ỊJỌN 6

IJisọsị Kpa Angị Ụnọ Iwo Kụrụ Imiiye Da Ohu Iwo La Ang Oriri

(ịMatiyu 14:13-21; ịMakị 6:30-44; iLuku 9:10-17)

1Ụka kọ nọ chẹẹ, iJisọsị kpoye nya Ihu ọkịlọlọ nya ịGalili ọlẹ ká ẹnyị nyamwụ ọkịla ri ịTayịberiyasị kele koye ọlaanyị nyamwụ. 2Ụka ọọwa, iru nya angịnyị lụmẹ-lụmẹ juwa ba iJisọsị jẹ, chajị, ị yẹ ụkụrwọ ẹbyẹbyị ịtụka nya uda ọhọhọ ọlẹ kọ juwa họ alẹdụrụ la datị-datị. 3Ịnyị, iJisọsị a kpụ uhye nya ọgbọdọ ọhẹ kaka hụhụ ụ-ụwa bala angịjụgbẹyị nyamwụ lẹlẹ. 4Ụka ọọwa lẹ, ụka nya Ang Oriri Ọchịpwụrụ nya ala iJuu juwa ju chwẹẹ lụmẹ lẹ. 5Ụka ká iJisọsị yọyị dagaga ju, kọ yẹ iru nya angịnyị ịwẹ kị juwa kele ka ẹga nyamwụ lụmẹ lẹ, ọ byi iFilipu yẹkẹẹ, “Ale, ahị tị́ ka ye ang oriri ra bwu ha angịlẹ ri kọ ka nwaa kpa lẹẹ mẹ?” 6IJisọsị ya ịnyị nyọka ma iFilipu yẹ ịnyị. Chajị, ọwa ayịdang jẹ́ ang ọlẹ kọ ka họ kpá wuu ene-ene lẹ.

7IFilipu wẹ byoo yẹkẹẹ, “Ọngọlahị, ó ri kahị ra ịkaa nya akpa nya okpoko imiiye lẹpwụ-lẹpwụ rara wẹẹ, ọ́ ka la gbuu, kpụ ọngọngọọng nyaa ka jẹ́-ẹ ye chị ẹngịrị myị́ kpong-kpong lẹka.”

8Ịnyị, ọngọjụgbẹyị nya iJisọsị ọkịla ọhẹ ọlẹ kị wụrụ Andụrụ ọnyịnịna nya ịSayịmọn iPita, a byi iJisọsị yẹkẹẹ, 9“Ọnyị ọlẹng ochiche ọhẹ jam ọlẹ kọ la abẹ nya ịkaa ịrụ ịhyẹ ịlẹ kị kpa ọrụ nya ịrayịsị nya alubekee ọlẹ kị wụrụ ‘ịbali’ họ bala iyenyi imiiye jam. Ma, ị́ tị ka pwụ iru nya angịnyị ịwẹ gẹnị ka.”

10IJisọsị wẹ byaa yẹkẹẹ, “Anụ kele kaka byi iru nya angịnyị ịwẹ kị hụhụ bẹẹbẹẹbẹẹ mẹ.” Ọ byaa ịnyị chajị amẹ lụmẹ ẹ-ẹga ọọwa. Ịnyị, iru nya angịnyị ịịwa a hụhụ ụ-ụwa lẹlẹ. Iru ojuju nya alẹng ịgbahị ịlẹpwụ nyaa kem, lala angịnyị angị ụnọ iwo kụrụ imiiye da angị ohu iwo chiriri. 11IJisọsị ye ịkaa ịịwa kpa ụ-ụbwọ. Ọ ji Ohe Oluhye obe u-uhye nyaa. Ọọwa lẹ, ọ bwaa gịla iru nya angịnyị ịịwa ịlẹ kị hụhụ ụ-ụwa lẹlẹ. Ọ hu iyenyi ịịwa gịlaa ịnyịnyị. Ọọwa lẹ, iru nya angịnyị ịịwa a ri ịkaa bala iyenyi ọọwa wu ẹpwụ kpọng-kpọng lẹlẹ. 12Ịnyị, ụka ká iru nya angịnyị ịịwa ri kpụ ịlaa hi lẹ, iJisọsị a byi angịjụgbẹyị nyamwụ yẹkẹẹ, “Anụ kele kaka go apwụ nya ịkaa bala iyenyi ihihi wuu ju ang mẹ. Chajị, ọ́ chịla kahị ka tụụbwọ hi ụpwụ nya ọhẹ-lọhẹ ta ayịreji ododu ka.” 13Ịnyị lẹ, angịjụgbẹyị nyamwụ a kele kaka go apwụ nya abẹ nya ịkaa ịrụ myị edo iwo kụrụ imiiye ụka ọlẹ ká angịnyị ri kpụ ịlaa hi lẹlẹ.

14Ịnyị, ụka ká iru nya angịnyị ịịwa yẹ ụkụrwọ ẹbyẹbyị nya ang oriri ọwẹ ká iJisọsị họ ịnyị lẹ, ị juwa yẹkẹẹ, “Nya ẹla nya ịlẹhị ịnyị! Ọlẹng ọlẹ a ri ọlọmwụ nya Ohe Oluhye ọọwa ọlẹ ká Ohe Oluhye ya ene-ene yẹkẹẹ, ọwa nyị juwa ka du ẹrụ warị wẹ odehe ọlẹ lẹ.” 15Ịnyị, ụka ká iJisọsị ayịdang jẹ́ yẹkẹẹ, angịwẹ nyị juwa tịtọ kịị nyị ka warị kaka wu ọwa, kịị nyị ka hu ọwa adịrahụ la agbụrụ lẹ, ọ rụ bwu ẹpwụ nyaa kele ka uhye nya ọgbọdọ ọhẹ kaka hụ ụ-ụwa ụbwọọmwụ-ụbwọọmwụ lẹlẹ.

IJisọsị Jẹdịyẹ U-uhye nya Ugbenyi

(ịMatiyu 14:22-33; ịMakị 6:45-52)

16Ịnyị, ụka ká obyi hi ẹnụ ọọwa lẹ, angịjụgbẹyị nya iJisọsị a hireji bwu uhye ọgbọdọ kele ka Ihu ọkịlọlọ nya ịGalili lẹlẹ. 17Ụka kị pwụ ụwa, ị gba ju ka ẹpwụ nya ụmwụ nya enyi, juwa ju ụmwụ jahị da ka epweji nya ịKapẹnawụm. Ụka ọọwa lẹ, odu juwa hi wuu lẹ. Ma, iJisọsị á tị kele ka ẹga nyaa lẹka. 18Ịnyị, igbachịwụ ọtụka-ọtụka ọhẹ a gba mịla ihu ọọwa nmoo, juwa chị́ enyi pwururu-pwururu, juwa ka ẹpwụ nya ụmwụ nya enyi nyaa lẹlẹ. 19Ụka ká angịjụgbẹyị nya iJisọsị ju ụmwụ nyaa jẹ chẹẹ, lala ịmaalị ịta lee ine lẹ, ị chẹhị kaka yẹ iJisọsị kọ juwa jẹdịyẹ u-uhye nya ugbenyi kele ka ẹga nyaa lẹ, ị juwa juhi ọtụka-ọtụka lẹlẹ. 20IJisọsị byaa yẹkẹẹ, “Anụ juhi kaka. Am ayịdang a lẹẹ lẹ!” 21Ịnyị, angịjụgbẹyị nya iJisọsị ịịwa a dọọ ọwụraba kele ka ẹpwụ nya ụmwụ nya enyi nyaa lẹlẹ. Ịnyị, ụmwụ nya enyi nyaa a pwụ ẹga ọlẹ kị juwa jẹ ka ahyaahị-ahyaahị lẹlẹ.

Aliru nya Angịnyị Juwa Pịlahị nya IJisọsị

22Ụka ká ahị ọọnamwụ pyẹ, iru nya angịnyị ịlẹ kị juwa o-oye ọlaanyị nya ihu ọkịlọlọ nya ịGalili ọọwa jẹ́ yẹkẹẹ, ụmwụ nya enyi ookpokpo kẹnẹ-kẹnẹ nyaa hi juwa ọ-ọnụụka ọọwa ịnịyẹ lẹ. Ị myịmyị jẹ́ yẹkẹẹ, angịjụgbẹyị nya iJisọsị ụbwaa kem nyaa ju ụmwụ nya enyi ọọwa kpoye nya Ihu rụ lẹ. IJisọsị ayịdang nyị́ juwa taa lụka ọọwa ka. 23Ịnyị lẹ, ị kpa amwụ nya enyi ịkịla ịhyẹ pwụ eji bwu epweji nya ịTayịberiyasị lẹlẹ. Ẹga ọlẹ kị wu amwụ nya enyi ịịwa godayị rịrị lẹ, ọ ju ẹga ọlẹ ká iru nya angịnyị ịịwa hụhụ ri ịkaa ịnịyẹ chwẹẹ, lụka ọlẹ ká iJisọsị raabwọ jwoo haa kpá. 24Ịnyị, ụka ká iru nya angịnyị ịịwa á yẹ iJisọsị ayịdang lee angịjụgbẹyị nyamwụ ụ-ụwa kaka lẹ, ị gba ju ka ẹpwụ nya amwụ nya enyi ịịwa, juwa rụ kele ka epweji nya ịKapẹnawụm kaka pịlahị nya iJisọsị ụ-ụwa lẹlẹ.

IJisọsị A Ri Ang Oriri nya Ọhịhị Lẹ

25Ụka ká iru nya angịnyị ịịwa kele kaka yẹ iJisọsị o-oye ọlaanyị nya Ihu ọkịlọlọ ọọwa lẹ, ị byoo yẹkẹẹ, “Ayịbahị ịtịcha, ụka oyina a tị́ warị wẹ ẹgẹlẹ kpong-kpong?”

26Ịnyị, iJisọsị a wẹ byaa yẹkẹẹ, “Nya ịlẹhị-ịlẹhị, m byinu yẹkẹẹ, m jẹ́ ká ajị nya ịkaa ọlẹ kanụ ri wu ẹpwụ kpọng-kpọng ịnịyẹ, a du kanụ wẹẹ pịlahị nyam. Ma, aajị nyori yẹkẹẹ, anụ jẹ́ etu nya ụkụrwọ ẹbyẹbyị nyam ọlẹ kam họ kpong-kpong ka. 27Anụ wo mẹ! Anụ juwa nwụ ịlọnụ la ụkụrwọ u-uhye nya ang oriri ọlam-ọlam ọlẹ kọ kaa bịrị-bịrị ka. Ma, ọkọkọ nya ọọwa lẹ, anụ tụtụ juwa họ ụkụrwọ, chajị nya ang oriri ọlẹ kọ kaa kpa angịnyị ehe gbee ju ka ẹpwụ nya ọhịhị ọmyịmyị-ka mẹ. Ọnyị nya ọngịnyị ehe ọlẹ ayịdang a ka ya ang oriri ọọwa hanụ lẹlẹ. Chajị, ọwa kpakpakpa, Ohe Oluhye Adịda a kpa ọngịrị nya ụkụrwọ ẹbyẹbyị ọhọhọ nyamwụ da ịnaaba nyamwụ ba lẹ.”

28Ịnyị, angịịwa a tọọ ịtọ yẹkẹẹ, “Ayịbahị ịtịcha, ịịyẹ a tị́ chịla kahị ka họ pyii kọ ka mẹjẹ ụkụrwọ nya Ohe Oluhye ọhọhọ mẹ?”

29IJisọsị wẹ byaa yẹkẹẹ, “Ụkụrwọ nya Ohe Oluhye ọhọhọ a lẹẹ lẹlẹ: Anụ kpa ọkịlẹtụ nyanụ wuu myị la Ọnyẹwẹ nya Ohe Oluhye ọlẹ ká Ohe Oluhye du warị wẹ odehe ọlẹ mẹ.”

30Ị wẹ byi iJisọsị yẹkẹẹ, “O hiigu. Ịịyẹ a tị́ ri ụma nya ụkụrwọ ẹbyẹbyị ọlẹ ká ka họ mẹjẹẹhị, kahị ka yẹ, chajị kahị ka jẹ́-ẹ myị lang yẹẹyẹẹ mẹ? Ụma nya ịyẹ, a tị́ ka họ? 31Adahị igogo anyị ri ang oriri ọlẹ kị wụrụ ‘ịmana’ ụ-ụwa u-ugbileji ugbeene jaabwọ ká Ụpwụ Ịgọgọ ya lẹẹ ẹ-ẹgẹlẹ u-uhye nya ọọwa yẹkẹẹ, ‘Ohe Oluhye a hu ịkaa o-bwu epwoohe haa ri lẹ.’ ”

32IJisọsị wẹ byaa yẹkẹẹ, “Nya ịlẹhị-ịlẹhị, m byinu yẹkẹẹ, ụma nya ang oriri ọlẹ ká iMosisi ya hanụ ugbeene lẹ, ọọwa á ri ịkaa ọlam ọlam o-bwu epwoohe lẹka. Ma, ugbẹnyị, Ohe Oluhye Adam a lẹẹ hu ịkaa nya ịlẹhị-ịlẹhị ọlẹ kọ bwu epwoohe hireji hanụ wẹẹ lẹ. 33Chajị, ọngọlẹ ká Ohe Oluhye du ẹrụ bwu epwoohe warị kaka hu ọhịhị ha alodehe ọlẹ kpangga, a ri ịkaa o-bwu epwoohe hireji ọọwa wẹẹ lẹ.”

34Angịwẹ wẹ byi iJisọsị yẹkẹẹ, “O hiigu. Ó ri ịnyị lẹ aalẹ, Ọngọlahị, aa tị tị juwa hu ịkaa nya ọhịhị ọọwa hahị ri ịnyịnyịịnyị mẹ!”

35IJisọsị wẹ byaa yẹkẹẹ, “Am kpakpakpa a ri ịkaa nya ọhịhị ọọwa lẹlẹ. Ọng myị́ ọng ọlẹ kọ warị wẹ ẹga nyam lẹ aalẹ, imyi á ka nwọọ kpá ẹnẹnẹhẹ kaka. Ọng myị́ ọng ọlẹ kọ tị kpa ọkịlẹtụ ookpokpo myị lam lẹ aalẹ, imyi-enyi á tị ka nwọọ kpá ẹnẹnẹhẹ kaka ịnyịnyị. 36Ma, m myịmyị jam ma ẹla ọlẹ ya jenu yẹkẹẹ, ịnọ, am ayịdang jam ẹ-ẹpwarịrị nyanụ lẹ! Ma, ánụ tị myị kpa ọkịlẹtụ ookpokpo myị lam kpong-kpong kaka. 37Angịlẹ wuu ká Ohe Oluhye Adịda ayịdang á tị daa ụbwọ chịm ọgụ ene lẹ aalẹ, ị ka warị wẹ ẹga nyam pyii lẹ. Ọng myị́ ọng ọlẹ kọ tị warị wẹ ẹga nyam ene lẹ aalẹ, ḿ ka ku ọngọọwa rụ hi ịlọm kpong-kpong kaka. 38Chajị i-irya nya ịlọm am ayịdang a lẹẹ kam hireji bwu epwoohe warị wẹ odehe ọlẹ, nyọka họhọ kpong-kpong ka. Ma, irya nya Ohe Oluhye ọngọ dum ẹrụ warị kem ịnyị! 39Irya nya Ohe Oluhye ọọwa ọlẹ kọ dum ẹrụ warị, tị ri ká ọngọngọhẹ lẹpwụ nya angịlẹ wuu kọ ya ham ka gụm byi kpong-kpong ka. Ma, ọkọkọ nya ọọwa lẹ, kam ka wule angịịwa wuu eji bwula igu lahị-lahị, la ẹnụtụrụ ohyẹẹkpẹ pyii ịnyị! 40Chajị, ang ọlẹ kọ ri irya nya Ohe Oluhye Adam ri yẹkẹẹ, ọng myị́ ọng ọlẹ kọ yẹ Ọnyẹwẹ nya Ohe Oluhye ọọwa kọ myị kpa ọkịlẹtụ ookpokpo myị la Ọnyẹwẹ ọọwa, ka la ọhịhị ọmyịmyị-ka. Ọọwa lẹ, am ayịdang a ka wule ọngọọwa eji bwula igu la ẹnụtụrụ ohyẹẹkpẹ pyii lẹlẹ.”

41Ụka ọọwa, ala iJuu ịlụwa juwa mwọ ala ya ba iJisọsị, chajị nyọlẹ kọ yẹkẹẹ, “Am ayịdang à ri ịkaa nya ọhịhị ọlẹ kọ hireji bwu epwoohe lẹ.” 42Ọọwa, ị juwa yẹkẹẹ, “Ahyu! Ọ-ọlẹng ọlẹ à ri iJisọsị ọlẹ kahị jẹ́ adamwụ bala ịnamwụ kaka-á? Ee lẹ, anyanyị, ọ tị́ ka jẹ́-ẹ byihi yẹkẹẹ, epwoohe, ọwa nyaa bwu hireji lẹ mẹ?”

43IJisọsị wẹ byaa yẹkẹẹ, “Anụ ba la ala ọ-mwọ ya ju ịlọnụ mẹ! 44Anụ wo mẹ! Ọngọngọhẹ-ẹ́ ka jẹ́-ẹ warị wẹ ẹga nyam myị́ ka, kẹnẹ-kẹnẹ ó-ri ká Adịda ọlẹ kọ dum ẹrụ warị, á kpa ọngịrị nyamwụ mwụ ọngọọwa chịm ọgụ ene lẹ mẹ ịnyị! Am ayịdang tị ka wule angị ịlịnyị wuu eji bwula igu lẹnụtụrụ ohyẹẹkpẹ pyii lẹ. 45Chajị, ọng myị́ ọng ọlẹ kọ wo omyi nya Ohe Oluhye Adịda bala ọ-jẹ́ ang bwu ẹpwụtụbwọ nyamwụ lẹ aalẹ, ọngọọwa ka warị wẹ ẹga nyam pyii lẹ. Chajị, alọmwụ nya Ohe Oluhye inyogo da ẹ-ẹpwụ nya apwụ nyaa yẹkẹẹ, ‘Ụka juwa warị ị-ịlahị ká Ohe Oluhye ayịdang ka mẹ ang jẹ angịnyị ehe wuu chajị nya ịlọmwụ Ọwa Ohe Oluhye wẹẹ.’ 46Ọngọngọhẹ ọkịla á tị juwa ọlẹ kọ jẹ́ Ohe Oluhye Adịda yẹẹyẹẹ kpụ, ọ ka jẹ́-ẹ mẹ ẹla nyamwụ jẹ angịnyị ehe kaka. Kẹnẹ-kẹnẹ, ọngọlẹ ká Ohe Oluhye Adịda ayịdang du ẹrụ warị mẹ ịnyị! 47Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ kpa ọkịlẹtụ nyamwụ ookpokpo myị la Ọnyẹwẹ nya Ohe Oluhye ọọwa lẹ aalẹ, ọ la ọhịhị ọmyịmyị-ka lẹ! 48Am kpakpakpa a ri ịkaa nya ọhịhị ọọwa lẹlẹ. 49Ụka ká adanụ igogo anyị ri ang oriri ọlẹ kị wụrụ ‘ịmana’ ọọwa u-ugbileji ugbeene kpá lẹ, ị gbu wuu myị́ wẹẹ! 50Ma, ịkaa nya ọhịhị ọọwa ọlẹ kọ bwu epwoohe hireji, a ri ang oriri nya ọhịhị ọlẹ ká ọngịnyị ehe á roo ene lẹ, ká ọngọọwa á ka gbu kpá ẹnẹnẹhẹ kaka lẹlẹ. 51Am kpakpakpa a ri ịkaa nya ọhịhị ọọwa ọlẹ kọ bwu epwoohe hireji lẹlẹ. Ọng myị́ ọng ọlẹ kọ ye ịkaa ọọwa ri lẹ aalẹ, ọngọọwa ka la ọhịhị o-gbe oyi myị́ oyi lẹ. Ugbinyịrọ nyam ọlẹ kam wẹẹ ka hu kpa kaka kịla iya wọnụ nya alodehe ọlẹ wuu ju chajị nya ọhọbịrị nyaa, a ri ịkaa ọọwa ọlẹ kam hu ha lẹ.”

52Ụka ká ala iJuu ịlụwa wo ẹla ọọwa lẹ, ị juwa kpa da ọnụ wẹ awụlẹ larụ-larụ lẹlẹ. Ị yẹkẹẹ, “Anyanyị, ọlẹng ọlẹ a tị́ ka jẹ́-ẹ hu ugbinyịrọ nyamwụ hahị ri mẹ?”

53IJisọsị wẹ byaa yẹkẹẹ, “Nya ịlẹhị-ịlẹhị, m byinu yẹkẹẹ, ó ri kanụ myị ye ugbinyịrọ nya Ọnyị nya ọngịnyị ehe ọlẹ ayịdang ri bala ọ-myị ye ịwọ nyamwụ nwa ịnyịnyị ka aalẹ, ánụ ka jẹ́-ẹ la ọhịhị ọmyịmyị-ka nya Ohe Oluhye kaka. 54Ọng myị́ ọng ọlẹ kọ tị ye ugbinyịrọ nyam ri bala ọ-myị ye ịwọ nyam nwa ịnyịnyị lẹ aalẹ, ọngọọwa ka la ọhịhị ọmyịmyị-ka ẹ-ẹpwụ nyamwụ lẹ. Aalẹ, am ayịdang tị ka wule ọngọọwa eji bwula igu lahị-lahị, lụka ohyẹẹkpẹ pyii ịnyịnyị lẹ. 55Chajị ugbinyịrọ nyam a ri ang oriri nya ịlẹhị-ịlẹhị nya ọhịhị ọọwa lẹlẹ. Ịwọ nyam a tị ri ang ọnwanwa nya ịlẹhị-ịlẹhị nya ọhịhị ọọwa ịnyịnyị lẹlẹ. 56Ọng myị́ ọng ọlẹ kọ myị ye ugbinyịrọ nyam ri bala ọ-myị ye ịwọ nyam nwa ịnyịnyị lẹ aalẹ, ọngọọwa juwa hịhị ẹ-ẹpwụ nyam lẹ. Aalẹ, am tị juwa hịhị ẹ-ẹpwụ nyamwụ ịnyịnyị lẹ. 57Jaabwọ ká Ohe Oluhye Adịda ọlẹ kọ juwa hịhị dum ẹrụ warị du kaam ayịdang tịtị jam hịhị bwula ụbwọ ọdada nya Ohe Oluhye Adịda ọọwa lẹ, ịnyịnyị-ịnyịnyị, ọng myị́ ọng ọlẹ kọ ka myị-ị ye ugbinyịrọ nyam ri bala ọ-ka myị-ị ye ịwọ nyam nwa ịnyịnyị a tịtị ka la ọhịhị bwulam lẹlẹ. 58Ọnyị nya ọngịnyị ehe ọlẹ ayịdang a ri ịkaa nya ọhịhị ọlẹ kọ bwu epwoohe hireji ịnyịlẹhị lẹlẹ. Ọ́ tị lala ụma nya ịkaa ọlẹ ká adanụ igogo anyị ri u-ugbileji kpá ene kịị gbu myịmyị ka. Ma, ọng myị́ ọng ọlẹ kọ myị ye ịkaa nya ịlẹhị ọọwa ọlẹ kọ bwu epwoohe hireji ri lẹ aalẹ, ọngọọwa ka la ọhịhị o-gbe oyi myị́ oyi lẹ.”

59IJisọsị mẹ ẹlẹwẹ jẹ angịnyị u-ube ọ-mẹ ẹla nya Ohe Oluhye jẹ nya ala iJuu olepweji nya ịKapẹnawụm.

Ẹla nya Ọhịhị Ọmyịmyị-ka

60Ịnyị, iru nya angịjụgbẹyị nya iJisọsị lụmẹ-lụmẹ ịlẹ kị juwa wo ẹla ọmẹjẹ nyamwụ ọọwa a juwa yẹkẹẹ, “Ang ọmẹjẹ ọlẹ la ọngịrị lụmẹ kaka kpoye. Lẹ, o-owo a tị́ ka wowo ju ka ụrụ nyamwụ myị́?”

61Ịnyị, ụka ká iJisọsị jẹ́ ẹ-ẹpwụ-ẹpwụ nya ịlọmwụ yẹkẹẹ, angịjụgbẹyị nya ọọwa nyị juwa mwọ ala ya o-oluhye nya ẹla ọọwa lẹ, ọ byaa yẹkẹẹ, “Anụ aligu nyam, ang ọmẹjẹ nyam ọwẹ juwa chị́ịnụ abwọ pyẹpyẹ, du kanụ ka ji ẹkpẹ nyanụ dam lẹ, lee? 62Ee lẹ, anyị, anụ tị́, tị tị ka họ ụka kanụ ka yẹ Ọnyị nya ọngịnyị ehe ọlẹ kọ ka juwa rụ tịrẹkpẹ kele ka uhye-ọgba nya epwoohe ẹ-ẹga ọlẹ kọ bwu warị lẹẹ kpong-kpong? 63Olegu nya Ohe Oluhye a kaa hu ọkpịra-kpịra nya ọhịhị ọlala ha ọngịnyị ehe lẹ. Ugbinyịrọ nya ọngịnyị ehe á ju apyobwuna nya ịngịngịhyẹ họọ kpong-kpong ka. Ẹla ọlọnụ nyam ọlẹ kam kaa ya jenu kpangga a ri Olegu nya Ohe Oluhye ọọwa lẹlẹ. Ẹla ọọwa a tị ri ọhịhị ịnyịnyị lẹlẹ. 64Ma, angịhyẹ nyanụ á tị myị kpa ọkịlẹtụ ookpokpo myị la ẹla nyam ọọwa kpong-kpong kaka.” IJisọsị ya ịnyị, chajị ọwa ayịdang jẹ́ angịlẹ wuu kị myị, juwa kpa ọkịlẹtụ ookpokpo nyaa myị lọọ ka bala ọ-jẹ́ ọngọlẹ kọ juwa ka pịrọọ ha ịnyịnyị. 65Ọọwa lẹ, ọ byaa yẹkẹẹ, “Ajị nya ọọwa, a du kam byinu ene-ene yẹkẹẹ, ọngọngọhẹ á ka warị wẹ ẹga nyam myị́ kaka. Kẹnẹ-kẹnẹ, ó ri ká Ohe Oluhye Adịda ayịdang á da ọngọọwa ụbwọ chịm ọgụ kpá ene lẹ, mẹ ịnyị.”

66Bwu ụka ọọwa lẹ, iru nya angịjụgbẹyị nya iJisọsị ịhyẹ lụmẹ-lụmẹ a juwa ji ẹkpẹ nyaa dọọ lẹlẹ. Ị́ tụtụm myị ba iJisọsị jẹ bwu ụka ọọwa kaka. 67Ịnyị, iJisọsị a byi angịjụgbẹyị nyamwụ angị iwo kụrụ imiiye yẹkẹẹ, “Anụ bẹ? Anụ ka rụ him ịnyịnyị kpịlọọ?”

68ỊSayịmọn Pita wẹ byoo yẹkẹẹ, “Ọngọlahị ee, ahị tị́ ka jẹ́-ẹ rụ hing ka ẹga nya owo wẹẹ? Kaahụ ayịdang kpakpakpa a la ẹla nya ọhịhị ọmyịmyị-ka ọọwa lẹ. 69Ahị ayịdang tị lẹẹ kpa ọkịlẹtụ nyahị wuu myị lang lẹ. Chajị ahị jẹ́ yẹkẹẹ, ahụ kpakpakpa a ri Ọngọ Ịgọgọ ọọwa ọlẹ ká Ohe Oluhye du warị ịnyịlẹhị lẹlẹ.”

70IJisọsị wẹ byaa yẹkẹẹ, “M chụnụ anụ angịjụgbẹyị nyam angị iwo kụrụ imiiye chụ kpá lẹ, ọngọhẹ lẹpwụ nyanụ á ri Ohe Onyobyi ayịdang wẹ ka?” 71IJisọsị ya ẹlẹwẹ rụ́ iJudasị ọnyị nya ịSayịmọn Isikarọtụ ọlẹ kọ ri ọngọhẹ lẹpwụ nya angị iwo kụrụ imiiye ịịwa, kọọwa a tị ri ọngọ juwa ka pịrị iJisọsị ha.

Pilihan Saat Ini:

ỊJỌN 6: IBNO

Sorotan

Berbagi

Salin