မၤတၢ် 14
14
စီၤပီလူးဒီးစီၤဘၢ်နါဘၤစံၣ်တဲၤတဲလီၤ တၢ်သးခုအကစီၣ်ဖဲဝ့ၢ်အံၤကနံၤ
1ဖဲဝ့ၢ်အံၤကနံၤန့ၣ်, အဝဲသ့ၣ်လဲၤဆူပှၤယူဒၤဖိအဘူၣ်ဘျီၣ်လၢ အမ့ၢ်တၢ်ဘါလီၢ်ဒ်အမၤတ့ၢ်ဝဲလၢဝ့ၢ်အၣ်တံၤအီာ်အသိးန့ၣ်လီၤ. အဝဲသ့ၣ်ကတိၤတၢ်တုၤလီၤတီၤလီၤတုၤဒၣ်လဲာ်, ပှၤယူဒၤဖိဒီးပှၤကြံးခ်ဖိအါဒံအါဂၤစူၢ်က့ၤနာ်က့ၤတၢ်န့ၣ်လီၤ. 2ဘၣ်ဆၣ်ဒီးပှၤယူဒၤဖိလၢအတစူၢ်တနာ်တၢ်တဖၣ်ထိၣ်ဂဲၤထီၣ် ပှၤကလုာ်ဂၤတဖၣ်အသးထီဒါစီၤပီလူးဒီးစီၤဘၢ်နါဘၤန့ၣ်လီၤ. 3ပှၤတၢ်မၢဖိခံဂၤအံၤအိၣ်ဖဲန့ၣ်ဖးယံာ်လီၤ. အဝဲသ့ၣ်စံးကတိၤတၢ်ဒူဒူဘၣ်ဃးဒီးကစၢ်အဂ့ၢ်ဒီးအတၢ် ကစီၣ်ဘၣ်ဃးဒီးကစၢ်အဘျုးအဖှိၣ်အံၤမ့ၢ်တၢ်မ့ၢ်တၢ်တီအဂ့ၢ်န့ၣ်, ကစၢ်အုၣ်အသးခီဖျိအဟ့ၣ်တၢ်စိတၢ်ကမီၤလၢတၢ်မၤတၢ်လီၤလးဒီး တၢ်ပနီၣ်လီၤလးတဖၣ်န့ၣ်လီၤ. 4ပှၤဂီၢ်မုၢ်လၢဝ့ၢ်ပူၤတဖၣ်လီၤဖးခံဖု, တဖုအိၣ်ပှိၤပှၤယူဒၤဖိတဖၣ်, ဒီးအဂၤတဖုအိၣ်ပှိၤပှၤတၢ်မၢဖိတဖၣ်န့ၣ်လီၤ.
5တုၤနုၤတစုပှၤကလုာ်ဂၤတနီၤဒီးပှၤယူဒၤဖိတဖၣ်, ဃုာ်ဒီးအပှၤခိၣ်ပှၤနၢ်တဖၣ်စံၣ်ညီၣ်အၢၣ်လီၤသကိးဝဲလၢ အကမၤအၢမၤသီပှၤတၢ်မၢဖိတဖၣ်ဒီးကကွံာ်အီၤလၢလၢၢ်န့ၣ်လီၤ. 6ဖဲပှၤတၢ်မၢဖိတဖၣ်သ့ၣ်ညါတၢ်ဂ့ၢ်အဝဲအံၤန့ၣ်, အဝဲသ့ၣ်ဃ့ၢ်ဆူဝ့ၢ်လူစတြၤဒီးဝ့ၢ်ဒ့ၢ်ဘ့ၤဘၣ်ဃးဒီးကီၢ်လူၤကီၤနံ, ဒီးဆူကီၢ်အိၣ်ဝးတရံးအီၤ, 7ဒီးဖဲတၢ်လီၢ်တဖၣ်န့ၣ်, အဝဲသ့ၣ်စံၣ်တဲၤတဲလီၤတၢ်သးခုအကစီၣ်န့ၣ်လီၤ.
လၢဝ့ၢ်လူစတြၤဒီးဝ့ၢ်ဒ့ၢ်ဘ့ၤအပူၤ
8တၢ်မၤအသးဖဲဝ့ၢ်လူစတြၤန့ၣ်, ပှၤအခီၣ်ဟးဂီၤတ့ၢ်ဝဲလၢအအိၣ်ဖျဲၣ် ထီၣ်လံၤလံၤဒီးဟးတသ့နီတဘျီဘၣ်အိၣ်ဝဲတဂၤလီၤ. 9အဝဲဆ့ၣ်နီၤဖဲန့ၣ်ဒီးဒိကနၣ်စီၤပီလူးအတၢ်စံးတၢ်ကတိၤ တဖၣ်လီၤ. စီၤပီလူးကွၢ်ထံကွၢ်ဆးအီၤ, ဒီးထံၣ်လၢအဝဲဒၣ်အိၣ်ဒီးတၢ်စူၢ်တၢ်နာ်လၢတၢ်ကမၤဘျါ က့ၤအီၤအဂီၢ်အဃိ, 10စံးဝဲလၢအကလုၢ်ဖးဒိၣ်, “ဂဲၤဆၢထၢၣ်ဘျၢဘျၢတက့ၢ်.” ဖဲန့ၣ်, ပှၤခီၣ်ဟးဂီၤစံၣ်ထီၣ်ဒီးစးထီၣ်ဟးထီၣ်ဟးလီၤဝဲဒၣ်လီၤ. 11ဖဲပှၤဂီၢ်မုၢ်တဖၣ်ထံၣ်ဘၣ်တၢ်လၢစီၤပီလူးမၤတ့ၢ်ဝဲန့ၣ်, အဝဲသ့ၣ်ကိးပသူထီၣ်လၢပှၤလူၤကီၤနံဖိအကျိာ်ဒၣ်ဝဲဒီးစံး, “ယွၤတဖၣ်ဟဲလီၤဆူပအိၣ်, အိၣ်ဒီးပှၤကညီအက့ၢ်အဂီၤလီၤ.” 12အဝဲသ့ၣ်ကိးစီၤဘၢ်နါဘၤလၢကစၢ်စူ ဒီးစီၤပီလူးတခီ, မ့ၢ်လၢအကတိၤတၢ်လီၤဆီဒၣ်တၢ်အဃိ, ကိးဝဲလၢကစၢ်ဟ့ၢ်မ့ၤန့ၣ်လီၤ. 13ကစၢ်စူအပှၤလုၢ်တၢ်အခိၣ်လၢအဘၣ်ဃးဒီးတၢ်လုၢ်ဟံၣ်လၢ အအိၣ်လၢဝ့ၢ်အချၢန့ၣ်, ဟဲစိာ်ကျီၢ်ဖါလၢအဘၣ်တၢ်ဒုးလံာ်ထီၣ်အီၤလၢဖီကွီၤ တဖၣ်ဆူတၢ်လုၢ်ဟံၣ်အတြဲၤခီၣ်ထံးလီၤ. အဂ့ၢ်မ့ၢ်လၢအဝဲဒီးပှၤဂီၢ်မုၢ်တဖၣ်အဲၣ်ဒိးလုၢ်ထီၣ်ပာ်ထီၣ် တၢ်ဆူပှၤတၢ်မၢဖိတဖၣ်အအိၣ်အဃိန့ၣ်လီၤ.
14ဖဲစီၤဘၢ်နါဘၤဒီးစီၤပီလူးနၢ်ဟူဘၣ်တၢ်လၢအဝဲသ့ၣ်တဖၣ် သါကမၤဝဲန့ၣ်, အဝဲသ့ၣ်ဖှီယာ်အကူအသိး ဒီးဃ့ၢ်နုာ်လီၤဆူ ပှၤဂီၢ်မုၢ်တဖၣ်အသိးအကျါ, ဒီးကိးပသူထီၣ်ဝဲ, 15“ဘၣ်မနုၤအဃိသုမၤတၢ်အံၤလဲၣ်. ပမ့ၢ်ဒၣ်ပှၤကညီဒ်သုဝဲအသိးလီၤ. ပဟဲပဝဲဖဲအံၤဒ်သိးပကဘိးဘၣ်သ့ၣ်ညါသုလၢတၢ်သးခုအကစီၣ်, ဒ်သိးသုကဃၣ်ကွံာ်သုသးလၢတၢ်တဂိာ်တသီၣ်တဖၣ်အံၤ, ဒီးဃၣ်ဃီၤသုသးဆူကစၢ်လၢအမူဝဲတဂၤန့ၣ်အအိၣ်, ကစၢ်လၢ အတ့လီၤမူခိၣ်, ဟီၣ်ခိၣ်, ပီၣ်လဲၣ်ပီၣ်တြီၤ, ဒီးတၢ်အိၣ်လၢအပူၤခဲလၢာ်ခဲဆ့န့ၣ်လီၤ. 16လၢအပူၤကွံာ်န့ၣ်, အဝဲဒၣ်ပျဲပှၤကိးကလုာ်ဒဲးလဲၤဖဲအသးမၤဖဲ အသးဒၣ်ဝဲလီၤ. 17ဘၣ်ဆၣ်ဒီးအဝဲဟ့ၣ်တ့ၢ်လံတၢ်အုၣ်အသးထီဘိဘၣ်ဃးအနီၢ် ကစၢ်ဒၣ်ဝဲအဂ့ၢ်ခီဖျိတၢ်မၤအဂ့ၤအဝါလၢအမၤဝဲတဖၣ်န့ၣ်လီၤ. အဝဲဒၣ်ဒုးစူၤလီၤတၢ်လၢမူခိၣ်လၢသုဂီၢ်, ဒီးဒုးသၣ်ထီၣ်ဘုဟုတၤသူတၤသၣ်ဘၣ်ဆၢဘၣ်ကတီၢ်, အဝဲဒၣ်ဟ့ၣ်သုတၢ်အီၣ်တၢ်အီ, ဒီးမၤပှဲၤသုသးလၢတၢ်သူၣ် ဖှံသးညီန့ၣ်လီၤ.” 18ပှၤတၢ်မၢဖိတဖၣ်စံးကတိၤတၢ်ထဲအံၤဒၣ်လဲာ်န့ၣ်, တြီပှၤဂီၢ်မုၢ်ဒ်သိးအသုတလုၢ်ထီၣ်ပာ်ထီၣ်တၢ်ဆူအဝဲသ့ၣ် အအိၣ်တန့ၢ်ညီညီဘၣ်.
19ပှၤယူဒၤဖိတနီၤဟဲလၢဝ့ၢ်အၣ်တံၤအီာ်ဘၣ်ဃးဒီးကီၢ်ပံၤစံၤဒံဒီး လၢဝ့ၢ်အံၤကနံၤလီၤ. အဝဲသ့ၣ်ထုးန့ၢ်ပှၤဂီၢ်မုၢ်အသးဒ်သိးအကစူၢ်ကနာ်တၢ်လၢ အဝဲသ့ၣ်စံးဝဲ, ဒီးကွံာ်စီၤပီလူးလၢလၢၢ်ဝံၤ, ဖဲအဆိကမိၣ်လၢအဝဲဒၣ်သံလံန့ၣ်, တွံၢ်ထုးထီၣ်ကွံာ်အီၤဆူဝ့ၢ်အချၢန့ၣ်လီၤ. 20ဘၣ်ဆၣ်ဒီးဖဲပှၤစူၢ်က့ၤနာ်က့ၤတၢ်တဖၣ်လဲၤအိၣ်ဝးတရံးအီၤန့ၣ်, အဝဲဒၣ်ဂဲၤဆၢထၢၣ်ဒီးက့ၤနုာ်က့ၤဝဲဆူဝ့ၢ်ပူၤ, ဒီးမုၢ်ဆ့ၣ်ထီၣ်တနံၤန့ၣ်, အဝဲဒီး စီၤဘၢ်နါဘၤလဲၤဆူဝ့ၢ်ဒ့ၢ်ဘ့ၤလီၤ.
စီၤပီလူးဒီးစီၤဘၢ်နါဘၤအတၢ်က့ၤကဒါက့ၤဆူ ဝ့ၢ်အၣ်တံၤအီာ်ဘၣ်ဃးဒီးကီၢ်စူၤရံ
21စီၤပီလူးဒီးစီၤဘၢ်နါဘၤစံၣ်တဲၤတဲလီၤတၢ်သးခုအကစီၣ် ဖဲဝ့ၢ်ဒ့ၢ်ဘ့ၤဒီးဒုးကဲထီၣ်ပှၤအါဒံအါဂၤလၢအပျဲၢ်အဘီၣ်န့ၣ်လီၤ. အန့ၣ်ဝံၤအလီၢ်ခံအဝဲသ့ၣ်က့ၤကဒါက့ၤဆူဝ့ၢ်လူစတြၤ, ဒီးဆူဝ့ၢ်အံၤကနံၤဒီးဆူဝ့ၢ်အၣ်တံၤအီာ်ဘၣ်ဃးဒီးကီၢ်ပံၤစံၤဒံန့ၣ်လီၤ. 22အဝဲသ့ၣ်ဟ့ၣ်ဆူၣ်ထီၣ်ပှၤစူၢ်က့ၤနာ်က့ၤတၢ်တဖၣ်အဂံၢ်အဘါ ဒီးဟ့ၣ်သဆၣ်ထီၣ်အခံဒ်သိးအကအိၣ်ဂၢၢ်ဆိးကျၢၤလၢ အတၢ်စူၢ်တၢ်နာ်အပူၤန့ၣ်လီၤ. အဝဲသ့ၣ်သိၣ်လီၤသီလီၤတၢ်ဒီးစံးဝဲ, “လၢပကနုာ်လီၤဆူကစၢ်ယွၤအဘီအမုၢ်အဂီၢ်န့ၣ်, ပကဘၣ်လဲၤခီဖျိတၢ်ကီတၢ်ခဲအါမးလီၤ. 23လၢတၢ်အိၣ်ဖှိၣ်တဖုဘၣ်တဖုအပူၤန့ၣ်, အဝဲသ့ၣ်ဃုထၢထီၣ်သူၣ်က့သးပှၢ်တဖၣ်, ဒီးလၢတၢ်ထုကဖၣ်ဒီးတၢ်ဒုၣ်တၢ်အီၣ်အပူၤ, အဝဲသ့ၣ်ဟ့ၣ်လီၤအးလီၤပှၤတဖၣ်န့ၣ်ဆူကစၢ်လၢအဝဲသ့ၣ်သူၣ်လီၤ အတၢ်စူၢ်တၢ်နာ်လၢအပူၤတဂၤအစုပူၤန့ၣ်လီၤ.
24အဝဲသ့ၣ်လဲၤခီဂာ်ကီၢ်ပံၤစံၤဒံဝံၤအလီၢ်ခံ, လဲၤတုၤဝဲဖဲကီၢ်ပၣ်ဖူၤလံ န့ၣ်လီၤ. 25အဝဲသ့ၣ်စံၣ်တဲၤတဲလီၤတၢ်သးခုအကစီၣ်ဖဲဝ့ၢ်ပ့ၢ်က့ၤဝံၤအလီၢ်ခံ လဲၤဝဲဆူဝ့ၢ်အးတါလံၤလီၤ. 26ဒီးဖဲန့ၣ်အဝဲသ့ၣ်ဒိးထီၣ်ကဘီဒီးက့ၤကဒါက့ၤဆူဝ့ၢ်အၣ်တံၤအီာ်ဘၣ် ဃးဒီးကီၢ်စူၤရံ, လၢအမ့ၢ်တၢ်လီၢ်ဖဲအဝဲသ့ၣ်ဘၣ်တၢ်အးလီၤအီၤဆူကစၢ်ယွၤ အဘျုးအဖှိၣ်အတၢ်အံးတၢ်ကွၢ်အပူၤဒ်သိးဒီး အကမၤတၢ်မၤလၢအခဲအံၤအဝဲသ့ၣ်မၤဝံၤလံဝဲတမံၤအဂီၢ်န့ၣ်လီၤ.
27ဖဲအဝဲသ့ၣ်က့ၤတုၤဖဲဝ့ၢ်အၣ်တံၤအီာ်န့ၣ်, ကိးဖှိၣ်ပှၤတၢ်အိၣ်ဖှိၣ်ဖိတဖၣ်တပူၤဃီဒီးစံးဘၣ်တဲဘၣ် အဝဲသ့ၣ်တၢ်ခဲလၢာ်ဘၣ်ဃးကစၢ်ယွၤအတၢ်မၤဃုာ်တၢ်ဒီးအီၤ, ဒီးဘၣ်ဃးအဝဲအိးဟိထီၣ်ကျဲလၢပှၤကလုာ်ဂၤတဖၣ်ကစူၢ် ကနာ်တၢ်အဂီၢ်ဒ်လဲၣ်န့ၣ်လီၤ. 28ဖဲန့ၣ်အဝဲသ့ၣ်အိၣ်ဒီး ပှၤစူၢ်က့ၤနာ်က့ၤတၢ်တဖၣ်ဖးယံာ်ညါလီၤ.
Pilihan Saat Ini:
မၤတၢ် 14: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
