မၤတၢ် 10
10
စီၤပ့းတရူးဒီးစီၤကန့လံး
1ဖဲဝ့ၢ်ကဲၤစါရံၤန့ၣ်, ပှၤအိၣ်ဝဲဒၣ်တဂၤလၢအမံၤမ့ၢ်စီၤကန့လံး, ပှၤရိမ့ၤသုးဖိတကယၤအခိၣ်, ဘၣ်ဃးဒီးသုးမုၢ်တဖုလၢပှၤကိးအီၤလၢ “အံၤတလံအသုးမုၢ်” န့ၣ်လီၤ. 2အဝဲဒၣ်မ့ၢ်ပှၤလၢအအဲၣ်ထူအဲၣ်ယွၤဒီးအပှၤဟံၣ်ဖိ ဃီဖိဒီဒူၣ်ညါမ့ၢ်ပှၤတဖၣ်လၢအယူးယီၣ်ဒီးပျံၤကစၢ်ယွၤန့ၣ်လီၤ. အဝဲဒၣ်မၤစၢၤပှၤယူဒၤဖိအဖှီၣ်အယာ်တဖၣ်အါမးဒီးဃ့ ဘါထုကဖၣ်ယွၤတထံၣ်ဃီလီၤ. 3ဘၣ်တနံၤဖဲဟါခီလီၤသၢနၣ်ရံၣ်ဃၣ်ဃၣ်န့ၣ်, အဝဲဒိးန့ၢ်ဘၣ်တၢ်ထံၣ်လၢညါခီတမံၤ, ဖဲအဝဲထံၣ်ဘၣ်ဝဲတြၢၢ်ကလာ်လၢကစၢ်ယွၤအကလူးတဂၤဟဲနုာ်လီၤဆူ အဟံၣ်ပူၤဒီးကိးထီၣ်အီၤ, “စီၤကန့လံးဧၢ” န့ၣ်လီၤ.
4အဝဲဒၣ်ကွၢ်ထံကလူးလၢတၢ်ပျံၤတၢ်ဖုးအပူၤဒီးစံးဝဲ, “ကစၢ်ဧၢ, မ့ၢ်မနုၤလဲၣ်.” ကလူးစံးဆၢတၢ်ဒီးစံးဝဲ,
“ကစၢ်ယွၤတူၢ်လိာ်လံနတၢ်ထုကဖၣ်ဒီးနတၢ်ဟ့ၣ်သးကညီၤ တၢ်တဖၣ်, ဒီးကစံးဆၢက့ၤနၤလီၤ. 5ဒီးခဲကနံၣ်အံၤ, ဆှၢလီၤပှၤတနီၤဆူဝ့ၢ်ယၤဖိၤဒ်သိးကလဲၤဃုကိး န့ၢ်ပှၤတဂၤလၢအမံၤအလၢအပှဲၤမ့ၢ်ဝဲစီၤၡံမိၣ်ပ့းတရူးန့ၣ်တက့ၢ်. 6အဝဲဒၣ်အိၣ်သမှံၤလၢပှၤမၤတၢ်ဖံးစီၤၡံမိၣ်အဟံၣ်, လၢအအိၣ်ဝဲဖဲပီၣ်လဲၣ်ကၢၢ်နံၤန့ၣ်လီၤ.” 7ဖဲကလူးလၢအကတိၤတၢ်တဂၤဟးထီၣ်ကွံာ်ဝံၤအလီၢ်ခံန့ၣ်, စီၤကန့လံးကိးထီၣ်အခ့အပှၤလၢအမၤတၢ်လၢအဟံၣ်အကျါခံဂၤ ဒီးသုးဖိတဂၤလၢအယူးယီၣ်ဒီးပျံၤယွၤဒီးမ့ၢ်ပှၤမၤတၢ်လၢ အဂီၢ်ထီဘိအကျါတဂၤန့ၣ်လီၤ. 8အဝဲစံးဘၣ်တဲဘၣ်အဝဲသ့ၣ်တၢ်လၢအမၤတ့ၢ်အသးခဲလၢာ်ဝံၤ ဒီးဆှၢလီၤအဝဲသ့ၣ်ဆူဝ့ၢ်ယၤဖိၤလီၤ.
9မုၢ်ဆ့ၣ်ထီၣ်တနံၤဖဲအဝဲသ့ၣ်လဲၤတၢ်အဖၢမုၢ်ဒီးဘူးကတုၤ ဃီၤဝ့ၢ်ယၤဖိၤန့ၣ်, စီၤပ့းတရူးလဲၤထီၣ်ဆူဟံၣ်ခိၣ်ဒုးအလိၤကဘၣ်ဖဲမုၢ်ထူၣ်အဆၢ ကတီၢ်, ဒ်သိးအကဃ့ဘါထုကဖၣ်တၢ်လီၤ. 10အဝဲဒၣ်တၢ်သၣ်ဝံၤထီၣ်အသး, ဒီးတၢ်မိၣ်အီၣ်အသးတၢ်အီၣ်လီၤ. ဘၣ်ဆၣ်ဒီး, ဖဲတၢ်အီၣ်ဘၣ်တၢ်ကတဲာ်ကတီၤအီၤအဖၢမုၢ်န့ၣ်, အဝဲအိၣ်ဒီးတၢ်ထံၣ်တၢ်လၢညါခီတမံၤလီၤ. 11အဝဲထံၣ်ဘၣ်မူခိၣ်အိးထီၣ်အသးဒီးတၢ်တမံၤလၢအလီၤဂာ် ယၣ်ဖးဒိၣ်တဘ့ၣ်ဘၣ်တၢ်စဲၤလီၤအီၤလၢအနၢၣ်လွံၢ်နၢၣ်ဆူဟီၣ်ခိၣ် လီၤ. 12လၢအပူၤန့ၣ်အိၣ်ဒီးဆၣ်ဖိကီၢ်ဖိအကလုာ်ကလုာ်, တၢ်စွါတၢ်စွဲအကလုာ်ကလုာ်, ဒီးထိၣ်ဧိၤလံာ်ဧိၤလၢအယူၤလၢမူကပိာ်လိၤအကလုာ်ကလုာ်န့ၣ်လီၤ. 13တၢ်အကလုၢ်သီၣ်ထီၣ်ဒီးစံးဘၣ်အီၤ, “စီၤပ့းတရူးဧၢ, ဂဲၤဆၢထၢၣ်ဒီးမၤသံတၢ်ဒီးအီၣ်တၢ်တက့ၢ်.”
14ဘၣ်ဆၣ်ဒီးစီၤပ့းတရူးစံးဝဲဒၣ်, “ကစၢ်ဧၢ, ယတအီၣ်လ့ၤတက့ၤဘၣ်. တၢ်တမံၤလၢ်လၢ်လၢအဘၣ်တၢ်ပာ်အီၤလၢအတစီတဆှံဒီးတကဆှီ လၢတၢ်ကအီၣ်အီၤအဂီၢ်န့ၣ်, ယတအီၣ်တ့ၢ်ယဲနီတစုဘၣ်.”
15တၢ်အကလုၢ်စံးဘၣ်ကဒီးအီၤ, “တၢ်လၢကစၢ်ယွၤပာ်ဖျါလၢအကဆှီလၢတၢ်ကအီၣ်အီၤအဂီၢ်ကစီဒီ န့ၣ်, မ်နသုတဆိကမိၣ်လၢအတကဆှီလၢတၢ်ကအီၣ်အီၤအဂီၢ်န့ၣ်တဂ့ၤ.” 16တၢ်မၤအသးဒ်သိးအံၤပှဲၤထီၣ်သၢစု, ဒီးတၢ်လၢအဘၣ်တၢ်စဲၤလီၤအီၤ တမံၤန့ၣ်ဘၣ်တၢ်ထုးထီၣ်က့ၤအီၤဆူမူခိၣ်လီၤ.
17ဖဲစီၤပ့းတရူးကွၢ်ဆိကမိၣ်ဝဲဘၣ်ဃးကစၢ်သးအိၣ်စံးဘၣ်အီၤ တၢ်မနုၤခီဖျိတၢ်ထံၣ်တၢ်လၢညါခီတမံၤအံၤအဖၢမုၢ်န့ၣ်, ပှၤလၢစီၤကန့လံးဆှၢလီၤဝဲတဖၣ်ဃုသ့ၣ်ညါဒီးထံၣ်န့ၢ်လံစီၤၡံမိၣ် အဟံၣ်, ဒီးအိၣ်ဆၢထၢၣ်ဝဲခဲကနံၣ်အံၤဖဲကျဲစၢၤအမဲာ်ညါန့ၣ်လီၤ. 18အဝဲသ့ၣ်ကိးထီၣ်ဒီးသံကွၢ်ဝဲ, “ဖဲတၢ်လီၢ်အဝဲအံၤန့ၣ်ပှၤသမှံၤလၢ အမံၤမ့ၢ်စီၤၡံမိၣ်ပ့းတရူးအိၣ်ဝဲတဂၤဧါ.”
19ဖဲစီၤပ့းတရူးဆိကမိၣ်ဒံးဝဲတၢ်ထံၣ်တၢ်လၢညါခီအံၤအခီပညီအဖၢမုၢ်န့ၣ်, ယွၤအသးစံးဘၣ်အီၤ, “ဒိကနၣ်တက့ၢ်. ပှၤသၢဂၤဟဲဃုနၤဖဲအံၤလီၤ. 20လၢတၢ်န့ၣ်အဃိ, ဂဲၤဆၢထၢၣ်ဒီးလဲၤလီၤဆူဒၢးဖီလာ်, ဒီးတဘၣ်မၤယံာ်မၤနီၢ်နသးလၢနကလဲၤပိာ်အဝဲသ့ၣ်အခံတဂ့ၤ. အဂ့ၢ်မ့ၢ်လၢယဆှၢလီၤအဝဲသ့ၣ်ဖဲအံၤအဃိလီၤ.” 21လၢတၢ်န့ၣ်အဃိစီၤပ့းတရူးစံၣ်လီၤလၢဒၢးဖီလာ်ဒီးစံးဘၣ်ပှၤသ့ၣ် တဖၣ်န့ၣ်, “ယမ့ၢ်ပှၤလၢသုဃုအီၤတဂၤလီၤ. သုဟဲလၢမနုၤအဂ့ၢ်လဲၣ်.”
22အဝဲသ့ၣ်စံးဆၢဝဲ, “သုးဖိတကယၤအခိၣ်စီၤကန့လံးဆှၢလီၤပှၤလီၤ. အဝဲမ့ၢ်ပှၤဂ့ၤပှၤဝါလၢအယူးယီၣ်ဒီးပျံၤကစၢ်ယွၤတဂၤ, ဒီးပှၤယူဒၤဖိခဲလၢာ်ယူးယီၣ်ပာ်ကဲအီၤအဒိၣ်အအါလီၤ. ကစၢ်ယွၤအကလူးတဂၤစံးဘၣ်အီၤလၢအကကွဲဃီၤနၤဆူအဟံၣ်, ဒ်သိးအကနၢ်ဟူဘၣ်နတၢ်စံးတၢ်ကတိၤတဖၣ်အဂီၢ်လီၤ.” 23စီၤပ့းတရူးကိးနုာ်အီၤဆူဟံၣ်ပူၤဒီးစံးဝဲ, “ဟဲနုာ်, ဒီးတနၤအံၤမံဖဲအံၤတက့ၢ်.”
မုၢ်ဆ့ၣ်ထီၣ်တနံၤန့ၣ်အဝဲဒၣ်အိၣ်ကတဲာ်ကတီၤထီၣ်အသးဒီး လဲၤပိာ်အဝဲသ့ၣ်အခံလီၤ. ဒီးပှၤစူၢ်က့ၤနာ်က့ၤတၢ်အဂၤတနီၤဖဲဝ့ၢ်ယၤဖိၤလဲၤဃုာ်ဒီးအီၤလီၤ. 24ဒီးလၢခံတနံၤန့ၣ်, အဝဲဒၣ်လဲၤတုၤဝ့ၢ်ကဲၤစါရံၤဖဲစီၤကန့လံးအိၣ်ခိးအီၤဃုာ် ဒီးအဘူးအတံၢ်ဒီးအတံၤသကိးတံၢ်တံၢ်တဖၣ်လၢအဝဲဒၣ်ကိးပာ်ဝဲန့ၣ်လီၤ. 25ဖဲစီၤပ့းတရူးသါကလဲၤနုာ်လီၤအခါန့ၣ်, စီၤကန့လံးသဂၢၢ်အီၤ, ချံးခီၣ်တီၤလီၤလၢအခီၣ်ထံး, ဒီးထိၣ်လီၤပှီၤအသးလၢအမဲာ်ညါလီၤ. 26ဘၣ်ဆၣ်ဒီးစီၤပ့းတရူးဒုးဂဲၤဆၢထၢၣ်အီၤဒီးစံးဝဲ, “ဂဲၤဆၢထၢၣ်တက့ၢ်. ယမ့ၢ်ဒၣ်ပှၤကညီတဂၤလီၤ.” 27ဖဲစီၤပ့းတရူးကတိၤတၢ်ဒီးစီၤကန့လံးအဖၢမုၢ်န့ၣ်, လဲၤနုာ်ဝဲဆူဟံၣ်ပူၤဒီးထံၣ်ဘၣ်ပှၤအါဒံအါဂၤပာ်ဖှိၣ်ထီၣ်အသးဖဲန့ၣ်လီၤ. 28ဒီးအဝဲဒၣ်စံးဘၣ်အဝဲသ့ၣ်, “သုနီၢ်ကစၢ်ဒၣ်သုဝဲသုသ့ၣ်ညါလၢပှၤယူဒၤဖိတဂၤအတၢ် ဘူၣ်တၢ်ဘါတပျဲအီၤလၢအကလဲၤဒီးရ့လိာ်အသးဒီးပှၤကလုာ် ဂၤမ့ၢ်ဂ့ၤ, ကမၤဘၣ်ထွဲအသးဒီးအီၤမ့ၢ်ဂ့ၤန့ၣ်ဘၣ်. ဘၣ်ဆၣ်ဒီးကစၢ်ယွၤဒုးနဲၣ်တ့ၢ်ယၤလၢယတဘၣ်ပာ်ပှၤနီတဂၤလၢ အတကဆှီမ့ၢ်ဂ့ၤ, တစီတဆှံမ့ၢ်ဂ့ၤန့ၣ်ဘၣ်လီၤ. 29လၢတၢ်န့ၣ်အဃိ, ဖဲနမၤလိာ်ယၤန့ၣ်, ယတဂ့ၢ်လိာ်နီတစဲးဘၣ်ဒီး ယဟဲယဲလီၤ. ခဲကနံၣ်အံၤယသံကွၢ်နၤ, နမၤလိာ်ယၤလၢမနုၤအဂီၢ်လဲၣ်.”
30ဒီးစီၤကန့လံးစံးဝဲ, “ဖဲအပူၤကွံာ်သၢသီ, ကဘၣ်ဖဲဆၢကတီၢ်တကတီၢ်ဃီအံၤန့ၣ်, ယအိၣ်ဒီးဟါခီလီၤသၢနၣ်ရံၣ်အတၢ်ထုကဖၣ်လၢဟံၣ်ပူၤလီၤ. သတူၢ်ကလာ်, ပှၤကညီတဂၤအိၣ်ဆၢထၢၣ်လၢယမဲာ်ညါ, ကူသိးဒီးတၢ်ကူတၢ်သိးကတြ့ၣ်ကတြိၣ်, 31ဒီးစံးဘၣ်ယၤ, ‘စီၤကန့လံးဧၢ, ကစၢ်ယွၤနၢ်ဟူလံနတၢ်ထုကဖၣ်ဒီး ထံၣ်ဘၣ်လံနတၢ်ဟ့ၣ်သးကညီၤတဖၣ်လံ. 32ဆှၢလီၤပှၤဆူဝ့ၢ်ယၤဖိၤဒ်သိးအကကိးန့ၢ်ပှၤတဂၤလၢအမံၤ အလၢအပှဲၤမ့ၢ်ဝဲစီၤၡံမိၣ်ပ့းတရူးန့ၣ်တက့ၢ်. အဝဲအိၣ်သမှံၤဖဲပှၤမၤတၢ်ဖံးဖိစီၤၡံမိၣ်အဟံၣ်, လၢအအိၣ်ဝဲဖဲပီၣ်လဲၣ်နံၤန့ၣ်လီၤ.’ 33လၢတၢ်န့ၣ်အဃိယမၢလီၤပှၤလၢအကလဲၤကိးနၤတဘျီဃီ, ဒီးမ့ၢ်မးတၢ်အဂ့ၤလၢနဟဲအဃိလီၤ. ခဲကနံၣ်အံၤ, ပဝဲကိးဂၤဒဲးပအိၣ်လၢကစၢ်ယွၤအမဲာ်ညါ, ဒီးအိၣ်ခိးဒ်သိးပကနၢ်ဟူဘၣ်တၢ်တမံၤလၢ်လၢ်လၢကစၢ်မၤလိာ်တ့ၢ် နၤလၢနကကတိၤအီၤန့ၣ်လီၤ.
စီၤပ့းတရူးအတၢ်စံးတၢ်ကတိၤ
34ဒီးစီၤပ့းတရူးအဲးထီၣ်အထးခိၣ်ဒီးစံးဝဲ, “ခဲကနံၣ်အံၤယသ့ၣ်ညါလံတၢ်မ့ၢ်တၢ်တီလၢ ကစၢ်ယွၤတကွၢ်မဲာ်ပှၤနီတဂၤဘၣ်န့ၣ်လီၤ. 35ပှၤတဂၤလၢ်လၢ်, ကမ့ၢ်ဒၣ်ဝဲပှၤတကလုာ်ဂ့ၤတကလုာ်ဂ့ၤဘၣ်ဆၣ်, မ့ၢ်ပျံၤယွၤဒီးမၤတၢ်လၢအကြၢးဝဲဘၣ်ဝဲန့ၣ်, ဘၣ်တၢ်တူၢ်လိာ်အီၤလီၤ. 36သုသ့ၣ်ညါတၢ်ကစီၣ်လၢအဝဲဒၣ်ဆှၢလီၤဆူပှၤအံၣ်စရ့လးဖိ တကလုာ်အအိၣ်, လၢအဘိးဘၣ်သ့ၣ်ညါတၢ်သးခုအကစီၣ်ဘၣ်ဃးဒီးတၢ်ဃူတၢ်ဖိး ခီဖျိယ့ၣ်ၡူးခရံာ်, လၢအမ့ၢ်ပှၤကိးဂၤဒဲးအကစၢ်န့ၣ်လီၤ. 37သုသ့ၣ်ညါတၢ်ဂ့ၢ်အဒိၣ်အမုၢ်တမံၤလၢအမၤအသးသကုၤ ကီၢ်ယူဒၤဒီဘ့ၣ်ညါ, စးထီၣ်လၢကီၢ်ကၤလံၤလါ, ဖဲစီၤယိၤဟၣ်စံၣ်တဲၤတဲလီၤတ့ၢ်တၢ်ဒိးဘျၢအဂ့ၢ်ဝံၤအလီၢ်ခံန့ၣ်လီၤ. 38သုသ့ၣ်ညါဘၣ်ဃးပှၤဝ့ၢ်နစၤရ့းဖိယ့ၣ်ၡူး, လၢကစၢ်ယွၤလူလီၤဂၢ်လီၤသးစီဆှံဒီးတၢ်စိတၢ် ကမီၤလၢအလိၤဒ်လဲၣ်အဂ့ၢ်န့ၣ်လီၤ. အဝဲဒၣ်လဲၤသကုၤဆးဒး, မၤဂ့ၤတၢ်ဒီးမၤဘျါက့ၤကယဲၢ်ပှၤအိၣ်လၢမုၣ်ကီၤလံၢ်အတၢ်စိတၢ် ကမီၤအဖီလာ်, အဂ့ၢ်မ့ၢ်လၢကစၢ်ယွၤအိၣ်ဒီးအီၤအဃိလီၤ. 39ပမ့ၢ်ပှၤအုၣ်အသးတဖၣ်ဘၣ်ဃးဒီးကယဲၢ်တၢ်လၢအဝဲဒၣ်မၤဝဲ ဖဲဝ့ၢ်ယရူၤၡလ့ၣ်, ဒီးကီၢ်ယူဒၤတၢ်လီၢ်အဂၤတဖၣ်န့ၣ်လီၤ. အဝဲသ့ၣ်မၤသံအီၤခီဖျိအပျၤထီအီၤလၢထူၣ်စုညါအလိၤန့ၣ်လီၤ. 40ဘၣ်ဆၣ်ဒီးကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံဖဲသၢသီ တသီဒီးဒုးအိၣ်ဖျါထီၣ်အီၤ, 41လၢပှၤကိးဂၤဒဲးအမဲာ်ညါတမ့ၢ်ဘၣ်. မ့ၢ်ထဲပဝဲစှၤဂၤဧိၤလၢအမ့ၢ်ပှၤအုၣ်အသးလၢကစၢ်ယွၤဃုထၢတ့ၢ်ဝဲ အမဲာ်ညါ, ပဝဲလၢအအီၣ်ဃုာ်အီဃုာ်တၢ်ဒီးအီၤဖဲ အဝဲဒၣ်ဂဲၤဆၢထၢၣ်က့ၤလၢတၢ်သံဝံၤအလီၢ်ခံန့ၣ်လီၤ. 42ဒီးအဝဲဒၣ်မၤလိာ်ပှၤဒ်သိးပကစံၣ်တဲၤတဲလီၤတၢ်သးခုအကစီၣ် ဆူပှၤဂီၢ်မုၢ်, ဒီးအုၣ်ပသးလၢအဝဲမ့ၢ်ပှၤတဂၤလၢယွၤဖှူတ့ၢ်အီၤလၢ အကကဲပှၤမူဒီးပှၤသံတဖၣ်အစံၣ်ညီၣ်ကွီၢ်န့ၣ်လီၤ. 43ဝံကိးဂၤဒဲးကတိၤတ့ၢ်တၢ်ဘၣ်ဃးလၢအဂ့ၢ်, ဒီးစံးဝဲလၢကယဲၢ်ပှၤစူၢ်က့ၤနာ်က့ၤအီၤတဂၤလၢ်လၢ်အတၢ်ဒဲးဘး ကဘၣ်တၢ်ပျၢ်ကွံာ်အီၤလၢအမံၤအစိကမီၤအဃိန့ၣ်လီၤ.”
ပှၤကလုာ်ဂၤတဖၣ်ဒိးန့ၢ်သးစီဆှံ
44ဖဲစီၤပ့းတရူးကတိၤဒံးတၢ်အဖၢမုၢ်န့ၣ်, သးစီဆှံဟဲလီၤလၢပှၤလၢအဒိကနၣ်တၢ်ကစီၣ်ကိးဂၤဒဲးအလိၤလီၤ. 45ပှၤယူဒၤဖိလၢအစူၢ်က့ၤနာ်က့ၤတၢ်လၢအဟဲဃုာ်ဒီးစီၤပ့းတရူး လၢဝ့ၢ်ယၤဖိၤတဖၣ်, ကမၢကမၣ်ဝဲလၢကစၢ်ယွၤလူလီၤဂၢ်လီၤအတၢ်ဟ့ၣ်ဘၣ်ဃးသး စီဆှံလၢပှၤကလုာ်ဂၤတဖၣ်အလိၤစ့ၢ်ကီးအဃိန့ၣ်လီၤ. 46အဂ့ၢ်မ့ၢ်လၢအဝဲသ့ၣ်နၢ်ဟူပှၤတဖၣ်န့ၣ်ကတိၤတၢ်လၢကျိာ်လီၤ တိၢ်လီၤဆီဒီးစံးထီၣ်ပတြၢၤကစၢ်ယွၤအတၢ်ဒိၣ်တၢ်မုၢ်အဃိလီၤ. စီၤပ့းတရူးကတိၤထီၣ်တၢ်ဒီးစံးဝဲ, 47“ပှၤတဖၣ်အံၤဒိးန့ၢ်ဘၣ်ဝဲသးစီဆှံဒ်ပဒိးန့ၢ်ဘၣ်တ့ၢ်ပဝဲ စ့ၢ်ကီးအသိးန့ၣ်လီၤ. မ်ဒ်န့ၣ်ဒီးမ့ၢ်ပှၤတဂၤဂၤတြီအဝဲသ့ၣ်လၢ အသုတဒိးဘျၢထံတဂ့ၤန့ၣ်ဘၣ်ကသ့ဧါ.” 48လၢတၢ်န့ၣ်အဃိအဝဲဒၣ်မၤလိာ်အဝဲသ့ၣ်ဒ်သိးအကဒိးစူၢ် ဒိးဘျၢအသးလၢယ့ၣ်ၡူးခရံာ်အမံၤန့ၣ်လီၤ. အဝဲအံၤဝံၤအလီၢ်ခံအဝဲသ့ၣ်မၢအဝဲဒၣ်အိၣ်ဒီးအီၤစှၤနံၤစှၤသီလီၤ.
Pilihan Saat Ini:
မၤတၢ် 10: KSWC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sgaw Karen Common Bible © Bible Society of Myanmar, 1992.
