UTOM MME APOSTLE 7
7
Ikɔ Emi Stephen Eketiŋde
1NDIEN akwa oku obup ete, Nte mme ŋkpɔ emi edi ntre?
2Ndien Stephen ɔdɔhɔ ete,
Nditɔ-ete ye mme ete, ekpaŋ utɔŋ. Abasi emi enyenede ubɔŋ owut ete nnyin Abraham Idem Esie, ke ini enye odude ke Mesopotamia, ke enye miduŋke ke Haran kaŋa; 3onyuŋ ɔdɔhɔ enye ete, Nam daha ke isɔŋ emana fo ye oruk fo, nyuŋ di ke isɔŋ eke ndiwutde fi. 4Ndien enye ɔwɔrɔ ke isɔŋ mme Chaldean edi ediduŋ ke Haran: ndien ke ini ete esie ama akakpa, Abasi osio enye do, ada enye edi ke isɔŋ emi mbufo eduŋde ke esit ke emi: 5edi inɔŋɔ enye udeme do, inɔŋɔ enye baba ɔtɔ kiet nte enye esinde ikpat ke esit: edi ɔŋwɔŋɔ ete, Imɔ iyeda isɔŋ oro inɔ enye enyene, ye ubon esie eke editienede ke edem, kpa ke ini enye mika-inyeneke kaŋa eyen. 6Abasi onyuŋ ɔdɔhɔ ntem, ete, ubon esie eyeduŋ ke esen idut, mmɔ oro eyenyuŋ esin mmɔ ke ufin, enyuŋ efik mmɔ ke isua ikie inaŋ. 7Abasi onyuŋ ɔdɔhɔ ete, Nyekpe ikpe ye idut oro mmɔ edukde ufin enɔ mmɔ: ndien oro ama ebe, mmɔ eyewɔrɔ edinam ŋkpɔ enɔ Mi ke ebiet emi. 8Abasi onyuŋ ɔnɔ enye ediomi mbobi: ntre ke Abraham obon Isaac, onyuŋ onim enye mbobi ke ɔyɔhɔ usen itiaita; Isaac onyuŋ obon Jacob, Jacob onyuŋ obon ikpɔ mme ete nnyin duopeba. 9Ndien ikpɔ mme ete nnyin efibe Joseph ufup, enyam enye enɔ edika Egypt: 10edi Abasi odu ye enye, onyuŋ anyaŋa enye osio ke kpukpru ukut esie, onyuŋ ɔnɔ enye mfɔn-iso ke iso Pharaoh edidem Egypt, onyuŋ anam enye ɔwɔrɔ ɔniɔŋ; Pharaoh onyuŋ onim enye ke andikara Egypt ye ofuri ufɔk esie. 11Edikem akaŋ ye akwa ukut oduk ke ofuri isɔŋ Egypt ye Canaan: ndien mme ete nnyin ikwe se ediade. 12Edi ke ini Jacob okopde ete ibotkpot mmɔ ke Egypt, enye osio mme ete nnyin ɔdɔŋ ke akpa ini. 13Ndien ke utɔŋɔ-ntak ini Joseph ayarare idem ɔnɔ nditɔ-ete esie; Pharaoh onyuŋ ɔfiɔk oruk Joseph. 14Ndien Joseph ɔdɔŋ ekekot Jacob ete esie, ye kpukpru ubon esie, ete enyɔŋɔ etiene imɔ; mmɔ edi owo ata ye efut. 15Ekem Jacob ɔsuhɔre aka ke Egypt; enye onyuŋ akpa do, ye mme ete nnyin; 16ndien eda mmɔ edi ke Shechem edibuk ke udi oro Abraham akadade silver edep ye nditɔ Hamor ke Shechem. 17Edi ke adaŋemi ini emi Abasi ɔkɔŋwɔŋɔde ɔnɔ Abraham ekperede, nditɔ Israel etɔt enyuŋ ewak eti-eti ke Egypt, 18tutu edidem efen, emi mifiɔkke Joseph, adaha ada ke Egypt. 19Enye anam ŋkpɔ ŋkari-ŋkari ye oruk nnyin, onyuŋ ɔsɔŋ ido ye mme ete nnyin, ete mmɔ eduɔŋɔ nsek-nditɔ mmɔ, man nditɔ oro ekudu uwem. 20Ke ini oro Moses amana, enye onyuŋ eye eti-eti: enyuŋ ebɔk enye ke ɔfiɔŋ ita ke ufɔk ete esie: 21edi ke ini eduɔkde enye, eyen Pharaoh aŋwan emen enye ɔbɔk akama nte eyen idem esie. 22Ndien ekpep Moses ofuri ifiɔk nditɔ Egypt; enye onyuŋ edi ɔkpɔsɔŋ owo ke ikɔ-inua ye ke ubɔk-utom. 23Edi ke ini enye ekperede ndisim isua aba, ɔdɔŋ enye ndika ŋkese nditɔ-ete esie, nditɔ Israel. 24Ndien ke adaŋemi enye okutde nte ekande owo mmɔ kiet ubɔk, enye ada ye owo oro, ɔtɔ eyen Egypt ɔduɔk, osio usiene ɔnɔ owo oro efikde: 25enye onyuŋ abat ete nditɔ-ete imɔ eyekut, ete Abasi ke ada ubɔk imɔ ɔnɔ mmɔ erinyaŋa; edi mmɔ ikwe. 26Ke usen eŋwen ŋko, enye ɔbiɔŋɔre owo iba ke iso nte mmɔ eŋwanade eŋwan, ndien ɔdɔŋ enye ndinam mmɔ etɔŋɔ ntak etie ke emem; ntre ke enye ete, Mbufo edi nditɔ-ete; nsinam mbufo enamde kiet eken se mifɔnke? 27Edi enye emi ɔdiɔkde ndinam ye mbɔhiduŋ esie onuk Moses efep, ete enye, Anie odori fi ete edi andikara ye ebierikpe ɔnɔ nnyin? 28Nte oyom ndiwot mi nte okowotde eyen Egypt mkpɔŋ? 29Edi ke ini Moses okopde ikɔ oro, enye efehe okoduŋ ke isɔŋ Midian, onyuŋ obon nditɔ iren iba do. 30Ndien ke isua aba ema ekebe, angel owut enye idem ke desert Obot Sinai ke edeme ikaŋ ke eto. 31Edi ke adaŋemi Moses okutde ŋkukut emi, idem akpa enye: ndien nte enye asaŋade ekpere ete ise, uyo Jehovah osim enye, ete, 32Ami ndi Abasi mme ete fo, Abasi Abraham, ye eke Isaac, ye eke Jacob. Edi idem enyek Moses, enye inyuŋ idehede ise ŋkukut oro. 33Edi Jehovah ɔdɔhɔ enye ete, Sio ikpa-ukot fo ke ukot fo fep: koro ɔtɔ oro afo adade ke esit edi edisana isɔŋ. 34Mmotim ŋkut utuk ikɔt Mi emi edude ke Egypt, mmonyuŋ ŋkop mmum mmɔ, mmonyuŋ nsuhɔre ndisio mmɔ ke ukut: di ndien, nyedɔŋ fi utom ke Egypt. 35Moses emi mmɔ ekesinde, ete, Anie odori fi ete edi andikara ye ebierikpe? kpa enye ke Abasi ɔdɔŋ ete ada ubɔk angel oro okowutde enye idem ke eto edi andikara ye andinyaŋa. 36Owo emi ada mmɔ ɔwɔrɔ, ke ama akanam mme utibe-ŋkpɔ ye mme idiɔŋɔ ke Egypt ye ke Ididuot Inyaŋ, ye ke desert ke isua aba. 37Emi edi Moses oro ɔkɔdɔhɔde nditɔ Israel ete, Abasi eyenam prophet, emi edibietde mi, adaha ada ɔnɔ mbufo ke otu nditɔ-ete mbufo. 38Enye edi owo oro asaŋade ye angel emi ekenemede nneme ye enye ke Obot Sinai odu ke esop ke desert ye mme ete nnyin: enye onyuŋ ɔbɔ mme odu-uwem ikɔ ɔsɔk nnyin: 39Edi mme ete nnyin inyimeke ndisuk ibuot nnɔ enye, edi enuk enye efep ɔkpɔŋ mmɔ, ewɔŋɔre efiak eka Egypt ke esit mmɔ, enyuŋ edɔhɔ Aaron ete, 40Bot mme abasi eke edibemde nnyin iso nɔ nnyin: koro ama edi Moses emi, emi akadade nnyin ɔwɔrɔ ke isɔŋ Egypt, nnyin ifiɔkke se itibede ye enye. 41Ntre ke mmɔ ebot eyen-enaŋ ke mme usen oro, enyuŋ eda uwa esɔk idem oro, enyuŋ edat esit ke utom ubɔk mmɔ. 42Edi Abasi ɔwɔŋɔre ɔkpɔŋ mmɔ, onyuŋ asana mmɔ ayak ete, enam ŋkpɔ enɔ udim enyɔŋ: kpa nte ewetde ke ŋwed mme prophet, ete,
Nte mbufo ekeda unam eke ewotde ye uwa esɔk Mi
Ke isua aba ke desert, O ufɔk Israel?
43Mbufo ekebiom ataya Moloch,
Ye ntantafiɔŋ abasi emi ekerede Rephan;
Mme mbiet eke mbufo ekebotde enim ndituak ibuot nnɔ mmɔ;
Ndien nyetaŋ mbufo mfep nnim ke edem Babylon oko.
44Mme ete nnyin ekenyene ataya ŋkpɔ-ntiense ke desert, kpa nte Enye emi eketiŋde ikɔ ye Moses etemede enye ete, anam esin ke mbiet oro enye okokutde. 45Mme ete nnyin ŋko eda ataya emi esaŋa ye Joshua eduk, ke ini mmɔ edade isɔŋ mme idut, emi Abasi ebinde osio ke iso mme ete nnyin, enyene, tutu osim eyo David: 46emi okutde mfɔn-iso ke iso Abasi, onyuŋ ebeŋede, ete eyak imɔ ikut ebiet iduŋ inɔ Abasi Jacob. 47Edi Solomon ɔbɔp ufɔk ɔnɔ Enye. 48Edi Ata Edikoŋ iduŋke ke mme ufɔk eke edade ubɔk ebɔp nte prophet ɔdɔhɔde ete,
49Enyɔŋ edi ebekpo Mi,
Isɔŋ onyuŋ edi udorukot Mi:
Jehovah ete, nso oruk ufɔk ke mbufo edibɔp enɔ Mi?
Mme nso ebiet ke mbufo edinim ke itie nduɔk-odudu Mi?
50Nte idige ubɔk Mi akanam kpukpru ŋkpɔ emi?
51Mbufo mbon nsɔŋ-ibuot, emi minaŋa mbobi ke esit ye utɔŋ, mbufo etak ndiŋwaŋwana ye Edisana Spirit kpukpru ini: nte mme ete mbufo ekenamde kpa ntre ke mbufo enam. 52Ewe prophet ke mme ete mbufo mikɔkɔbɔke? Mmɔ ekenyuŋ ewot mmɔ eke ebemde iso ekwɔrɔ ete, Ata Edinen eyedi; ndien ke emi mbufo emenyuŋ ekabare edi mme andida Enye nnɔ ye mme andiwot Enye; 53mbufo emi ekebɔde ibet ke ubɔk mme angel, ndien minimke enye.
54Edi ke adaŋemi mmɔ ekopde ŋkpɔ emi, esit ofut mmɔ eti-eti, mmɔ enyuŋ eta edet ese enye. 55Edi Stephen ye uyɔhɔ Edisana Spirit owuk enyin ese enyɔŋ, okut ubɔŋ Abasi, 56ye Jesus nte adade ke ubɔk nnasia Abasi, onyuŋ ɔdɔhɔ ete, Sese, mmokut heaven nte anade iŋwaŋ, mmonyuŋ ŋkut Eyen Owo nte adade ke ubɔk nnasia Abasi. 57Edi mmɔ efiori ke ɔkpɔsɔŋ uyo, esiri utɔŋ, ebumere ye esit kiet ekefuk enye; 58ndien mmɔ ebin enye esio ke obio, enyuŋ etɔŋɔ enye ke itiat: mme ntiense enyuŋ enim ɔfɔŋidem mmɔ ke ukot akparawa kiet emi ekerede Saul. 59Ndien mmɔ etɔŋɔ Stephen ke itiat, nte enye esemede okot Ɔbɔŋ, ete Ɔbɔŋ Jesus, bɔ ukpɔŋ mi. 60Enye onyuŋ ɔtɔnɔ edɔŋ, ofiori ke ɔkpɔsɔŋ uyo ete, Ɔbɔŋ, kuda idiɔk-ŋkpɔ emi udori mmɔ. Ndien ke ama eketiŋ ntre, enye ede.
Pilihan Saat Ini:
UTOM MME APOSTLE 7: ENA
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Efik Old Bible With Sectional Headings © Bible Society of Nigeria, 2013, 2019.
