မၤတၢ် 8
8
စီၤစီလူးမၤအၢမၤနးတၢ်အိၣ်ဖှိၣ်
1စီၤစီလူးအၢၣ်လီၤထွဲဝဲတၢ်မၤသံစီၤစတ့းဖၣ်န့ၣ်လီၤ.
တနံၤဃီအဝဲန့ၣ်, တၢ်အိၣ်ဖှိၣ်လၢဝ့ၢ်ယရူၤၡလ့ၣ်အပူၤဘၣ်တၢ်စးထီၣ်မၤအၢမၤနး အီၤနးမးလီၤ. မ့တမ့ၢ်ဘၣ်လၢပှၤတၢ်မၢဖိတဖၣ်ဘၣ်ဒီး, ပှၤစူၢ်က့ၤနာ်က့ၤတၢ်ခဲလၢာ်လီၤပြံလီၤပြါဝဲသကုၤကီၢ်ယူဒၤ ဒီးကီၢ်ၡၤမရံန့ၣ်လီၤ. 2သနာ်က့ဒီး, ပှၤအဲၣ်ထူအဲၣ်ယွၤတနီၤခူၣ်လီၤကွံာ်စီၤစတ့းဖၣ်ဒီးဟီၣ်တၢ် ယၢၤတၢ်လၢအဃိဒိၣ်ဒိၣ်ကလဲာ်လီၤ.
3မ့မ့ၢ်စီၤစီလူးတဂၤဂုာ်ကျဲးစၢးမၤဟးဂီၤကွံာ်တၢ်အိၣ်ဖှိၣ်န့ၣ်လီၤ. အဝဲဒၣ်နုာ်လီၤဟံၣ်တဖျၢၣ်ဝံၤတဖျၢၣ်, မိၤထီၣ်ကွံာ်ဝဲပှၤစူၢ်က့ၤနာ်က့ၤတၢ်တဖၣ်မုၣ်မုၣ်ခွါခွါ, ဒီးဒၢနုာ်အဝဲသ့ၣ်လၢဃိာ်ပူၤလီၤ.
တၢ်စံၣ်တဲၤတဲလီၤတၢ်သးခုအကစီၣ်လၢ ကီၢ်ၡၤမရံပူၤ
4ပှၤစူၢ်က့ၤနာ်က့ၤတၢ်လၢအလီၤပြံလီၤပြါတဖၣ်လဲၤဝဲသကုၤ ဆးဒးဒီးစံၣ်တဲၤတဲလီၤတၢ်သးခုအကစီၣ်န့ၣ်လီၤ. 5စီၤဖံလံးပူးလဲၤဝဲဆူကီၢ်ၡၤမရံအဝ့ၢ်ခိၣ်အပူၤ, ဒီးစံၣ်တဲၤတဲလီၤခရံာ်အဂ့ၢ်လၢပှၤအိၣ်ဖဲန့ၣ်တဖၣ်အဂီၢ်လီၤ. 6ပှၤဂီၢ်မုၢ်တဖၣ်နၢ်ဟူဘၣ်စီၤဖံလံးပူးအတၢ်စံးတၢ် ကတိၤဒီးထံၣ်ဘၣ်တၢ်လီၤလးတဖၣ်လၢအမၤဝဲဒၣ်သတးဒီး, ဒိကနၣ်အီၤလၢတၢ်သးစၢၢ်ဆၢအပူၤလီၤ. 7တၢ်နါအၢတဖၣ်ကိးပသူထီၣ်ဒီးဟးထီၣ်ကွံာ်လၢပှၤအါဂၤ အလိၤ, ဒီးပှၤသံတခီပၤဒီးပှၤခီၣ်ဟးဂီၤအါဂၤဘၣ်တၢ်မၤဘျါက့ၤ အီၤလီၤ. 8သတးဒီး, လၢဝ့ၢ်န့ၣ်အပူၤတၢ်သူၣ်ခုသးခုအိၣ်ဝဲဒိၣ်ဒိၣ်ကလဲာ်လီၤ.
9ပှၤလၢတၢ်ကိးအမံၤလၢစီၤၡံမိၣ်တဂၤအိၣ်ဝဲဖဲဝ့ၢ်န့ၣ်အပူၤ, ဒီးအဝဲဒၣ်ဒုးကမၢကမၣ်တ့ၢ်ပှၤၡၤမရံဖိတဖၣ်ခီဖျိအတၢ်မၤ ကဒါပှၤမဲာ်န့ၣ်လီၤ. အဝဲဒၣ်စံးလီၤအသးလၢအမ့ၢ်ပှၤဖးဒိၣ်တဂၤလီၤ. 10ပှၤကိးဂၤဒဲး, စးထီၣ်လၢပှၤဒိၣ်ပှၤပှၢ်တုၤလီၤလၢပှၤပတီၢ်မုၢ်လၢဝ့ၢ်န့ၣ် အပူၤဒိကနၣ်အီၤလၢတၢ်သးစၢၢ်ဆၢအပူၤလီၤ. အဝဲသ့ၣ်တဖၣ်စံးဝဲလၢစီၤၡံမိၣ်မ့ၢ်ကစၢ်ယွၤအစိကမီၤလၢ အဘၣ်တၢ်ကိးအီၤလၢတၢ်စိကမီၤဖးဒိၣ်န့ၣ်လီၤ. 11အဝဲသ့ၣ်ဒိကနၣ်အီၤလၢတၢ်သးစၢၢ်ဆၢအပူၤ, အဂ့ၢ်မ့ၢ်လၢအဝဲဒၣ်ဒုးကမၢကမၣ်အဝဲသ့ၣ်ယံာ်တ့ၢ်မးခီဖျိ အတၢ်မၤကဒါပှၤမဲာ်န့ၣ်လီၤ. 12ဘၣ်ဆၣ်ဒီးတုၤအဝဲသ့ၣ်စူၢ်က့ၤနာ်က့ၤတၢ်သးခုအကစီၣ် လၢစီၤဖံလံးပူးစံၣ်တဲၤတဲလီၤဝဲဘၣ်ဃးကစၢ်ယွၤအဘီအမုၢ်ဒီး ယ့ၣ်ၡူးခရံာ်အဂ့ၢ်န့ၣ်, အဝဲသ့ၣ်ဒိးဘျၢအသးလၢထံ, မုၣ်မုၣ်ခွါခွါန့ၣ်လီၤ. 13စီၤၡံမိၣ်အနီၢ်ကစၢ်ဒၣ်ဝဲစ့ၢ်ကီးစူၢ်က့ၤနာ်က့ၤတၢ်, ဒီးလၢအဘၣ်တၢ်ဘျၢအီၤလၢထံဝံၤအလီၢ်ခံ, အဝဲဒၣ်လဲၤက့ၤအိၣ်ဆိးဝဲထီဘိဒီးစီၤဖံလံးပူးလီၤ. တုၤအထံၣ်ဘၣ်ဝဲတၢ်ပနီၣ်လီၤလးဒီးတၢ်လီၤလိၢ်လီၤလး တဖၣ်န့ၣ်ဒီး, ကမၢကမၣ်ဝဲဒိၣ်ဒိၣ်ကလဲာ်လီၤ.
14တုၤပှၤတၢ်မၢဖိလၢဝ့ၢ်ယရူၤၡလ့ၣ်အပူၤတဖၣ်နၢ်ဟူဘၣ်ဝဲ လၢပှၤၡၤမရံဖိတဖၣ်တူၢ်လိာ်တ့ၢ်လံကစၢ်ယွၤကလုၢ်ကထါန့ၣ်ဒီး, ဆှၢလီၤစီၤပ့းတရူးဒီးစီၤယိၤဟၣ်လၢအကလဲၤဆူအဝဲသ့ၣ်အအိၣ်လီၤ. 15အဝဲသ့ၣ်လဲၤဝဲဒီးဃ့ဘါထုကဖၣ်ယွၤလၢပှၤၡၤမရံဖိလၢ အစူၢ်က့ၤနာ်က့ၤတၢ်တဖၣ် ကဒိးန့ၢ်ဘၣ်သးစီဆှံအဂီၢ်လီၤ. 16အဂ့ၢ်မ့ၢ်လၢသးစီဆှံတဟဲလီၤလၢအဝဲသ့ၣ်နီတဂၤအလိၤဒံးဘၣ်. မ့ၢ်ဒၣ်အဝဲသ့ၣ်ဘၣ်တၢ်ဘျၢအီၤလၢထံလၢကစၢ်ယ့ၣ်ၡူးအမံၤ အပူၤဧိၤလီၤ. 17အန့ၣ်ဒီးစီၤပ့းတရူးဒီးစီၤယိၤဟၣ်ပာ်ထီၣ်အစုလၢအဝဲသ့ၣ်အခိၣ် ဖီခိၣ်, ဒီးအဝဲသ့ၣ်ဒိးန့ၢ်ဘၣ်သးစီဆှံန့ၣ်လီၤ.
18တုၤစီၤၡံမိၣ်ထံၣ်ဘၣ်ဝဲလၢယွၤဟ့ၣ်လီၤပှၤစူၢ်က့ၤနာ်က့ၤတၢ် တဖၣ်လၢသးစီဆှံ, ခီဖျိပှၤတၢ်မၢဖိတဖၣ်အတၢ်ပာ်ထီၣ်အစုလၢအဝဲသ့ၣ် အလိၤန့ၣ်ဒီး, အဝဲဒၣ်ဟ့ၣ်စီၤပ့းတရူးဒီးစီၤယိၤဟၣ်လၢစ့, 19ဒီးစံးဝဲ, “ဟ့ၣ်စ့ၢ်ကီးယၤတၢ်စိကမီၤတမံၤအံၤ, ဒ်သိးပှၤတဂၤလၢ်လၢ်လၢယပာ်ထီၣ်ယစုလၢအလိၤန့ၣ်, ကဒိးန့ၢ်ဘၣ်ဝဲသးစီဆှံအဂီၢ်န့ၣ်တက့ၢ်.”
20စီၤပ့းတရူးစံးဆၢက့ၤအီၤ, “မ့ၢ်လၢနဆိကမိၣ်နဲလၢကစၢ်ယွၤ အတၢ်ဟ့ၣ်န့ၣ်နပှ့ၤအီၤလၢစ့ကန့ၢ်အဃိ, မ်နၤဒီးနစ့ကလီၤဒၣ်ဝဲဆူလရာ်ပူၤန့ၣ်တက့ၢ်. 21နတဘၣ်ထွဲဘၣ်ဃးဒီးပတၢ်မၤအံၤဘၣ်. အဂ့ၢ်မ့ၢ်လၢနသးတဘျၢလၢကစၢ်ယွၤအမဲာ်အတၢ်ထံၣ်အပူၤ အဃိလီၤ. 22နအိၣ်ဒီးနတၢ်ကူၣ်အအၢတမံၤအံၤအဃိနဘၣ်ပီၢ်ယၢ်ဒီးဃၣ်လိၤ က့ၤနသး, ဒီးဃ့ထုကဖၣ်ကစၢ်လၢကပျၢ်နတၢ်ကမၣ်မ့ၢ်လၢ နဆိကမိၣ်ထီၣ်တၢ်ဒ်သိးအံၤအဃိန့ၣ်လီၤ. 23အဂ့ၢ်မ့ၢ်လၢယထံၣ်လၢနသးပှဲၤဒီးတၢ်သူၣ်က့ၣ်သးကါဒီးနတၢ် ဒဲးဘးအံၤဖီၣ်စၢဃာ်နၤဒ်ပှၤဃိာ်ဖိတဂၤအသိးအဃိလီၤ.”
24စီၤၡံမိၣ်စံးဆၢက့ၤစီၤပ့းတရူးဒီးစီၤယိၤဟၣ်, “ဝံသးစူၤဃ့ထုကဖၣ်ကစၢ်လၢယဂီၢ်, ဒ်သိးတၢ်လၢသုစံးတ့ၢ်တဖၣ်အသုတဟဲဘၣ်ယၤနီတမံၤတဂ့ၤန့ၣ် တက့ၢ်.”
25တုၤအဝဲသ့ၣ်အုၣ်အသးဒီးတဲဖျါယွၤအတၢ်ကစီၣ်ဝံၤအလီၢ်ခံန့ၣ် စီၤပ့းတရူးဒီးစီၤယိၤဟၣ်က့ၤကဒါက့ၤဆူဝ့ၢ်ယရူၤၡလ့ၣ်လီၤ. ဖဲအက့ၤဝဲလၢကျဲန့ၣ်, အဝဲသ့ၣ်စံၣ်တဲၤတဲလီၤတၢ်သးခုအကစီၣ် အံၤလၢသဝီတဘျုးဖျၢၣ်အိၣ်လၢကီၢ်ၡၤမရံအပူၤန့ၣ်လီၤ.
စီၤဖံလံးပူးဒီးပှၤအဲၤသံအီးပးပဒိၣ်တဂၤ
26ကစၢ်အကလူးတဂၤစံးဘၣ်စီၤဖံလံးပူး, “ကတီၤထီၣ်နသးဝံၤလဲၤလီၤဆူကလံၤထံးတခီ, ဒီးပိာ်လီၤကျဲလၢအလဲၤလၢဝ့ၢ်ယရူၤၡလ့ၣ်ဆူဝ့ၢ်ဂါစၤန့ၣ်တက့ၢ်.” (ကျဲအံၤတဘၣ်တၢ်သူအီၤလၢၤဘၣ်). 27အန့ၣ်ဒီးစီၤဖံလံးပူးကတီၤထီၣ်အသးဒီးလဲၤဝဲလီၤ. အကတီၢ်ဖဲန့ၣ်တၢ်မၤအသးလၢပှၤအဲၤသံအီးပးအပှၤဒ့ဒံၣ်ဖိ လၢအမ့ၢ်ကီၢ်အဲၤသံအီးပးအနီၢ်ပၤမုၣ်တဂၤအပဒိၣ်ဖးဒိၣ်, ပှၤလၢအဘၣ်ပၢၤကျိၣ်ပၢၤစ့တဂၤန့ၣ်, လဲၤတၢ်လၢကျဲန့ၣ်လီၤ. အဝဲဒၣ်လဲၤတ့ၢ်ဝဲဆူဝ့ၢ်ယရူၤၡလ့ၣ်လၢကဘူၣ်ထူဘါယွၤ အဂီၢ်, 28ဒီးဘၣ်လၢအက့ၤကဒါက့ၤဆူအဟံၣ်, ဒီးဒိးအလ့ၣ်ကဟၣ်ဒၣ်ဝဲန့ၣ်လီၤ. ဖဲအဝဲက့ၤလၢကျဲအခါ, ဖးဝဲလံာ်ဝံယၡါယၤန့ၣ်လီၤ. 29သးစီဆှံစံးဘၣ်စီၤဖံလံးပူး, “လဲၤဃီၤဆူလ့ၣ်ကဟၣ်န့ၣ်အအိၣ်ဒီးဟးဖဲအကပၤန့ၣ်တက့ၢ်.” 30စီၤဖံလံးပူးလဲၤဃ့ၢ်ဝဲဆူလ့ၣ်ကဟၣ်အကပၤ, ဒီးနၢ်ဟူအဝဲဖးလံာ်ဝံယၡါယၤဒီးသံကွၢ်အီၤ, “တၢ်လၢနဖးန့ၣ်မ့ၢ်နနၢ်ပၢၢ်အခီပညီစ့ၢ်ကီးဧါ.”
31ပဒိၣ်န့ၣ်စံးဆၢက့ၤအီၤ, “ပှၤမ့ၢ်တအိၣ်လၢအကတဲနၢ်ပၢၢ်ယၤ တဂၤဘၣ်ဒီး, ယနၢ်ပၢၢ်ယဲကသ့ဒ်လဲၣ်.” သတးဒီးအဝဲဒၣ်ကွဲမုာ်အီၤဒီးစံး, “ဟဲထီၣ်ဒိးသကိးလ့ၣ်ကဟၣ်ဒီးယၤတက့ၢ်.” 32တၢ်ကွဲးအသးတတီၤလၢအဝဲဒၣ်ဖးဝဲန့ၣ်မ့ၢ်အအံၤ,
“ဒ်သိတဒုလၢတၢ်မိၤထီၣ်အီၤလၢ
တၢ်ကမၤသံအီၤအဂီၢ်အသိး,
ဒ်သိဆံးဖိတဒုဖဲတၢ်တံာ်အဆူၣ်အကတီၢ်န့ၣ်
တမၤသီၣ်ဘၣ်အကလုၢ်အသိး,
အဝဲဒၣ်တအဲးထီၣ်အထးခိၣ်ဘၣ်.
33အဝဲဒၣ်ဘၣ်တၢ်မၤမဲာ်ဆှးအီၤဒီးတၢ်စံၣ်ညီၣ်တီတအိၣ်ဘၣ် လၢအဂီၢ်ဘၣ်.
ပှၤလၢအကစံးကတိၤဘၣ်ဃးဒီးအဝဲဒၣ်
အစၢၤအသွဲၣ်အဂ့ၢ်ကသ့န့ၣ်တအိၣ်နီတဂၤဘၣ်.
အဂ့ၢ်မ့ၢ်လၢတၢ်ဟံးထီၣ်ကွံာ်အသးသမူလၢဟီၣ်ခိၣ်အံၤ အဃိန့ၣ်လီၤ.”
34ပဒိၣ်န့ၣ်သံကွၢ်ဝဲစီၤဖံလံးပူး, “တဲဘၣ်ယၤတက့ၢ်. ဝံတဂၤအံၤမ့ၢ်အကတိၤတၢ်လၢအကစၢ်ဒၣ်ဝဲအဂ့ၢ်ဧါ. မ့တမ့ၢ်ဘၣ်ဒီးမ့ၢ်အကတိၤတၢ်ဘၣ်ဃးပှၤအဂၤတဂၤဂၤ အဂ့ၢ်န့ၣ်လဲၣ်.” 35အန့ၣ်ဒီးစီၤဖံလံးပူးကတိၤထီၣ်တၢ်စးထီၣ်လၢတၢ်ကွဲး အသးတတီၤအံၤဝံၤ, စံးဘၣ်တဲဘၣ်အီၤလၢတၢ်သးခုအကစီၣ်ဘၣ်ဃး ယ့ၣ်ၡူးန့ၣ်လီၤ. 36ဒီးဖဲအလဲၤကဒီးဆူညါအဖၢမုၢ်န့ၣ်, အဝဲသ့ၣ်တုၤဃီၤဝဲဒၣ်လၢထံအိၣ်အလီၢ်တတီၤ, ဒီးပဒိၣ်န့ၣ်စံးဝဲ, “ထံအိၣ်ဖဲအံၤလီၤ. ယမ့ၢ်အဲၣ်ဒိးဒိးဘျၢယသးလၢထံဒီး, တၢ်လၢကတြီယကျဲမ့ၢ်အအိၣ်တမံၤမံၤဧါ.” 37(စီၤဖံလံးပူးစံးဘၣ်အီၤ, “နမ့ၢ်နာ်ယ့ၣ်ၡူးခရံာ်လၢနသးဒီဖျၢၣ်ညါဒီး, နဒိးဘျၢနသးလၢထံသ့ဝဲဒၣ်လီၤ.” အဝဲဒၣ်စံးဆၢက့ၤအီၤ, “ယနာ်လၢယ့ၣ်ၡူးခရံာ်မ့ၢ်ကစၢ်ယွၤအဖိခွါန့ၣ်လီၤ.”)
38ပဒိၣ်န့ၣ်မၤလိာ်ပှၤနီၣ်လ့ၣ်ကဟၣ်လၢအကပာ်ကတီၢ်အလ့ၣ် ကဟၣ်, ဒီးစီၤဖံလံးပူးဒီးပဒိၣ်လဲၤလီၤဝဲဆူထံကျါခံဂၤလၢာ်, ဝံၤစီၤဖံလံးပူးဘျၢပဒိၣ်န့ၣ်လၢထံလီၤ. 39တုၤအဝဲသ့ၣ်ဟဲက့ၤထီၣ်လၢထံကျါန့ၣ်ဒီး, ကစၢ်ယွၤအသးဟံးထီၣ်ကွံာ်စီၤဖံလံးပူးန့ၣ်လီၤ. ပဒိၣ်န့ၣ်တထံၣ်လၢၤအီၤနီတဘျီဘၣ်. ဘၣ်ဆၣ်ဒီးက့ၤက့ၤဝဲပှဲၤဒီးတၢ်သူၣ်ခုသးခုန့ၣ်လီၤ. 40စီၤဖံလံးပူးထံၣ်လၢအလဲၤတုၤလံလၢဝ့ၢ်အးစဒိာ်, ဒီးလဲၤကဒီးဝဲဆူညါတုၤအတုၤလၢဝ့ၢ်ကဲၤစါရံၤတစုလီၤ. ဖဲအလဲၤတၢ်လၢကျဲအခါ, အဝဲဒၣ်စံၣ်တဲၤတဲလီၤတၢ်သးခုအကစီၣ်ဘၣ်ဃးယ့ၣ်ၡူးခရံာ်, လၢဝ့ၢ်အိၣ်လၢတၢ်ဘၢၣ်စၢၤတဖၣ်န့ၣ်ကိးဝ့ၢ်ဒဲးအပူၤလီၤ.
Pilihan Saat Ini:
မၤတၢ် 8: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
