မၤတၢ် တၢ်ကတိၤဆှၢနုာ်
တၢ်ကတိၤဆှၢနုာ်
လံာ်ပှၤတၢ်မၢဖိတဖၣ်အတၢ်ဖံးတၢ်မၤတဘ့ၣ်အံၤမ့ၢ်တၢ်ကွဲးလၢ အပိာ်ထွဲထီၣ်စီၤလူၤကၣ်အလံာ်တၢ်သးခုကစီၣ်န့ၣ်လီၤ. အတၢ်တိာ်မိၢ်ပှၢ်မ့ၢ်လၢအကစံးဘၣ်တဲဘၣ်တၢ်ဘၣ်ဃး ပှၤပိာ်ယ့ၣ်ၡူးအခံအဆိကတၢၢ်တဖၣ်လၢအဘၣ်တၢ်ပၢတၢ်ဆှၢ အီၤလၢသးစီဆှံသတးဒီး, ရၤလီၤတၢ်သးခုအကစီၣ်ဘၣ်ဃးယ့ၣ်ၡူး, “လၢဝ့ၢ်ယရူၤၡလ့ၣ်, ဒီးသကုၤကီၢ်ယူဒၤဒီးကီၢ်ၡၤမရံ, ဒီးတုၤလၢဟီၣ်ခိၣ်အကတၢၢ်န့ၣ်လီၤ” (၁:၈). မ့ၢ်တၢ်ဂ့ၢ်ဘၣ်ဃးပှၤခရံာ်ဖိအတၢ်ဟူးတၢ်ဂဲၤ, လၢအစးထီၣ်အသးလၢပှၤယူဒၤဖိအသိးအကျါ, ဒီးလဲၤအသးတဆီဘၣ်တဆီတုၤအကဲထီၣ်တၢ်စူၢ်တၢ်နာ် တကလုာ်လၢဟီၣ်ခိၣ်ဒီဘ့ၣ်ညါအဂီၢ်န့ၣ်လီၤ. ပှၤကွဲးလံာ်တဂၤအံၤအသးအိၣ်စ့ၢ်ကီးလၢအကဒုးမံသူၣ်မံသး ဘၣ်ပှၤဖးတၢ်ဖိတဖၣ်လၢပှၤခရံာ်ဖိတဖၣ်, တမ့ၢ်တီနံတၢ်လီၤပျံၤလီၤဖုးအလီၢ်လၢထံဂ့ၢ်ကီၢ်ဂ့ၢ်တကပၤ လၢကမၤဟးဂီၤကွံာ်ပှၤရိမ့ၤဖိအဘီမုၢ်အဂီၢ်န့ၣ်ဘၣ်. ဒီးလၢပှၤခရံာ်ဖိအတၢ်စူၢ်တၢ်နာ်မ့ၢ်ဝဲတၢ်မၤလၢထီၣ်ပှဲၤ ထီၣ်က့ၤပှၤယူဒၤဖိအတၢ်ဘူၣ်တၢ်ဘါတခီန့ၣ်လီၤ.
လံာ်တဘ့ၣ်အံၤပနီၤဖးလီၤအီၤသ့သၢတီၤ, ဒ်ပထံၣ်ဘၣ်တၢ်ဒုးဟူထီၣ်သါလီၤတၢ်သးခုအကစီၣ် ဘၣ်ဃးယ့ၣ်ၡူးဒီးတၢ်ဒုးကဲထီၣ်ဒီးမၤဂၢၢ်မၤကျၢၤ တၢ်အိၣ်ဖှိၣ်န့ၣ်, မၤအသးလၢတၢ်လီၢ်တပူၤဘၣ်တပူၤ ဒီးလဲၢ်ထီၣ်ဝဲကွ့ၢ်ကွ့ၢ်အသိးန့ၣ်လီၤ.
(၁) ပှၤခရံာ်ဖိအတၢ်ဟူးတၢ်ဂဲၤစးထီၣ်သးလၢဝ့ၢ်ယရူၤၡလ့ၣ် အပူၤဖဲယ့ၣ်ၡူးက့ၤထီၣ်က့ၤဆူမူခိၣ်ဝံၤအလီၢ်ခံ
(၂) အတၢ်ဒိၣ်ထီၣ်လဲၢ်ထီၣ်လၢတၢ်လီၢ်အဂၤတဖၣ်ဖဲကီၢ်ပၤလၤ စတဲၣ်အပူၤဒီး
(၃) အတၢ်ဒိၣ်ထီၣ်လဲၢ်ထီၣ်ဆူထံကီၢ်အိၣ်ဝးတရံးပီၣ်လဲၣ်မဲဒံး ထၢၣ်ရ့နယၢၣ်အပူၤပၢၢ်တုၤလၢဝ့ၢ်ရိမ့ၤန့ၣ်လီၤ.
တၢ်လၢအကါဒိၣ်ဝဲဒီးအိၣ်ဖျါလီၤဆီတမံၤလၢလံာ်မၤတၢ် တဘ့ၣ်အံၤအပူၤန့ၣ်, မ့ၢ်သးစီဆှံအတၢ်ဟူးတၢ်ဂဲၤအတၢ်ဖံး တၢ်မၤန့ၣ်လီၤ. အဝဲဒၣ်ဟဲလီၤအိၣ်ဒီးတၢ်စိတၢ်ကမီၤလၢ ပှၤစူၢ်ပှၤနာ်တၢ်ဖိတဖၣ်အလိၤလၢဝ့ၢ်ယရူၤၡလ့ၣ်အပူၤဖဲဘူၣ် ယဲၢ်ဆံအမုၢ်နံၤန့ၣ်လီၤ. သးစီဆှံပၢဆှၢဒီးဟ့ၣ်ဂံၢ်ဟ့ၣ်ဘါဝဲ တၢ်အိၣ်ဖှိၣ်ဒီးတၢ်အိၣ်ဖှိၣ်အခိၣ်အနၢ်တဖၣ်လၢတၢ်မၤ အသးခဲလၢာ်လၢအဘၣ်တၢ်ကွဲးဖျါအီၤလၢလံာ်အံၤအပူၤ န့ၣ်လီၤ.
ခရံာ်ဖိအဆိကတၢၢ်အတၢ်ကစီၣ်ဘၣ်တၢ်ဟ့ၣ်ထီၣ်အီၤဖုၣ် ကိာ်ခီဖျိတၢ်စံၣ်တဲၤတဲလီၤတဘျုးယုၢ်, ဒီးတၢ်မၤအသးလၢအဘၣ်တၢ်ကွဲးဖျါအီၤတဖၣ်အံၤ, လီၣ်ဖျါထီၣ်တၢ်ကစီၣ်အံၤအစိကမီၤလၢပှၤစူၢ်ပှၤနာ်တၢ်ဖိ တဖၣ်အတၢ်အိၣ်မူအပူၤ, ဒီးလၢတၢ်အိၣ်ဖှိၣ်အတၢ်ရ့လိာ်မုာ်လိာ်သးအပူၤန့ၣ်လီၤ.
လံာ်အတကွီၣ်
တၢ်ကတဲာ်ကတီၤလၢတၢ်အုၣ်အသးအဂီၢ် ၁:၁-၂၆
(က) ယ့ၣ်ၡူးအတၢ်မၤလိာ်လၢခံကတၢၢ်ဒီးအတၢ်စံးပာ် ၁:၁-၁၄
(ခ) ပှၤလၢအထီၣ်က့ၤစီၤယူဒၤအလီၢ် ၁:၁၅-၂၆
တၢ်အုၣ်အသးလၢဝ့ၢ်ယရူၤၡလ့ၣ်အပူၤ ၂:၁-၈:၃
တၢ်အုၣ်အသးလၢကီၢ်ယူဒၤဒီးကီၢ်ၡၤမရံအပူၤ ၈:၄-၁၂:၂၅
စီၤပီလူးအတၢ်သးခုကစီၣ်အတၢ်ဖံးတၢ်မၤ ၁၃:၁-၂၈:၃၁
(က) အတၢ်လဲၤအခီၣ်ထံးတဘျီ ၁၃:၁-၁၄:၂၈
(ခ) တၢ်အိၣ်ဖှိၣ်ရိဖှိၣ်လၢဝ့ၢ်ယရူၤၡလ့ၣ်အပူၤ ၁၅:၁-၃၅
(ဂ) တၢ်လဲၤခံဘျီတဘျီ ၁၅:၃၆-၁၈:၂၂
(ဃ) တၢ်လဲၤသၢဘျီတဘျီ ၁၈:၂၃-၂၁:၁၆
(င) စီၤပီလူးကဲပှၤဃိာ်ဖိလၢဝ့ၢ်ယရူၤၡလ့ၣ်, ကဲၤစါရံၤ, ဒီးဝ့ၢ်ရိမ့ၤတဖၣ်အပူၤ ၂၁:၁၇-၂၈:၃၁
Pilihan Saat Ini:
မၤတၢ် တၢ်ကတိၤဆှၢနုာ်: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.