မၤတၢ် 20
20
စီၤပီလူးလဲၤကဒီးဆူကီၢ်မၤက့းဒနံဒီးကီၢ်အဃါယၤ
1ဖဲတၢ်တၢထီၣ်တၢလီၤဘှ့ၣ်လီၤက့ၤဝံၤအလီၢ်ခံန့ၣ်, စီၤပီလူးကိးဖှိၣ်အပျဲၢ်အဘီၣ်တဖၣ်ဒီးကတိၤဟ့ၣ်ဂံၢ် ဟ့ၣ်ဘါအဝဲသ့ၣ်ဝံၤ, ဆၢဂ့ၤဆၢဝါအဝဲသ့ၣ်ဒ်သိးအကလီၤ ဖးဒီးအီၤမုာ်မုာ်အဂီၢ်လီၤ. အန့ၣ်ဝံၤအလီၢ်ခံအဝဲဒၣ်ဟးထီၣ်ဒီးလဲၤဆူကီၢ်မၤက့းဒနံန့ၣ်လီၤ. 2အဝဲဒၣ်လဲၤခီဂာ်တၢ်လီၢ်တၢ်ကျဲဖဲန့ၣ်တဖၣ်ဒီးကတိၤဟ့ၣ် ဂံၢ်ဟ့ၣ်ဘါပှၤလၢတၢ်ကစီၣ်အါထံၣ်အါဘီန့ၣ်လီၤ. အန့ၣ်ဝံၤအလီၢ်ခံအဝဲဒၣ်လဲၤဆူကီၢ်အဃါယၤလီၤ. 3ဖဲန့ၣ်အဝဲဒၣ်အိၣ်ဝဲသၢလါလီၤ. ဖဲအဝဲဒၣ်အိၣ်ကတဲာ်ကတီၤအသးဒ်သိးအကလဲၤဆူကီၢ် စူၤရံန့ၣ်, သ့ၣ်ညါဝဲလၢပှၤယူဒၤဖိတဖၣ်ကူၣ်တၢ်ထီဒါအီၤ, ဒီးလၢတၢ်န့ၣ်အဃိပာ်လီၤအသးလၢအကက့ၤကဒါက့ၤဝဲ ခီဖျိကီၢ်မၤက့းဒနံလီၤ. 4ပှၤဘ့းရံၤဖိစီၤပူရူးအဖိခွါစီၤစိပၤတြူး, ပှၤသ့းစၤလနံဖိစီၤအရံစတၢ်ဃူးဒီးစီၤစ့းကူၣ်ဒူး, ပှၤဒ့ၢ်ဘ့ၤဖိ စီၤကါယူး, ဒီးစီၤတံၤမသ့း, ဒီးပှၤအၤစံဖိစီၤတူဃံၤကူးဒီးစီၤ တြီးဖံၤမူးတဖၣ်လဲၤဃုာ်ဒီးအီၤလီၤ. 5အဝဲသ့ၣ်တဖၣ်လဲၤဆိဆူဝ့ၢ်တြိၤအါလၢပမဲာ်ညါဒီးအိၣ်ခိး ပှၤဖဲန့ၣ်လီၤ. 6ဘူၣ်ကိၣ်တအိၣ်ဘၣ်ဒီးကိၣ်မံၣ်ဝံၤအလီၢ်ခံ, ပဒိးထီၣ်ကဘီဖဲဝ့ၢ်ဖံလံးပံၤဒီးဖဲယဲၢ်သီပူၤကွံာ်ဝံၤန့ၣ် ပထံၣ်လိာ်ပသးဒီးအဝဲသ့ၣ်ဖဲဝ့ၢ်တြိၤအါဒီးပအိၣ်ဖဲန့ၣ်တနွံလီၤ.
စီၤပီလူးလဲၤအိၣ်သကိးအပျဲၢ်အဘီၣ်တဖၣ် ဖဲဝ့ၢ်တြိၤအါအကတၢၢ်တဘျီ
7လၢမုၢ်နွံနံၤအကျါမုၢ်ခီၣ်ထံးနံၤဟါခီန့ၣ်, ပပာ်ဖှိၣ်ထီၣ်သကိးပသးလၢတၢ်စိၢ်ဘျဲးကိၣ် အဂီၢ်လီၤ. စီၤပီလူးကတိၤတၢ်ဒီးပှၤဂီၢ်မုၢ်တဖၣ်ပၢၢ်တုၤလၢဖးဖီမုၢ် တစုအဂ့ၢ်မ့ၢ်လၢအကဘၣ်ဟးထီၣ်ဝဲလၢခံတနံၤအဃိလီၤ. 8ဖဲဒၢးထီၣ်ထီလၢပပာ်ဖှိၣ်ပသးအလီၢ်န့ၣ်, မ့ၣ်အူဒၢဘၣ်တၢ်ဒွဲၣ်ထီၣ်အီၤအါဖျၢၣ်လီၤ. 9ပိာ်ခွါသးစၢ်လၢအမံၤမ့ၢ်စီၤအူတူၤဃူးတဂၤဆ့ၣ်နီၤဝဲလၢပဲတြီဖိအလိၤ, ဒီးဖဲစီၤပီလူးကတိၤတၢ်ယံာ်ထီၣ်န့ၣ်, စီၤအူတူၤဃူးအမဲာ်ဖံးဃၢထီၣ်တုၤအဝဲဒၣ်မံဘၣ်အသးဒီးလီၤ တဲာ်လၢဟံၣ်သၢကထၢတကထၢဆူဟီၣ်ခိၣ်လိၤလီၤ. ဖဲအဝဲသ့ၣ်လဲၤထၢထီၣ်အီၤန့ၣ်အဝဲဒၣ်သံလံဝဲလံ. 10ဘၣ်ဆၣ်ဒီးစီၤပီလူးစံၣ်လီၤဆူဟံၣ်ဖီလာ်ဒီးသကူးလီၤအသးလၢ အဖီခိၣ်ဒီးဖိးဟုအီၤလီၤ. “တဘၣ်ကိၢ်တဂ့ၤ.” အဝဲဒၣ်စံးဝဲ, “အဝဲမူဒံးကစီဒီလီၤ.” 11အန့ၣ်ဝံၤအလီၢ်ခံ, အဝဲဒၣ်က့ၤထီၣ်ဆူဟံၣ်ဖီခိၣ်, စိၢ်ဘျဲးကိၣ်ဒီးအီၣ်သကိးတၢ်လၢအပျဲၢ်အဘီၣ်တဖၣ်လီၤ. အဝဲဒၣ်ကတိၤတၢ်ဒီးအဝဲသ့ၣ်ဖးယံာ်တုၤလၢမုၢ်ဟဲဆ့ၣ်ထီၣ်ဝံၤ ဒီးဟးထီၣ်ဝဲဒၣ်လီၤ. 12အဝဲသ့ၣ်က့ၤဆှၢပှၤသးစၢ်တဂၤန့ၣ်ဆူအဟံၣ်, ဒီးမ့ၢ်အအိၣ်မူဒံးဝဲ အဃိ, အသူၣ်မုာ်သးမုာ်ဝဲဒိၣ်မးလီၤ.
လၢဝ့ၢ်တြိၤအါဆူဝ့ၢ်မံလ့ၤတူး
13ပဒိးဆိပာ်ကဘီလၢစီၤပီလူးအမဲာ်ညါဒီးလဲၤဆူဝ့ၢ်အၣ်စူးဒ်သိး ပကဒုးဒိးထီၣ်အီၤလၢကဘီဖဲန့ၣ်လီၤ. အဝဲဒၣ်မၤလိာ်တ့ၢ်ပှၤလၢ ပကမၤဒ်သိးအံၤ, အဂ့ၢ်မ့ၢ်လၢအဝဲအနီၢ်ကစၢ်ကလဲၤဆူဝ့ၢ်အၣ်စူးလၢခိအကျဲ တကပၤအဃိန့ၣ်လီၤ. 14ဖဲအဝဲဒၣ်ထံၣ်လိာ်ပှၤလၢဝ့ၢ်အၣ်စူးန့ၣ်, အဝဲဒိးထီၣ်ကဘီလၢပသကိးဒီးလဲၤပဝဲဆူဝ့ၢ်မ့ၤတိၤလ့န့ၣ်လီၤ. 15ပဒိးကဒီးကဘီဖဲန့ၣ်ဒီးမုၢ်ဆ့ၣ်ထီၣ်တနံၤန့ၣ်, ပလဲၤတုၤဖဲတၢ်လီၢ်လၢအအိၣ်သဃီၤဒီးကီးဃံ အူးလီၤ. လၢခံတနံၤန့ၣ်, ပတုၤဖဲကီးစါမူးဒီးမုၢ်ဆ့ၣ်ထီၣ် တနံၤန့ၣ်တုၤဖဲဝ့ၢ်မံလ့ၤတူးလီၤ. 16စီၤပီလူးပာ်လီၤအသးလၢအကလဲၤခီပတာ်ကွံာ်ဝ့ၢ်အ့းဖ့း စူးဒ်သိးအဆၢကတီၢ်သုတလၢာ်ကွံာ်ဝဲဖဲကီၢ်အၤစံတဂ့ၤန့ၣ်လီၤ. အဝဲဒၣ်အဲၣ်ဒိးလဲၤတုၤဝ့ၢ်ယရူၤၡလ့ၣ်ဆိဆိ, မ့ၢ်သ့န့ၣ်, လၢဘူၣ်ယဲၢ်ဆံအနံၤအဂီၢ်လီၤ.
စီၤပီလူးအတၢ်ကတိၤတၢ်ဒီးဝ့ၢ်အ့းဖ့းစူးအပှၤသူၣ်က့သးပှၢ်တဖၣ်လၢခံကတၢၢ်တဘျီ
17ဖဲဝ့ၢ်မံလ့ၤတူးန့ၣ်, စီၤပီလူးဆှၢလီၤတၢ်ကစီၣ်ဆူဝ့ၢ်အ့းဖ့းစူး ဒီးမၢတၢ်အိၣ်ဖှိၣ်အပှၤသူၣ်က့သးပှၢ်တဖၣ်ဟဲထံၣ်အီၤလီၤ. 18ဖဲအဝဲသ့ၣ်ဟဲတုၤန့ၣ်, အဝဲဒၣ်စံးဘၣ်အီၤ, “စးထီၣ်မုၢ်တနံၤဖဲယဟဲတုၤကီၢ်အၤစံန့ၣ်, ယအိၣ်ဆိးဖံးမၤတပူၤဃီဒီးသုဒ်လဲၣ်ဒ်လဲၣ်န့ၣ်သုသ့ၣ်ညါသုဝဲလီၤ. 19လၢတၢ်ဆီၣ်လီၤသးလၢာ်လၢာ်ဆ့ဆ့ဒီး မဲာ်ထံမဲာ်နိအဒိၣ်အအါ အပူၤ, ယမၤယတၢ်ဖံးတၢ်မၤဒ်ကစၢ်အခ့အပှၤတဂၤအသိး ခီဖျိဆၢကတီၢ်အကီအခဲလၢအဟဲတုၤအိၣ်ယၤလၢပှၤယူဒၤ ဖိတဖၣ်အတၢ်ကူၣ်အၢကူၣ်သီအဃိန့ၣ်လီၤ. 20သုသ့ၣ်ညါလၢ, ဖဲယစံၣ်တဲၤတဲလီၤန့ၢ်သုတၢ်ဒီးသိၣ်လိသီလိသုလၢ ကမျၢၢ်အကျါမ့ၢ်ဂ့ၤ, လၢသုဟံၣ်သုဃီပူၤမ့ၢ်ဂ့ၤ, တၢ်တမံၤလၢ်လၢ်လၢအကကဲထီၣ်တၢ်မၤစၢၤလၢသုဂီၢ်န့ၣ်, ယတပာ်ခူသူၣ်ယဲနီတမံၤဘၣ်န့ၣ်လီၤ. 21ယဟ့ၣ်ပလီၢ်ပှၤယူဒၤဖိဒီးပှၤကလုာ်ဂၤခံဖုလၢာ်သပှၢ်ပှၢ်ဒ်သိးအဝဲသ့ၣ် ကညိကွံာ်အတၢ်ဒဲးဘးဒီးဃၣ်က့ၤအသးဆူကစၢ်ယွၤအအိၣ်, ဒီးစူၢ်က့ၤနာ်က့ၤပကစၢ်ယ့ၣ်ၡူးန့ၣ်လီၤ. 22ဒီးခဲကနံၣ်အံၤ, လၢတၢ်စူၢ်ဒီးတၢ်ဒိကနၣ်သးစီဆှံအကလုၢ် အပူၤန့ၣ်, ယကလဲၤယဲဆူဝ့ၢ်ယရူၤၡလ့ၣ်, ဒီးတၢ်ကမၤအသးဒီးယၤဖဲန့ၣ်ဒ်လဲၣ်ဒ်လဲၣ်န့ၣ်, ယတသ့ၣ်ညါဘၣ်. 23ထဲတမံၤ, ယသ့ၣ်ညါလၢဝ့ၢ်ကိးဖျၢၣ်ဒဲးအပူၤန့ၣ် သးစီဆှံဟ့ၣ် ပလီၢ်တ့ၢ်ယၤလၢတၢ်စၢဃာ်ဒီးတၢ်မၤနးမၤဖှီၣ်အိၣ်ခိးပာ်စၢၤ ယခိၣ်န့ၣ်လီၤ. 24ဘၣ်ဆၣ်ဒီး, တၢ်မၤနးမၤဖှီၣ်ယသးသမူတမ့ၢ်တၢ်အကါဒိၣ်လၢ ယဂီၢ်ဘၣ်. မ့မ့ၢ်အကါဒိၣ်ဝဲလၢယကမၤဝံၤယတၢ်မၤလၢကစၢ် ယ့ၣ်ၡူးဟ့ၣ်လီၤယၤ, လၢအမ့ၢ်ဝဲတၢ်အုၣ်သးလၢတၢ်သးခု အကစီၣ်ဘၣ်ဃးကစၢ်ယွၤအဘျုးအဖှိၣ်အဂ့ၢ်န့ၣ်လီၤ.
25ယဟးဝ့ၤဝီၤတ့ၢ်လံလၢသုဝဲခဲလၢာ်အကျါဒီးစံၣ်တဲၤတဲလီၤယွၤ အဘီအမုၢ်န့ၣ်လီၤ. ဒီးခဲကနံၣ်အံၤ, ယသ့ၣ်ညါလၢသုတထံၣ်ဘၣ်လၢၤယၤနီတဂၤဘၣ်. 26လၢတၢ်န့ၣ်အဃိ, မုၢ်တနံၤဃီအံၤယဘိးဘၣ်သ့ၣ်ညါသုသပှၢ်ကတၢၢ်လၢသုဝဲ တဂၤဂၤသုမ့ၢ်လီၤမၢ်ကွံာ်ဒီးတမ့ၢ်ယမူယဒါဘၣ်လီၤ. 27အဂ့ၢ်ဒ်အံၤ, တၢ်လၢကစၢ်ယွၤတိာ်ပာ်ဝဲခဲလၢာ်ခဲဆ့န့ၣ်, ယတပာ်ခူသူၣ်ယဲဘၣ်ဒီးဘိးဘၣ်သ့ၣ်ညါသုလီၤ. 28အံးထွဲကွၢ်ထွဲလီၤသုသးဒၣ်ဝဲ, ဒီးအံးထွဲကွၢ်ထွဲသိခဲလၢာ်လၢသးစီဆှံပာ်လီၤတ့ၢ်ဝဲလၢသု တၢ်အံးတၢ်ကွၢ်အပူၤန့ၣ်တက့ၢ်. ကဲထီၣ်ပှၤကွၢ်သိတဖၣ် လၢကစၢ်ယွၤအတၢ်အိၣ်ဖှိၣ်အဂီၢ်, တၢ်အိၣ်ဖှိၣ်လၢအဝဲဒုးကဲထီၣ်အီၤဆူ အတၢ်ဒၣ်ဝဲခီဖျိအဖိခွါအတၢ်သံန့ၣ်တက့ၢ်. 29ယသ့ၣ်ညါယဲဒၣ်လၢယဟးထီၣ်ဝံၤအလီၢ်ခံန့ၣ်, ထွံၣ်မံၤအဒူတဖၣ်ကဟဲနုာ်လီၤဆူသုကျါ, ဒီးတပျဲပူၤသိတဖၣ် န့ၣ်ဘၣ်. 30ဆၢကတီၢ်ကတုၤဃီၤဝဲဖဲပှၤတနီၤလၢသုသိးသုကျါဒၣ်ဝဲ ကလီန့ၢ်တၢ်ဒ်သိးအကကွဲန့ၢ်လွဲန့ၢ်အပျဲၢ်အဘီၣ်တဖၣ်ဆူ အအိၣ်လီၤ. 31လၢတၢ်န့ၣ်အဃိ, အိၣ်ပလီၢ်သူၣ်ပလီၢ်သးဒီးသ့ၣ်နီၣ်ထီၣ်လၢ, သၢနံၣ်အတီၢ်ပူၤလၢမုၢ်ဆါဆဲးလၢမုၢ်နၤယသိၣ်လီၤသီလီၤဒီး ဟ့ၣ်ပလီၢ်သုလၢမဲာ်ထံမဲာ်နိအဒိၣ်အအါအပူၤန့ၣ်တက့ၢ်.
32ဒီးခဲကနံၣ်အံၤ, ယဟ့ၣ်လီၤသုဆူကစၢ်ယွၤအတၢ်အံးတၢ်ကွၢ်ဒီးတၢ်ကစီၣ်ဘၣ်ဃး အဝဲဒၣ်အဘျုးအဖှိၣ်အပူၤ, လၢအမၤထီၣ်မၤထီသုသ့ဝဲဒီးဟ့ၣ်သုတၢ်ဆိၣ်ဂ့ၤဆိၣ်ဝါလၢ အကတဲာ်ကတီၤပာ်ဝဲလၢအပှၤဂီၢ်မုၢ်ခဲလၢာ်အဂီၢ်န့ၣ်လီၤ. 33ယတသးလီသးကွံပှၤနီတဂၤအစ့မ့ၢ်ဂ့ၤ, ထူမ့ၢ်ဂ့ၤ, တၢ်ကူတၢ်ကၤမ့ၢ်ဂ့ၤန့ၣ်ဘၣ်. 34သုနီၢ်ကစၢ်ဒၣ်သုဝဲသုသ့ၣ်ညါလၢယဖံးတၢ်မၤတၢ်လၢယစု ဒၣ်ယဲ, ဒီးမၤန့ၢ်တၢ်ခဲလၢာ်လၢယတံၤသကိးဒီးယၤပန့ၢ်ဘၣ် အလီၢ်အိၣ်တဖၣ်လီၤ. 35လၢတၢ်ကိးမံၤဒဲးအပူၤန့ၣ်, ယဒုးနဲၣ်တ့ၢ်သုလၢပကဘၣ်မၤတၢ်ဆူၣ်ဆူၣ်လၢတၢ်မၤစၢၤ ပှၤဂံၢ်စၢ်ဘါစၢ်တဖၣ်အဂီၢ်ဒီးတဘျီဃီသ့ၣ်နီၣ်ထီၣ်ကစၢ် ယ့ၣ်ၡူးအတၢ်ကတိၤလၢအစံးဝဲ, ‘ဟ့ၣ်တၢ်န့ၣ်ဘၣ်ဆိၣ်ဂ့ၤအါန့ၢ်ဒံးဒိးန့ၢ်တၢ်တက့ၢ်လီၤ.’
36ဖဲစီၤပီလူးကတိၤတၢ်ဝံၤန့ၣ်, အဝဲတီၤလီၤဃုာ်ဒီးအဝဲသ့ၣ်ကိးဂၤဒဲးဒီးဃ့ဘါထုကဖၣ် တၢ်လီၤ. 37အဝဲသ့ၣ်ကိးဂၤဒဲးဟီၣ်ဝဲဖဲအဖိးဃာ်အီၤဒီးနၢမူအီၤ ဒီးဆၢဂ့ၤဆၢဝါအီၤအခါန့ၣ်လီၤ. 38အဝဲသ့ၣ်အသးအုးလီၤဆီဒၣ်တၢ်မ့ၢ်လၢအဝဲစံးဘၣ်တ့ၢ် အဝဲသ့ၣ်, “သုတထံၣ်ဘၣ်လၢၤယၤနီတဘျီဘၣ်” အဃိန့ၣ်လီၤ. ဒီးအဝဲသ့ၣ်ဆှၢလီၤအီၤဆူကဘီပူၤလီၤ.
Pilihan Saat Ini:
မၤတၢ် 20: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
