မၤတၢ် 6
6
ပှၤမၤစၢၤတၢ်ဖိနွံဂၤ
1လၢခံက့ၤဖဲအပျဲၢ်အဘီၣ်တဖၣ်အနီၣ်ဂံၢ်အါထီၣ်ဝဲကွ့ၢ်ကွ့ၢ်န့ၣ်, ပှၤယူဒၤဖိလၢအကတိၤထဲကြံးခ်အကျိာ်တဖၣ်ကဒူးကဒ့ၣ်ထီဒါ ပှၤယူဒၤဖိလၢအကတိၤအကျိာ်ဒၣ်ဝဲတဖၣ်န့ၣ်လီၤ. အဝဲသ့ၣ်စံးဝဲလၢဖဲအဘၣ်ဃးဒီးတၢ်ဟ့ၣ်နီၤလီၤလၢတနံၤဂီၢ် တနံၤဂီၢ်န့ၣ်, ပှၤတကနၣ်ဃုာ်အဝဲသ့ၣ်အပှၤမုၣ်ကမဲတဖၣ်ဘၣ် န့ၣ်လီၤ. 2အန့ၣ်ဒီးပှၤတၢ်မၢဖိတဆံခံဂၤန့ၣ်ကိးဖှိၣ်အပျဲၢ်အဘီၣ်အတၢ်အိၣ် ဖှိၣ်ဒီဖုညါဒီးစံးဘၣ်အဝဲသ့ၣ်, “လၢပကကွၢ်ကျဲၤတၢ်အီၣ်တၢ်အီအဂီၢ်န့ၣ်, ပမ့ၢ်ဘၣ်ဆိကတီၢ်ကွံာ်တၢ်စံၣ်တဲၤတဲလီၤယွၤကလုၢ်ကထါဒီး တမ့ၢ်တၢ်လၢအကြၢးအဘၣ်ဘၣ်. 3သတးဒီးဒီပုၢ်ဝဲၢ်သ့ၣ်ဧၢ, ဃုထၢထီၣ်ပှၤနွံဂၤလၢသုကျါ, လၢအဘၣ်တၢ်သ့ၣ်ညါအီၤဒ်အမ့ၢ်ပှၤတဖၣ်လၢအလၢပှဲၤဒီးသးစီ ဆှံဒီးတၢ်ကူၣ်သ့ဒီးပကပာ်လီၤမူဒါတခါအံၤလၢအဝဲသ့ၣ် အစုပူၤလီၤ. 4ပဝဲဒၣ်ပကစၢ်ဒၣ်ပဝဲတခီ, ပကဟ့ၣ်လီၤပဆၢကတီၢ်လၢာ်လၢာ်ဆ့ဆ့လၢတၢ်ထု ကဖၣ်ဒီးတၢ်စံၣ်တဲၤတဲလီၤယွၤကလုၢ်ကထါအဂီၢ်လီၤ.”
5ပှၤတၢ်မၢဖိတဖၣ်အတၢ်ဟ့ၣ်ကူၣ်ဟ့ၣ်ဖးန့ၣ်ပှၤဒီဖုညါဘၣ် သူၣ်ဘၣ်သးဝဲဒိၣ်မးသတးဒီး, အဝဲသ့ၣ်ဃုထၢထီၣ်ဝဲစီၤစတ့းဖၣ်, ပှၤတဂၤလၢအလၢပှဲၤဒီးတၢ်စူၢ်တၢ်နာ်ဒီးသးစီဆှံ, ဒီးဃုထၢထီၣ်စ့ၢ်ကီးဝဲ စီၤဖံလံးပူး, စီၤပြဃီၢ်, စီၤနံၤကါနီၢ်, စီၤတံမိၣ်, စီၤပၢ်မ့းနး, ပှၤအၣ်တံၤအီာ်ဖိစီၤနံၤကလါလၢအနုာ်လီၤဆူ ပှၤယူဒၤဖိအတၢ်ဘူၣ်တၢ်ဘါအပူၤတဖၣ်န့ၣ်လီၤ. 6အဝဲသ့ၣ်ဆှၢထီၣ်ပှၤတဖၣ်အံၤဆူပှၤတၢ်မၢဖိတဖၣ်အမဲာ်ညါ, ဒီးပှၤတၢ်မၢဖိတဖၣ်ဃ့ထုကဖၣ်ယွၤဒီးပာ်အစုလၢပှၤတဖၣ် အံၤအခိၣ်လိၤလီၤ.
7အန့ၣ်သတးဒီးကစၢ်ယွၤအကလုၢ်ကထါရၤလီၤအသးအါထီၣ်ဝဲကွ့ၢ် ကွ့ၢ်လီၤ. အပျဲၢ်အဘီၣ်အနီၣ်ဂံၢ်လၢဝ့ၢ်ယရူၤၡလ့ၣ်အပူၤအါထီၣ်ဂီၢ် ထီၣ်ဒိၣ်ဒိၣ်ကလဲာ်, ဒီးပှၤလုၢ်တၢ်အခိၣ်တဘျုးဒံတဘျုးဂၤစူၢ် က့ၤနာ်က့ၤတၢ်လီၤ.
တၢ်ဖီၣ်စီၤစတ့းဖၣ်အဂ့ၢ်
8စီၤစတ့းဖၣ်, ပှၤလၢအလၢပှဲၤဒီးကစၢ်ယွၤအဘျုးအဖှိၣ်ဒီးတၢ်စိတၢ် ကမီၤတဂၤန့ၣ်, မၤဝဲတၢ်လီၤလးဒီးတၢ်ပနီၣ်လီၤလးအဒိၣ်အမုၢ် တဖၣ်လၢပှၤသ့ၣ်တဖၣ်အကျါလီၤ. 9ဘၣ်ဆၣ်ဒီးပှၤအိၣ်ဝဲတနီၤလၢအဂဲၤဆၢထၢၣ်ထီဒါအီၤလီၤ. အဝဲသ့ၣ်မ့ၢ်ပှၤကရၢဖိဘၣ်ဃးဒီးပှၤသဘျ့ဖိအဘူၣ်ဘျီၣ် (ဒ်အဘၣ်တၢ်ကိးအီၤအသိး) ဒီးမ့ၢ်ပှၤယူဒၤဖိအိၣ်လၢဝ့ၢ်ကူၤ ရ့ၤန့ဒီးဝ့ၢ်အလ့းစၣ်ဒြ့းတဖၣ်အပူၤလီၤ. အဝဲသ့ၣ်အံၤဒီးပှၤယူဒၤဖိအဂၤတဖၣ်လၢအအိၣ်လၢကီၢ်ကံၤလံၤ ကံဒီးကီၢ်အၤစံန့ၣ်, ကတိၤဂ့ၢ်လိာ်တၢ်ဒီးစီၤစတ့းဖၣ်လီၤ. 10ဘၣ်ဆၣ်ဒီးယွၤအသးဒုးကတိၤအီၤတၢ်ကတိၤပှဲၤဒီးတၢ်ကူၣ် သ့သတးဒီး, တုၤအဝဲဒၣ်ကတိၤထီၣ်တၢ်တစုန့ၣ်, အဝဲသ့ၣ်ကတိၤဂ့ၢ်လိာ်ဆၢအီၤတသ့ဘၣ်န့ၣ်လီၤ. 11အန့ၣ်ဒီး, အဝဲသ့ၣ်သဆၣ်ထီၣ်ပှၤတနီၤအခံလၢတၢ်ခူသူၣ်ခူလံာ် အပူၤလၢအကအုၣ်အသးကဘျံးကဘျၣ်ဒီးစံး, “ပနၢ်ဟူဘၣ်တ့ၢ်လံအဝဲဒၣ်အတၢ်ကတိၤတရီတပါထီဒါစီၤမိၤၡ့ ဒီးကစၢ်ယွၤန့ၣ်လီၤ.” 12အဝဲသ့ၣ်မၤဝဲဒ်သိးအံၤန့ၣ်, မ့ၢ်အမၤဂဲၤထီၣ်ပှၤဂီၢ်မုၢ်ဒီးပှၤယူဒၤဖိကရၢ အခိၣ်အနၢ်တဖၣ်ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ် အသူၣ်အသးလီၤ. အဝဲသ့ၣ်ဖီၣ်စီၤစတ့းဖၣ်ဒီးမိၤထီၣ်အီၤဆူကီၣ်ကး အမဲာ်ညါလီၤ. 13အန့ၣ်ဝံၤအဝဲသ့ၣ်ကိးနုာ်ဝဲပှၤတနီၤလၢကအုၣ်အသးကဘျံး ကဘျၣ်ထီဒါစီၤစတ့းဖၣ်ဒီးပှၤတဖၣ်န့ၣ်စံးဝဲ, “ပှၤတဂၤအံၤထီဘိန့ၣ်စံးကတိၤတၢ်ထီဒါပတၢ်လုၢ်ဟံၣ်စီ ဆှံဒီးတၢ်သိၣ်တၢ်သီလၢပန့ၢ်ဘၣ်ခီဖျိစီၤမိၤၡ့န့ၣ်လီၤ. 14ပနၢ်ဟူဘၣ်တ့ၢ်လံအဝဲဒၣ်အတၢ်ကတိၤလၢအစံးဝဲလၢပှၤ နစၤရ့းဖိယ့ၣ်ၡူးတဂၤအံၤကမၤလီၤပှီၢ်ကွံာ်တၢ်လုၢ်ဟံၣ်စီဆှံ တဖျၢၣ်အံၤ, ဒီးလဲလိာ်ကွံာ်ပလုၢ်ပလၢ်တဖၣ်လၢစီၤမိၤၡ့ ဟ့ၣ်လီၤတ့ၢ်လံပှၤန့ၣ်လီၤ.” 15ကယဲၢ်ပှၤဆ့ၣ်နီၤအိၣ်လၢကီၣ်ကးအလီၢ်န့ၣ်, ကွၢ်စူၣ်စီၤစတ့းဖၣ်ဒီးထံၣ်ဝဲလၢအဝဲဒၣ်အမဲာ်ဖျါလီၤဂာ်ဒ် မူခိၣ်ကလူးတဂၤအမဲာ်အသိးန့ၣ်လီၤ.
Pilihan Saat Ini:
မၤတၢ် 6: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
