Matta 18
18
Ki dukki Gwaari she Magham
(Mar 9:33-37; Luk 9:46-48)
1Ye sarchi nang tu̱ nu̱ mburi nda kwa a ɓa she Yesu tu̱ zham nda ku za, “Ki dukki nu̱ gwaari mbu̱ kwaaɗar viɗa?”
2Tu̱ qa woi koɗommandi nggur tu̱ ching ndu̱ nda gha chele ɓaanda. 3Tu̱ zu̱ za, “Ngaa zu̱ zhire ye nu, mbu̱ nun nggoɗ tun kha wa qusonggi pichichi ɓa, sar da tun ɓu̱ vi nu̱ mbu̱ kwaaɗar ɓu̱ Magham ɓa. 4Ku̱me nang aaki kataki ɗyinan nu̱ gha, wa woi koɗommandi nang, chin dukki gwaari mbu̱ kwaaɗar viɗi.
5“Aaki dlu̱ki woi koɗomma wa nang ku̱me nga, dlu̱kyang nga.
Ɗye ji Saariku
(Mar 9:42-48; Luk 17:1-2)
6“Aaki saki da chele ɓu̱ qusonggi nu̱ maitaki nga nang tu̱ shi sola, kuzhom ku̱ gu̱n vu̱nar khi nu̱ ve quran, yang kom tu̱ mbuk nda nu̱ mbu̱ ɗyim chitndi kirkandi. 7Larji ɗya ɗye zhiyaye ku̱me ɗyiku khang nu̱ka saki nduki ma sola! Ɗyiku nu̱ka saki nduki ma solari a nje a ɓari, yang njif na ɓa ki si ɗya ɗye zhiyaye. 8Mbu̱ yang aa khaaro aa saaroro wa ka sa ma sola, ku̱rto nu̱ gha to mbuk gha. Kuzhom vi na nu̱ mbu̱ nyifi nu̱ke nu̱ka shi woɗa ɓa ndu̱ gwattang bu̱n ndu̱ saaro da ye ku̱ mbuktor nu̱ mbu̱ ɓai nu̱ke nu̱ka shi mu̱ɗ ɓa, ndu̱ khar rap ndu̱ saaro rap. 9Mbu̱ yang yitor ke nu̱ sa ma zop, fu̱lokh nu̱gha to mbuk gha. Ka duk mbaari mbu̱ ta gwa nyifiri nu̱ke ɓu̱ shi woɗa ɓa ndu̱ yiti da ye ku̱ kha na ndu̱ yitor rap tu̱ yang mbuktor nu̱ mbu̱ giɗim ɓai nu̱ke nu̱ka shi mu̱ɗ ɓa.
10“Ku̱r ma vaanu, ku̱ ndu̱m nu da chele qusonggiku na ɓa, ku̱me nga zu̱ran ye nu nu̱ ru̱ktiku ɓu̱ Magham nu̱ khutlo wor nu̱ke a mbu̱ viɗi sot a nggu̱t mbu̱ yiti Zhinkir ɓanga. 11[Ku̱me Yi ɓu̱ Nduk a ɓa ma ɗana nduki nu̱ saghaki.]
Ku̱rti Ɓalar ndu̱ Ndu̱ɓang nu̱ Saghaki
(Luk 15:3-7)
12“A fu̱n ke kwaari ɓa nwa? Mbu̱ ndu̱ɓang ku won a nje kha nu̱ khutlo ngguri, tu̱ da chele ɓaanda sagha, alapa ɓu̱ njig wor ɗyin mu̱dlam qu̱m mu̱dlamndi nu̱ sa dlengi tu̱ ɗu̱ ma laɓ dandi nu̱ saghakyang ɓa goma? 13Yang mbu̱ wa gwa nda, nga zu̱ zhire ye nu, ka kasha ndu̱ɓang dandi nang tu̱ duk ɗyin mu̱dlam qu̱m mu̱dlamndi nu̱ke nu̱ sagha ku ɓandi nang. 14Wanang tu̱k, Zhinonu nu̱ mbu̱ viɗi nu̱ shim aa nduk da mbu̱ qusonggi nang ku̱ sagha ɓa.
Mbu̱ Mu̱dlo wa shi Zop yoro
(Luk 17:3)
15“Mbu̱ mu̱dlo wa shi zop yoro, ɗu̱ to ɗa wut zop ɓaran yenda, to ndu̱ chin tun rap. Mbu̱ wa tu̱ktoro, ta gaɓ ndu̱ mu̱dlwang. 16Yang mbu̱ nu̱ tu̱ktor ɓa, to qa aa nduk da aa nduk rap tun ɗu̱ su̱yen tu̱k ma ku̱ kha ma saidu mbu̱ me nduki rap ma yir kunung. 17Mbu̱ wa zhang tu̱k wor gha, to ze tabar ɓu̱ nu̱ mbu Yesu ku, mbu̱ wa zhang tu̱k ɓalar ɓu̱ tabar nu̱ mbu Yesu kwa gha, tun da nda nu̱ mbu̱ njif nu̱ke nu̱ zu̱n Magham ɓa nu̱ solar nu̱ zhangki nggooti gha.
18“Zhire nga zu̱ran ye nu, kap ɗyi nun gu̱nki gha fan larji ka gu̱n nu̱ gha far mbu̱ viɗi. Kap ɗyi nun kolki nu̱ gha fan mbu̱ larji tu̱k, ka kol nu̱gha far mbu̱ viɗi.
19“Ngaa zu̱ran ye nu tu̱k, mbu̱ nduki rap chele ɓaanu fan larji wa tlogha ku̱ khuɗ nda ɗyi ngguri, Zhinkir ɓang nu̱ke a mbu̱ viɗi ka shi ye wora. 20Ku̱me kap ye maa nu̱ nduki rap ma yir kunung tabaki nu̱ mbu̱ dlu̱ma, ngaa nje su̱yen ndu̱ wora.”
Ku̱rti Ɓalar ndu̱ Maavi nu̱ke nu̱ka Ndu̱m tun nu̱ ve Nduk ɓa
21Tu̱ Biturus a ɓa she Yesu tu̱ zham nda za, “Zhinerem gwaanji, sar kim mu̱dla ka shiki zop ya tang ndu̱m nu̱ ve nda? Sar mut mu?”
22Tu̱ Yesu tlogha za, “Nga zu̱ran ye nu, sar mut ɗyenda ɓa, kope wa khu̱l ɗyin mut sar mut.
23“Ku̱me nang, kwaaɗar mbu̱ viɗi wa shipa kuji nggur nu̱ shimki ku̱ shiga nji gu̱nar ɓaran nu̱ke a she maaviku ɓaran. 24Nu̱ kujirang nggaki su̱ shigarang, ta ɓa ndu̱ khuski nggur yenda nu̱ dlu̱ki kudum mu̱zhindi khang nu̱ke ka gama ndu̱ mu̱ti ɓaran ɓu̱ ɗu̱ma dliiran ɓa. 25Nu̱ke nu̱ ɗu̱ma dliiran ɓa, tu̱ kujirang sa za ku̱ masa nda ɓar ndu̱ nokhzan ndu̱ qusonggi ɓaran ndu̱ ɗyin kha nda kap ma ku̱ dli mu̱zhindi ɓaranang yenda.
26“Tu̱ maavyang kurum gha gume nda tu̱ khuti nda za, ‘Shi kaɗanyi, ngga dliiroro kap.’ 27Tu̱ kujirang na zhiyaye ɓu̱ maavyang, tu̱ ndu̱m kudumang yenda tu̱ ngga nda gha.
28“Yang ba viri ɓu̱ maavyang nu̱ dam, tu̱ gama ndu̱ khuski nggur nu̱ka shiki tlu̱nar ku su̱yen, yang a mbu khuskyang kudum mu̱zhindi nu̱ke khang ɓa, tu̱ khuɓ qur khuskyang a zu̱ran za, ‘Dli kudum ɓang ya.’
29“Tu̱ raptan nu̱ tlu̱narang shul gha tu̱ khuti nda a zu̱ran za. ‘Shi kaɗanyi, ngga dliiroro.’
30“Tu̱ yang maavyang zhang gha, tu̱ ɗu̱ ndu̱ chin ta khi nda gha zhaaru̱m za kope wa dli kudumang kap. 31Nu̱ ɓeena maavikwang tu̱kki ɗyi nu̱ shiki, nu̱ tu̱k mu̱ndan ku ɓa, tu̱ ɗu̱ ku tu̱ ɗa zu̱ su̱ ɗyi nu̱ wor tu̱kki kap ye kuji.
32“Tu̱ kuji qa maavyang tu̱ ze nda za, ‘To maavi malkandi. Nga ndu̱m kudumku nang yor kap ku̱me ta khuti nga. 33Yang alapa nu̱ shipa tu̱ga ta na zhiyaye ɓu̱ mu̱dlwang wa nang naki zhiyaye ɓara ɓa?’ 34Tu̱ memu̱na kuji su̱bu̱r maɗyi, tu̱ yang sa za ku̱ vu̱r bonye yenda kope wa dli kudum ɓaran yenda kap.
35“Wanang tu̱k Zhinkir ɓang nu̱ kya mbu̱ viɗi ka shiki ye aaki chele ɓaanu nu̱ zhangki ndu̱mndan ye mu̱dlen gha ndu̱ memu̱naran da.”
Pilihan Saat Ini:
Matta 18: ttrNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
