မၤတၢ် 16
16
စီၤတံၤမသ့းလဲၤဃုာ်တၢ်ဒီးစီၤပီလူးဒီးစီၤစံလၤ
1စီၤပီလူးလဲၤဆူညါဆူဝ့ၢ်ဒ့ၢ်ဘ့ၤဒီးဝ့ၢ်လူစတြၤလီၤ. ဖဲဝ့ၢ်လူစတြၤန့ၣ်အပျဲၢ်အဘီၣ်အိၣ်ဝဲတဂၤလၢအမံၤမ့ၢ်စီၤတံၤမသ့း, ဒီးအဝဲဒၣ်အမိၢ်လၢအမ့ၢ်စ့ၢ်ကီးပှၤစူၢ်က့ၤနာ်က့ၤတၢ်တဂၤ န့ၣ်မ့ၢ်ဝဲပှၤယူဒၤမုၣ်, ဘၣ်ဆၣ်အပၢ်မ့ၢ်ပှၤကြံးခ်ဖိတဂၤန့ၣ်လီၤ. 2ပှၤစူၢ်က့ၤနာ်က့ၤတၢ်ကဒဲကဒဲဒီးစီၤတံၤမသ့းဖဲဝ့ၢ်လူစတြၤ ဒီးဝ့ၢ်အံၤကနံၤခဲလၢာ်ကတိၤအုၣ်အသးထဲအဝဲအတၢ်ဂ့ၤ အဂ့ၢ်န့ၣ်လီၤ. 3စီၤပီလူးအသးအိၣ်လၢအဝဲဒၣ်ကကဲထီၣ်ပှၤလဲၤဃုာ်တၢ်ဒီး အီၤသတးဒီး, ကူးတရံးအီၤလီၤ. အဝဲမၤတၢ်ဒ်သိးအံၤန့ၣ်, မ့ၢ်လၢပှၤယူဒၤဖိလၢအအိၣ်အဆိးဖဲတၢ်လီၢ်တၢ်ကျဲတဖၣ် န့ၣ်အပူၤအဃိ, အဂ့ၢ်မ့ၢ်လၢအဝဲသ့ၣ်ခဲလၢာ်သ့ၣ်ညါလၢ စီၤတံၤမသ့းအပၢ်မ့ၢ်ပှၤကြံးခ်ဖိတဂၤအဃိန့ၣ်လီၤ. 4ဖဲအဝဲသ့ၣ်လဲၤခီဂာ်ဝ့ၢ်တဖၣ်န့ၣ်, အဝဲသ့ၣ်ဟ့ၣ်လီၤဝဲပှၤစူၢ်က့ၤနာ်က့ၤတၢ်တဖၣ်လၢတၢ်သိၣ် တၢ်သီလၢအဘၣ်တၢ်စံၣ်ညီၣ်ပာ်လီၤအီၤလၢပှၤတၢ်မၢဖိ ဒီးတၢ်အိၣ်ဖှိၣ်အသူၣ်က့သးပှၢ်လၢဝ့ၢ်ယရူၤၡလ့ၣ်, ဒီးစံးဘၣ်အဝဲသ့ၣ်လၢအကတိၢ်န့ၢ်ဟံးဃာ်အီၤလီၤ. 5လၢတၢ်န့ၣ်အဃိ, တၢ်အိၣ်ဖှိၣ်တဖၣ်အတၢ်စူၢ်တၢ်နာ်အဂံၢ် အဘါဆူၣ်ထီၣ်, ဒီးပှၤစူၢ်က့ၤနာ်က့ၤတၢ်အနီၣ်ဂံၢ်အါထီၣ်ဝဲ ကိးနံၤဒဲးလီၤ.
စီၤပီလူးထံၣ်တၢ်ထံၣ်လၢညါခီဖဲဝ့ၢ်တြိၤအါ
6မ့ၢ်လၢသးစီဆှံတပျဲအဝဲသ့ၣ်စံၣ်တဲၤတဲလီၤတၢ်ကစီၣ်ဖဲ ကီၢ်အၤစံဘၣ်အဃိ, အဝဲသ့ၣ်လဲၤခီဂာ်ကီၢ်ဖြူၤကံဒီး ကီၢ်ကလၤတံန့ၣ်လီၤ. 7ဖဲအဝဲသ့ၣ်လဲၤတုၤမူၤစံအကီၢ်ဆၢန့ၣ်, ဂုာ်ကျဲးစၢးလဲၤနုာ်ဝဲဆူကီၢ်ဘံၤသူၤနံဘၣ်ဆၣ် ဒီးယ့ၣ်ၡူးအသးတပျဲအဝဲသ့ၣ်ဘၣ်. 8လၢတၢ်န့ၣ်အဃိ, အဝဲသ့ၣ်လဲၤခီဂာ်ကီၢ်မူၤစံဒီးလဲၤလီၤဝဲ ဆူဝ့ၢ်တြိၤအါန့ၣ်လီၤ. 9နၤအဝဲန့ၣ်, စီၤပီလူးဒိးန့ၢ်ဘၣ်တၢ်ထံၣ်လၢညါခီတမံၤဒီး လၢတၢ်ထံၣ်လၢညါခီအပူၤန့ၣ်, အဝဲထံၣ်ဘၣ်ပှၤကီၢ်မၤက့းဒနံဖိတဂၤဆၢထၢၣ်ဒီးဃ့ကညး အီၤဒီးစံး, “ဟဲခီဂာ်ဆူကီၢ်မၤက့းဒနံဒီးမၤစၢၤပှၤတက့ၢ်.” 10စီၤပီလူးဒိးန့ၢ်တၢ်ထံၣ်လၢညါခီဝံၤအလီၢ်ခံတဘျီဃီ, ပအိၣ်ကတဲာ်ကတီၤပသးလၢပကဟးထီၣ်ဒီးလဲၤဆူကီၢ်မၤက့းဒနံ, အဂ့ၢ်မ့ၢ်လၢပနာ်လၢယွၤကိးပှၤဒ်သိးပကစံၣ်တဲၤတဲလီၤတၢ်သးခု အကစီၣ်ဆူပှၤထံဖိကီၢ်ဖိဖဲန့ၣ်တဖၣ်အအိၣ်အဃိန့ၣ်လီၤ.
နီၢ်လူၤဒံကဲထီၣ်ပှၤစူၢ်က့ၤနာ်က့ၤခရံာ်ဖဲဝ့ၢ်ဖံလံးပံၤ
11ပဟးထီၣ်ဖဲဝ့ၢ်တြိၤအါလၢကဘီဒီးခီဂာ်တဘျီဃီဆူကီး စၤမသြါက့ၤ, ဒီးလၢခံတနံၤန့ၣ်လဲၤကဒီးဆူဝ့ၢ်နါပလံၣ်လီၤ. 12စးထီၣ်ဖဲန့ၣ်ပလဲၤတၢ်လၢခိအကျဲဆူဝ့ၢ်ဖံလံးပံၤ, လၢအမ့ၢ်ဝ့ၢ်တဝ့ၢ်လၢအဘၣ်ဃးဒီးကီၢ်မၤက့းဒနံအကီၢ်ဆၣ်အဆိကတၢၢ်တဘ့ၣ်, လၢအအိၣ်လၢရိမ့ၤအတၢ်ပၢအဖီလာ်န့ၣ်လီၤ. ပအိၣ်ပဝဲစှၤနံၤစှၤသီဖဲန့ၣ်လီၤ. 13ဖဲပှၤယူဒၤဖိအမုၢ်အိၣ်ဘှံးနံၤန့ၣ်, ပဟးထီၣ်ဆူဝ့ၢ်အချၢဒီးလဲၤ ဆူထံကျိနံၤ, ဖဲတၢ်လီၢ်လၢပဆိကမိၣ်ပှၤယူဒၤဖိအတၢ်ဘါထု ကဖၣ်အလီၢ်ကအိၣ်ဝဲန့ၣ်လီၤ. ပဆ့ၣ်နီၤဒီးစံၣ်တဲၤတဲလီၤန့ၢ်တၢ်လၢပိာ်မုၣ်လၢအဟဲပာ်ဖှိၣ် သကိးအသးဖဲန့ၣ်တဖၣ်အဂီၢ်လီၤ. 14ပိာ်မုၣ်လၢအဒိကနၣ်ပတၢ်စံးတၢ်ကတိၤအကျါတဂၤမ့ၢ်ဝဲနီၢ် လူၤဒံဘၣ်ဃးဒီးဝ့ၢ်သူၤအတံရၤ, လၢအဆါတၢ်ကံးယာ်လုးတကုာ်လုၢ်ဒိၣ်ပှ့ၤဒိၣ်တဖၣ်န့ၣ်လီၤ. အဝဲဒၣ်မ့ၢ်ပှၤလၢအဘူၣ်ထူဘါယွၤ, ဒီးကစၢ်ယွၤအိးထီၣ်အသးဒ်သိးအကတူၢ်လိာ်တၢ်လၢစီၤ ပီလူးစံးကတိၤဝဲန့ၣ်လီၤ. 15အဝဲဒၣ်ဒီးအပှၤဟံၣ်ဖိဃီဖိတဖၣ်ဘၣ်တၢ်ဘျၢအီၤလၢထံလီၤ. အန့ၣ်ဝံၤအလီၢ်ခံအဝဲဒၣ်ကွဲပှၤဒီးစံးဝဲ, “သုမ့ၢ်ပာ်ယၤလၢယမ့ၢ်ပှၤစူၢ်က့ၤနာ်က့ၤကစၢ်နီၢ်နီၢ်န့ၣ်, ဟဲအိၣ်လၢယဟံၣ်တက့ၢ်.” ဒီးအဝဲဒၣ်ကိးပှၤသပှၢ်ပှၢ်တုၤ ပလဲၤတစုလီၤ.
လၢဝ့ၢ်ဖံလံးပံၤအဃိာ်ပူၤ
16ဘၣ်တနံၤဖဲပလဲၤဃီၤပဝဲဆူတၢ်ထုကဖၣ်အလီၢ်န့ၣ်, ပဘၣ်တၢ်သဂၢၢ်ပှၤလၢကုၢ်ပိာ်မုၣ်သးစၢ်တဂၤလၢအအိၣ်ဒီးတၢ်နါ လၢအဒုးဖးအီၤတၢ်လၢအကမၤအသးလၢခံတဖၣ်န့ၣ်လီၤ. ခီဖျိအဝဲဒၣ်ဖးတၢ်အဃိန့ၣ်, မၤန့ၢ်စ့အါအါဂီၢ်ဂီၢ်လၢအကစၢ် တဖၣ်အဂီၢ်လီၤ. 17အဝဲဒၣ်ပိာ်ထီၣ်စီၤပီလူးဒီးပဝဲသ့ၣ်တဖၣ်အခံ, အိၣ်ဒီးတၢ်ကိး ပသူထီၣ်ဝဲ, “ပှၤသ့ၣ်တဖၣ်အံၤမ့ၢ်ကစၢ်ယွၤလၢအဒိၣ်ကတၢၢ် အထီကတၢၢ်တဂၤအခ့အပှၤလီၤ. အဝဲသ့ၣ်ဘိးဘၣ်သ့ၣ်ညါသုလၢသုကဘၣ်တၢ်အုၣ်က့ၤခီၣ် က့ၤသုဒ်လဲၣ်အဂ့ၢ်န့ၣ်လီၤ.” 18ဒီးမၤဝဲဒ်အံၤအါနံၤအါသီ, တုၤစီၤပီလူးအသးဒိၣ်ထီၣ်ဒီးဃၣ်တရံးအသးဒီးစံးဘၣ်တၢ်နါန့ၣ်, “လၢယ့ၣ်ၡူးခရံာ်အမံၤအပူၤန့ၣ်, ယဟ့ၣ်လီၤယကလုၢ်လၢနကဟးထီၣ်ကွံာ်လၢပိာ်မုၣ်အံၤ အပူၤလီၤ.” တဘျီဃီဖဲန့ၣ်တၢ်နါဟးထီၣ်ကွံာ်လၢအပူၤလီၤ. 19ဖဲပိာ်မုၣ်သးစၢ်အကစၢ်တဖၣ်သ့ၣ်ညါလၢကဒိးန့ၢ်ဘၣ်စ့ အဂီၢ်တၢ်အခွဲးအယာ်တအိၣ်လၢၤဘၣ်န့ၣ်, အဝဲသ့ၣ်စှီၤဃာ်စီၤပီလူးဒီးစီၤစံလၤဒီးလဲၤတွံၢ်အီၤဆူ ပဒိၣ်ပပှၢ်တဖၣ်အအိၣ်, ဖဲဖၠါပူၤန့ၣ်လီၤ. 20အဝဲသ့ၣ်ဆှၢထီၣ်စီၤပီလူးဒီးစီၤစံလၤဆူရိမ့ၤအစံၣ် ညီၣ်ကွီၢ်တဖၣ်အမဲာ်ညါဒီးစံးဝဲ, “ပှၤတဖၣ်အံၤမ့ၢ်ပှၤယူဒၤဖိ, ဒီးမၤတၢထီၣ်တၢလီၤတၢ်လၢပဝ့ၢ်ပူၤလီၤ. 21အဝဲသ့ၣ်သိၣ်လိလုၢ်လၢ်လၢအထီဒါပတၢ်သိၣ်တၢ်သီတဖၣ်လီၤ. ဒ်ပမ့ၢ်ရိမ့ၤအပှၤထံဖိကီၢ်ဖိတဖၣ်အသိးန့ၣ်, အဝဲသ့ၣ်အတၢ် သိၣ်လိတဖၣ်အံၤ, ပတူၢ်လိာ်အီၤမ့ၢ်ဂ့ၤ, မၤထွဲပိာ်ထွဲအီၤမ့ၢ်ဂ့ၤ တသ့ဘၣ်န့ၣ်လီၤ. 22ပှၤဂီၢ်မုၢ်တဖၣ်စ့ၢ်ကီးထီဒါစီၤပီလူးဒီးစီၤစံလၤလီၤ.
အန့ၣ်ဒီးစံၣ်ညီၣ်ကွီၢ်တဖၣ်မၢပှၤဖှီယာ်ကွံာ်ပှၤခံဂၤန့ၣ်အကူအသိး, ဒီးဟ့ၣ်လီၤအကလုၢ်လၢပှၤကဖျ့အဝဲသ့ၣ်လီၤ. 23တၢ်ဖျ့အီၤတီၢ်အီၤနးမးဝံၤအလီၢ်ခံ, တၢ်တ့ၢ်နုာ်အီၤဆူဃိာ်ပူၤ, ဒီးပှၤဃိာ်ဒိၣ်ဘၣ်တၢ်မၤလိာ်အီၤလၢအကဒုးဃာ်အဝဲသ့ၣ် လီၤတံၢ်လီၤဆဲးန့ၣ်လီၤ. 24တုၤပှၤဃိာ်ဒိၣ်ဒိးန့ၢ်တၢ်ကလုၢ်အံၤဒီး, အဝဲဒၣ်တ့ၢ်နုာ်အဝဲသ့ၣ်ဆူဒၢးလၢအအိၣ်လၢဃိာ်အသး ကံၢ်ပူၤဒီးသိးဃာ်အခီၣ်လၢသ့ၣ်ကျီၤဖးဃၢတဖၣ်အကဆူးန့ၣ်လီၤ.
25ကဘၣ်ဖဲဖးဖီမုၢ်အကတီၢ်န့ၣ်, စီၤပီလူးဒီးစီၤစံလၤဃ့ဘါထုကဖၣ်တၢ်ဒီးသးဝံၣ်ထါစံးထီၣ် ပတြၢၤကစၢ်ယွၤ, ဒီးပှၤဃိာ်ဖိအဂၤတဖၣ်ဒိကနၣ်တၢ်လီၤ. 26သတူၢ်ကလာ်, ဟီၣ်ခိၣ်ဟူးဝဲဒၣ်ဆူၣ်ဆူၣ်ကလဲာ်တုၤ အမၤဟူးဝးဆှဲးဆှိးဃိာ်အခီၣ်ထံးန့ၣ်လီၤ. တဘျီဃီဖဲန့ၣ်, တြဲၤတဖၣ်အိးထီၣ်အသးဒီးပျံၤထးတဖၣ်လီၤတဲာ်ကွံာ်လၢ ပှၤဃိာ်ဖိခဲလၢာ်အလိၤလီၤ. 27ပှၤဃိာ်ဒိၣ်ပၢၢ်ထီၣ်ဒီးဖဲအဝဲဒၣ်ထံၣ်ဃိာ်အတြဲၤတဖၣ်အိၣ် အိးထီၣ်အသးန့ၣ်, ဆိကမိၣ်ဝဲလၢပှၤဃိာ်ဖိတဖၣ်ထူၣ်ဖျဲး လၢာ်လံန့ၣ်လီၤ. လၢတၢ်န့ၣ်အဃိ, အဝဲဒၣ်ထုးထီၣ်အနးဒီးသါကမၤသံလီၤအသးလီၤ. 28ဘၣ်ဆၣ်ဒီးစီၤပီလူးကိးထီၣ်လၢအကလုၢ်ဖးဒိၣ်ဒီးစံးဝဲ, “မၤဆါလီၤနသးတဂ့ၤ. ပအိၣ်ပဝဲဖဲအံၤကိးဂၤဒဲးလီၤ.”
29ပှၤဃိာ်ဒိၣ်ကိးထီၣ်ဒ်သိးပှၤကဟဲစိာ်တၢ်ကပီၤဝံၤ, ဃ့ၢ်နုာ်ဆူဒၢးပူၤ, ထိၣ်လီၤပှီၤအသးဒီးကနိးကစုာ်ဝဲလၢ စီၤပီလူးဒီးစီၤစံလၤအခီၣ်ထံးလီၤ. 30အန့ၣ်ဝံၤ အဝဲဒၣ်ဆှၢထီၣ်အဝဲသ့ၣ်ဆူခိဒီးသံကွၢ်အီၤ, “တၢ်ဒိၣ်သ့ၣ်ဧၢ, ဒ်သိးယကဘၣ်တၢ်အုၣ်က့ၤခီၣ်က့ၤယၤ အဂီၢ်န့ၣ်, ယကဘၣ်မၤမနုၤလဲၣ်.”
31အဝဲသ့ၣ်စံးဘၣ်အီၤ, “စူၢ်က့ၤနာ်က့ၤကစၢ်ယ့ၣ်ၡူးတက့ၢ်. ဒီးနကဘၣ်တၢ်အုၣ်က့ၤခီၣ်က့ၤနၤ, နဝဲဒီး နပှၤဟံၣ်ဖိဃီဖိ တဖၣ်န့ၣ်လီၤ.” 32တုၤနုၤတစု, အဝဲသ့ၣ်စံၣ်တဲၤတဲလီၤကစၢ်အကလုၢ်ကထါလၢ အဝဲဒီးပှၤအဂၤလၢအအိၣ်လၢအဟံၣ်ပူၤကိးဂၤဒဲးလီၤ. 33တနၤဃီတဆၢကတီၢ်ဃီန့ၣ်, ပှၤဃိာ်ဒိၣ်သ့ကွံာ်အဝဲသ့ၣ်အပူၤလီၢ် အပူၤကျဲ, ဒီးအဝဲဒၣ်ဒီးအပှၤဟံၣ်ဖိဃီဖိခဲလၢာ်ဘၣ်တၢ်ဘျၢ အီၤလၢထံတဘျီဃီလီၤ. 34အဝဲဒၣ်က့ၤကိးစီၤပီလူးဒီးစီၤစံလၤဆူအဟံၣ်ဒီးဟ့ၣ်အီၤ တၢ်အီၣ်လၢအကအီၣ်ဝဲအဂီၢ်လီၤ. အဝဲဒီးအပှၤဟံၣ်ဖိဃီဖိတဖၣ်အသးပှဲၤဒီးတၢ်သူၣ်ခု သးခုမ့ၢ်လၢအဝဲသ့ၣ်စူၢ်က့ၤနာ်က့ၤလံကစၢ်ယွၤအဃိ န့ၣ်လီၤ.
35မုၢ်ဆ့ၣ်ထီၣ်တနံၤန့ၣ်, ရိမ့ၤအစံၣ်ညီၣ်ကွီၢ်တဖၣ်ဆှၢလီၤပၢၤကီၢ် အခိၣ်အနၢ်တဖၣ်ဃုာ်ဒီးတၢ်ကလုၢ်, “ပျၢ်ကွံာ်ပှၤသ့ၣ်တဖၣ်န့ၣ် တက့ၢ်.”
36လၢတၢ်န့ၣ်အဃိပှၤဃိာ်ဒိၣ်တဲဘၣ်စီၤပီလူးဒီးစံးဝဲ, “ပှၤစံၣ်ညီၣ်ကွီၢ်တဖၣ်ဟ့ၣ်လီၤအကလုၢ်လၢနၤဒီးစီၤစံလၤ, သုကဘၣ်တၢ်ပျၢ်ဖျဲးကွံာ်သုအဂီၢ်လီၤ. လၢတၢ်န့ၣ်အဃိ, သုဟးထီၣ်ကွံာ်သ့လံ. ဒီးလဲၤတၢ်မုာ်မုာ်တက့ၢ်.”
37ဘၣ်ဆၣ်ဒီးစီၤပီလူးစံးဘၣ်ပၢၤကီၢ်အခိၣ်အနၢ်တဖၣ်, “တၢ်တထံၣ်န့ၢ်တၢ်ကမၣ်လၢပပူၤနီတမံၤဘၣ်. ဘၣ်ဆၣ်ဒီးအဝဲသ့ၣ်တီၢ်ပှၤဖျ့ပှၤလၢကမျၢၢ်အမဲာ်ညါ, ပဝဲလၢအမ့ၢ်ရိမ့ၤအထံဖိကီၢ်ဖိတဖၣ်လီၤ. အန့ၣ်ဝံၤအလီၢ်ခံအဝဲသ့ၣ်တ့ၢ်နုာ်ပှၤလၢဃိာ်ပူၤလီၤ. မ့မ့ၢ်အခဲအံၤ, အဝဲသ့ၣ်ကဒုးဟးထီၣ်ကွံာ်ပှၤလၢတၢ်ခူသူၣ် အပူၤန့ၣ်ဧါ. တန့ၢ်ဘၣ်. ရိမ့ၤအစံၣ်ညီၣ်ကွီၢ်တဖၣ်အနီၢ်ကစၢ်ဒၣ်ဝဲကဘၣ်ဟဲဖဲအံၤ ဒီးဒုးဟးထီၣ်ပှၤလီၤ.”
38ပၢၤကီၢ်အခိၣ်အနၢ်တဖၣ်တဲဖျါထီၣ်က့ၤတၢ်ကတိၤတဖၣ် အံၤလၢရိမ့ၤအစံၣ်ညီၣ်ကွီၢ်တဖၣ်, ဒီးဖဲအဝဲသ့ၣ်နၢ်ဟူလၢစီၤပီလူးဒီးစီၤစံလၤမ့ၢ်ရိမ့ၤ အထံဖိကီၢ်ဖိန့ၣ်, အဝဲသ့ၣ်ပျံၤတၢ်လီၤ. 39လၢတၢ်န့ၣ်အဃိ, အဝဲသ့ၣ်လဲၤဒီးဃ့ကညးစီၤပီလူးဒီး စီၤစံလၤလီၤ. အန့ၣ်ဝံၤအလီၢ်ခံ, အဝဲသ့ၣ်ဆှၢထီၣ်အီၤဆူ ဃိာ်အချၢဒီး မၢအဝဲသ့ၣ်ဟးထီၣ်ကွံာ်လၢဝ့ၢ်ပူၤလီၤ. 40စီၤပီလူးဒီးစီၤစံလၤဟးထီၣ်ကွံာ်လၢဃိာ်ပူၤဒီး လဲၤဆူနီၢ်လူၤဒံအဟံၣ်လီၤ. ဖဲန့ၣ်အဝဲသ့ၣ်ထံၣ်လိာ်အသးဒီးပှၤစူၢ်က့ၤနာ်က့ၤတၢ် တဖၣ်, ကတိၤဟ့ၣ်ဆူၣ်ထီၣ်အဝဲသ့ၣ်အဂံၢ်အဘါ, ဒီးဟးထီၣ်ကွံာ်လၢဝ့ၢ်ပူၤလီၤ.
Pilihan Saat Ini:
မၤတၢ် 16: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
