JOHN 18

Mbon Ekɔŋ Emum Jesus

(Mt 26.47-56; Mk 14.43-50; Lk 22.47-53)

1KE Jesus ama eketiŋ ikɔ emi, Enye asaŋa ye mbet Esie ɔwɔrɔ ekebe ke ɔwɔwɔ Kidron, okosim ebiet emi iŋwaŋ mfri odude; ndien Enye oduk ke esit ye mbet Esie. 2Judas ŋko-ŋko, emi adade Enye ɔnɔ, ɔfiɔk ebiet oro: koro Jesus awakde ndika do ye mbet Esie. 3Mmɔdo ke ini Judas ama ɔkɔbɔ udim mbonekɔŋ ye mme asaŋutom ke ubɔk ikpɔ oku ye mme Pharisee, enye asaŋa ye utuenkaŋ ye nsaraŋikaŋ ye ŋkpɔ eŋwan edi ke ɔtɔ oro. 4Sia Jesus ɔfiɔkde kpukpru se iyomde ndisim Enye, Enye ɔwɔrɔ edi, edibup mmɔ, Mbufo eyom anie? 5Mmɔ ebɔrɔ enye ete, Iyom Jesus-a-Nazareth. Jesus ete mmɔ, Ami ndi Enye. Judas ŋko, emi adade Enye ɔnɔ, mɔdo, ada ye mmɔ. 6Ntem ke ini Jesus ɔdɔhɔde mmɔ ete, Ami ndi Enye, mmɔ ekibe efiak edem ekeduɔŋɔ ke isɔŋ. 7Ntre ke Jesus ɔtɔŋɔ ntak obup mmɔ ete, Mbufo eyom anie? 8Mmɔ ete, Iyom Jesus-a-Nazareth. Jesus ɔbɔrɔ ete, Mmɔdɔdɔhɔ mbufo nte, Ami ndi Enye. Ntem edieke mbufo eyomde Mi, eyak mmɔ emi enyɔŋɔ eke mmɔ. 9Enye eketiŋ ntem man ɔwɔrɔ osu nte enye ɔkɔdɔhɔde ete, Baba kiet ke otu mmɔ emi Afo ɔkɔnɔde Mi ikatakke Mi. 10Ekem Simon Peter emi akamade ofut adabare enye ekpi ofin akwa oku, onyuŋ osibe enye utɔŋ nnasia. Enyiŋ owo oro ekere Malchus. 11Jesus ete Peter, Sin ofut ke efɔk; nte ndiŋwɔŋke cup emi Ete Mi ɔkɔnɔde Mi?

12Ntre ke udim oro ye akamba etubom mmɔ ye mme asaŋutom mme Jew emum Jesus ebɔp, 13eda Enye ebem iso eka ke ɔtɔ Annas; koro enye edi ete ŋwan Caiaphas, emi edide akwa oku ke isua oro. 14Caiaphas edi owo emi ɔkɔnɔde mme Jew item ete, Ɔfɔn owo kiet ndikpa ke ibuot mbio-obio.

15Simon Peter etiene Jesus, mbet efen onyuŋ anam kpa ntre. Mbet oro edi owo emi akwa oku ɔdiɔŋɔde, enye onyuŋ asaŋa ye Jesus oduk ke esit okure akwa oku: edi Peter ada ke inua-otop ke aŋwa. 16Ntre ke mbet eken oro akwa oku ɔdiɔŋɔde ɔwɔrɔ eketiŋ ŋkpo ye ŋwan emi etiede usuŋ, onyuŋ ada Peter oduk. 17Ntem ke eyen-aŋwan emi etiede usuŋ obup Peter ete, Nte afo nde edi kiet ke otu mbet owo emi? Peter ete, Ndige. 18Ndien ikɔt ufɔk ye mme asaŋutom eda ke ɔtɔ oro: ekabara ikaŋ ukaŋ, koro etuebede, mmɔ enyuŋ ewebe ikaŋ; Peter onyuŋ ada do ye mmɔ ewebe ikaŋ.

19Ntre ke akwa oku obup Jesus abaŋa mbet Esie ye se Enye ekpepde owo. 20Jesus ɔbɔrɔ enye ete, Ami ŋketetiŋ ŋkpɔ nnɔ ererimbot aŋwa-aŋwa; ŋkɔnɔ ukpep-ŋkpɔ kpukpru ini ke synagogue ye ke temple, emi kpukpru mme Jew ekam edide edisobo do; ŋkonyuŋ ntiŋke baba ŋkpɔ kiet ke ndibe. Nsinam obupde Mi? 21Bup mmɔ emi ekopde ikɔ Mi, mme ntiŋ nso nnɔ mmɔ. Sese, mmɔ efiɔk se nsitiŋde. 22Ndien ke ini Enye ɔdɔhɔde ntem, asaŋutom kiet emi adade ŋkpet-ŋkpet, oyibi Jesus ufia, ete, Nte ɔbɔrɔ akwa oku ikɔ ntre? 23Jesus ɔbɔrɔ enye ete, Edieke ŋketiŋde se idiɔkde, wut idiɔk oro: edi edieke ŋketiŋde se inende, nsinam oyibide Mi? 24Ntre ke Annas ɔnɔ Enye ye uruk eda esɔk Caiaphas akwa oku.

25Edi Simon Peter osuk adada do ewebe ikaŋ. Ntre ke mmɔ ebup enye ete, Nte afo nde edi owo kiet ke otu mbet Esie? Enye akaŋ ete, Ndige. 26Ofin akwa oku kiet, emi edide iman owo emi Peter okosibede enye utɔŋ, ete enye, Nte ŋkekwe fi ye Enye ke iŋwaŋ mfri? 27Peter ɔtɔŋɔ ntak akaŋ: ndien idaha oro ekikɔ ɔkpok.

28Ntem ke mmɔ eda Jesus ewɔrɔ ekpɔŋ Caiaphas, eka ke ufɔk andikara. Eyo ama esiere. Mmɔ ke idem mmɔ inyuŋ idukke ufɔk andikara mbak edisabare idem, ete idia passover. 29Ndien Pilate ɔwɔrɔ edisobo ye mmɔ, onyuŋ obup ete, Mbufo etiŋ nso edian owo emi? 30Mmɔ ɔbɔrɔ enye ete, Edieke owo emi mikpedige anam-idiɔk, nnyin ikpadaha Enye idisin fi ke ubɔk. 31Ntre ke Pilate ete mmɔ, Eda Enye ke idem mbufo ekekpe ikpe Esie, nte ibet mbufo asaŋade. Mme Jew ete enye, Nnyin inyeneke unen ndiwot owo; 32man ikɔ nte Jesus eketiŋde owut oruk mkpa eke Enye edikpade osu.

33Mmɔdo Pilate ɔtɔŋɔ ntak oduk ufɔk, onyuŋ okot Jesus, obup Enye ete, Nte afo edi edidem mme Jew? 34Jesus ɔbɔrɔ ete, Nte afo etiŋ emi ke idem fo; mme mmɔ efen etiŋ emi enɔ fi ebaŋa Mi? 35Pilate ɔbɔrɔ ete, Nte ndi Jew? Ikɔt Fo ye ikpɔ oku ekada Fi esin mi ke ubɔk: akanam nso? 36Jesus ɔbɔrɔ ete, Obio Ubɔŋ Mi idige eke ererimbot emi: edieke Obio Ubɔŋ Mi ekpedide eke ererimbot emi, ikɔt Mi ekpe-ŋwana eŋwan, mbak ediyak Mi esin mme Jew ke ubɔk: edi Obio Ubɔŋ Mi itoho do. 37Ntem Pilate obup Enye ete, Nte Afo edi edidem naŋa? Jesus ɔbɔrɔ ete, Omotim etiŋ ete ndi Edidem. Nkamana kabaŋa ntak emi, ŋkonyuŋ nduk ke ererimbot kabaŋa ŋkpɔ emi, man ndi ntiense nnɔ akpanikɔ. Kpukpru mmɔ eke edide eke akpanikɔ, ekop uyo Mi. 38Pilate ete Enye, Nsidi akpanikɔ?

Ndien ke enye ama eketiŋ ntem, enye ɔtɔŋɔ ntak ɔwɔrɔ etiene mme Jew, ɔkɔdɔhɔ mmɔ ete, Ami ŋkwe Enye idiɔk ke idem. 39Edi mbufo emenyene ido, ete nsana owo kiet nyak nnɔ mbufo ke passover. Nte eyoyom nsana naŋa Edidem mme Jew nyak nnɔ mbufo? 40Mmɔ etɔŋɔ ntak efiori ete, Nnyin iyomke owo emi; iyom Barabbas. Ndien Barabbas edi owo ŋwo.

Pilihan Saat Ini:

JOHN 18: ENA

Sorotan

Berbagi

Salin