လံာ်ယိၤဟၣ် 20
20
တၢ်သွၣ်ခိၣ်အပူၤလၢအလီၤဟိ
(မး. ၂၈:၁-၈; မၢ်. ၁၆:၁-၈; လူၤ. ၂၄:၁-၁၂)
1လၢမုၢ်ခီၣ်ထံးနံၤဂီၤဂီၤဒီးတၢ်ခံးဒံးအဆၢကတီၢ်န့ၣ်, ပှၤမၤကဒါလၣ်မုၣ်နီၢ်မၤရံလဲၤဆူတၢ်သွၣ်ခိၣ်ဒီးထံၣ် ဘၣ်ဝဲလၢလၢၢ်လၢအအိၣ်လၢတၢ်ပူၤခိၣ်ထိးန့ၣ်, ဘၣ်တၢ်သုးကွံာ်အီၤလံန့ၣ်လီၤ. 2အန့ၣ်ဒီး, အဝဲလဲၤဃ့ၢ်ဆူစီၤၡံမိၣ်ပ့းတရူးဒီးအပျဲၢ် အဘီၣ်အဂၤတဂၤလၢယ့ၣ်ၡူးအဲၣ်အီၤအအိၣ်ဒီးစံးဘၣ် အဝဲသ့ၣ်, “ပှၤစိာ်ကွံာ်ကစၢ်အစိၣ်လၢတၢ်သွၣ်ခိၣ် အပူၤလံ. ဒီးပှၤပာ်အီၤဖဲလဲၣ်န့ၣ်ပတသ့ၣ်ညါဘၣ်.”
3အန့ၣ်ဝံၤ, စီၤပ့းတရူးဒီးအပျဲၢ်အဘီၣ်အဂၤတဂၤန့ၣ် ဟးထီၣ်ဒီးလဲၤဝဲဆူတၢ်သွၣ်ခိၣ်န့ၣ်လီၤ. 4အဝဲသ့ၣ်ခံဂၤလိာ်န့ၣ်ဃ့ၢ်ဝဲ, ဘၣ်ဆၣ်အပျဲၢ်အဘီၣ်အဂၤ တဂၤန့ၣ်ဃ့ၢ်ချ့န့ၢ်စီၤပ့းတရူးဒီးလဲၤတုၤဆိဝဲလၢတၢ်သွၣ် ခိၣ်ပူၤန့ၣ်လီၤ. 5အဝဲသကူးလီၤအသးဒီးကွၢ်နုာ်တၢ်ဒီးထံၣ်ဘၣ်ဝဲ တၢ်ကံးယာ်ဖှီဝါကဆှၣ်တဖၣ်အိၣ်ပာ်လီၤအသး, ဘၣ်ဆၣ်တလဲၤနုာ်ဝဲဘၣ်. 6စီၤၡံမိၣ်ပ့းတရူးဟဲလၢအဝဲအလီၢ်ခံ, ဒီးတဘျီဃီလဲၤနုာ်ဝဲဆူတၢ်သွၣ်ခိၣ်အပူၤ န့ၣ်လီၤ. ဒီးထံၣ်ဘၣ်ဝဲတၢ်ကံးယာ်ဖှီဝါကဆှၣ်အိၣ် ပာ်လီၤအသးဖဲန့ၣ်, 7ဒီးထံၣ်စ့ၢ်ကီးဝဲတၢ်ကံးယာ်လၢပှၤဖၢၣ်ဃာ်ယ့ၣ်ၡူး အခိၣ်န့ၣ်လီၤ. ခိၣ်ဖၢၣ်အံၤတအိၣ်တပူၤဃီဒီးတၢ်ကံးယာ်ဖှီဝါ ကဆှၣ်တဖၣ်န့ၣ်ဘၣ်. မ့မ့ၢ်အိၣ်ထူထီၣ်အသးလၢအလီၢ်ဒၣ် ဝဲန့ၣ်လီၤ. 8အန့ၣ်ဝံၤ, အပျဲၢ်အဘီၣ်လၢအလဲၤတုၤဆိလၢတၢ်သွၣ်ခိၣ်ပူၤ တဂၤန့ၣ်, လဲၤနုာ်စ့ၢ်ကီးဝဲ, ထံၣ်ဘၣ်တၢ်ဒီးနာ်တၢ်လီၤ. 9(အန့ၣ်ဒၣ်လဲာ်, တၢ်ကွဲးအသးလၢအစံးဝဲလၢယ့ၣ်ၡူး ကဘၣ်ဂဲၤဆၢထၢၣ်က့ၤလၢတၢ်သံန့ၣ်, အဝဲသ့ၣ်တနၢ်ပၢၢ် ဒံးဝဲဘၣ်န့ၣ်လီၤ.) 10အန့ၣ်ဝံၤ, အပျဲၢ်အဘီၣ်တဖၣ်က့ၤကဒါက့ၤဆူအဟံၣ်ဒၣ် ဝဲန့ၣ်လီၤ.
ယ့ၣ်ၡူးလီၣ်ဖျါထီၣ်အသးလၢပှၤမၤကဒါလၣ်မုၣ် နီၢ်မၤရံ
(မး. ၂၈:၉-၁၀; မၢ်. ၁၆:၉-၁၁)
11နီၢ်မၤရံဆၢထၢၣ်ဒီးဟီၣ်ဝဲဖဲတၢ်သွၣ်ခိၣ်ပူၤအချၢ, ဒီးဖဲအဟီၣ်ဝဲအခါန့ၣ်, အဝဲသကူးလီၤအသးဒီးကွၢ်နုာ် တၢ်ဆူတၢ်သွၣ်ခိၣ်အပူၤ, 12ဒီးထံၣ်ဘၣ်ဝဲကလူးခံဂၤကူကၤတၢ်အဝါ, ဆ့ၣ်နီၤဝဲဖဲယ့ၣ်ၡူးအစိၣ်အိၣ်တ့ၢ်ဝဲအလီၢ်, လၢအခိၣ်ထးတဂၤဒီးလၢအခီၣ်ထံးတဂၤန့ၣ်လီၤ. 13အဝဲသ့ၣ်သံကွၢ်အီၤ, “နီၢ်ဧၢ, ဘၣ်မနုၤအဃိလၢနဟီၣ် န့ၣ်လဲၣ်.”
အဝဲစံးဆၢတၢ်ဒီးစံးဝဲ, “အဝဲသ့ၣ်စိာ်ကွံာ်ယကစၢ်န့ၣ်လံ. ဒီးပာ်ဝဲဖဲလဲၣ်န့ၣ်ယတသ့ၣ်ညါဘၣ်.”
14စံးတၢ်န့ၣ်ဝံၤ, အဝဲဃၣ်တရံးအသးဒီးထံၣ်ဘၣ်ဝဲယ့ၣ်ၡူး ဆၢထၢၣ်ဖဲန့ၣ်, ဘၣ်ဆၣ်အဝဲတသ့ၣ်ညါလၢအမ့ၢ်ယ့ၣ်ၡူး ဘၣ်န့ၣ်လီၤ. 15ယ့ၣ်ၡူးသံကွၢ်အီၤ, “နီၢ်ဧၢ, ဘၣ်မနုၤအဃိလၢနဟီၣ် န့ၣ်လဲၣ်. မ့ၢ်နဃုမတၤတဂၤန့ၣ်လဲၣ်.”
နီၢ်မၤရံဆိကမိၣ်ဝဲလၢအမ့ၢ်ပှၤကွၢ်တၤသၣ်အလီၢ် အဃိစံးဘၣ်အီၤ, “တၢ်ဒိၣ်ဧၢ, နမ့ၢ်စိာ်ကွံာ်အီၤဒီးနပာ်အီၤဖဲ လဲၣ်န့ၣ်, စံးဘၣ်တဲဘၣ်ယၤတက့ၢ်. ယကလဲၤဒီးဟံးန့ၢ်က့ၤ အီၤလီၤ.”
16ယ့ၣ်ၡူးကိးထီၣ်အီၤ, “နီၢ်မၤရံဧၢ” အဝဲဃၣ်အသးဆူအအိၣ်ဒီးကိးဆၢက့ၤအီၤလၢဧ့ၤဘြံၤ အကျိာ် “ရၤဘူနံၤဧၢ” (အခီပညီမ့ၢ် ‘သရၣ်’ လီၤ.)
17ယ့ၣ်ၡူးစံးဘၣ်အီၤ, “တဘၣ်ဖိးဃာ်ယၤတဂ့ၤ. အဂ့ၢ်ဒ်လဲၣ်န့ၣ်, ယတက့ၤထီၣ်ဘၣ်ဆူပၢ်အအိၣ်ဒံးဘၣ်. မ့မ့ၢ်လဲၤဆူယဒီပုၢ်ဝဲၢ် တဖၣ်အအိၣ်ဒီးစံးဘၣ်တဲဘၣ်အဝဲသ့ၣ်လၢယက့ၤထီၣ်ကဒါ က့ၤဆူပှၤလၢအမ့ၢ်ယပၢ်ဒီးမ့ၢ်အဝဲသ့ၣ်အပၢ်, ယကစၢ်ယွၤဒီးအဝဲသ့ၣ်အကစၢ်ယွၤအအိၣ်န့ၣ်တက့ၢ်.”
18အန့ၣ်ဒီး, ပှၤမၤကဒါလၣ်မုၣ်နီၢ်မၤရံလဲၤဒီးစံးဘၣ်တဲဘၣ် အပျဲၢ်အဘီၣ်တဖၣ်လၢအဝဲထံၣ်ဘၣ်ကစၢ်ဒီးတၢ်လၢ ကစၢ်စံးဘၣ်တဲဘၣ်တ့ၢ်အီၤတဖၣ်န့ၣ်လီၤ.
ယ့ၣ်ၡူးလီၣ်ဖျါထီၣ်အသးလၢအပျဲၢ်အဘီၣ်တဖၣ်
(မး. ၂၈:၁၆-၂၀; မၢ်. ၁၆:၁၄-၁၈; လူၤ. ၂၄:၃၆-၄၉)
19ဖဲမုၢ်ခီၣ်ထံးနံၤမုၢ်ဟါလီၤတ့ၢ်လံအကတီၢ်န့ၣ်, အပျဲၢ်အဘီၣ်တဖၣ်ပာ်ဖှိၣ်ထီၣ်အသးဒီးမ့ၢ်လၢ အဝဲသ့ၣ်ပျံၤဘၣ်ပှၤယူဒၤဖိအခိၣ်အနၢ်တဖၣ်အဃိ, တြဲၤတဖၣ်ဘၣ်တၢ်ကးတံာ်ဃာ်အီၤလီၤ. တုၤနုၤတစုယ့ၣ်ၡူးဟဲဒီးအိၣ်ဆၢထၢၣ်လၢအဝဲသ့ၣ်အသိး အကျါဒီးစံး, “မ်တၢ်ဃူတၢ်ဖိးအိၣ်ဒီးသုတက့ၢ်.” 20စံးတၢ်အံၤဝံၤဒီး, အဝဲဒုးနဲၣ်အဝဲသ့ၣ်တဖၣ်လၢအစုဒီးအကပၤ န့ၣ်လီၤ. အပျဲၢ်အဘီၣ်တဖၣ်သူၣ်ခုသးခုဝဲလၢအထံၣ်ဘၣ် ကစၢ်အဃိန့ၣ်လီၤ. 21ယ့ၣ်ၡူးစံးဘၣ်ကဒီးအဝဲသ့ၣ်, “မ်တၢ်ဃူတၢ်ဖိးအိၣ်ဒီးသု တက့ၢ်. ဒ်ပၢ်မၢလီၤတ့ၢ်ယၤအသိး, ယမၢလီၤသုစ့ၢ်ကီးလီၤ.” 22ဝံၤဒီးယ့ၣ်ၡူးသါသဖှိထီၣ်လၢအဝဲသ့ၣ်အလိၤဒီးစံး, “ဒိးန့ၢ်သး စီဆှံတက့ၢ်. 23သုမ့ၢ်ပျၢ်ကွံာ်ပှၤအတၢ်ဒဲးဘးတဖၣ်ဒီး, အတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤလီၤ. သုမ့ၢ်တပျၢ်ကွံာ်အဝဲသ့ၣ်အတၢ်ဒဲးဘးတဖၣ် ဘၣ်ဒီး, တၢ်တပျၢ်ကွံာ်ဘၣ်အီၤဘၣ်.”
ယ့ၣ်ၡူးဒီးစီၤသိၤမါ
24ဖဲယ့ၣ်ၡူးဟဲဝဲန့ၣ်, စီၤသိၤမါ (လၢအဘၣ်တၢ်ကိးအီၤလၢပှၤ သဃံာ်) လၢအမ့ၢ်အပျဲၢ်အဘီၣ်တဆံခံဂၤအကျါတဂၤန့ၣ်, တအိၣ်လၢအဝဲသ့ၣ်အသိးအကျါဘၣ်. 25လၢတၢ်န့ၣ်အဃိ, အပျဲၢ်အဘီၣ်အဂၤတဖၣ်စံးဘၣ်အီၤ, “ပထံၣ်ဘၣ်လံကစၢ်လံ.”
စီၤသိၤမါစံးဘၣ်အဝဲသ့ၣ်, “မ့တမ့ၢ်ဘၣ်လၢယထံၣ်ဘၣ်ထးဆဲးဖျိအလီၢ်လၢ အစုလိၤဒီးကလၢၢ်ဘၣ်တၢ်ပူၤလီၢ်တဖၣ်န့ၣ်လၢယစုနၢ, ဒီးကလၢၢ်ဘၣ်အကပၤလၢယစုဘၣ်ဒီးယတနာ်ဘၣ်.” 26တၢ်မၤအသးအံၤဝံၤလၢခံတနွံန့ၣ်, အပျဲၢ်အဘီၣ်တဖၣ်ပာ်ဖှိၣ်ကဒီးအသးလၢဟံၣ် အပူၤဒီးအအံၤတဘျီစီၤသိၤမါအိၣ်ဒီးအဝဲသ့ၣ် န့ၣ်လီၤ. တြဲၤတဖၣ်ဘၣ်တၢ်ကးတံာ်အီၤ, ဘၣ်ဆၣ် ယ့ၣ်ၡူးဟဲဒီးဆၢထၢၣ်လၢအဝဲသ့ၣ်အသိးအကျါဒီးစံး, “မ်တၢ်ဃူတၢ်ဖိးအိၣ်ဒီးသုတက့ၢ်.” 27ဝံၤဒီးယ့ၣ်ၡူးစံးဘၣ်စီၤသိၤမါ, “ပာ်နစုနၢဖဲအံၤဒီးကွၢ်ယစု တဖၣ်အံၤတက့ၢ်. ဝံၤဒီးယူာ်ဃီၤနစုဒီးကလၢၢ်ကွၢ်ယကပၤ တက့ၢ်. ဆိကတီၢ်လၢနတၢ်သးဒ့ဒီဒီးနာ်တၢ်တက့ၢ်.”
28စီၤသိၤမါစံးဆၢယ့ၣ်ၡူး “ယကစၢ်ဒီးယကစၢ်ယွၤ” န့ၣ်လီၤ.
29ယ့ၣ်ၡူးစံးဘၣ်အီၤ, “မ့ၢ်နထံၣ်ဘၣ်ယၤအဃိနနာ် တၢ်ဧါ. ပှၤလၢအတထံၣ်ဘၣ်ယၤသနာ်က့နာ်တၢ်တဖၣ်န့ၣ်, ဘၣ်ဆိၣ်ဂ့ၤဝဲလီၤ.”
လံာ်အံၤအတၢ်တိာ်
30ယ့ၣ်ၡူးမၤတၢ်လီၤလးအဂၤတဖၣ်တဘျုးမံၤလၢအပျဲၢ်အဘီၣ် တဖၣ်အမဲာ်ညါ, ဘၣ်ဆၣ်တဘၣ်တၢ်ကွဲးနီၣ်ကွဲးဃါအီၤလၢလံာ်အံၤအပူၤဘၣ် န့ၣ်လီၤ. 31ဘၣ်ဆၣ်တၢ်သ့ၣ်တဖၣ်အံၤဘၣ်တၢ်ကွဲးဃာ်အီၤ, မ့ၢ်ဒ်သိးသုကနာ်လၢယ့ၣ်ၡူးမ့ၢ်ခရံာ်, ကစၢ်ယွၤအဖိခွါ, ဒီးခီဖျိသုတၢ်နာ်အီၤန့ၣ်, သုကန့ၢ်ဘၣ်တၢ်မူအဂီၢ်န့ၣ်လီၤ.
Pilihan Saat Ini:
လံာ်ယိၤဟၣ် 20: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
