UTOM MME APOSTLE 5
5
Mbuk Ananias Ye Sapphira Aŋwan Esie Sapphira
1EDI owo kiet emi ekerede Ananias, ye Sapphira ŋwan esie, 2anyam se mmɔ enyenede, omum ubak okuk akama, ŋwan esie ke odu; ndien enye ada ubak okuk edinim mme apostle ke ukot. 3Edi Peter ete, Ananias, nsinam Satan ɔyɔhɔde fi esit, esin osu nsu ɔnɔ Edisana Spirit, omum ubak okuk iŋwaŋ akama? 4Ke ini iŋwaŋ akanade do, nte idige okuo? Kpa ke ini ama akanyam enye, nte okuk esie iduhe fi ke ubɔk ndida nnam nte amade? Anam didie ekere ke esit fo ndinam oruk ŋkpɔ emi? Usuhu nsu unɔ owo, osu ɔnɔ Abasi. 5Ke ini Ananias okopde ikɔ emi, enye ɔduɔ ke isɔŋ, akpa. Akwa ndik onyuŋ omum kpukpru mmɔ emi ekopde ŋkpɔ emi. 6Ndien mkparawa edaha ke enyɔŋ eda ɔfɔŋ ewaŋ enye, emen enye ewɔrɔ ekebuk.
7Ekem ke hour ita ema ekebe, ŋwan esie oduk edi, ifiɔkke se ikotibede. 8Edi Peter ɔbɔrɔ enye ete, Sian mi, mme mbufo ekenyam iŋwaŋ ebɔ ibat okuk emi? Enye onyime ete, Ikɔbɔ adaŋa oro. 9Edi peter ɔbɔrɔ enye ete, Anam didie mbufo edukde ediomi ndidomo Spirit Jehovah nse? sese, ukot owo emi ekobukde uberi eda ke enyin-usuŋ, mmɔ eyenyuŋ emen fi ewɔrɔ. 10Ndien idaha oro enye ɔduɔ ke ukot Peter, akpa: ndien mkparawa eduk edi edikut ete enye akpa, mmɔ enyuŋ emen enye ewɔrɔ ekebuk ke ŋkaŋ ebe esie. 11Ndien akwa ndik odoro ofuri ufɔk Abasi, ye kpukpru owo eke ekopde ŋkpɔ emi.
12Edi Abasi ada ubɔk mme apostle anam ediwak idiɔŋɔ ye utibe-ŋkpɔ ke otu mbio-obio: kpukrpu mmɔ enyuŋ ebono ye esit kiet ke Etehe Solomon. 13Edi baba owo kiet ke otu mmɔ eken idehede idian idem ye mmɔ: edi mbio-obio etoro mmɔ; 14ndien mmɔ eke enimde ke akpanikɔ ediana ye Ɔbɔŋ edɔdiɔŋ ewak, mme otu owo, iren ye iban; 15tutu mmɔ emen mbon udɔŋɔ ewɔŋɔ edinim ke mbri ye ke mkpana ke efak, man ekpedi mfut Peter ɔduɔ ndusuk mmɔ ke idem, ke adaŋemi enye asaŋade ebe. 16Mme otu owo enyuŋ eto ke mme obio emi ekande Jerusalem ekuk, eda mbon udɔŋɔ edi, ye mmɔ emi ndidehe spirit etuhɔde: ndien enam udɔŋɔ okure kpukpru mmɔ.
17Edi akwa oku adaha ke enyɔŋ, ye kpukpru mmɔ emi edude ye enye (mmɔ edi ŋka Saducee), ufup onyuŋ ɔyɔhɔ mmɔ esit; 18ndien mmɔ emum mme apostle, esin mmɔ ke ufɔk-ŋkpɔkɔbi. 19Edi ke okoneyo angel Ɔbɔŋ eberede usuŋ ufɔk-ŋkpɔkɔbi, ada mmɔ ɔwɔrɔ, ete, 20Eka ekeda ke temple, etiŋ kpukpru ikɔ Uwem emi enɔ mbio-obio. 21Ndien ke ini mmɔ ekopde, mmɔ eduk ke temple ke usiere-usen, enyuŋ ekpep mme owo ŋkpɔ. Edi akwa oku edi, ye mmɔ emi edude ye enye, edikot akwa esop ye kpukpru mbiowo nditɔ Israel obon ɔtɔ kiet, onyuŋ ɔdɔŋ eka ke ufɔk-ŋkpɔkɔbi ekada mmɔ oro edi. 22Edi mme isuŋutom eke ekade ikwe mmɔ ke ufɔk-ŋkpɔkɔbi; ntre ke mmɔ efiak edi edidɔhɔ ete, 23Imokut ite etim ekɔbi ufɔk-ŋkpɔkɔbi, imonyuŋ ikut mme andikpeme edade ke usuŋ: edi ke adaŋemi nnyin ibererede, ikwe baba owo kiet ke esit. 24Ekem ke ini etubom temple ye ikpɔ oku ekopde ikɔ emi, esit otimere mmɔ eti-eti, ete mme ŋkpɔ emi ediwɔrɔ didie? 25Edi owo kiet edi edidɔhɔ mmɔ ete, Sese, mme owo emi mbufo ekesinde ke ufɔk-ŋkpɔkɔbi mmɔ ke temple, ke eda ekpep mbio-obio ŋkpɔ. 26Ekem etubom temple ye mme isuŋutom eka ekeda mmɔ edi, edi idige ke ɔkpɔsɔŋ ubɔk; koro mmɔ efehede, mbak mbio-obio editɔŋɔ mmɔ ke itiat. 27Edi ke ini edade mmɔ edi, enam mmɔ eda ke iso esop. 28Ndien akwa oku obup mmɔ ete, Nnyin ima isɔŋ uyo ikpan mbufo, ite ekukpep aba ŋkpɔ ke enyiŋ emi: ndien sese, emɔyɔhɔ Jerusalem ye ukpep-ŋkpɔ mbufo, enyuŋ eyom iyip owo emi ɔkɔbɔ nnyin. 29Edi Peter ye mme apostle ebɔrɔ ete, Nnyin inyene ndikop uyo Abasi ŋkan uyo owo. 30Abasi mme ete nnyin akanam Jesus, emi mbufo ekekɔŋde ke cross ewot, eset ke mkpa. 31Abasi akada ubɔk nnasia, Esie emenere Enye onim ke enyɔŋ, ete edi Ɔbɔŋ ye Andinyaŋa, man Enye ɔnɔ Israel erikabare esit, ye erifen mme idiɔk-ŋkpɔ. 32Nnyin inyuŋ idi mme ntiense ŋkpɔ emi: Edisana Spirit, emi Abasi ɔnɔde mmɔ emi ekopde uyo Esie, onyuŋ edi ntiense ŋko.
33Edi ke ini mmɔ ekopde ikɔ emi, esit ofut mmɔ eti-eti, mmɔ enyuŋ eyom ndiwot mmɔ oro. 34Edi owo kiet adaha ke enyɔŋ ke esop (enye edi Pharisee, emi ekerede Gamaliel, ekpep-ibet, emi kpukpru mbio-obio ekponode), onyuŋ ɔnɔ uyo ete, Enam mmɔ oro ewɔŋɔ kaŋa. 35Ndien enye ɔdɔhɔ mmɔ ete, Mbufo mbon Israel, ekpeme se mbufo eyomde ndinam ye mmɔ emi. 36Koro tutuko Theudas adaha ada, owut idem ete imɔ idi akamba owo; owo ekpere ikie inaŋ enyuŋ edian idem ye enye; edi ewot enye; kpukpru mmɔ eke eketinede enye esuana, esobo. 37Ke owo emi ama ekebe efep, Judas eyen Galilee adaha ada ini oro ewetde enyiŋ mbio-obio esin ke ŋwed, onyuŋ odudi ndusuk owo ada. Enye nde atak, kpukpru mmɔ eke etienede enye enyuŋ esuana. 38Ndien ke emi nnɔ mbufo uyo nte, Edianare ekpɔŋ mmɔ emi, esana mmɔ eyak: koro edieke odu emi mme utom emi otode owo, eyewure: 39edi edieke otode Abasi, mbufo idikemeke ndiwuri mmɔ; mbak mbufo edikut idem nte eŋwanade ye Abasi. 40Ndien mmɔ enyime ndikop uyo esie: enyuŋ ekot mme apostle edi, enyuŋ emia mmɔ, enyuŋ ewuk mmɔ ete, ekutiŋ ikɔ ke enyiŋ Jesus, enyuŋ eyak mmɔ enyɔŋɔ. 41Ntre ke mmɔ oro ewɔrɔ ekpɔŋ esop, edara koro ebatde ete mmɔ emedot ndibɔ esuene kabaŋa enyiŋ Jesus. 42Ndien kpukpru usen, ke temple ye ke ufɔk, mmɔ idopke uyo ndikpep nnyuŋ ŋkwɔrɔ, ete Jesus edi Christ.
Pilihan Saat Ini:
UTOM MME APOSTLE 5: ENA
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Efik Old Bible With Sectional Headings © Bible Society of Nigeria, 2013, 2019.
