Luka 24

Yesu Ku Thlata Akwa Mtəmta

(Mat 28:1-10; Mar 16:1-8; Yah 20:1-10)

1Ɗəɗəpə mbing ar vir na ntangkəma akwa sati, antə mwanki nda kətə sur shiwura na msəra tə da ɗəmhə ni, ka təra mwari ata kul ni. 2Antə da wuta abbər mdə ku takələmta pela na ata mnya kul ni. 3Amma sakatə da ku ləkwa kuta kul ni, da aɗi wutə mshiyir Mthlaku Yesu wa. 4Da akwa damitədzi ata kəra su ngəni, təng təkəma da wutə mji shili laga suɗa na ka ləptər ɗa akwa mbəlmbəla apa wurka, athləthlata adzə ɗa. 5Kamnyar tə mwanki ni akwa thlivəra, antə da dləri kəma ɗa ata di. Antə mji ni pəla ala ɗa, “Kamnyar mi tə giri akwa bara mdə na ka mpika akwa nca mji na mtəmtari ri? 6Tsa aɗi azi wa! Tsa ku thlata! Ɗangtə giri su tə tsa pəla ala giri sakatə tsa tsu akwa Galili ni. 7Tsa pəla, ‘Ku ndzi dwali ka mdə hamta Ɓzər Mda akwa tsiya mjir biku, ka da kukwamta ni, akwa vir na makərkur ka tsa ata thlata.’ ” #Mat 16:21; 17:22-23; 20:18-19; Mar 8:31; 9:31; 10:33-34; Luk 9:22; 18:31-33

8Antə mwanki ni ɗangtə gariyirni nda. 9Sakatə da thlata ata kul ni ka si, antə da pəla shanga suayeri ngəni aka mjir thlipə na kumkantang ni, ka shanga mambila mji. 10Mwanki na pəla suayeri ngəni aka aposəlayeri ni an Maryamu Magdalin, ka Yuwana, ka Maryamu na mama' Yakub, kəga mwanki damwa na adzə ɗa. 11Amma aposəlayeri ni namtə ndər tə mwanki pəla ala ɗa ni apa sur gyali, da aɗi mbərsatə ɗa wa.

12Amma Bitrəs thlatə mwat, ka hwi mwari adzə kula ni. Antə tsa nggyarghəidzi ka wulhə kuta kul ni, ka wutə yadər lilin ni apwi abwa duku. Antə tsa ngka aharngkiɗa akwa dzama ata kəra surndatə ngəni.

Yesu Ata Lakur Mwari Ahar Immawus

(Mar 16:12-13)

13Tsu vir nda, mji laga aɗi suɗa akwa nca mjir nu Yesu na akwa mwari akwa di laga na ka thləmari Immawus, daɓwa ɗa ka Urushalima an apa kilomita kumkantang. 14Da akwa gari ata kəra shanga suayeri na ku hara ni. 15Sakatə da akwa gari ata kəra suayeri laga, təng Yesu mwari adzə ɗa, ka təra ata kəma duku kəga da. 16Amma mdə hartə nca ɗa, har tə da aɗi mzhi nggaɓəla ni wa. 17Antə Yesu pəla ala ɗa, “Man su tə giri akwa gari ata kər sakatə giri akwa mwa nə ri?”

Antə da thləthlatə tsəkəm, ka ɗəffa ɗa ɓzəɓzari. 18Antə pal akwa nca ɗa na ka thləmari Klopas ni, shinau alari ka pəla, “I tamatə gə shinga an mətəpi akwa Urushalima, na aɗi nggata ata kəra suayeri na hara akwa kuta virayeri nə wa!”

19Antə tsa pəla ala ɗa, “Suayeri madə ri?”

Antə da pəla alari, “Su na hara aka Yesu na mdər Nazareth ni. Tsa an naɓi na ka duna akwa kəthlər ka akwa gari, akəma Hyel ka akəma shanga mji ni. 20Amma pristayeri na ol'ola kəga kuthlyayeri, ku hamta ni tə mdə hara alari shariyar mta, ka kukwamta ni. 21Amma yeru pəla nggwa tsa an ata sə mbuli Israila! Tsuwa ashina an vir na makərkur ka harar su ni. 22Ata kəra ngəni tsuwa, mwanki laga akwa nca yeru ku ndatə yeru. Kamnyar da dli mwari akwa vəi kul ni ashina ɗəɗəpa, 23amma da aɗi wutə mshiyirni wa. Antə da si akwa pəla abbər har da wulsu ka wutə mjirthlentərhyel, na pəla ala ɗa abbər na tsa ka mpika. 24Tsuwa mji aɗi akwa nca yeru na mwari adzə kul ni, ka wutə tsu apa su tə mwanki ni pəla, tsa ka kərari da aɗi wutə ni wa.”

25Antə Yesu pəla ala ɗa, “Haba, kamnyar mi tə giri ana nggaɓəla su wa ri? Giri amzhi mbərsa təkəma ka kəlara su tə naɓiyayeri pəla wa!” 26Aɗi ndzi dwali abbər ka Kristi ɗar bwaniyir suayeri ngəni, kambəla tsa ləkwa səliyirni wa ya? 27Antə tsa ngkərɓəla ala ɗa su tə mdə pəla ata kərari akwa shanga kakaɗayeri, baɗitə ka kakaɗayeri ar Musa, har ka vədza aka ar shanga naɓiyayeri.

28Sakatə da ku hara kudzəhə ka di tə da akwa mwari akwa ni, antə Yesu hara apa tsa ata ləkəma. 29Amma da ndzangkir alari akwa pəla, “Ndzi adzə yeru bu, təng tahaku abaka hara ni, kamnyar pci aɗi kəra diya mai.” Apani antə tsa ləvəi, ka ndzəndzi ata kəma duku kəga da. 30Sakatə da akwa səm susəma, antə tsa kətə buradi, ka vədza barka aka ri, ka ɓəgəlwa, ka na ala ɗa. 31Təng təkəma nca ɗa kəlardzi, tə da ku nggaɓəla ni. Antə tsa jaktə sha ala ɗa. 32Antə mdə na duku ni pəla aka nvwa ni, “Saka tə tsa akwa gari ala mwa ata laku ni, mwa aɗi akwa ngga apa ɗəffa mwa akwa mba mwa wa, sakatə tsa akwa ngkərɓəla ala mwa kakaɗayeri ar Hyel ni?”

33Antə da thlatə tsu ata saka nda, ka jaktə ngka ahar Urushalima. Antə da wutə mjir thlipə na kumkantang tsaptədzi ata vəi duku, kəga mji damwa tsuwa adzə ɗa. 34Antə da pəla, “Diya Mthlaku ku thlatə jiri! Har tsa ncantə kərni aka Siman!”

35Antə mji na suɗə ni ngkərɓəla ala ɗa shanga suayeri na hara ala ɗa ata laku, ka apatə da ku nggaɓəla ni sakatə tsa akwa ɓəgəlwa buradi ala ɗa.

Yesu Ku Ncantə Kərni Aka Mjirthlipərni

(Mat 28:16-20; Mar 16:14-18; Yah 20:19-23; Kəth Apos 1:6-8)

36Sakatə da tsu akwa ngkər su ni, təng nggədza Yesu surni athləthlata akwa nca ɗa. Antə tsa pəla ala ɗa, “Ka msərakur ndzi adzə giri!”

37Amma da ku ndatədzi ka ləkwa thlivər ka duna, da akwa dzama abbər sakani da akwa wul mambəl laga. 38Amma Yesu pəla ala ɗa, “Kamnyar mi tə giri akwa damitədzi nə ri? Tsuwa kamnyar mi tə giri akwa yuyu su akwa ɗəffa giri nə ri? 39Wulhə giri tsi ka səli, ka giri nggaɓəla abbər I ka kəri. Tsəkwar gir ra, ka giri wuta. Kamnyar mambəl aɗi ka kumər dza wala ɗethlu, apatə giri akwa wul ra kəgari nə wa.”

40Aghəla tə tsa pəla ndər ngəni, antə tsa ncanta ala ɗa tsiyari ka səlari. 41Amma təng tə da aɗi kuri hamta jiri wa kamnyar jili kucali ka surndatə ni, antə tsa yu ɗa abbər, “Giri ka su tə giri ata səmari azi ya?” 42Antə da na alari kəlfa ptsaptsari, 43antə tsa dlu ka ɓɗəmnya ata nca ɗa.

44Antə tsa pəla ala ɗa, “Ngəni an Suayeri tə I pəla ala giri sakatə I ata vəi duku ka giri, abbər shanga suayeri tə mdə rəbuta ata kəri akwa tsawur Musa, ka kakaɗər naɓiyayeri, ka Zabura ni, dwali ka da sə nghyaɓəladzi.”

45Sakanda antə Yesu ku kəlar dzamər ɗa, kamnyar ka da nggaɓəla su na akwa kakaɗayeri ar Hyel ni. 46Antə tsa pəla ala ɗa, “Apani antə mdə rəbuta abbər tar ka Kristi ɗar bwani, akwa vir na makərkur ka tsa thlata akwa mtəmta. 47Tsuwa ka mdə ngkər labar ar tubi ka ar tifəmta bikayeri akwa thləmari, aka shanga mjir duniya, baɗita ahar Urushalima. 48Giri an seɗar suayeri ngəni. 49Nggədza tsuwa I ata sə thlentə ala giri su tə Təddarna hara alkawalari ala giri. Amma ka giri ndzi tsu akwa kuta di, tar ma giri ku dlu duna akwar amtazi.” #Kəth Apos 1:4

Yesu Ku Ləmtazi

(Mar 16:19-20; Kəth Apos 1:9-11)

50Antə tsa ləɓəla ka da har tə da mzhitə Bethlani. Antə tsa haptə tsiyari ka vədza ala ɗa barka.#Kəth Apos 1:9-11 51Sakatə tsa ku vədza ala ɗa barka ni, antə tsa ndəkəmtadzi ka da, tə mdə ku kətə ni akwa ləmtazi ka tsa. 52Antə da vəngkər səli alari, ka jaktə ngka ahar Urushalima, nghyinghyari ka kucali. 53Tsuwa da ləkəma ka ndzi akwa mbwar vəngkər səli akwa hu Hyel.

Pilihan Saat Ini:

Luka 24: KNB

Sorotan

Berbagi

Salin