ỌMWỤ ỌDADA 5
5
Anyị Ịtụma nya Adam
1Ọlẹ à ri ego ogbegbe nya anyị ịtụma nya Adam lẹ. Ụka ọlẹ ká Ohe Oluhye họ ọngịnyị ehe nya ọgbanyẹ, ọ họọ la ụma nya ịlọmwụ. 2Ọlẹng ookpokpo bala ọnyang ookpokpo, Ohe Oluhye a họ nya ọgbanyẹ-ọgbanyẹ lẹ. Ụka kọ wahị kụrwaa kpá lẹ, ọ wụrwaa “angịnyị ehe” lẹlẹ. 3Ụka ká Adam gu ẹka ohu da iwo ịta (130), ọ ma ọnyị ọlẹng ọhẹ. Ọnyị ọọwa me Adam ayịdang lụmẹ. Adam wụrụ ẹnyị nya ọnyị ọọwa, ịSẹtị. 4Bwu ụka ọlẹ kị ma ịSẹtị kpá, Adam myịmyị ri ehe lala ẹka ohu ineku (800). Adam ma anyị alẹng bala anyị anyang ịkịla hile Sẹtị ọwẹ. 5Ẹka nya ehe oriri nya Adam wuu ri ẹka ohu ihikichu da ẹka iwo ịta (930) gbẹgbịlẹ ene kọọ gbu.
6Ụka ká ịSẹtị gu ẹka ohu ookpokpo kụrụ ẹka ịrụ (105), ọ ma ọnyị ọlẹng. Ọ wụrụ ẹnyị nyamwụ Ẹnọchị. 7Bwu ụka ọlẹ kị ma Ẹnọchị kpá, ịSẹtị myịmyị gu ẹka ohu ineku kụrụ irwiye (807) ene kọọ gbu. Ọ ma anyị alẹng bala anyị anyang ịkịla hile Ẹnọchị ịnyịnyị. 8ỊSẹtị ri ehe lala ẹka ohu ihikichu da ẹka iwo kụrụ imiiye (912) gbẹgbịlẹ ene kọọ gbu.
9Ụka ká Ẹnọchị gu ẹka iwo ihikichu, ọ ma ọnyị ọlẹng ọlẹ kọ wụrụ iKenan. 10Ẹnọchị myịmyị ri ehe lala ẹka ohu ineku da ẹka iwo kụrụ ịrụ (815) bwu ụka ọlẹ kọ ma iKenan kpá ene kọọ gbu. Ọ myịmyị ma anyị alẹng bala anyị anyang ịkịla hile iKenan. 11Ẹnọchị ri ehe lala ẹka ohu ihikichu kụrụ ẹka ịrụ (905) ene kọọ gbu.
12Ụka ká iKenan gu ẹka iwo irwiye, ọ ma ọnyị ọlẹng ọlẹ kọ wụrụ ịMahalalẹlụ.
13IKenan myịmyị ri ehe bwu ụka ọlẹ kọ ma ịMahalalẹlụ kpá lala ẹka ohu ineku da ẹka iwo ine (840) ene kọọ gbu. Ọ ma anyị alẹng bala anyị anyang ịkịla hile ịMahalalẹlụ ịnyịnyị. 14Ẹka nya ehe oriri nya iKenan wuu tụchawụlẹ ri ẹka ohu ihikichu da ẹka iwo (910) ene kọọ gbu.
15Ụka ká ịMahalalẹlụ gu ẹka iwo ịrwọnyẹ kụrụ ịrụ, ọ ma ọnyị ọlẹng ọlẹ kọ wụrụ ịJarẹdị. 16ỊMahalalẹlụ myịmyị ri ehe lala ẹka ohu ineku da ẹka iwo ịta (830) bwu ụka ọlẹ kọ ma ịJarẹdị. Ọ myịmyị ma anyị alẹng bala anyị anyang ịkịla hile ịJarẹdị ịnyịnyị. 17Ehe oriri nya ịMahalalẹlụ wuu tụchawụlẹ ri ẹka ohu ineku da ẹka iwo ihikichu kụrụ ịrụ (895) ene kọọ gbu.
18Ụka ká ịJarẹdị gu ẹka ohu da ẹka iwo ịrwọnyẹ kụrụ imiiye (162), ọ ma ọnyị ọlẹng ọlẹ kọ wụrụ Ịnọkụ. 19ỊJarẹdị myịmyị ri ehe lala ẹka ohu ineku (800) gbẹgbịlẹ bwu ụka ọlẹ kọ ma Ịnọkụ kpá, ene kọọ gbu. Ọ myịmyị ma anyị alẹng bala anyị anyang ịkịla hile Jarẹd ịnyịnyị. 20Ehe oriri nya ịJarẹdị wuu tụchawụlẹ ri ẹka ohu ihikichu da ẹka iwo ịrwọnyẹ kụrụ imiiye (962) ene kọọ gbu.
21Ụka ká Ịnọkụ gu ẹka iwo ịrwọnyẹ kụrụ ịrụ, ọ ma ọnyị ọlẹng ọlẹ kọ wụrụ iMetusẹla. 22Ịnọkụ jẹdịyẹ lihi ojuju ị-ịlahị nya Ohe Oluhye bwu ụka ọlẹ kọ ma iMetusẹla pyịyọọ lala ẹka ohu ịta (300) gbẹgbịlẹ. Ọ ma anyị alẹng bala anyị anyang ịkịla hile iMetusẹla ịnyịnyị. 23Ehe oriri nya Ịnọkụ wuu tụchawụlẹ ri ẹka ohu ịta da ẹka iwo ịrwọnyẹ kụrụ ịrụ (365). 24Ajị nyọlẹ ká Ịnọkụ jẹdịyẹ ị-ịlahị nya Ohe Oluhye lihi ojuju lẹ, Ohe Oluhye kpọọ rụ lahị-lahị. Ọ́ gbu lala angịkịla ene kpong-kpong kaka.
25Ụka ká iMetusẹla gu ẹka ohu da ẹka iwo ineku kụrụ irwiye (187), ọ ma ọnyị ọlẹng ọlẹ kọ wụrụ ịLamẹkị. 26IMetusẹla myịmyị ri ehe ẹka ohu irwiye da ẹka iwo ineku kụrụ imiiye (782) ene kọọ gbu. Ọ ma anyị alẹng bala anyị anyang ịkịla hile ịLamẹkị ịnyịnyị. 27Ehe oriri nya iMetusẹla wuu tụchawụlẹ ri ẹka ohu ihikichu da ẹka iwo ịrwọnyẹ kụrụ ihikichu (969) ene kọọ gbu.
28Ụka ká ịLamẹkị gu ẹka ohu ookpokpo da iwo ineku kụrụ imiiye (182), ọ ma ọnyị ọlẹng ọhẹ.
29Ụka ọọwa, ịLamẹkị yẹkẹẹ, “Ẹhẹẹ! Ọnyị ọlẹ ka dahị ụbwọ ẹ-ẹpwụ nya ẹrụ owuwu nyahị tahị lẹ: ọnyị ọlẹ ayịdang a ri ọngọlẹ kọ ka kpa ọhagụ warị wahị bwu ẹpwụ nya ọpyị ọlẹ ká Amkpaa gọlọ ju ugbẹnyị lẹlẹ.” Ịnyị a du ká ịLamẹkị wụrụ ẹnyị nya ọnyị ọọwa, iNuwa lẹ. 30ỊLamẹkị myịmyị ri ehe ẹka ohu ịrụ da ẹka iwo ihikichu kụrụ ịrụ (595) ene kọọ gbu. Ọ myịmyị ma anyị alẹng bala anyị anyang ịkịla hile iNuwa. 31Ehe oriri nya ịLamẹkị wuu tụchawụlẹ ri ẹka ohu irwiye da ẹka i'wo irwiye kụrụ irwiye (777) ene kọọ gbu.
32Ụka ká iNuwa gu ẹka ohu ịrụ (500), ọ ma anyị alẹng ịlẹ kọ wụrụ ịChẹm bala ịHam bala ịJafẹtị.
Pilihan Saat Ini:
ỌMWỤ ỌDADA 5: IBNO
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Igede Bible © The Bible Society of Nigeria, 2019.