Luk 2

Yisa Masia dɔɣibu yɛla

(Matiu 1.8-25)

1Naa Siiza Agasitus daa ti bahi noli ni bɛ sab’ o tiŋgbɔŋ ni niriba zaa yuya baŋ bɛ kalinli. 2Kuriinius n-daa nyɛ Siria Gomna niriba yuya tuui sab’ maa saha. 3Ka sokam daa kul’ omaŋmaŋ’ ya ni bɛ ti sab’ o yuli.

4Di saha ka Yisifu gba daa mali shili ni o yi Nazarɛt Galili tiŋgbɔŋ ni kuli Bɛtilihɛm Judia tiŋgbɔŋ ni Naa Dauda ya la, dama o daa yila Naa Dauda zuliya ni na. 5Ka o mini Mariama so bɛ ni daa zaŋ ti o ka o mali puu la kuli bɛ ya Bɛtilihɛm ni bɛ ti sab’ bɛ yuya. 6Bɛ ni daa be Bɛtilihɛm maa ka Mariama dɔɣibu saha paai, 7ka o daa dɔɣ’ o paɣisar’ dɔɣim bidibiga n-zaŋ chinchini pil’ o sɔŋ wɔrimɔri piɛɣu ni, dama bɛ daa bi nya palo saamba yilikpɛrili ni.

Piɛguliba mini malaikanima

8Piɛgul’ shɛb’ daa be tiŋ’ maa ni mɔɣu ni gul’ bɛ piɛri yuŋ. 9Ka ti Duuma malaika daa ti puhi yi bɛ zuɣu, ka ti Duuma jilima neesim neei gil’ ba ka dabiɛm kpe ba pam, 10amaa ka malaika maa yɛli ba, “Di zɔriya dabiɛm! Dama lahibal’ suŋ din mali suhupiɛlli pam ka nyɛ sokam zaa dini ka n ʒina ni n ti yɛli ya. 11Zuŋɔ yuŋ ŋɔ bɛ dɔɣi yi tiligira ŋun nyɛ Masia ni yi Duuma la Naa Dauda ya Bɛtilihɛm. 12Shihir’ shɛli yi ni ti yɛn nya ka baŋ nyɛla, yi ni ti nya ka bɛ zaŋ chinchini pili biliɛɣu maa sɔŋ wɔrimɔri piɛɣu ni.”

13Di saha ka malaika bɔbili daa dii yi alizanda ni na nti pahi malaika yino maa zuɣu, ka bɛ yiini yila paɣiri Naawuni yɛra:

14“Ti paɣiri Zallakudura Naa

ŋun tiri dunianim’ bɛn

tumd’ o yubu suhudoo ŋɔ!”

15Di saha ka malaikanim’ maa daa yi bɛ sani lab’ alizanda ni, ka piɛguliba maa yɛli taba, “Chɛliya ka ti chaŋ Bɛtilihɛm ti nya yɛl’ shɛli din niŋ ka ti Duuma yɛli ti ŋɔ.”

16Ka bɛ daa dii yiɣisi zo yomyom ti nya Mariama mini Yisifu, ka nya biliɛɣu maa ka o do wɔrimɔri piɛɣu ni. 17Piɛguliba maa ni daa nya biliɛɣu maa, ka bɛ yɛli malaika la ni daa yɛli ba bia maa yɛla shɛm zaa. 18Ka di daa niŋ bɛnkam zaa wum piɛguliba maa ni yɛli shɛm maa alahiziba. 19Ka Mariama daa zaŋ yɛla ŋɔ zaa niŋ o suhu ni n-kul tɛhiri di yɛla. 20Di nyaaŋa ka piɛguliba maa daa yi ni labiri kuna ka yiini yila paɣiri Naawuni bɛ ni daa wum ka nya shɛm maa zuɣu, dama di daa kul nyɛla kaman malaika la ni daa yɛli ba shɛm.

Yisa yuli bolibu

21 # Lɛv 12.3; Luk 1.31 Ka Yisa dɔɣim dali naba daa ti tuui ka bɛ gun’ o, ka bol’ o yuli Yisa, din nyɛ yu’ shɛli malaika ni daa pun ti o ka Mariama naanyi zal’ o puu la.

Bɛ ni zaŋ Yisa ti Naawuni shɛm

22 # Lɛv 12.6-8 Ka Mariama paɣidɔɣisɔtali daɣiri ni yibu dali daa ti paai kaman Anabi Musa zaligu ni daa wuhi shɛm. Ka bɛ zaŋ bia maa chaŋ Jɛrusalɛm ni bɛ ti zaŋ o ti ti Duuma 23#Yibu 13.2, 12 kaman di ni daa sab’ ti Duuma zaligu ni shɛm la. Dina n-nyɛ ni bɛ zaŋmi bidib’ tuuli kam ti ti Duuma Naawuni. 24Ka bɛ daa chaŋ ti mali sara maligu shɛli ti Duuma zaligu ni daa wuhi la; di daa nyɛla ŋmanʒiɛh’ ayi bee yiŋ’ ŋmambih’ ayi.

25Do’ so daa be Jɛrusalɛm ka o yuli booni Simiɔn; o daa nyɛla ninvuɣ’ suŋ ka zɔri Naawuni ni o suhu zaa. Ka Naawuni Shia Kasi daa be o ni, ka o daa yuuni Izraɛlnim’ Tiligira kandina soli. 26Ka Naawuni Shia Kasi daa kahigi yɛli Simiɔn ni o ku kpi faashee ka o nini ti nya ti Duuma ni daa lo ni o ni ti ba Masia so la. 27Ka Naawuni Shia Kasi maa daa ti zaŋ Simiɔn chaŋ Naawuni jɛmbu duu. Dindali maa ka Yisifu mini Mariama gba daa zaŋ Yisa chaŋ Naawuni jɛmbu duu maa ni ni bɛ ti niŋ kaman Anabi Musa zaligu ni daa wuhi shɛm la. 28Ka Simiɔn daa deei bia maa buɣi, ka paɣiri Naawuni yɛra:

29“N Duuma, a pal’ a ni daa lo alikauli shɛl’ la,

dinzuɣu chɛ ka man’ ŋun nyɛ a dabili ŋɔ

yi dunia ni ni suhudoo;

30dama n nini nya a tiliginsim shɛli

31a ni zaŋ zali zuliya kam zaa ninni ŋɔ.

32 # Aiz 42.6; 49.6; 52.10 A ti bɛn pa Yɛhudianim’ neesim

din ni kahig’ a soli wuhi ba,

ka duh’ a niriba Izraɛlnima.”

33O ni daa yɛli bia maa yɛla shɛm maa daa chɛ ka di gar’ o ba min’ o ma pam. 34Ka Simiɔn daa suhi Naawuni daalibarika niŋ o ni ka yɛl’ o ma Mariama, “Nyama, Izraɛlnim’ pam ni ti lula bia ŋɔ zuɣu, ka bɛ pam mi ti yiɣisila o zuɣu. O lan nyɛla shihir’ shɛli niriba ni ni ti tɔɣisi jɛndi, 35dama niriba pam suhuri ni tɛha ni ti yi palo o zuɣu. Ka suhusaɣiŋgu ti ŋma amaŋmaŋ’ gba suhu kaman takɔb’ la.”

36Paɣ’ so daa beni n-nyɛ anabi, ka o yuli booni Anna. O daa nyɛla Fanuɛl bia, ka nyɛ Asha zuliya ni nira. O daa kurigiya pam; o daa ʒini doo yil’ la yuma ayopɔin, 37ka daa ʒini pakolim ni mi hal ka o yuma ti paai pihiniinaanahi. O daa kul bela Naawuni jɛmbu duu wuntaŋ’ ni mini yuŋ kam jɛmdi Naawuni ni nolɔbo mini wunsuhigu. 38Di saha maa ka o daa kana ti paɣiri Naawuni ka tɔɣisiri bia maa yɛla bɛnkam zaa daa yuuni Jɛrusalɛmnim’ tiliginsim nyabu sol’ la sani.

Yisifu mini Mariama lab’ kuli Nazarɛt

39 # Mat 2.23 Yisifu mini Mariama ni daa niŋ ti Duuma zaligu ni daa wuhi shɛlikam zaa naai maa, ka bɛ lab’ kuli bɛ ya Nazarɛt Galili tiŋgbɔŋ ni. 40Ka bia maa daa ti zooi m-mali yaa ni baŋsim pam; ka Naawuni daalibarika be o ni.

Yisa chaŋ Naawuni jɛmbu duu

41 # Yibu 12.1-27; Zal 16.1-8 Yuuni kam Yisa ba min’ o ma daa yi chanila Jɛrusalɛm ti puhiri Yaɣigari Chuɣu. 42O ni daa ti paai yuun’ pinaayi, ka bɛ min’ o chaŋ Yaɣigari Chuɣu ni kaman bɛ daadiini kali soli ni daa wuhi shɛm. 43Ka chuɣu maa daa ti puhi naai ka bɛ labiri kuna, ka Yisa ŋun daa na nyɛ bisariŋga la kpalim Jɛrusalɛm, ka o ba min’ o ma bi mi. 44Bɛ daa tɛhiya ni o bela bɛ sochandi’ tab’ sani, ka daa chaŋ dabisi’ muni chandi zaa ka naanyi ti gbaag’ o bɔbu bɛ dɔɣiriba mini bɛ nimmiriba sani. 45Bɛ ni daa ti bi nya o, ka bɛ ŋmaligi lab’ Jɛrusalɛm ni bɛ ti bo o shee. 46Di daba ata dali ka bɛ daa ti nya o la Naawuni jɛmbu duu, ka o ʒi Yɛhudia adiini karimbanim’ sunsuuni wumdi bɛ yɛtɔɣa ka bɔhiri ba bɔhigunima. 47Ka di gari bɛnkam zaa daa wum o baŋsim yɛtɔɣa min’ o ni daa garigiri ba shɛm maa. 48O ba min’ o ma ni daa ti nya o, di daa gari ba pam, ka o ma bɔh’ o, “M bia, bɔ n-niŋ ka a niŋ ti lala? A bi nya m min’ a ba ni lihiri bɔr’ a shee ni suhusaɣiŋgu shɛm?”

49Ka Yisa ŋmaligi bɔhi ba, “Bɔzuɣu ka yi lihiri bɔri ma? Yi bi mi ni di nyɛ ma la talahi ni m be m Ba duu?” 50Ka bɛ daa bi baŋ o ni yɛli ba shɛm maa gbinni.

51Ka o mini ba daa laɣim doli kuli Nazarɛt, ka o daa deeri bɛ noli. Ka o ma daa zaŋ yɛla ŋɔ zaa niŋ o suhu ni. 52#1 Sam 2.26; Ŋaha 3.4 Ka Yisa daa kul pahirila baŋsim mini zoosim, ka mali zuɣu pam Naawuni mini salinim’ sani.

Pilihan Saat Ini:

Luk 2: DBwDB

Sorotan

Berbagi

Salin