SAN MATEO 2
2
Meyk'a apkelyetsáteyak aptémakxa yaw'a
1Apteyekmek axta Jesús tegma Belén, xama tegma apwányam yókxexma Judea axta m'a, cham'a aptémakxa axta makham wese' Herodes ma'a yókxexma nak. Apkelwokmek axta tegma apwányam Jerusalén énxet'ák apkelyetsáteyak axta aptémakxa yaw'a, ektaxnegwánxa ekhem axta apkeleñamak ma'a. 2Aptahak axta apkelmaxneyeyncha'a s'e:
—¿Háxko apyetnakxa judíos wese' apwányam apagkok apteyekmo exnexta? Hakte negwet'ak axta negko'o aptepa yaw'a apagkok ma'a ektaxnegwánxa ekhem, nelxegakmek axta negko'o yakwayam enxoho ólpeykesho'.
3Awanhek axta ektamheykha apwáxok wese' Herodes apleg'a amya'a, hawók axta nahan ektahakxa m'a apyókxoho énxet'ák apheykha nak ma'a tegma apwányam Jerusalén. 4Apchánchesákxeyk axta wese' apwányam ma'a apyókxoho apkelámha apmonye'e nak appasmo apkelmaxnéseso Dios énxet'ák apagkok tén han ma'a apkelxekmóso nak apnámokkok ektémakxa segánamakxa. Apkelmaxneyáha axta apkeltamho ey'asagkohok ekpayhókxa yakweykenxa etyamok Mesías. 5Aptahak axta apkelátegmowágko s'e:
—Payhok ma'a Belén yókxexma Judea, hakte temegkek apnaktáxeséyak énxet aptaha axta Dios appeywa aplegaso s'e:
6‘Xép tegma Belén yókxexma Judá,
háwe exchep tegma apketchetse'
nepyeseksa tegma apkelyawe nak keso yókxexma;
hakte xép sat yenyék xama wese'
yakwayam epékesesagkok apkelxega m'a
énxet'ák ahagkok Israel.’#Mi 5.2.
7Apyexákpók axta Herodes apkeláneyeyncha'a m'a énxet'ák apkelyetsáteyak axta aptémakxa yaw'a, yakwayam enxoho etakmelcheshok apkelmaxneyeykha ekhem eyakhémókxa apteyapma yaw'a. 8Keñe axta apkeláphasa tegma apwányam Belén. Aptahak axta apkeláneya s'e:
—Kólmohok hana m'a, kóltegyaha sat amya'a m'a sakcha'a nak; kélwetágwokmek sat agkok, heltennásetak sat ko'o, yakwayam enxoho ko'o xa amhagkok alpeykesamho'.
9Apkelxegkek axta xa énxet'ák apkelyetsáteyak axta aptémakxa yaw'a natámen apméso appeywa wese' Herodes. Apmonye'e axta apxegak ma'a yaw'a apkelwet'a axta aptepa ektaxnegwánxa ekhem, ekwokmoho apyetnakmo yaw'a m'a apyetnakxa axta sakcha'a. 10Xama axta apkelwet'a yaw'a m'a énxet'ák apkelyetsáteyak axta aptémakxa yaw'a, kélpayhekxeyk axta apwáxók. 11Keñe axta apkelántaxnegwokmo kañe' tegma, apwet'ak axta sakcha'a yetlo m'a egken María; apkeltekxeyágkek axta aptapnák xóp apkelpeykáso. Apkelmeykásegkek axta atña'ák yántéseksek kélxátamo axta cha'a aksok elmomnáwa, apmések axta sawo ekyátekto ekmomnáwa, tén han ma'a aksok ekmátsa agko' la'a ekpakneyam éten agkok, tén han ma'a yámet ánek ekmátsa ekpakneyamla'a. 12Keñe axta ekwanmésa kélésa elpewhok eltakhohok ma'a aphakxa axta wese' Herodes, mók ámay axta apkelpéwók apkeltakháwo m'a apkelenyémekxa.
Jesús apketkok kélya'aso Egipto kélxegánegkesama
13Xama axta apkeltakhákxo m'a énxet'ák apkelyetsáteyak axta aptémakxa yaw'a, xama Wese' egegkok Dios apchásenneykha axta wanmeyásak José. Aptahak axta apcháneya s'e: “Exatakha', ema sakcha'a tén han xa egken, emhok yenyehek ma'a Egipto, exnamho sat ma'a ekwokmoho seltennáseykxo makham ko'o, hakte peyk ektamok Herodes sakcha'a yakwayam yakhek.”
14Apxatakha'ak axta José, apmeyk axta sakcha'a tén han ma'a egken, axta'a axta apxegak apmahágko m'a Egipto. 15Apheykmek axta m'a ekwokmoho apketsapa wese' Herodes. Temegkek axta xa, yakwayam enxoho kasawhaxkohok katnehek ma'a ektémakxa axta apxeyenma Wese' egegkok eñama apxeyenma m'a énxet aptaha axta Dios appeywa aplegaso, aptéma axta s'e: “Egipto payhok sekwónégkaxa ko'o hatte.”#Os 11.1.
Herodes apkeltémo kólnáhapwók sakcha'a apkelennay'a
16Xama axta apyekpelchágwokmo Herodes apkelyexancháseyncha'a m'a énxet'ák apkelyetsáteyak axta aptémakxa yaw'a, aplókok apagko' axta, apkeltamhok axta kólnáhapwók apyókxoho sakcha'a apkelennay'a ekwayam nak apkánet apyeyam apagkok esenhan ma'a apketcheyetse nak apheykha m'a tegma apwányam Belén, tén han ma'a nepyáwa tegma apwányam nak, ekhawo m'a ekwánxa axta yeyam apkeltennasakxa énxet'ák apkelyetsáteyak axta aptémakxa yaw'a. 17Cháxa ektahakxa axta ektaha m'a apxeyenma axta Wese' egegkok, eñama apxeyenma m'a Jeremías, aptaha axta Dios appeywa aplegaso, aptéma axta s'e:
18“Legáxchek axta ekyennamáxma tegma Ramá,
kéllekxagweykha axta anhan tépak ma'a.
Raquel axta m'a,
elekxagweyncha'a axta aptekyawa étchek,
axta kaltamhok kóllánekxések awáxok
hakte apkeletsekkek axta.”#Jer 31.15.
19Wánxa agkok, wanmések axta eyke makham José xama Dios apchásenneykha neyseksa apha axta m'a Egipto, cham'a natámen apketsapma axta Herodes. Aptahak axta apcháneya s'e: 20“Exatakha', ema sakcha'a tén han xa egken, emyekxa makham ma'a Israel, hakte apkeletsekkek kaxwo' ma'a énxet'ák apmáheyo axta yakhek sakcha'a.”
21Apxatakha'ak axta José, apyentegkek axta sakcha'a tén han ma'a egken, Israel axta apya'áseykxa'. 22Xama axta apleg'a amya'a José aptaha wese' Arquelao m'a yókxexma Judea, apyakmagkaso m'a apyap Herodes, apchekak axta emyekxak ma'a; yókxexma Galilea axta apmeyákxa', hakte wanmések axta kélésa emyekxak ma'a Judea. 23Xama axta apwákxo m'a, aphakmek axta tegma apwányam Nazaret.#Mr 1.24; Lc 2.39; Jn 1.45. Temegkek axta xa yakwayam enxoho katnehek ma'a apxeyenma axta katnehek énxet'ák aptaha axta Dios appeywa apkellegaso: cham'a ekmáheyo eltamhakpok Jesús apkeñama Nazaret.
Pilihan Saat Ini:
SAN MATEO 2: LEGN
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lengua Sur (Enxet) New Testament © United Bible Societies, 1992.
