LUKE 24

Jesus Eset Ke Mkpa

(Mt 28.1-10; Mk 16.1-8; Jn 20.1-10)

1EDI ke akpa usen urua, ke ntuhube usenubɔk, mmɔ eda ufuɔŋkpɔ oro eketimde eka ke udi. 2Edi mmɔ ekut ete ema ekpat itiat ke udi esio. 3Ndien mmɔ eduk, edi ikwe okpo Ɔbɔŋ Jesus. 4Ekem nte esit otimerede mmɔ abaŋa ŋkpɔ emi, sese, owo iba emi esinede nsem-nsem ɔfɔŋidem eda mmɔ ke ŋkaŋ: 5ndien ke ini iban efehede ndik etuk iso ese isɔŋ, mmɔ oro edɔhɔ ete, Nsinam mbufo eyomde Enye emi odude uwem ke otu mme akpa-mkpa? 6Enye iduhe mi; Enye emeset; eti nte Enye eketiŋde ɔnɔ mbufo, ke ini Enye odude kaŋa ke Galilee, ete, 7Eyeda Eyen owo esin mme idiɔk owo ke ubɔk, eyenyuŋ ewot Enye ke cross, ndien ke ɔyɔhɔ usen ita Enye eyetɔŋɔ ntak eset. 8Ndien mmɔ eti ikɔ Esie, enyuŋ efiak ekpɔŋ udi eka ekebuk ofuri ŋkpɔ emi enɔ mbet duopekiet, 9ye kpukpru mmɔ eken. 10Iban emi edi Mary Magdalene ye Joanna, ye mary eka james; iban efen emi esaŋade ye mmɔ etiŋ mme ŋkpɔ emi enɔ mme apostle: 11edi mbuk mmɔ etie ke utɔŋ mmɔ oro nte ikpikpu nneme; mmɔ inyuŋ inimke mmɔ ke akpanikɔ.

12Edi Peter obumere adaha efehe aka udi; onyuŋ ɔnuhɔ okut ɔfɔŋ linen nte anade ke idem mmɔ; ntre ke enye afiak ɔnyɔŋ ufɔk eyik ke se ikotibede.

13Ekem sese, owo iba ke otu mmɔ esaŋa kpa ke usen oro eka obio-iŋwaŋ emi ekerede Emmaus, emi oyomde ye Jerusalem mile itiaba. 14Mmɔ enyuŋ eneme nneme ebaŋa kpukpru ŋkpɔ emi ekotibede. 15Edikem nte mmɔ enemede ntre ebup kiet eken mbume, Jesus ke Idem Esie asaŋa ekpere mmɔ onyuŋ asaŋa ye mmɔ. 16Edi ebɔp mmɔ enyin ete, ekudiɔŋɔ Enye. 17Ndien Enye ɔdɔhɔ mmɔ ete, Nso oruk nneme ke eneme ntem ke isaŋ mbufo? Ndien mmɔ etuak eda, enyuŋ etie mfuhɔ-mfuhɔ. 18Edi owo mmɔ kiet, emi ekerede Cleopas, ɔbɔrɔ Enye ete, Nte Afo kpɔt edi esen owo ke Jerusalem, ndien ufiɔkke se ikotibede do ke usen ifaŋ emi? 19Jesus ɔdɔhɔ mmɔ ete, Nso idi oro? Mmɔ edɔhɔ Enye, Se ibaŋade Jesus emi otode ke Nazareth, emi ekedide prophet eke enyenede odudu ke ubɔk-utom ye ke ikɔ-inua ke iso Abasi ye ke iso kpukpru mbio-obio: 20ye adaŋa nte ikpɔ oku ye mbon esop nnyin ekadade Enye enɔ ebierikpe ndiwot Enye, ye adaŋa nte mmɔ ekewotde Enye ke cross. 21Edi nnyin ikodori enyin ite edi Enye edifak Israel. Akan oro, emi edi ɔyɔhɔ usen ita nte ekanam mme ŋkpɔ emi ema. 22Edi ndusuk iban, emi edude ke otu nnyin, enam idem akpa nnyin: mmɔ ebak eka udi; 23ndien ke adaŋemi mikwe okpo Esie, mmɔ edi edidɔhɔ ete mme imɔ ikokut mme angel ke ŋkukut, emi edɔhɔde ete Enye ke odu uwem. 24Ndusuk mmɔ emi edude ye nnyin enyuŋ eka udi, ekut ŋkpɔ ntre kpa nte iban ekɔdɔhɔde, edi mmɔ ikwe Enye. 25Ekem Enye ɔdɔhɔ mmɔ ete, O mbon emi enanade ibuot, emi misɔpke ndinim kpukpru se mme prophet eketiŋde ke akpanikɔ. 26Nte inaŋa nte Christ okut mme ukut emi, ndien ebe oduk ke Ubɔŋ Esie? 27Ndien Enye ɔtɔŋɔ ke Moses ye kpukpru mme prophet asian se eketiŋde ebaŋa Enye ke Idem Esie ke ofuri Ŋwed Abasi ɔnɔ mmɔ. 28Edi mmɔ esaŋa ekpere obio-iŋwaŋ emi mmɔ ekade do. Ndien Enye anam nte ŋkpɔ eke enye oyomde ndibe ŋka iso. 29Edi mmɔ eyire Enye ete, Daŋ ye nnyin; koro ke ekpere mbubreyo, ndien eyo ɔmɔŋ okut. 30Enye oduk akadaŋ ye mmɔ Ekem ke ini Enye etiede ye mmɔ ke itie-udia, Enye emen uyo, ɔdiɔŋ, obuŋ, ayak ɔnɔ mmɔ. 31Enyin mmɔ etara, mmɔ enyuŋ ediɔŋɔ Enye; Enye onyuŋ osop mmɔ ke enyin. 32Ndien mmɔ edɔhɔ kiet eken ete, Nte esit ikofiopke nnyin, ke ini Enye enemede nneme ye nnyin ke usuŋ, onyuŋ asiakde ikɔ Abasi ɔnɔ nnyin? 33Ndien mmɔ edaha ke enyɔŋ kpa idaha oro, efiak enyɔŋɔ ke Jerusalem, enyuŋ ekut nte mbet duopekiet ebonode ɔtɔ kiet, ye mmɔ emi edude ye mmɔ; 34mmɔ oro enyuŋ edɔhɔ ete, Ɔbɔŋ emeset ke akpanikɔ, omonyuŋ owut Simon idem. 35Ekem mmɔ ebuk se ikotibede ke usuŋ, ye nte ekediɔŋɔde Enye, ke ini Enye obuŋde uyo.

Jesus Owut Mbet Esie Iba Idem

(Mt 28.16-20; Mk 16.14-18; Jn 20.19-23; Acts 1.6-8)

36Edi nte mmɔ etiŋde ŋkpɔ emi, Jesus ke Idem Esie ada ke ufɔt mmɔ, onyuŋ ɔdɔhɔ mmɔ ete, Emem akpakam odu ye mbufo. 37Edi mmɔ edikhe, enyuŋ efehe ndik, onyuŋ etie mmɔ nte mmɔ ke ekut spirit. 38Edi Enye ete mmɔ, Nsinam esit etimerede mbufo, nsinyuŋ inam iyihe otibede mbufo ke esit? 39Ese ubɔk ye ukot Mi, efiɔk ete edi Ami ke Idem Mi; efiɔŋɔ Mi, enyuŋ ese: koro spirit inyeneke obuk ye ɔkpɔ nte mbufo ekutde Ami nnyenede. 40Ndien ke Enye ama eketiŋ ntem, Enye owut mmɔ ubɔk ye ukot Esie. 41Edi ke adaŋemi idaresit miyakke mmɔ enim ke akpanikɔ, idem onyuŋ akpade mmɔ, Enye ɔdɔhɔ mmɔ ete, Nte mbufo emenyene se owo adiade mi? 42Ndien enɔ Enye ibio; ofɔp iyak. 43Enye ɔbɔ ata ke iso mmɔ.

44Enye onyuŋ ɔdɔhɔ mmɔ ete, Emi edi ikɔ eke ŋketiŋde ye mbufo, ke adaŋemi ŋkodude ye mbufo; nte kpukpru se ekewetde ebaŋa Mi ke ibet Moses ye mme prophet ye mme psalm enyene ndisu. 45Ndien Enye aŋwaŋare mmɔ ikike, man mmɔ efiɔk ikɔ Abasi; 46Enye onyuŋ ɔdɔhɔ mmɔ ete, Ekewet ntem, ete Christ enyene ndikpa, ndinyuŋ ntɔŋɔ ntak nset ke mkpa ke ɔyɔhɔ usen ita: 47enyuŋ enyene nditɔŋɔ ke Jerusalem ŋkwɔrɔ erikabare esit ye erifen mme idiɔk-ŋkpɔ ke enyiŋ Esie nnɔ kpukpru mme idut. 48Mbufo edi mme ntiense ŋkpɔ emi. 49Sese, nyenyuŋ ndɔŋ uŋwɔŋɔ emi Ete Mi ɔkɔŋwɔŋɔde etiene mufo: edi etie ke obio ebet tutu esine mbufo odudu emi otode ke enyɔŋ.

Emen Jesus Edɔk

(Mk 16.19-20; Acts 1.9-11)

50Ndien Enye ada mmɔ ɔwɔrɔ tutu osim Bethany: ndien Enye emenere ubɔk Esie ke enyɔŋ ɔdiɔŋ mmɔ. 51Edikem, nte Enye ɔdiɔŋde mmɔ Enye adianare ye mmɔ, enyuŋ emen Enye edɔk eduk ke heaven. 52Ndien mmɔ etuak ibuot enɔ Enye, enyuŋ efiak enyɔŋɔ ke Jerusalem ye akwa idara: 53mmɔ enyuŋ edu ke temple kpukpru ini, enɔ Abasi itoro.

Pilihan Saat Ini:

LUKE 24: ENA

Sorotan

Berbagi

Salin