Ubutukilo 35
35
Zambi yawahisa Yakoba ku Betele
1Zambi yambila Yakoba ngwenyi: “Katuka uye ku limbo lia Betele#35:1 limbo lia Betele kilometro 19 ku norde ya Yerusaleme., Ukatwame ko. Ukatunge chilumbilo homa haze akusolokelele Zambi muze wachinyine yayenu Esau.”
2Mba Yakoba yambila akwa zuwo lienyi ni waze eswe abwile hamwe nenyi ngwenyi: “Mbilenu mahamba a yilambala waze nuli no hakachi kenu, chizenu manyonga eswe abi a mu mbunge jenu, nuzale mahina aha. 3Tukatukenu tuyenu ku Betele. Kwenako mutukatungila chilumbilo ha kuwayila Mwene Zambi yoze wanguvwile ha tangwa lia lamba, wangufungile kanawa kuma kweswe te nakuya.” 4Mba yaamwaha Yakoba mahamba eswe a yilambala waze abwile no, yaamwaha nawa yingeliengelie ya ku matwi yize te akuzala. Yakoba yayivumbika mushi lia mutondo shene uze wabwile hakamwihi ni limbo lia Shekeme.
5Muze Yakoba ni ana jenyi te anayi mu jila, akwa membo waze akusulangana yeevwa woma unji, kaakawile ko. 6Yakoba ni atu jenyi eswe yaaheta ku limbo lia Luze (hanji Betele) mu chifuchi cha Kanana. 7Yatunga ko chilumbilo, yaluka ko jina ngwenyi, Betele, mumu kwenako alimwene ni Zambi, muze te anachinyi yayo Esau. 8Debora, ndeji ya Rebeka, yafwa. Yaamufunda mushi lia mutondo shene, uze wabwile hehi ni Betele. Mba mutondo uze yaauluka ngwo, Shene wa Malilo.
9Yakoba, ha kuheta chenyi ku Kanana, Zambi yamusolokela nawa, yamuwahisa ngwenyi: 10“Jina lie kulichi kubwa nawa Yakoba, alioze Israele.” Chenacho Zambi amulukile ngwenyi, Israele. 11Zambi yamwamba nawa ngwenyi: “Yami nguli Mwene Zambi Mukwa Ndundo Jeswe. Usema ana anji. Vungu lie maakabwa anji, akwo maakabwa mianangana anene. Vungu lie mulikoka, maakabwa mavungu anene. 12Chifuchi chino nahele Abrahama ni Isake, ngunakwehe cho yena ni vungu lie lia kulutwe.” 13Mba Zambi yahichika Yakoba, yahiluka kwenyi mwilu. 14Yakoba yamika ho liwe ha chiwulukilo, yahinjila ho vinyu ni kuzujila ho maji ha kulikunjika kuli Zambi, 15yaluka ho jina ngwenyi, Betele.
Kufwa cha Rashele
16Yakoba ni atu jenyi yaakatuka ku Betele. Muze haaheta hehi ni limbo lia Efrata, Rashele yevwa musongo wa kusema, yabinda kuhiana. 17Muze misongo hiyoka chifunguji yamwamba ngwenyi: “Kanda wivwa woma, yono nawa kali mwana wa lunga.” 18Muze Rashele te himasutuka, yaluka mwana jina ngwenyi, Benoni#35:18 Benoni mu hebreu linalumbunuka ngwo: “mwana wa lamba liami.” Alioze Yakoba yamuluka jina ngwenyi, Benjamine#35:18 benjamine mu hebreu linalumbunuka ngwo: “mwana yoze mayuka.”.
19Muze Rashele hafwa, yaamufunda mu jila ya kuya ku limbo lia Efrata. (Musono kaakulivuluka ngwo, Betleheme#35:19 Betleheme kilometro 8 ku sude ya Yerusaleme..) 20Yakoba yamika liwe ha fuka lia Rashele. Lie liwe kwe lili ndoo ni musono. 21Israele yakatuka ho, yasa musumba wenyi ku sali lia zuwo lisuku lia Edere.
Ana ja Yakoba a malunga
(Tala nawa 1 San 2:1-2)
22Muze Israele te anatwama mu chifuchi chize, mwanenyi Rubene yalimona ni Bila, umwe pwo lia tato, mba tato yachinyingika.
Yakoba yabwa ni ana kumi ni aali a malunga. 23Wano e ana ja Leya: Rubene (mwe mwana mutangu wa Yakoba), Simeone, ni Levi, ni Yuda, ni Isakare, ni Zabulone. 24Wano e ana ja Rashele: Josefe, ni Benjamine. 25Ana ja Bila, ndungo ya Rashele wano: Dane ni Naftali. 26Ana ja Zilpa, ndungo ya Leya wano: Gade, ni Ashere. Wano eswe e ana ja Yakoba waze te asemene mu chifuchi cha Mesopotamia.
Kufwa cha Isake
27Yakoba yaheta maha tato Isake ku limbo lia Mamre, hehi ni Kiriate Arba, (jina likwo Hebrone), kuze abwile Abrahama ni Isake hatangu. 28Isake yatwama ni mwono miaka kulakaji ni makumi nake, 29te kashinakaji wa tachi ndoo ni ku kufwa chenyi. Mba ana jenyi Esau ni Yakoba yaamufunda.
Pilihan Saat Ini:
Ubutukilo 35: CHK1970
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.