Rut 4
4
Booz jetaque en loua jañe'me Rut
1Joñe'me Booz dajoyi jodi'me nadic nale qonec'ata jena'me noic, nataq'aen naq'aic jo'ne yelo'ta ga'me qouapega jena'me jiyaĝadipi nale dojapega't. Copa'ta joca'li ñichiñe joñe'me Booz, male ta'yedi joñe'me laqaya, qama'le joñe'me Booz yiyaĝanegue joca'li:
«Cha'li jayem anec'ata, oñiiñe, nataq'aen da'me jayem anaquiaĝana.»
Qama'le ñe'me jiyaĝaua ya'uo yema joga'me enaac ñe'me Booz. 2Qampaja'a joñe'me Booz yiyaĝanalo jogaa'me diez 'yaĝaicachidi, nataq'aen da'me en ñidiñe joca'li. Yem da'me dojo', 3male joñe'me Booz enaac da'me dojapegue' joñe'me laqaya:
«Jañe'me Noemí yitaĝa 'niyelaq, chiyoĝogue di'me Moab, qama'le jañe'me yataqachiñe eja da'me jetaque yemen jodi'me 'naleua jodi'me qadaqaya Elimélec. 4Qama'le nach'ena jena'me jenjo' jo'ne jetaque auayaten, nataq'aen qom jetaque auajelaĝanec, nataq'aen paja'a jetaque aua'uo ga'me at'ataĝac, qa'a uo'oe jonaa'me naajo' 'yaĝaicachidi jo'ne qo'mi yec'ate'tape, nataq'aen ena'te auoqovin joga'me at'aqatac. Nataq'aen am jo'ne yataqachiñe ja am 'te qaya'a jodi'me Elimélec, qama'le naqa'am jo'ne 'noota ta'le auajelaĝanec jena'me jenjo' aleua. Qalaĝaja qom ja auajelaĝanec, 'noota qom jayem a'uaĝatem nayi, qa'a nataq'aen jayem jo'ne am jajoyalegue da'me nataq'aen jayem laqaya jodi'me, jo'ne nataq'aen 'uo da'me ladic da'me jajelaĝanec jena'me jenjo' aleua.»
Qama'le joñe'me laqaya enaac:
«Jaja'a, jajelaĝanec jena'me jenjo' aleua.»
5Qama'le joñe'me Booz ya'uo ga'me 'laqatac laqaya jo'ne enaac:
«Nayi 'noota qom auenate'ta jena'me jenjo': qom auajelaĝanec jena'me aleua, anetouetac jañe'me Noemí da'me 'uo jaga'me ne'tajop jo'ne late, maliaĝa qaya'te loua, yauo Moab laje jo'ne p'ae te'me loua jodi'me Mahlón, nach'e ena'am auen adoua jo' qomle, qaedi ja pal da'me lenaĝat di'me qadaqaya.»
6Qama'le ca'li domachiya jena'me jenjo', ñe'me jiyaĝaua enaac:
«Qom naq'aeta jena'me jenjo', jetapega ja jaqanatet ta'le jajelaĝanec jena'me jenjo' aleua, qa'a ja jetaque 'uo ga'me janem da'me yeuoyaĝac. Qalaĝaja qom jetaque auajelaĝanec, 'noota qom aua'uo jena'me jenjo', yataqachiñe am jamaĝalegue qaedi auajelaĝanec.»
7Di'me Israel 'uo ca'li da'me mach'e 'loyaĝac, qom uo'oe gaa'me naqaya' jo'ne neuodena't, male onolec ga'me naqat ga'me lapela'. 8Naqaena ya'uo joga'me laqaya joñe'me Booz, qama'le enaac:
«Nach'e am auajelaĝanec.»
9Qama'le joñe'me Booz male enapegalo jogaa'me 'yaĝaicachidi nataq'aen jogaa'me uo'oe jo'me nojaĝac ca'li:
«Yema ami nayi auec'achiñetac jo'me 'laqatac ñe'me ñejo' jiyaĝaua, qama'le nayi auañitalegue ga'me 'lataĝac ñe'me yaqaya da'me ja yaconeguet jena'me jenjo', qama'le jayem yema jajelaĝanec, ga'me loĝot jodi'me qadaqaya Elimélec, nataq'aen dia'me c'oqo'te Quilión nataq'aen di'me Mahlón. 10Nataq'aen auañitalegue nayi male jen youa jañe'me Rut, p'ae, Moab laje, qaedi nataq'aen jena'me jenjo' aleua qaya'te deuodaĝanec da'me lenaĝat jodi'me Mahlón, mach'e lequiaĝaua ca'li jañe'me jo'ne joote qaya, nataq'aen qaedi yataqachiñe ja pal da'me lenaĝat jena'me jenjo' noic nataq'aen ja qoyapalaĝate'ta di'me. Nach'ena jena'me jenjo' jo'ne ja'uo nayi qama'le auañitalegue nayi.»
11Jogaa'me 'yaĝaicachidi nataq'aen jogaa'me ueteda'a jodi'me nojaĝac 'yadeteguet joñe'me Booz joca'li male edaac:
«Jaja'a, yataqachiñe jauanaqatalegue jena'me jenjo' jo'ne auauoyi nayi, qama'le nayi, jaga'me aquiaĝaua jo' qomle jo'ne yec'ata na'me at'achaqa', 'noota qom ñe'me Jaliaĝanec nach'eñe jo'ne en ena'ama dia'me Raquel nataq'aen Lía mach'e qadat'el, da'me yema qo'mi Israel laje'. Nataq'aen da'me am, qopaquetapega da'me am jiyaĝaua jo'ne yataqachiñe 'uo da'me lejaliaĝa jo' qomle jena'me jenjo' Belén, nataq'aen na'me Efrata, nataq'aen am jiyaĝaua jo'ne yataqachiñe qaya'te auena'am. 12'Noota qom ñe'me Jaliaĝanec am yanem da'me 'lonaĝac nataq'aen am yanema gaa'me ac'oqo'te jo'ne chiyaqayi jana'me janjo' yauo jo'ne jetaque auen adoua nayi, nataq'aen da'me yataqachiñe jalcote joga'me adayi, ena'am joga'me yauana ga'me Fares jo'ne c'oĝot jodi'me Judá nataq'aen Tamar.»
Lañoĝoqui ñe'me Obed
13Qama'le naq'aeta jena'me jenjo' joca'li, male joñe'me Booz yataqachiñe en loua jañe'me Rut, qama'le ñe'me Jaliaĝanec yaje'tem da'me paja'a qo'uaĝae joca'li jañe'me, nataq'aen da'me paja'a 'uo joga'me lec'oĝot joca'li. 14Qama'le jogaa'me yauo' laqaya' nataq'aen made'tape joca'li male edaac, dojedapegue' jañe'me Noemí:
«¡'Noota qom yataqachiñe qo'nonaĝachigui joñe'me Jaliaĝanec, queda'me nayi am yanem jenjo' adaual qaedi am netela yemeda naajo' noloqo'ote! Nataq'aen ¡'noota qom na'me adaual yataqachiñe 'uo da'me lejaliaĝa jena'me jenjo' jo'ne mach'e qat'achaqa' Israel! 15Na'me nojo' naqaena am yanem da'me at'añaĝac da'me am 'yaĝaina', qa'a jenjo' adaual mach'e c'oĝot jana'me adate jo'ne yataqachiñe am noqopita, ¡onole qalaĝaja ena'am ta'le uo'oe gaa'me siete ac'oqo'te!»
16Noemí male yacona joñe'me notolec male yataqachiñe netela joñe'me chayovida'a 'yaĝaic. 17Qama'le ca'li qoyauatapega da'me dojo', male naa'me leje'gue etedapega joca'li:
«¡Male yataqachiñe 'uo joñe'me c'oĝot jañe'me Noemí!»
Qama'le qoya'uo joga'me lenaĝat joca'li jo'ne mach'e enaac Obed, jo'ne jenjo' mach'e let'a ñe'me Jesé, nataq'aen mach'e lapena' joñe'me David.
Lenaqa'te naa'me jiyaĝa'u jo'ne chiyoĝogueta joñe'me David
18Naajo' jo'ne chiyoĝoteguet ca'li joñe'me Fares: qa'a joñe'me Fares mach'e let'a joñe'me Hesrón, 19qama'le joñe'me Hesrón mach'e let'a joñe'me Ram, qama'le Ram mach'e let'a jodi'me Aminadab. 20Aminadab mach'e let'a jodi'me Nahasón, qama'le Nahasón mach'e let'a di'me Salmón. 21Salmón mach'e let'a joñe'me Booz, qama'le joñe'me Booz mach'e let'a joñe'me Obed. 22Obed mach'e let'a jodi'me Jesé, qama'le joñe'me Jesé mach'e let'a joñe'me David.
Pilihan Saat Ini:
Rut 4: TDO
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Biblia en Toba del Oeste © Sociedad Bíblica Argentina, 2014, 2019.