachishcallamantaj, 4Mandaj Diosta adorana altarta rurashcallamantaj chayashpami Mandaj Diosta chaipi adorashpa mañarca.
5Abramhuan rij Lotpish achca ovejacunata, achca vacacunata, achca gentecunatami charirca. 6Paicuna tandalla causanapajca allpaca mana pajtarcachu. Paicunaca ishquindijtaj yallitaj charijcuna cashcamantami shujllapica mana causai tucurcacuna. 7Abrampaj michijcunahuan, Lotpaj michijcunahuanca p'iñanacunatami callarircacuna. Chai punllacunaca chai llajtapica cananeocuna, ferezeocunami causacurca. 8Chaimi Abramca, Lottaca: “Ñucapish canpish familiapurallataj cashca jahua p'iñanacunaca mana allichu. Ñuca michijcunahuan, cambaj michijcunahuan p'iñanacunapish mana allichu. 9Cai tucui allpami cambaj ñaupajpi. Cunanca ñucamanta ch'icanyashpa richunmi rogani. Can lluqui maqui ladoman rijpica, ñucaca alli ladoman rishallami. Can alli maqui ladoman rijpica, ñucaca lluqui ladoman rishallami” nircami.
10Shina nijpi Lot ricushpaca Jordán yacu pambataca achca yacu regaricushcamanta Mandaj Diospaj huerta shinata, Zoar pueblo ch'imbapurapi caj Egipto llajta shina cajtami ricurca. Chai pambaca Sodoma, Gomorra pueblocunata Mandaj Dios manaraj chingachijpimi chashna carca. 11Chaimi Lotca, Jordán yacu tucui pambata paipaj cachun agllashpa, inti llujshin ladoman rirca. Chashnami caishujmanta chaishujmanta ch'icanyarcacuna. 12Abramca Canaanllapitajmi saquirirca. Ashtahuanpish Lotca pugru pambacunapi tiyaj pueblocunapimi causagrirca. Paica asha ashata causashpa rishpami Sodomaman chayagrirca. 13Sodomapi causajcunaca mana allita rurajcuna cashcamanta yallitaj millaillata rurashpa Mandaj Diosta p'iñachijcunami carca.
14Lot, Abrammanta ch'icanyashca q'uipami Mandaj Diosca, Abramtaca: “Cunanca can maipi cashcamanta uratapish, janajtapish, inti llujshin ladotapish, inti huashicun ladotapish alli ricui. 15Can maillata ricushca llajtacunataca canmanpish, cambaj huahua huahuacunamanpishmi huiñaipaj cusha. 16Cambaj huahua huahuacunataca ñutu allpa shina cachun achcatami mirachisha. Ñutu allpata maijanpish yupai tucujpica, cambaj huahua huahuacunatapish yupashcami canga. 17Jatari, tucui cai llajtataca largotapish, anchotapish purishpa ricui. Cai llajtataca canmanmi cuni” nirca.
18Chaimi Abramca, paipaj carpa huasita pascashpa apashpa rishpa Hebrón pueblo c'uchupi caj encina yuracuna tiyan allpapi causarca. Chai allpaca, Mamre runapajmi carca. Abramca Mandaj Diosta mañangapajmi chaipipish shuj altarta rurarca.
Pilihan Saat Ini:
GÉNESIS 13: QCHI04
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Quichua Chimborazo Bible Revision 2010 © United Bible Societies, 2010.