မၤတၢ် 2
2
သးစီဆှံအတၢ်ဟဲလီၤ
1ဖဲဘူၣ်ယဲၢ်ဆံအမုၢ်နံၤတုၤဃီၤဝဲန့ၣ်, ပှၤစူၢ်က့ၤနာ်က့ၤတၢ်ခဲလၢာ်ပာ်ဖှိၣ်ထီၣ်အသးလၢတၢ်လီၢ် တပူၤဃီန့ၣ်လီၤ. 2သတူၢ်ကလာ်, တၢ်အသီၣ်ဟဲလီၤလၢမူခိၣ်လီၤဂာ်ဒ်ကလံၤလၢအအူတၢ်ဆူၣ်မး အသိး, ဒီးတၢ်အသီၣ်အံၤမၤပှဲၤဟံၣ်လၢအဝဲသ့ၣ်ဆ့ၣ်နီၤဝဲလၢအပူၤဒီ တဖျၢၣ်ညါလီၤ. 3အန့ၣ်ဒီးအဝဲသ့ၣ်ထံၣ်ဝဲမ့ၣ်အူလၣ်လၢအလီၤဂာ်ဒီးတၢ်အပျ့ၤ တဖၣ်ရၤလီၤအသး, ဒီးထိးဘၣ်ပှၤအိၣ်ဖဲန့ၣ်တဂၤဘၣ်တဂၤစုာ်စုာ်လီၤ. 4အဝဲသ့ၣ်ခဲလၢာ်လၢထီၣ်ပှဲၤထီၣ်ဒီးသးစီဆှံ, ဒီးကတိၤထီၣ်တၢ်လၢကျိာ်ဂၤတဖၣ်ဒ်ယွၤအသးဒုးသ့စံးသ့ ကတိၤအီၤအသိးန့ၣ်လီၤ.
5ဒီးအကတီၢ်ဖဲန့ၣ်, ပှၤယူဒၤဖိဒီးပှၤလၢအအဲၣ်ယွၤပျံၤယွၤလၢ အဟဲလၢကိးထံကိးကီၢ်ဒဲးတဖၣ်, အိၣ်ဆိးဝဲလၢဝ့ၢ်ယရူၤၡလ့ၣ် အပူၤန့ၣ်လီၤ. 6တုၤအဝဲသ့ၣ်နၢ်ဟူတၢ်သီၣ်အံၤန့ၣ်ဒီး, ဟဲပာ်ဖှိၣ်ထီၣ်အသးဂီၢ်မုၢ်ဂီၢ်ပၤလီၤ. အဝဲသ့ၣ်ခဲလၢာ်ကမၢကမၣ်ဝဲ, အဂ့ၢ်မ့ၢ်လၢပှၤတဂၤဘၣ်တဂၤ နၢ်ဟူဝဲပှၤစူၢ်က့ၤနာ်က့ၤတၢ်တဖၣ် စံးကတိၤတၢ်လၢအဝဲသ့ၣ်အကျိာ်ဒၣ်ဝဲအဃိန့ၣ်လီၤ. 7အဝဲသ့ၣ်တဖၣ်တၢ်လီၤကမၢကမၣ်ဒီးတၢ်လီၤလးဘၣ်အီၤဒိၣ်ဒိၣ် ကလဲာ်ဒီးစံး, “ပှၤတဖၣ်အံၤလၢအကတိၤတၢ်န့ၣ်, မ့ၢ်ဒၣ်ပှၤကီၢ်ကၤလံၤလါဖိလီၤ, တမ့ၢ်ဘၣ်ဧါ. 8မ့မ့ၢ်ဒ်န့ၣ်ဒီးပဝဲခဲလၢာ်ပနၢ်ဟူဘၣ်အဝဲသ့ၣ်အတၢ်ကတိၤလၢ ပကျိာ်ဒၣ်ပဝဲန့ၣ်, မ့ၢ်တၢ်ဒ်လဲၣ်. 9ပဝဲသ့ၣ်တဖၣ်ပမ့ၢ်ပှၤပၢ်သ့ၤဖိ, ပှၤမၤဒဲဖိ, ပှၤဧ့ၤလၣ်ဖိ, ပှၤမ့းစပတၤမံဖိ, ပှၤယူဒၤဖိ, ပှၤကပၤဒကံဖိ, ပှၤပီၣ်တူးဖိ, ပှၤအၤစံဖိ, 10ပှၤဖြူၤကံဖိ, ပှၤပၣ်ဖူၤလံဖိ, ပှၤအဲၤကူပတူးဖိ, ပှၤလံၤဘူဖိလၢအအိၣ်ဘူးဒီး ပှၤကူၤရ့ၤန့ဖိ, ဒီးပဝဲတနီၤပဟဲလၢဝ့ၢ်ရိမ့ၤဒီးပမ့ၢ် 11ပှၤယူဒၤဖိဒီးပှၤကလုာ်ဂၤလၢအနုာ်လီၤဆူပှၤယူဒၤဖိအတၢ် ဘူၣ်တၢ်ဘါအပူၤ, ဒီးပဝဲဒၣ်တနီၤပမ့ၢ်ပှၤကြ့တ့ၤဖိဒီးပှၤဧ့ရ့းဖိတဖၣ်လီၤ. ဘၣ်ဆၣ်ဒီးပဝဲဒၣ်ကိးဂၤဒဲးပနၢ်ဟူဘၣ်အဝဲသ့ၣ်စံးကတိၤ တၢ်လၢပကျိာ်ဒၣ်ပဝဲ, ဘၣ်ဃးတၢ်မၤအဒိၣ်အမုၢ်တဖၣ်လၢ ကစၢ်ယွၤမၤတ့ၢ်လံဝဲန့ၣ်လီၤ.” 12အဝဲသ့ၣ်တဖၣ်တၢ်ကမၢကမၣ်ဘၣ်အီၤဒိၣ်ဒိၣ်ကလဲာ်ဒီးဆိကမိၣ် က့ၤတၢ်တဘၣ်လၢၤဘၣ်သတးဒီး, သံကွၢ်လိာ်အသးတဂၤဒီးတဂၤ, “တၢ်မၤအသးတခါအံၤအခီပညီဒ်လဲၣ်” န့ၣ်လီၤ.
13မ့မ့ၢ်ပှၤအဂၤတဖၣ်နံၤဘၣ်ဖၣ်လဲပှၤစူၢ်က့ၤနာ်က့ၤတၢ်တဖၣ်န့ၣ်ဒီးစံးဝဲ, “ပှၤသ့ၣ်တဖၣ်အံၤမူၤလၢစပံးထံလီၤ.”
စီၤပ့းတရူးအတၢ်စံၣ်တဲၤတဲလီၤ
14အန့ၣ်ဒီး, စီၤပ့းတရူးလၢအအိၣ်ဖဲန့ၣ်ဒီးပှၤတၢ်မၢဖိအဂၤတဆံတဂၤ န့ၣ်, ဆၢထၢၣ်ဝဲဒီးကတိၤထီၣ်တၢ်လၢအကလုၢ်ဖးဒိၣ်ဒီးစံး, “ဒီပုၢ်ဝဲၢ်ပှၤယူဒၤဖိဒီးပှၤအိၣ်လၢဝ့ၢ်ယရူၤၡလ့ၣ်အပူၤခဲလၢာ်သ့ၣ်ဧၢ, ကနၣ်တက့ၢ်. ပျဲယတဲဘၣ်သုလၢတၢ်မၤအသးအံၤအခီပညီန့ၣ်တက့ၢ်. 15ပှၤသ့ၣ်တဖၣ်အံၤတမ့ၢ်အမူၤလၢစပံးထံဒ်သုဆိကမိၣ်သုဝဲအသိးန့ၣ်ဘၣ်. အဂ့ၢ်ဒ်လဲၣ်န့ၣ်, တၢ်ဆၢကတီၢ်ဘၣ်ဒံးဒၣ်ဂီၤခီခွံနၣ်ရံၣ်လီၤ. 16မ့မ့ၢ်တၢ်အံၤမ့ၢ်ဒၣ်တၢ်လၢဝံယိၤအ့လးစံးတ့ၢ်ဝဲလၢအဂ့ၢ်န့ၣ်လီၤ.
17‘ကစၢ်ယွၤစံးဝဲဒၣ်, အအံၤမ့ၢ်တၢ်လၢယကမၤအီၤလၢ
မုၢ်နံၤမုၢ်သီ လၢခံကတၢၢ်တဖၣ်,
ယကလူလီၤဂၢ်လီၤယသးလၢ
ပှၤဟီၣ်ခိၣ်ဖိခဲလၢာ်အလိၤ,
သုဖိမုၣ်ဖိခွါတဖၣ်ကတဲဖျါထီၣ်ယတၢ်ကစီၣ်,
သုပှၤသးစၢ်တဖၣ်ကထံၣ်တၢ်ထံၣ်လၢညါခီတဖၣ်,
ဒီးသုပှၤသးပှၢ်တဖၣ်ကမံမီၢ်တၢ်မံမီၢ်တဖၣ်လီၤ.
18ဖဲမုၢ်နံၤလၢခံတဖၣ်အကတီၢ်န့ၣ်,
ယကလူလီၤဂၢ်လီၤယသး
လၢယကုၢ်ယပှၤမုၣ်မုၣ်ခွါခွါတဖၣ်အလိၤဒၣ်လဲာ်ဒီး
အဝဲသ့ၣ်ကတဲဖျါထီၣ်ယတၢ်ကစီၣ်လီၤ.
19ယကမၤတၢ်လီၤလးတဖၣ်လၢမူကပိာ်လိၤ,
ဒီးဒုးနဲၣ်ဖျါထီၣ်တၢ်ပနီၣ်လီၤလးတဖၣ်လၢ
ဟီၣ်ခိၣ်ချၢလီၤ.
တၢ်သွံၣ်, မ့ၣ်အူ, ဒီးမ့ၣ်အူလုၢ်ကအိၣ်ဝဲ,
20မုၢ်ကခံးလီၤကွံာ်,
ဒီးလါကထီၣ်ဂီၤဒ်တၢ်သွံၣ်အသိး,
တချုးကစၢ်အမုၢ်နံၤဖးဒိၣ်လၢအပှဲၤဒီး
တၢ်လၤကပီၤတုၤဃီၤဒံးဘၣ်န့ၣ်လီၤ.
21ဒီးအကတီၢ်ဖဲန့ၣ်, ပှၤတဂၤလၢ်လၢ်လၢ
အကိးထီၣ်တၢ်ဆူကစၢ်အအိၣ်န့ၣ်,
ကဒိးန့ၢ်ဘၣ်တၢ်အုၣ်က့ၤခီၣ်က့ၤအီၤလီၤ.’
22“ပှၤအံၣ်စရ့လးဖိသကိးသကိးဒီးယၤသ့ၣ်ဧၢ, ကနၣ်ယတၢ်ကတိၤတဖၣ်အံၤတက့ၢ်. တၢ်ဒုးနဲၣ်ဖျါထီၣ်န့ၢ်သုဂ့ၤဂ့ၤကလဲာ်လၢပှၤနစၤရ့းဖိယ့ၣ် ၡူးမ့ၢ်ပှၤလၢယွၤအစိကမီၤအိၣ်ဒီးအီၤခီဖျိတၢ်မၤလီၤလး တဖၣ်, ဒီးတၢ်ပနီၣ်လီၤလးတဖၣ်လၢကစၢ်ယွၤမၤဝဲခီဖျိအီၤန့ၣ်လီၤ. သုကစၢ်ဒၣ်သုဝဲသုသ့ၣ်ညါတၢ်တဖၣ်အံၤမ့ၢ်လၢအမၤတ့ၢ်အသး လၢသုသိးသုကျါအဃိလီၤ. 23ဒ်ကစၢ်ယွၤကူၣ်ကျဲၤဒီးသ့ၣ်ညါပာ်ဝဲအသိး, ယ့ၣ်ၡူးဘၣ်တၢ်ဟ့ၣ်လီၤကွံာ်အီၤဆူသုစုပူၤဒီးသုမၤသံအီၤခီ ဖျိသုပျဲပှၤတၢ်ဒဲးဘးဖိတဖၣ်ပျၤထီအီၤလၢထူၣ်စုညါအလိၤန့ၣ်လီၤ. 24ဘၣ်ဆၣ်ဒီးကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံ, ဒီးမၤထူၣ်ဖျဲးထီၣ်အီၤလၢတၢ်သံအစိကမီၤအဖီလာ်, မ့ၢ်လၢတၢ်သံဟံးဃာ်အီၤတသ့လ့ၤတက့ၤဘၣ်အဃိလီၤ. 25အဂ့ၢ်ဒ်အံၤ, စီၤဒၤဝံးစံးတ့ၢ်ဝဲဘၣ်ဃးဒီးအီၤ,
‘ယထံၣ်ကစၢ်လၢယမဲာ်ညါထီဘိ,
အဝဲဒၣ်အိၣ်လၢယစုထွဲတခီသတးဒီး
တၢ်မၤဟူးမၤဝးယၤတသ့နီတမံၤဘၣ်.
26အန့ၣ်ဒီးယသးပှဲၤဒီးတၢ်သးခု,
ယတၢ်စံးတၢ်ကတိၤတဖၣ်ပှဲၤဒီး
တၢ်သူၣ်ဖှံသးညီလီၤ.
ဒီးယဲဒၣ်ယမ့ၢ်ပှၤလၢအသံသ့သနာ်က့,
ယကအိၣ်မံသူၣ်မံသးလၢတၢ်မုၢ်လၢ်အပူၤလီၤ.
27အဂ့ၢ်ဒ်အံၤ, နတပာ်တ့ၢ်ကွံာ်ယသးသမူလၢ
ပှၤသံတဖၣ်အကီၢ်ပူၤဘၣ်.
နတပျဲစ့ၢ်ကီးနခ့နပှၤလၢအသးတီဒီးနၤ
ကအုၣ်သံကျၣ်သံန့ၣ်ဘၣ်.
28နဒုးနဲၣ်တ့ၢ်လံယၤကျဲတဖၣ်လၢအဆှၢပှၤဆူတၢ်မူ,
ဒီးနတၢ်အိၣ်ဆိးဒီးယၤကမၤပှဲၤယသးဒီး
တၢ်သူၣ်ဖှံသးညီလီၤ.’
29“ယဒီပုၢ်ဝဲၢ်သ့ၣ်ဧၢ, ယဘၣ်စံးဘၣ်သုလိၤလိၤဘၣ်ဃးပပၢ်ဖးဒိၣ်မံၤဟူသၣ်ဖျါစီၤပၤ ဒၤဝံးအဂ့ၢ်လီၤ. အဝဲဒၣ်သံဝဲဒီးဘၣ်တၢ်ခူၣ်လီၤကွံာ်အီၤ, ဒီးအသွၣ်ခိၣ်န့ၣ်အိၣ်ဒံးဒၣ်ဖဲအံၤတုၤမုၢ်မဆါတနံၤအံၤန့ၣ်လီၤ. 30ဒ်အဝဲမ့ၢ်တ့ၢ်ဝံတဂၤအသိး, အဝဲသ့ၣ်ညါတၢ်လၢကစၢ်ယွၤအၢၣ်လီၤတ့ၢ်အီၤလၢအကမၤဝဲလၢ အဂီၢ်န့ၣ်လီၤ. ကစၢ်ယွၤမၤတၢ်အၢၣ်လီၤအီလီၤဒီးအီၤလၢ အကဒုးကဲထီၣ်အစၢၤအသွဲၣ်တဂၤလၢစီၤပၤ, ဒ်အဝဲကဲဘၣ်ဝဲအသိးန့ၣ်လီၤ. 31စီၤဒၤဝံးထံၣ်စိပာ်စၢၤတၢ်လၢကစၢ်ယွၤကမၤဝဲန့ၣ်သတးဒီး, အဝဲဒၣ်ကတိၤတၢ်ဘၣ်ဃးခရံာ်အတၢ်ဂဲၤဆၢထၢၣ်က့ၤလၢတၢ်သံ အဂ့ၢ်, ဖဲအစံးဝဲ,
‘အဝဲတဘၣ်တၢ်ပာ်တ့ၢ်ကွံာ်အီၤလၢ
တၢ်သံအကီၢ်ပူၤဘၣ်.
အနီၢ်ခိန့ၣ်တအုၣ်သံကျၣ်သံဝဲဘၣ်.’
32ယ့ၣ်ၡူးတဂၤအံၤကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံ, ဒီးတၢ်လၢအမၤအသးအံၤ, ပဝဲဒၣ်ခဲလၢာ်ပထံၣ်ဘၣ်လၢပမဲာ်လီၤ. 33အဝဲဒၣ်ဘၣ်တၢ်ပာ်ထီၣ်ထီအီၤလၢပၢ်ကစၢ်ယွၤအစုထွဲတကပၤ, ဒီးဒိးန့ၢ်သးစီဆှံလၢအအိၣ်ဒ်အအၢၣ်လီၤအီလီၤတ့ၢ်ဝဲအသိး န့ၣ်လီၤ. ဒီးတၢ်လၢသုထံၣ်ဘၣ်ဒီးနၢ်ဟူဘၣ်ခဲကနံၣ်အံၤ, မ့ၢ်ယ့ၣ်ၡူးအတၢ်ဟ့ၣ်လၢအလူလီၤဂၢ်လီၤဝဲလၢပလိၤန့ၣ်လီၤ. 34အဂ့ၢ်ဒ်လဲၣ်န့ၣ်, စီၤဒၤဝံးအကစၢ်ဒၣ်ဝဲတလဲၤထီၣ်ဘၣ်ဆူမူခိၣ်ဘၣ် သနာ်က့, အတၢ်ကတိၤအိၣ်ဒ်အံၤ,
‘ကစၢ်ယွၤစံးဘၣ်ယကစၢ်,
ဆ့ၣ်နီၤဖဲအံၤလၢယစုထွဲတခီ,
35တုၤယပာ်လီၤနဒုၣ်နဒါတဖၣ်ဒ်ခီၣ်ယီၢ်လီၢ်အသိးလၢနခီၣ်အဖီ လာ်တစုန့ၣ်တက့ၢ်.’
36အန့ၣ်သတးဒီး, သုဝဲပှၤအံၣ်စရ့လးဖိခဲလၢာ်သုကဘၣ်သ့ၣ်ညါ လီၤတံၢ်လၢယ့ၣ်ၡူးလၢသုပျၤထီအီၤလၢထူၣ်စုညါလိၤတဂၤအံၤ, မ့ၢ်ပှၤလၢကစၢ်ယွၤဒုးကဲထီၣ်အီၤလၢကစၢ်ဒီးခရံာ်န့ၣ်လီၤ.”
37တုၤပှၤတဖၣ်နၢ်ဟူဘၣ်တၢ်လၢစီၤပ့းတရူးစံးတ့ၢ်ဝဲအံၤန့ၣ်, အဝဲသ့ၣ်အသးဘၣ်ဒိဘၣ်ထံးနးမးဒီးစံးဘၣ်စီၤပ့းတရူးဒီး ပှၤတၢ်မၢဖိအဂၤတဖၣ်, “ဒီပုၢ်ဝဲၢ်သ့ၣ်ဧၢ, ပကမၤဘၣ်ဒ်လဲၣ်.”
38စီၤပ့းတရူးစံးဘၣ်အဝဲသ့ၣ်, သုဝဲဒၣ်ကိးဂၤဒဲးသုဘၣ်ပီၢ်ယၢ်ဒီးဃၣ်လိၤက့ၤသုသးဆူယွၤ အအိၣ်, ဒီးသုဘၣ်ဒိးဘျၢသုသးလၢထံလၢယ့ၣ်ၡူးခရံာ်အမံၤအပူၤ, ဒ်သိးသုကဒိးန့ၢ်ဘၣ်တၢ်ပျၢ်သုတၢ်ဒဲးဘးဒီးကစၢ်ယွၤအတၢ်ဟ့ၣ် လၢအမ့ၢ်သးစီဆှံန့ၣ်လီၤ. 39ကစၢ်ယွၤအတၢ်အၢၣ်လီၤအီလီၤအံၤမ့ၢ်ဝဲလၢသုဂီၢ်ဒီးလၢ သုဖိသုလံၤအဂီၢ်, ဒီးကယဲၢ်ပှၤအိၣ်လၢထံယံၤကီၢ်ယံၤတဖၣ်ခဲလၢာ် အဂီၢ်, ပှၤခဲလၢာ်လၢပကစၢ်ယွၤကိးန့ၢ်ဆူအအိၣ်န့ၣ်လီၤ.”
40စီၤပ့းတရူးအုၣ်အသးလၢအဝဲသ့ၣ်အမဲာ်ညါ, ဒီးလၢတၢ်စံးတၢ်ကတိၤအါထံၣ်အါဘီအပူၤမၢန့ၢ်ဆီၣ်ခံ အဝဲသ့ၣ်ဒီးစံး, “မၤပူၤဖျဲးသုသးလၢတၢ်စံၣ်ညီၣ်ဃၣ်လၢ အကဟဲဘၣ်ပှၤတစိၤအံၤလၢအအၢအသီန့ၣ်တက့ၢ်.” 41အဝဲသ့ၣ်အါဒံအါဂၤနာ်တၢ်လၢစီၤပ့းတရူးစံးဝဲ, ဒီးဘၣ်တၢ်ဘျၢအီၤလၢထံ ဒီးနံၤအဝဲန့ၣ်ပှၤစူၢ်က့ၤနာ်က့ၤတၢ်အနီၣ်ဂံၢ်အါထီၣ်ပှၤသၢကထိဂၤ ဃၣ်ဃၣ်လီၤ. 42အဝဲသ့ၣ်ဟံးန့ၢ်တၢ်ဆၢကတီၢ်လၢကမၤလိန့ၢ်တၢ်လၢ ပှၤတၢ်မၢဖိတဖၣ်အအိၣ်, ကရ့လိာ်မုာ်လိာ်သကိးအသး, ကအီၣ်သကိးအီသကိး, ဒီးကဘါထုကဖၣ်သကိးတၢ်အဂီၢ်န့ၣ်လီၤ.
ပှၤစူၢ်က့ၤနာ်က့ၤတၢ်တဖၣ်အတၢ်အိၣ်မူသကိး
43တၢ်လီၤလးဒီးတၢ်ပနီၣ်လီၤလးအါမံၤမၤအသးခီဖျိပှၤတၢ်မၢဖိတဖၣ်, ဒီးတၢ်ပျံၤတၢ်ဖုးလီၤဘၣ်ပှၤကိးဂၤဒဲးန့ၣ်လီၤ. 44ပှၤလၢအစူၢ်က့ၤနာ်က့ၤတၢ်ကိးဂၤဒဲးအိၣ်မူသကိးလၢတၢ်ရ့လိာ်မုာ် လိာ်သးဘူးဘူးတံၢ်တံၢ်အပူၤ, ဒီးဟ့ၣ်နီၤလိာ်သကိးအသးတၢ်လၢအအိၣ်ဒီးအဝဲသ့ၣ်တဂၤဒီး တဂၤန့ၣ်လီၤ. 45အဝဲသ့ၣ်ဆါလီၤကွံာ်အတၢ်စုလီၢ်ခီၣ်ခိၣ်ဒီးအတၢ်ဖိတၢ်လံၤတဖၣ်, ဒီးဟ့ၣ်နီၤလီၤဝဲစ့ဒ်တဂၤဒီးတဂၤလိၣ်ဘၣ်ဝဲအသိးန့ၣ်လီၤ. 46တနံၤဘၣ်တနံၤအဝဲသ့ၣ်လဲၤသကိးဆူတၢ်လုၢ်ဟံၣ်အပူၤ, ဒီးအီၣ်သကိးတၢ်အီၣ်လၢအဝဲသ့ၣ်အဟံၣ်တဖၣ်အပူၤပှဲၤဒီး တၢ်သူၣ်ခုသးခုဒီးတၢ်သူၣ်အိၣ်သးအိၣ်, 47အိၣ်ဒီးတၢ်စံးထီၣ်ပတြၢၤကစၢ်ယွၤ, ဒီးအဝဲသ့ၣ်ဒိးန့ၢ်ပှၤခဲလၢာ်အတၢ်ဘၣ်သူၣ်ဘၣ်သးန့ၣ်လီၤ. ဒီးကိးနံၤဒဲးန့ၣ်, ကစၢ်ပာ်ဖှိၣ်အါထီၣ်ပှၤဒိးန့ၢ်တၢ်အုၣ်က့ၤခီၣ်က့ၤ တဖၣ်ဆူအဝဲသ့ၣ်အတၢ်အိၣ်ဖှိၣ်အပူၤန့ၣ်လီၤ.
Pilihan Saat Ini:
မၤတၢ် 2: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
