ULÚKU 24

Ujísɔ̄si le héyī ŋmá ɔlékwū

(Umát 28.1-10; Umák 16.1-8; Ujɔ́n 20.1-10)

1Oflɔ́cí blibli kú ɛ̄cī Aláadi, ācɛnyā ā le pɛ́ tá unóji ā. É bī anɔ̄ mɛ́mla ɔdā okpócu nēé tɛtɛ tútū ā. 2É le má ka ɔ̄cɛ éyi kwú ɛcɔ̄ nēé míya kwū okónu únóji gbɔbū ā ú míya ŋmá anú. 3Anɔ́ɔ é le tá ipú nū á. Amáŋ é má okwū kú Óndú Ujísɔ̄si ŋ́. 4É háyi abɔ́ɔ jigbaa ohígbū ɔdā nēé má ā. Anɔ́ɔ igbeékpónú é le ācɛ ɛpa nēe le úwé nɛ̄hɛ́ o ceyī ŋmaáŋmaá wiiyē má hayi pī uwā. 5Ufi le anyā ā kwú nɛ̄ɛ̄nɛ̄hi, anɔ́ɔ é lɛ eyī kpó kwajɛ á. Ācɛ ā da uwá kahíníī, “Ɔdíyá nɛ̄ aá ī dɔɔ̄kā ɔ̄cɛ nōo yēeyī ɛgiyí ācɛ nēe gekwú āa? 6#Umát 16.21; 17.22,23; 20.18,19; Umák 8.31; 9.31; 10.33,34; Ulúk 9.22; 18.31-33Ó yɔ̄ amānyā gɛ ŋ́. Ɔwɔicō kwú ɔ̄ ú héyī ŋmá ɔlékwū ɛɛ́. Aá blakwu ɛlā nōó ka lɛ aá eko nōó yɔ̄ Ugálīli ā. 7Ó kahíníī, É géē je Ɔyínɔ̄nyīlɔ kú Ɔ̄cɛ tū ācobīyaíne kú Ɔwɔicō abɔ̄, é géē je ɔ́ nyɔ́kpá, cɛ́ɛ́ ɛ̄cī ɔ́mɛtá é géē je ɔ́ héyī ŋmá ɔlékwū.’” 8Anɔ́ɔ ācɛnyā ā le blakwu ɛlā nōó ka ā á. 9É pīyɛyí ŋmá unóji ā, anɔ́ɔ é le ɛjɛ̄ɛ̄jī ɔdā nōo yá ā da ayíkpó igwóléyi ā mɛ́mla ācɛ ohile ā. 10Anyā ā wɛ Umerí Umágādalíni, Ujowána, mɛ́mla Umerí, ɛ́nɛ́ kú Ujémīsi. Uwá mɛ́mla anyā ɔhá le aɔ́dā nēe yá nyā kpó ka lɛ ayíkpó ā. 11Amáŋ ayíkpó ā gbɛlá ka ɔdā nɛ̄ ācɛnyā ā ka ā wɛ ɛlā iciíci. Anɔ́ɔ é cɛ̄ɛ̄lā kú uwā ā ŋ́ má. 12Amáŋ Upíta cāŋjɛ anɔ́ɔ ó le inya kwu ga únóji ā á. Ó túkpɛɛ́ anɔ́ɔ ó má ɔdā ɔhá dúúmā gwū igbogbo kú ahilíki ā ŋ́ má. Anɔ́ɔ ó kwúcē le tá ɔlɛ́ le hídáagó kú ɔdā nōo yá ā?

Ayíkpó ɛpa le Óndú nōo héyī ā ma

(Umák 16.12-13)

13Ɛ̄cī ɔ́ɔmā piíí ā ācɛ ɛpa nōo ī yɛce Ujísɔ̄si bá yɔ̄ ī ga eyīpɔ́lɛ́ nēé hī ka Emáyɔ̄si ā. Ó lɛbɛ̄ɛka ukilómīta igwóléyi ŋmá Ujerúsālɛm. 14É kē bá yɔ̄ ī kɛlā lɛ iyī uwā lɛyíkwu odúúdú aɔ́dā nōo yá ā. 15Abɔ̄ é bá yɔ̄ ī kɔ̄kā, yɔ̄ ī tá ɛlā kwu ā, Ujísɔ̄si abɔ̄yīnū wā ŋmá igbīhi gaá gbɔɔ́ ō tíkpó mla uwá. 16É le ɔ́ má, amáŋ é jé ɔ̄ éjúuma ŋ́. 17Anɔ́ɔ Ujísɔ̄si da uwá kahíníī, “Ɔdí nɛ̄ aá yɔ̄ ī kɛlā lɛ iyī aá lɛyíkwu ɔ́ abɔ̄ aá bá ī yɛ ā?” Ɔtū le bīya lɛ uwá abɔ̄ é māháyi cíí ā. 18Anɔ́ɔ ɔ̄cɛ éyi kú uwā nēé hī Ukliyópasi ā, le ɔ̄kā da ɔ́ kahíníī, “Awɔ ofōōfuwɔ wɛ ugbɔ̄ga nōo wā Ujerúsālɛm nōó jé aɔ́dā nēe húmáyī yá abɔ́ɔ ipú ɛ̄cī nēe bá nyá ŋ́ má ā ā?” 19Ó dɔɔ̄kā kahíníī, “Ɔdínyá nɛ?” É da ɔ́ kahíníī, “Ɔdā nēé yá Ujísɔ̄si kú Unásārēti ā. Ɔ̄cɛ ɔ́ɔmā wɛ ɔ̄comɛ́ɛbɛ nɛ̄hi, aɔ́dā nɛ̄hi nōó yá mɛ́mla ɛlā nōó ka ā mafú ka Ɔwɔicō cɛ̄ɛ̄lā nū. Ɛjɛ̄ɛ̄jī ācɛ kē cɛ̄ɛ̄lā nū dúú. 20Aótrɛ̄yí kú ācogwɛ́ɛya mɛ́mla aɔ́wá kú aótrɛ̄yí ɔhá ā kwú ɔ̄ ú tū igbómína kú Uróm abɔ̄ kóō lɛ ɔ́ ŋmó. Anɔ́ɔ é kwú ɔ̄ ú nyɔ́kpá á. 21Alɔ leyīce gbɔbū ka anú wɛ ɔ̄cɛ nōo wā gáā hɛ́ ācɛ Ísrɛ̄lu tá á nɛɛ n! Amáŋ ícɛ wɛ ɛ̄cī ɔmɛtá ŋmífi nɛ̄ ɔdā ā yá yɔ̄ mɛ́ɛ̄ á. 22Ācɛnyā ōhī kú ígwu kú alɔ wā í lɛ alɔ ɔtū wuklíicō ofúlɔ̄cī mā. É le tá unóji kú nū, 23amáŋ é má okwū kú nū ŋ́. É kwúcē wā ī da alɔ ka aá le aálelékwū-ōtɛ̄hɔ̄ ɛpa má nēe da aá koó le héyī ɛɛ́. 24Ācɛ ōhī kú alɔ le yɛ tá únóji ā anɔ́ɔ ó lɛ ɛ́gɛ́nɛ̄ ācɛnyā ā ka lɛ ā yíílí, amáŋ é má okwū kú nū ŋ́.” 25Anɔ́ɔ Ujísɔ̄si da uwá kahíníī, “Aá líla íbí, ɔdíyá nōó lɔnɔ tū aá kóō cɛ̄ odúúdú ɛlā nɛ̄ ācomɛ́ɛbɛ ā ka ā? 26Ācomɛ́ɛbɛ ā í ka ɔ́ tɛ́ɛcɛ péee ka Ohɔ́nyɛtá ā í má ówē nēe bá nyā kpɛ́mm cɛ́ɛ́ kóō ga ipú ojīlīmā kú ɔcɛ́ kú nū. 27Anɔ́ɔ Ujísɔ̄si le ɛjɛ̄ɛ̄jī ɔdā nēé tá tāajɛ lɛyíkwu ɔ́ kpɛ́mm ipú ɛjɛ̄ɛ̄jī ɔkpíihɔ ā kpó ka lɛ uwá, gbɔɔ́ ŋmá ɔkpá kú Umósīsi mɛ́mla aɔ́dā nɛ̄ ɛjɛ̄ɛ̄jī ācomɛ́ɛbɛ ā tá tāajɛ ā.

28Abɔ̄ é le bá lɛ eyīpɔ́lɛ́ ɛga nēé bá yɔ̄ ī nyɔ̄ ā, Ujísɔ̄si le yá bɛ̄ɛka ɔdā nōó yɔ̄ ī yɛ gɔbū kpɔ́ ā. 29Amáŋ é lɛ ɔ́ kwú yāajɛ yɔ̄ ī gbɔ̄ɔkɔ lɛ ɔ́ kahíníī, “Yɔ̄ mla alɔ, ohígbū ka ɔ̄nɛ̄ le gbo ɛɛ́, otú kē gbɔɔ́ ō bī ɛɛ́” Anɔ́ɔ ó le tá ipú inu kóō yɔ̄ mla uwá á. 30Ó má cīce kóō lé ɔdōlé mla uwá. Ó kwú igbō ú, anɔ́ɔ ó le ahínyá tá Ɔwɔicō. Ó le ɔ́ ce, anɔ́ɔ ó kwú lɛ uwá á. 31Anɔ́ɔ igbeékpónú á nēé lɛ ɔ́ jéjúuma, anɔ́ɔ ó gebí tāajɛ ŋmá ipú uwā á. 32É da iyī uwā kahíníī, “Ɔtū he alɔ nɛ̄hi eko nōó yɔ̄ ī kɛlā lɛ alɔ ɔwɛ klla yɔ̄ ī ka ɛyí kú ɛlɔ̄ɔwɔicō lɛ alɔ ā.” 33Uwá cāŋ́jɛ bōōbū, anɔ́ɔ é kwúcē le yɛ tá Ujerúsālɛm á. Abɔ́ɔ ā, é má ayíkpó igwóléyi mɛ́mla ācɛ nēe bá mla uwā le jīla tɔ̄há, 34bá yɔ̄ ī ka kahíníī, “Óndú ā le héyī ɔkwɔ̄ɔ̄kwɛ̄yí. Ó lɛ iyīnū mafú lɛ Usáyímɔ̄ni ɛɛ́!” 35Anɔ́ɔ ācɛ ɛpa ā le ɔdā nōo yá ɔwɛ ā kpó ka lɛ uwá á. Ɛ́gɛ́nɛ̄ é jé ɔ̄ éjúuma klɔ́dɔ́ɔ́ eko nōo le igbo cē ɛpa ā.

Ujísɔ̄si le iyīnū mafú lɛ ayíkpó igwóléyi ā

(Umát 28.16-20; Umák 16.14-18; Ujɔ́n 20.19-23; Ācot 1.6-8)

36Eko nēé bá yɔ̄ ī kɛlā nyā ā, anɔ́ɔ igbeékpónú Ujísɔ̄si abɔ̄yī nū gaá háyi ipú uwā. Anɔ́ɔ ó da uwá kahíníī, “Ɛbɔ́ kóō yɔ̄ lɛ aá.” 37É hɛ́gilígilí, ufi le uwā kwú nɛ̄hi. É yɔ̄ ī gbɛlá ka inambo nɛ̄ aá yɔ̄ ī má á. 38Amáŋ ó da uwá kahíníī, “Ɔdíyá nɛ̄ aá hɛ́gilígilí ā? Ɔdíyá nɛ̄ aá cɛ̄ lɛ ɔtū kú aá í bɛ́ɛpa lɛyíkwu ɔ̄cɛ nɛ̄ n wɛ ā? 39Aá má abɔ̄ mɛ́mla ikpó kú um, kú aá jé koó wɛ ami abɔ̄yī um nɛ. Aá lɛ abɔ̄ kwu um kú aá má ɔ̄. Aá géē jé ka n lɛ ɛ́nɛ́bɛ́ ɔkpíyē mɛ́mla ikpokwú cɛ́ɛ́ aá géē cɛ̄ ka ami nɛ. Ń wɛ inambo ŋ́. Ohígbū ka inambo í gē lɛ ɛ́nɛ́bɛ́ ɔkpíyē mɛ́mla ikpokwú ŋ́. 40Abɔ̄ nōó le ɛlā nyā ka ā, ó le abɔ̄ kú nū mɛ́mla ikpó kú nū mafú lɛ uwá? 41Ɔtū le he ayíkpó ā nɛ̄hi, é klla le hídáagó nɛ̄ɛ̄nɛ̄hi nōó cɛ̄ lɛ uwá cɛ̄ koó wɛ anú ɔkwɛyí ŋ́. Anɔ́ɔ ó da uwá ɔ̄kā kahíníī, “Aá lɛ ɔdā dúúmā amānyā nɛ̄ ɔ̄cɛ í lé déē? 42É kwú ɛbéenyi ōnwū ú lɛ ɔ́, 43ó mīyɛ anɔ́ɔ ó kwú ɔ́ ú lé iyɔ̄bu uwā á.

44Anɔ́ɔ ó da uwá kahíníī, “Aɔ́dā piíí nyā nɛ̄ n kɛlā lɛ aá lɛyíkwu uwā eko nɛ̄ n yɔ̄ mla aá kpɔ́ ɛ́ɛ́ mā. Ɛjɛ̄ɛ̄jī ɔdā nēé tá tāajɛ lɛyíkwu um ipú ɔkpá íne kú Umósīsi mɛ́mla ipú ɔkpá kú ācomɛ́ɛbɛ mɛ́mla ipú ɔkpá kú Aíjē olɔhi ā géē yá jīla piíí.” 45Anɔ́ɔ ó le ɔfú je lɛ uwá kéē jɛ́yí ɔkpíihɔ ā á. 46Anɔ́ɔ ó da uwá kahíníī, “Ɛ̄nyā wɛ ɔdā nēé tá tāajɛ á. É géē je Ohɔ́nyɛtá ā ŋmó cɛ́ɛ́ ó kē ī héyī ŋmá ɔlékwū ɛ̄cī ɔ́mɛta piíí. 47É klla tá ɔ̄ ipú ɔkpíihɔ keé géē tɔ́ɔna kú olɛhɔ̄ nyā tɛ́ɛcɛ ka ācɛ kéē le pīyabɔ̄ ŋmá íne nēe ī bīya ā, cɛ́ɛ́ Ɔwɔicō í je yá uwā ɛhi. É géē tɔ́ɔna kú olɛhɔ̄ nyā aflɛ́yí ipú Ujerúsālɛm cɛ́ɛ́ é í tɔ́ɔna lɛ ɛjɛ̄ɛ̄jī ācɛ nēe bá ɛga dóódu ā. 48Aá wɛ ijáalí kú odúúdú aɔ́dā nēe bá nyā á. 49#Ācot 1.4Ami abɔ̄yī um géē tū ɔdā nɛ̄ Ádā um cokónu lɛ aá gé lɛ aá. Amáŋ aá géē gbēyī ipú igelī kú Ujerúsālɛm amānyā jāā gbéeko nēé gáā lɛ ɔfú nōo ŋmá ɔkpáncō ā tū aá iyē.”

É kwú Ujísɔ̄si ú ga ɔkpáncō (Umáki 16.19-20, Uklkú 1. 9-11)

50 # Ācot 1.9-11 Anɔ́ɔ Ujísɔ̄si le uwá kpó tɔ̄ɔkwu ŋmá igelī ā jāā ga Ubɛ́tāni á. Abɔ́ɔ ā, ó je abɔ̄ kú nū gicō le ɔhā hɛ́ ce uwá. 51Abɔ̄ ó yɔ̄ ī hɔ́hā ce uwá ā, ó nyɛ̄ɛ̄ ŋmá ɛgiyí uwā, anɔ́ɔ é kwú ɔ̄ ú gicō ga ipú ɔkpáncō á. 52É le ɛ̄gbā gbā ɔ̄ anɔ́ɔ é kwúcē ga Ujerúsālɛm á. Éeyē le mu uwá ipú nɛ̄hi. 53É le odúúdú eko kú uwā táajɛ ipú Agblīihɔ-nɛ̄hi ā yɔ̄ gē cɛ̄tra Ɔwɔicō.

Pilihan Saat Ini:

ULÚKU 24: IFBCL

Sorotan

Berbagi

Salin