Ubutukilo 32
32
Yakoba yalulika ha kulitakana ni yayo Esau 1Yakoba yaya mu jila yenyi. Mba yatakana ni tunganda twa mwilu. 2Muze Yakoba haamona, yamba ngwenyi: “Uno uli musumba wa Zambi.” Mba homa haze yaluka ho jina ngwenyi, Mahanaime#32:2 mahanaime mu hebreu linalumbunuka ngwo, “misumba yaali.”.
3Yakoba yatuma tunganda kuli yayo Esau. Mwe Esau te katwama ha mulundu wa Seire mu chifuchi cha Edome#32:3 EDOME ku sali lia sude ha chitende cha Kufwa.. 4Yakoba yamba ngwenyi: “Lwezenu Esau maliji wano: ‘Yami ndungo ye Yakoba, nayile ni kutwama matangwa anji maha Labane, nashimbula ko ndoo ni musono. 5Nguli ni ndungo a malunga ni a mapwo, ni ngombe, ni tumelu, ni mapanga, ni pembe. Nalemba mwane, ngunaliange kukutumina liji, ungutambule kama kanawa.’ ”
6Tunganda yaahiluka kuli Yakoba yaamulweza ngwo: “Tunakaheta maha yayenu Esau. Twamuhichika mu jila, kaneza ni kukubatwiza. Malunga 400 kali no.” 7Yakoba yevwa woma unji, yalibikala. Yahandununa atu jenyi ni yimuna yenyi yeswe, mapanga, ni pembe, ni ngombe, ni tumelu, ha mbunga jaali jaali. 8Yanyonga ngwenyi, nyi ngwe Esau masa jita ni mbunga yitangu, mbunga ya muchaali maachina.
9Hohene yalemba ngwenyi: “Zambi ya kaka Abrahama ni tata Isake, ngwivwe kama. Yena Mwene wami wangwambile nguhiluke ku chifuchi chami, ni kuli usoko wami, mba muukanguwahisa. 10Yami, kavumbi ke, ha kumona chize wangulwezele zango, ni chize wamanunwine yilakenyo yeswe yize wangulakenyene, kuyangutelele nihakepe. Nazaukile lwiji wa Yordau, te Chishi nichimwe ku moko, shina lukanda wami wika. Alioze haliabwila ngunahiluka ni mbunga jaali. 11Nalemba ngulamwine kama ku moko ja yaya Esau. Ngunevu woma, hanji meza ni kungububa ni mapwo hamwe ni ana. 12Wangulakenyene ngwe: ‘Mungukakuwahisa. Vungu lie mungukalipwisa anji ngwe masekeseke ku mbumbulu ya kalunga lwiji, waze atu kaahashile kwalula.’ ”
13Ha ufuku uze Yakoba yabomba. Muze hikwacha yasakula yimuna yakumwaha yayo Esau. 14Ye yimuna yili yino: pembe a yihwo kulakaji jaali, makuji makumi aali, ni mapanga a yihwo kulakaji jaali, makuji makumi aali, 15tumelu a yihwo ni ana jo, waze te maachamwa, makumi atatu, ni ngombe a yihwo makumi awana, makuji kumi, ni yimbulu a yihwo makumi aali, makuji kumi. 16Chendo ni chendo cha yimuna yachikunjika mu moko ja akwa milimo ha kwatwala. Mba yaalweza ngwenyi: “Tetekelenu kulutwe liami, nuhichika kachipinji hakachi ka chendo ni chendo muze nunende.” 17Yalweza mukwa milimo mutangu ngwenyi: “Nyi walitakana ni yaya Esau mu jila, nyi makuhula ngwenyi: ‘Iya mwene we? Kuli unayi? Yimuna yino yaya?’ 18Mba muukakumbulula ngwe: ‘Kaali a kavumbi kenu Yakoba, mwane. Hatuma chawana cha mwene wenyi Esau. Yakoba iye mwene kanakaula kunyima.’ ” 19Yakoba yalongesa nawa chizechene mutu wa muchaali, ni wa muchitatu, ndoo ni atu eswe waze te anatwala yimuna, ngwenyi: “Chenacho munukalweza yaya Esau muze munukatakana nenyi mu jila. 20Nukamba nawa ngwenu: ‘Kavumbi kenu Yakoba kanakaula kunyima.’ ” Yakoba yanyonga ngwenyi, ufwatulo wa Esau muukahwa mumu ha chawana chize amutuminyine kulutwe. Yanyonga nawa ngwenyi, nyi natakana nenyi kota manguvwila keke. 21Chenacho atetekesele milambu kulutwe, mba iye yasala ha musumba.
Yakoba yalitachika ni Zambi
22Ha ufuku uzewene Yakoba yakatuka, yanda mapwo jenyi ni ana jenyi kumi ni kashi, yanda nawa ndungo jenyi a mapwo aali. No yaazauka lwiji Jaboke#32:22 lwiji jaboke unanjila mu lwiji Yordau ku sali lia chivumbuko. ha mwaa. 23Muze Yakoba hazawisa atu jenyi, yazawisa nawa yuma yeswe. 24Yasala ukawenyi mu sali.
Mba umwe lunga yalitachika ni Yakoba ndoo ni muze hikwacha. 25Muze lunga yoze hamona ngwenyi, kahashile kukumba Yakoba, yamukwata ha shina lia kulu, mba kulu yilisengunuka. 26Mwe lunga yambila Yakoba ngwenyi: “Ngweche nguye, mumu hikwacha.”
Alioze Yakoba ngwenyi: “Chichi kukwecha ndoo hiwanguwahisa.”
27Lunga yamukumbulula ngwenyi: “Jina lie yena iya?”
Yakoba ngwenyi: “Yami Yakoba.”
28Mutu yoze ngwenyi: “Jina lie kulichi kubwa nawa Yakoba, mumu hiwalitachika ni Zambi ni atu, hiwakumba. Kashika maakuvuluka ngwo, Israele#32:28 Israele ha kulivuluka mu hebreu linalifu ni “kanalitachika ni Zambi,” hanji “Zambi kanalitachika.”.”
29Yakoba ngwenyi: “Nalemba ngulweze kama jina lie.”
Alioze iye ngwenyi: “Mumu yika unahulila jina liami?” Mba yamuwahisa.
30Yakoba yaluka ho jina ngwenyi, Peniele#32:30 peniele ha kulivuluka mu hebreu linalifu ni “meso ja Zambi.”, mumu yamba ngwenyi: “Hinamona Zambi meso ni meso hindu nguli ni mwono.” 31Shimbu Yakoba machikatuka ku Peniele, tangwa yilivumbuka. Alioze yabalita mumu shina lia kulu lienyi liasengunukine. 32Kashika, ndoo ni musono, Aisraele keeshi kulia yifwo ya ha shina lia kulu lia kashitu, mumu lunga yoze wasengunwine Yakoba ha shina lia kulu.
Pilihan Saat Ini:
Ubutukilo 32: CHK1970
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.