Matta 19
19
Shogar ɗyine Lakhtar Ɓu̱rti
(Mar 10:1-12)
1Nu̱ Yesu woɗaki ɓalarku nang, tu̱ njig dlar ghai Galili tu̱ ɗu̱ mbu̱ dlar ghai Yakhudiya nu̱ke a ve me gu̱mndi gaawu Urdun dam fara. 2Tu̱ nduki khang mbu gaanje nda, tu̱ ɗa shaana nu̱ khaatiku nje.
3Tu̱ Pariseku nggur a ɓa ma tu̱k men, tu̱ zham nda ku za, “Shwat woparang wa wuɗ za nduk ka ɗu̱ma ngga nokhzan gha ku̱me ɗyinggur mu?”
4Tu̱ tlogha ye wor za, “Alapa nun na bu̱laran za, ‘Gumapaali chin nu̱ du̱ngki aa nu̱m shikya nusu ndu̱ khusku, tu̱ zu̱ za. 5Ku̱me nang, nduk ka njig man ndu̱ zhin tu̱ gonta nu̱ ve nokhzan, nduk rapndang ka kha ma da.’ 6Sarda wor rap tu̱k ɓa, a khar nduk da ku. Ku̱me nang ɗyi nu̱ Magham gontaki, ku̱ nduk shakh nu̱gha ɓa.”
7Tu̱ yang ze nda ku za, “Mbu̱ wanang nu̱m saki tu̱ annabi Musa wopa za mbu̱ nduka ma ngga nokhzan gha, ku̱ vu̱r lagarkati nggar ɓu̱rti yenda na?”
8Tu̱ Yesu ze wor za, “Musa njigto nu za ngga nu nusuku ɓaanu gha ku̱me kaku̱ɗakh memu̱na nu. Yang shwat ɗyen wanang vu̱ nggarsan ɓa. 9Ngaa zu̱ran ye nu tu̱k, kap njif nu̱ nggaki nokhzan gha, mbu̱ shikya zawa ɓa, tu̱ ɓu̱r nokhzi ngguri, a shikya zawa.”
10Tu̱ nu̱ mburi nda kwa zu̱ yenda za, “Mbu̱ khar chele ɓu̱ nduk ndu̱ nokhzan wanang, kuzhom ku̱ nduk shi ɓu̱r ɓa.”
11Tu̱ yang ze wor za, “Aaki ka dlu̱ki ɓalar nang ɓa, kope nduki nu̱ Magham vu̱rki ye wora. 12Nduki a nje nu̱ khaki wor su̱ ve wor ɓa. Nduki a nje tu̱k nu̱ke nduki shiki ye wor wanang, yang nduki a nje tu̱k nu̱ zhangki ɓu̱rti gha ku̱me ndolar kwaaɗar mbu̱ viɗi. Nu̱ dar mbu̱ ɓalar nang ku̱ da mban.”
Yesu wa Sa Barke ye Qusonggi Pichichindi
(Mar 10:13-16; Luk 18:15-17)
13Kom tu̱ ɗa ɓa ndu̱ qusonggi pichichindi ye Yesu ma ku̱ sa barke ye wora ku̱ shi barar ye wor tu̱k, tu̱ yang nu̱ mburi nda kwang wu nduki nu̱ ɗa ɓa ki ndu̱ qusonggyang.
14Tu̱ Yesu ze wor za, “Njig ma qusonggi pichichindi ku̱ ɗa ɓa ku sha. Nggu̱tl nu̱ wor ɓa, ku̱me kwaaɗar mbu̱ viɗi ɗya ɓu̱ poona wora.” 15Tu̱ du̱ng khar barke nu̱ ve wor, kom tu̱ ɗu̱ varan.
Nyakhtlir nu̱ Gu̱nari
(Mar 10:17-31; Luk 18:18-30)
16A nje a nje, tu̱ njif nggur a ɓa she Yesu tu̱ zu̱ za. “Maalu̱m, ngga shikya nyi pooni ɗyi mbarkandi ma gwa nga nyifiri nu̱ke nu̱ka shi woɗa ɓaanda na?”
17Tu̱ Yesu tlogha yenda za, “To zhamndi nga ɗyine ɗyi mbarkandang ma nu̱ma? Mbarkandang nje ɓa kope Magham. Mbu̱ ta shim gwa nyifiri nu̱ke nu̱ka shi woɗa ɓa, to khutlo woparkwang.”
18Tu̱ tlogha ye Yesu za, “Woparku nyiya?”
Tu̱ Yesu tlogha za, “Tlagha na mu̱ɗ ɓa, shi na zawar ɓa, shi na muuru ɓa, yang kotama ɓa, 19to vu̱r zhaaji ye mo ndu̱ zhu, to ndola nu̱ bing ɓaaro wa vaaro.”
20Tu̱ nyakhtlirang zu̱ za, “Ngaa khutlo ɗyiku nang kap, njig kya nu̱m ya tu̱ka?”
21Tu̱ Yesu ze yenda za, “Mbu̱ ta shim kha na torop, to ɗu̱ to ɗa masa ɗyi nu̱ke a kha ɓar kap, to vu̱r mu̱zhindan ye nu̱ nungndiku, to ka gwa gu̱nar nu̱ mbu̱ viɗi. Kom to ɗa ɓa to mburi nga.”
22Nu̱ nyakhtlirang tu̱kki wanang, tu̱ ɗu̱ varan ndu̱ su̱bu̱rti memu̱na, ku̱me ɗya nu̱ gu̱na maɗyi.
23Tu̱ Yesu ze nu̱ mburi nda kwang za, “Zhire ngaa zu̱ran ye nu, ka shi shar ku̱ nu̱ gu̱na vi nu̱ mbu̱ kwaaɗar mbu̱ viɗi. 24Ngaa maataran ye nu tu̱k, ka kha ndolndol ye dliimokh ku̱ vi nu̱ mbu̱ ghub lu̱bu̱ra ye ku̱ nu̱ gu̱na vi nu̱ mbu̱ kwaaɗar ɓu̱ Magham.”
25Ni nu̱ mburi nda kwang tu̱kki wanang, tu̱ shi lazham ku maɗyi, tu̱ zham nda ku za, “Mbu̱ wanang ki ka ɗanaki ɗo?”
26Tu̱ Yesu nggu̱t wor dong kom tu̱ zu̱ za. “She nduku ɓu̱ shi ɓa, yang she Magham tun nje nu̱ke ka ku̱naki nda ɓa.”
27Tu̱ Biturus zu̱ za, “Wonji chem wa njig aa nu̱m chem a mburoro! Chem ka gwa kya nu̱ma?”
28Tu̱ Yesu ze wor za, “Zhire nga zu̱ran ye nu, mbu̱ qaandi virkir nu̱ke a ɓari, sarchi nu̱ Yi ɓu̱ Nduk khaki nu̱ ɗyine zhakhɗye ɓaran nu̱ zhaaji. Tun nun mbuki nga tun ka khan ɗyine zhakhɗye gwaanggu̱m rap tun kuma me ghai gwaanggu̱m rapndi ɓu̱ Israila. 29Yang tu̱k, kap njif nu̱ njigki raftiku, aa khachinku khuzuku, aa khachin nusuku, aa ku̱maandi ɓaran, aa mankir ɓaran, aa qusonggi ɓaran, aa damku ɓaran, ku̱me dlu̱ma. Ka gwa dukti ɓu̱ nang sar won, yang tu̱k tu̱ gwa nyifiri nu̱ke ɓu̱ shi woɗa ɓa. 30Yang nduki khang nu̱ke a guma ka kha ma nu̱ gana ku̱, nu̱ gana kwa yang ka ɓa kha ma nu̱ gumaku.”
Pilihan Saat Ini:
Matta 19: ttrNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
