Yahwana 3

Yesu Ka Nikodemus

1Mdə laga aɗi ka thləmari Nikodemus na akwa nca mjir Farisi, tsuwa tsa ola akwa nca mjir Yahudi. 2Vir laga mdə ngəni si adzə Yesu aviri ka pəla alari, “Rabbi, Yeru ku sənda abbər Hyel an thlentə nga ka gə sə thlipa ala yeru, kamnyar mda aɗi na amzhi hara surndatayeri ngəni tə ga akwa harari nə wa, tar ma Hyel adzə ni.”

3Antə Yesu pəla alari, “I akwa pəla ala gə jirkur, mda aɗi na ata mzhi ləkwa kuthlikurər Hyel wa, tar ma mdə ku jaktə yaɓəla ni ka damwa.”

4Antə Nikodemus yu ni abbər, “Apa madi tə mda ata mzhi yaɓəla mdə na ku hala apani ri? Tsa ata mzhi jaktə ləkwa kuta mama'ni ka mdə jaktə yaɓəla ni ka damwa ya?” 5Antə Yesu shinau ka pəla, “I akwa pəla ala gə jirkur, mda aɗi na mzhi ləkwa kuthlikurər Hyel wa, tar ma mdə ku yaɓəla ni atar yimi ka Mambəla. 6Mdə tə mdə yaɓəla ni atar dza daci, ata ndzi mdə ndzang, amma mdə tə yaɓəla ni atar Mambəl ata ndzi ka mambəla. 7Antə ga aɗiya ndatədzi kamnyar tə I pəla ala ga abbər tar ka mdə jaktə yaɓəla nga ka damwa nə wa. 8Kamnyar shambar ana fya akwa kəlara bwa tə tsa hira. Ga ana nggatə kurakari, amma ga aɗi ana səndə vəi tə tsa thlata akwa wala vəi tə tsa ata mwari akwa wa. Tsu apani antə shanga mji na yaɓəladzi atar Mambəl ata ndzi akwa.”

9Antə Nikodemus jaktə pəla alari, “Apa madi tə su ngəni ata mzhi hara ri?” 10Antə Yesu shinau alari ka pəla, “Gə maləm na ola akwa Israila, amma wala apani ga aɗi nggaɓəla su ngəni wa? 11I akwa pəla ala gə jirkur, yeru ana gari ata kəra su tə yeru ku sənda, ka hara seɗa ata kəra su tə yeru ku wuta. Amma wala apani giri aɗi akwa hir dlu ndərər yeru wa. 12Ma I akwa pəla ala giri suayeri na akwa duniya, amma giri aɗi hamta jiri aka ri wa, apa madi tə giri ata mzhi hamta jiri ma I pəla ala giri ata kəra suayeri na amtazi ri? 13Kamnyar mda aɗi na ku ɗar mwari amtazi wa, tar Ɓzər Mda na thlata amtazi ka səghəi.

14 “Kamnyar apatə Musa ku haptə pwapur əmza ata udzəm akwa mtaku, antə ata ndzi dwali ka mdə haptə Ɓzər Mda, 15kamnyar ka kəlara mdə na ku hamta jiri alari, wutə mpikə na akur wa.

16 “Kamnyar Hyel ku hir duniya, antə tsa hamta Ɓzərni na duku shini, abbər kəlara mdə na ku hamta jiri alari aɗiya mtə wa, amma ka tsa wutə mpikə na akur wa. 17Kamnyar Hyel aɗi thlentə Ɓzərni akwa duniya kamnyar ka tsa hara shariya aka duniya wa, amma kamnyar ka duniya wutə mbantədzi atar ni.

18 “Kəlara mdə na ku hamta jiri alari, mda aɗi ata hara alari shariya wa. Amma kəlara mdə na aɗi hamta jiri alari wa, shariya ku kurtə ngkəi ni, təng tə tsa aɗi hamta jiri aka Ɓzər Hyel na duku shini wa ni. 19Shariya ni an apani, parakəu ku si akwa duniya, amma mji ku hir kuthlu ta parakəu, kamnyar harar ɗa an ɗimi. 20Kamnyar kəlara mdə na ana hara ɗimikur ana nggəlar parakəu, antə tsa aɗi ata hir si adzə parakəu nə wa, kamnyar ta surhararni na ɗimi ni asə ndzi ata bəbal. 21Amma kəlara mdə na ana hara su akwa jirkur, tsa ana si adzə parakəu, kamnyar ka mji wutə hararni ni ata bəbal, abbər tsa akwa hara su tə Hyel akwa barari.”

Yahwana Ku Haptə Səliyir Yesu

22Aghəla ngəni antə Yesu ka mjirthlipərni ku mwari akwa tsəɗi Yahudiya, ka ɗarndzi anda akwa hara baptizma aka mji. 23Tsuwa Yahwana akwa hara baptizma ahar Ainon kudzəhə ka Salim, kamnyar yimi aɗi hang akwa vəi ndaga. Antə mji akwa kəɗar mwari adzə ni kamnyar ka mdə hara ala ɗa baptizma. 24Saka nda mda aɗi vu Yahwana akwa pərsəna katagu wa. #Mat 14:3; Mar 6:17; Luk 3:19-20

25Antə beɗi ku thlata akwa daɓwa mjir thlipər Yahwana ka mdər Yahudi laga ata kəra surharar ɗa abwar kəcimtadzi. 26Antə da si adzə Yahwana ka pəla alari, “Maləm, mdə tə giri ka tsa aɓəla bwanda Thlyagha Jodan ni, natə ga ku gari ata kərari ni, nggədza ni kulini akwa hara baptizma, tsuwa shanga mji akwa mwari adzə ni.”

27Antə Yahwana shinau ka pəla, “Mda aɗi na ata mzhi wutə su wa, tar ma Hyel ku hamta alari amtazi. 28Giri ka kəra giri an seɗarna ata kəra su tə I pəla abbər, ‘I aɗi Kristi wa, amma mdə ku thlentə ra kəi si kəmata tsa.’ #Yah 1:20 29Akwa vəi kəldzi mdə na ka amaliya akəla ri an sala mwala ni. Antə pazhir sala mwala ni, na athləthlata adzə ni ana hara kucali ka duna akwa kəlara sakatə tsa ku nggatə kuraka sala mwala ni. Antə kulini kucalərna ku nghyantədzi. 30Arni tar ka tsa jakjaka, amma arna tar kəi kəmta kəmtadzi.”

Mdə Na Thlata Amtazi Tsan Olta Shang

31Mdə na ku thlata amtazi an mdə na ku təramta shanga mji ka olkur. Shanga mji na akwa duniya an ar duniya, tsuwa da ana gari ata kəra suayeri na akwa duniya. Amma tsa na ku thlata amtazi tsan ata kəra shanga su. 32Tsa ana gari ata kəra su tə tsa ku wutə ka nggata, amma wala apani antə mda aɗi na ku dlu ndərərni wa. 33Amma shanga mji na ku dlu ndərərni ku seɗata abbər jiri Hyel ni ka jirkur. 34Kamnyar mdə tə Hyel thlentə ni akwa ngkər ndərər Hyel, kamnyar Hyel ku hamta alari mambələrni na mda amzhi ngkərɓəlari wa. 35Kamnyar Tədda ni ku hir Ɓzərni, antə tsa ku hamta shanga su akwa tsiyari. #Mat 11:27; Luk 10:22 36Kəlara mdə na ku hamta jiri aka Ɓzər, tsa ka mpikə na akur wa, amma kəlara mdə na aɗi kələngkər aka Ɓzər wa, tsa aɗi ata wutə mpikə na jirari wa, amma tsa ata kəɓa ka ɗəffə bwarbwarkurər Hyel.

Pilihan Saat Ini:

Yahwana 3: KNB

Sorotan

Berbagi

Salin