လံာ်ယိၤဟၣ် 13
13
ယ့ၣ်ၡူးသ့အပျဲၢ်အဘီၣ်တဖၣ်အခီၣ်
1ဖဲဘူၣ်လဲၤကပာ်တချုးဘၣ်တနံၤန့ၣ်, ယ့ၣ်ၡူးသ့ၣ်ညါဝဲလၢ တၢ်ဆၢကတီၢ်နၣ်ရံၣ်တုၤအိၣ်အီၤလၢအဝဲကဘၣ်ဟးထီၣ် ကွံာ်လၢဟီၣ်ခိၣ်အံၤဒီးက့ၤဆူပၢ်အအိၣ်န့ၣ်လီၤ. အဝဲအဲၣ်ဘၣ်ပှၤတဖၣ်လၢဟီၣ်ခိၣ်အံၤလၢအမ့ၢ်အတၢ် ဒၣ်ဝဲ, ဒီးအဲၣ်အီၤတုၤအကတၢၢ်န့ၣ်လီၤ.
2ယ့ၣ်ၡူးဒီးအပျဲၢ်အဘီၣ်တဖၣ်အီၣ်ဟါတၢ်အီၣ်အခါ, မုၣ်ကီၤလံၢ်ဒၢနုာ်တ့ၢ်လံဝဲတၢ်ကူၣ်လၢအကဟ့ၣ်လီၤကွံာ် ယ့ၣ်ၡူးလၢစီၤၡံမိၣ်အဖိခွါစီၤယူဒၤအံၣ်စကၤရံၤအိာ် အသးပူၤန့ၣ်လီၤ. 3ယ့ၣ်ၡူးသ့ၣ်ညါဝဲလၢပၢ်ဟ့ၣ်လံအီၤတၢ်စိတၢ်ကမီၤလၢာ်လၢာ် ဆ့ဆ့, ဒီးသ့ၣ်ညါစ့ၢ်ကီးဝဲလၢအဝဲဟဲလၢကစၢ်ယွၤအအိၣ် ဒီးကက့ၤဆူကစၢ်ယွၤအအိၣ်န့ၣ်လီၤ. 4လၢတၢ်န့ၣ်အဃိ, အဝဲဂဲၤဆၢထၢၣ်လၢတၢ်အီၣ်အလီၢ်, ဘ့ၣ်လီၤကွံာ်အဆ့ကၤဖီခိၣ်, ဒီးစၢဃာ်အယီၢ်ဒ့လၢတၢ်ကံး ယာ်လၢပှၤထွါပှၤလိၤတဘ့ၣ်န့ၣ်လီၤ. 5ဝံၤဒီးအဝဲလူလီၤထံလၢသရာ်အပူၤဒီးစးထီၣ်သ့အပျဲၢ်အဘီၣ် တဖၣ်အခီၣ်ဒီးထွါသူထီၣ်က့ၤဝဲလၢတၢ်ကံးယာ်လၢအစၢဃာ် အယီၢ်ဒ့တဘ့ၣ်န့ၣ်လီၤ. 6ဖဲယ့ၣ်ၡူးဟဲတုၤစီၤၡံမိၣ်ပ့းတရူးအအိၣ်ဒီး, အဝဲစံးဘၣ်အီၤ, “ကစၢ်ဧၢ, မ့ၢ်နကသ့ယခီၣ်စ့ၢ်ကီးဧါ.”
7ယ့ၣ်ၡူးစံးဆၢအီၤ, “တၢ်လၢယမၤခဲအံၤန့ၣ်, နတနၢ်ပၢၢ်ဘၣ်. ဘၣ်ဆၣ်လၢခံက့ၤနကနၢ်ပၢၢ်လီၤ.”
8စီၤပ့းတရူးစံးဝဲ “နတဘၣ်သ့ယခီၣ်နီတဘျီဘၣ်.” ယ့ၣ်ၡူးစံးဆၢအီၤ, “ယမ့ၢ်တသ့ဘၣ်နခီၣ်ဒီးနတဘၣ် ဃးဒီးယၤလၢၤဘၣ်.”
9စီၤၡံမိၣ်ပ့းတရူးစံးဆၢအီၤဒီးစံး “ကစၢ်ဧၢ, မ့မ့ၢ်ဒ်န့ၣ်ဒီး, တဘၣ်သ့ထဲယခီၣ်တဂ့ၤ. သ့ဃုာ်စ့ၢ်ကီးယစုတဖၣ်ဒီးယခိၣ် တက့ၢ်.”
10ယ့ၣ်ၡူးစံးဝဲ, “ပှၤတဂၤလၢ်လၢ်လၢအလုၢ်ထံဝံၤန့ၣ်, ကဆှီဝဲလၢာ်လၢာ်ဆ့ဆ့လံအဃိသ့ကွံာ်အသးအလီၢ် တအိၣ်လၢၤဘၣ်. ကဘၣ်သ့ကွံာ်ဒၣ်ထဲအခီၣ်ဧိၤန့ၣ်လီၤ. မ့တမ့ၢ်ဘၣ်ထဲပှၤလၢသုကျါတဂၤဧိၤန့ၣ်, သုဝဲခဲလၢာ်သု ကဆှီလံ.” 11(ယ့ၣ်ၡူးသ့ၣ်ညါတ့ၢ်ပှၤလၢအကဟ့ၣ်လီၤကွံာ်အီၤဒီးလၢတၢ်န့ၣ် အဃိအဝဲစံးဝဲ “မ့တမ့ၢ်ဘၣ်ထဲပှၤလၢသုကျါတဂၤဧိၤ န့ၣ်, သုဝဲခဲလၢာ်သုကဆှီလံန့ၣ်လီၤ.”)
12တုၤယ့ၣ်ၡူးသ့အဝဲသ့ၣ်အခီၣ်ဝံၤဒီး, အဝဲကၤထီၣ်က့ၤအဆ့ကၤ အဖီခိၣ်ဒီးက့ၤကဒါက့ၤဆူအလီၢ်လၢစီၢ်နီၤခိၣ်အကပၤန့ၣ်လီၤ. ဝံၤဒီးသံကွၢ်အဝဲသ့ၣ် “တၢ်လၢယမၤဘၣ်တ့ၢ်သုအံၤ, သုနၢ်ပၢၢ်စ့ၢ်ကီးဧါ. 13သုကိးယၤလၢသရၣ်ဒီးကစၢ်ဒီးသုကတိၤတၢ်ဒ်အံၤမ့ၢ်တၢ်လၢ အဘၣ်လီၤ. အဂ့ၢ်ဒ်အံၤယမ့ၢ်တၢ်အဝဲန့ၣ်လီၤ. 14ယၤလၢယမ့ၢ်သုကစၢ်ဒီးသုသရၣ်အံၤ, မ့ၢ်သ့ကွံာ်သုခီၣ်ဒီး, သုဝဲသ့ၣ်ကဒဲကဒဲသုကြၢးသ့ကွံာ်လိာ်သုခီၣ်လီၤ. 15ယပာ်လီၤန့ၢ်သုတၢ်အဒိအတဲာ်အံၤ, ဒ်သိးသုကမၤတၢ်ဒ်ယမၤတ့ၢ်သုအသိးန့ၣ်လီၤ. 16ယစံးဘၣ်တဲဘၣ်သုတၢ်မ့ၢ်တၢ်တီ, ကုၢ်တဒိၣ်န့ၢ်အကစၢ်နီတဂၤ ဘၣ်. ဒီးပှၤစိာ်တၢ်ကစီၣ်တဒိၣ်န့ၢ်ပှၤလၢအမၢလီၤအီၤနီတဂၤဘၣ်. 17ခဲအံၤမ့ၢ်လၢသုသ့ၣ်ညါတၢ်မ့ၢ်တၢ်တီအံၤလံဒီး, သုမ့ၢ်မၤအီၤန့ၣ်, သုကဘၣ်ဆိၣ်ဂ့ၤနီၢ်နီၢ်လီၤ.
18ယတကတိၤတၢ်လၢသုဝဲခဲလၢာ်အဂ့ၢ်ဘၣ်. ယသ့ၣ်ညါပှၤလၢ ယဃုထၢအီၤတဖၣ်လီၤ. ဘၣ်ဆၣ်တၢ်ကွဲးအသးကဘၣ် လၢထီၣ်ပှဲၤထီၣ်လၢအစံးဝဲ, ‘ပှၤလၢအအီၣ်တၢ်ဒီးယၤတဂၤ န့ၣ်ထီဒါယၤလီၤ’ (စံး. ၄၁:၉). 19ခဲအံၤတချုးလၢတၢ်မၤအသးဒံးဘၣ်န့ၣ်, ယတဲဘၣ်သုလၢတၢ်ဂ့ၢ် တဖၣ်အံၤဒ်သိးတုၤတၢ်မၤအသးဒီး, သုကနာ်လၢ ‘ယမ့ၢ်တၢ်လၢ ယမ့ၢ်’ န့ၣ်လီၤ. 20ယစံးဘၣ်တဲဘၣ်သုတၢ်မ့ၢ်တၢ်တီ, ပှၤတဂၤလၢ်လၢ်လၢအတူၢ်လိာ်ပှၤလၢယမၢလီၤအီၤန့ၣ်, မ့ၢ်အတူၢ်လိာ်ယၤစ့ၢ်ကီးဒီးပှၤတဂၤလၢ်လၢ်လၢအတူၢ် လိာ်ယၤန့ၣ်, တူၢ်လိာ်ပှၤလၢအမၢလီၤယၤစ့ၢ်ကီးန့ၣ်လီၤ.
ယ့ၣ်ၡူးတဲဆိပာ်တၢ်ကဟ့ၣ်လီၤကွံာ်အီၤအဂ့ၢ်
(မး. ၂၆:၂၀-၂၅; မၢ်. ၁၄:၁၇-၂၁; လူၤ. ၂၂:၂၁-၂၃)
21ယ့ၣ်ၡူးစံးတၢ်အံၤဝံၤဒီးအသးဘၣ်တံာ်တာ်ဒိၣ်ဒိၣ် ကလဲာ်ဒီးကတိၤဖျါထီၣ်ဝဲ, ‘ယစံးဘၣ်တဲဘၣ်သုတၢ်မ့ၢ် တၢ်တီ, ပှၤလၢသုကျါတဂၤကဟ့ၣ်လီၤကွံာ်ယၤလီၤ.”
22အပျဲၢ်အဘီၣ်တဖၣ်ကွၢ်လိာ်အသးတဂၤဒီးတဂၤ, မ့ၢ်လၢအဝဲအဲၣ်ဒိးစံးမတၤတဂၤလဲၣ်န့ၣ်, အဝဲသ့ၣ် တသ့ၣ်ညါဝဲအဃိလီၤ. 23အပျဲၢ်အဘီၣ်အကျါတဂၤလၢယ့ၣ်ၡူးအဲၣ်အီၤန့ၣ်, သန့ၤလီၤတၢ်သဃဲၤလိာ်အသးဒီးယ့ၣ်ၡူးန့ၣ်လီၤ. 24စီၤၡံမိၣ်ပ့းတရူးကျၢၢ်ကျာ်အခိၣ်ဆူအအိၣ်ဒီးစံး, “တၢ်န့ၣ်မ့ၢ်မတၤလဲၣ်န့ၣ် သံကွၢ်အီၤတက့ၢ်.”
25အဃိဒီး, အပျဲၢ်အဘီၣ်တဂၤအံၤသုးဘူးအသးဆူယ့ၣ်ၡူး အကပၤဝံၤသံကွၢ်အီၤ, “ကစၢ်ဧၢ, နစံးတၢ်န့ၣ်မ့ၢ်မတၤတဂၤလဲၣ်.”
26ယ့ၣ်ၡူးစံးဆၢတၢ်ဒီးစံးဝဲ, “ယကဘျၢလီၤကိၣ်လၢလီခီပူၤဒီးပှၤလၢယဟ့ၣ်လီၤအီၤ တဂၤန့ၣ်, မ့ၢ်ပှၤအဝဲန့ၣ်လီၤ. ထဲန့ၣ်ဒီးအဝဲဟံးန့ၢ်ကိၣ်, ဘျၢလီၤအီၤလၢလီခီပူၤဝံၤဟ့ၣ်လီၤဝဲစီၤယူဒၤလၢအမ့ၢ် စီၤၡံမိၣ်အံၣ်စကၤရံၤအိာ်အဖိခွါန့ၣ်လီၤ. 27တုၤစီၤယူဒၤဟံးန့ၢ်အီၣ်ကိၣ်ဝံၤတဘျီဃီဒီး, မုၣ်ကီၤလံၢ်နုာ်လီၤလၢအသးပူၤန့ၣ်လီၤ. ယ့ၣ်ၡူးစံးဘၣ်အီၤ, “တၢ်လၢနကဘၣ်မၤန့ၣ်မၤချ့ချ့တက့ၢ်.” 28ဘၣ်မနုၤအဃိယ့ၣ်ၡူးစံးဘၣ်အီၤတၢ်ဒ်အံၤလဲၣ်န့ၣ်, ပှၤအဂၤလၢအအီၣ်သကိးတၢ်ဒီးအီၤတဖၣ်တနၢ်ပၢၢ်နီ တဂၤဘၣ်. 29မ့ၢ်လၢစီၤယူဒၤပၢၤစ့အထၢၣ်အဃိ, အပျဲၢ်အဘီၣ်တနီၤဆိ ကမိၣ်ဝဲလၢယ့ၣ်ၡူးစံးဘၣ်အီၤလၢအကလဲၤပှ့ၤတၢ်လၢ အဝဲလိၣ်ဘၣ်ဝဲလၢဘူၣ်အဂီၢ်, မ့တမ့ၢ်ဘၣ်ဒီးလၢကဟ့ၣ် လီၤပှၤဖှီၣ်ဖိယာ်ဖိလၢတၢ်တမံၤမံၤန့ၣ်လီၤ.
30စီၤယူဒၤဟံးန့ၢ်ကိၣ်ဒီးဟးထီၣ်ကွံာ်ဝဲတဘျီဃီ န့ၣ်လီၤ. ဘၣ်မုၢ်နၤခီအဆၢကတီၢ်လီၤ.
တၢ်မၤလိာ်အသီ
31စီၤယူဒၤဟးထီၣ်ကွံာ်ဝံၤအလီၢ်ခံ, ယ့ၣ်ၡူးစံးဝဲ, “ခဲကနံၣ်အံၤပှၤကညီဖိခွါအလၤကပီၤအိၣ်ဖျါထီၣ်ဝဲ, ဒီးကစၢ်ယွၤအလၤကပီၤအိၣ်ဖျါထီၣ်ဝဲခီဖျိအီၤန့ၣ်လီၤ. 32ဒီးကစၢ်ယွၤအလၤကပီၤမ့ၢ်ဘၣ်တၢ်လီၣ်ဖျါထီၣ်ခီဖျိအီၤ ဒီး, ကစၢ်ယွၤကလီၣ်ဖျါပှၤကညီဖိခွါအလၤကပီၤလၢ အပူၤဒၣ်ဝဲ, ဒီးကမၤဝဲခဲကနံၣ်အံၤလီၤ. 33ယဖိယလံၤသ့ၣ်ဧၢ, ယတအိၣ်ဒီးသုယံာ်ယံာ်လၢၤဘၣ်. သုကဃုယၤဘၣ်ဆၣ်ဒီးဒ်ယစံးဘၣ်တ့ၢ်ပှၤယူဒၤဖိအခိၣ် အနၢ်တဖၣ်အသိးန့ၣ်, ယစံးဘၣ်တဲဘၣ်သုခဲကနံၣ်အံၤ, ‘တၢ်လီၢ်လၢယလဲၤန့ၣ်သုလဲၤတသ့ဘၣ်.’ 34ဒီးခဲကနံၣ်အံၤယဟ့ၣ်သုတၢ်မၤလိာ်အသီတထံၣ်, အဲၣ်လိာ်ကွံလိာ်သုသးတဂၤဒီးတဂၤတက့ၢ်. ဒ်ယအဲၣ်တ့ၢ်သု အသိးန့ၣ်, သုကဘၣ်အဲၣ်လိာ်ကွံလိာ်သုသးတဂၤဒီး တဂၤဒ်န့ၣ်အသိးလီၤ. 35သုမ့ၢ်အဲၣ်လိာ်ကွံလိာ်သုသးတဂၤဒီးတဂၤန့ၣ်ဒီး, ပှၤကိးဂၤဒဲးကသ့ၣ်ညါလၢသုမ့ၢ်ယပျဲၢ်ယဘီၣ်တဖၣ်လီၤ.”
ယ့ၣ်ၡူးကတိၤဆိပာ်စီၤပ့းတရူးကသမၢအီၤအဂ့ၢ်
(မး. ၂၆:၃၁-၃၅; မၢ်. ၁၄:၂၇-၃၁; လူၤ. ၂၂:၃၁-၃၄)
36စီၤၡံမိၣ်ပ့းတရူးသံကွၢ်ယ့ၣ်ၡူး, “ကစၢ်ဧၢ, နကလဲၤဆူလဲၣ်.” ယ့ၣ်ၡူးစံးဆၢအီၤ, “တၢ်လီၢ်လၢယကလဲၤန့ၣ်, နလဲၤပိာ်ယခံ ခဲအံၤတသ့ဘၣ်. ဘၣ်ဆၣ်လၢခံန့ၣ်နကဟဲပိာ်ယခံလီၤ.”
37စီၤပ့းတရူးသံကွၢ်အီၤ, “ကစၢ်ဧၢ, ယလဲၤပိာ်နခံခဲအံၤတသ့ န့ၣ်ဘၣ်မနုၤလဲၣ်. ယအိၣ်ကတဲာ်ကတီၤယသးလၢယကဟ့ၣ် လီၤယသးသမူလၢနဂီၢ်လီၤ.”
38ယ့ၣ်ၡူးစံးဆၢတၢ်ဒီးစံးဝဲ, “မ့ၢ်နအိၣ်ကတဲာ်ကတီၤနသးနီၢ်နီၢ်လၢ နကဟ့ၣ်လီၤနသးသမူလၢယဂီၢ်လံဧါ. ယစံးဘၣ်တဲဘၣ်နၤတၢ်မ့ၢ် တၢ်တီ, တချုးလၢဆီဖါကီၢ်အိၣ်အိထီၣ်ဒံးဘၣ်န့ၣ်, နကသမၢယၤသၢဘျီလၢနတသ့ၣ်ညါယၤဘၣ်န့ၣ်လီၤ.”
Pilihan Saat Ini:
လံာ်ယိၤဟၣ် 13: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
