Jɔn 9
9
Yisa tib’ zoondɔɣirili
1Yisa daa ti chaŋna nti nya zoondɔɣirili, 2ka o nyaandoliba bɔh’ o, “Karimba, doo ŋɔ laamba daalahichi zuɣu n-chɛ ka bɛ dɔɣ’ o zom’ ŋɔ bee omaŋmaŋ’ daalahichi zuɣu?”
3Ka Yisa yɛli ba, “Di pala doo ŋɔ daalahichi bee o laamba daalahichi zuɣu, amaa di niŋmi ni Naawuni tumtumsa yi palo o ni. 4Di niŋ kamaata ni ti tum ŋun tim ma na maa tuma ni nyɛ shɛli wuntaŋ’ ni na be ŋɔ, dama yuŋ ni zibi ka so ku lan tooi tum tuma yaha. 5#Mat 5.14; Jɔn 8.12 N ni na kul be dunia ŋɔ ni ŋɔ, n nyɛla dunia ŋɔ neesim.”
6O ni daa tɔɣisi yɛtɔɣa ŋɔ naai ka o tuhi nintɔri bahi tiŋa n-niŋ taŋkpaɣu garigari di ni n-zaŋ ʒe zom’ maa nina; 7ka yɛl’ o, “Cham’ Sailom biaŋ ni ti paɣ’ a nina maa.” (Sailom gbinni nyɛla Timbu.) Ka o chaŋ ti paɣ’ o nina maa, ka di dii neei, ka o labina.
8Ka zom’ maa ʒiʒiinitab’ mini bɛn daa pun mi ka o nyɛ barimaana la ti bɔhira, “Pa doo ŋɔ n-yi ʒiya maani bara la?”
9Ka shɛb’ yɛli, “Ŋuna m-bala.” Ka shɛb’ mi yɛli, “Aai, o ŋman’ o mi.”
Ka omaŋmaŋ’ yɛli ba, “Mani m-bala.”
10Ka bɛ bɔh’ o, “Wula ka a lee niŋ ka a nina maa neei?”
11Ka o yɛli ba, “Bɛ ni booni do’ so Yisa la n-gari taŋkpaɣu n-zaŋ ʒe n nina maa, ka yɛli ma ni n cham’ Sailom biaŋ la ni nti paɣi n nina maa. Ka n chaŋ ti paɣi, ka n nina maa dii neei.” 12Ka bɛ bɔh’ o, “O be ya?”
Ka o yɛli ba, “M bi mi.”
Farisiinima vihi zom’ tibbu
13Ka niriba maa daa zaŋ do’ so ŋun daa yi nyɛ zom’ maa tahi Farisiinim’ sani. 14Vuhim Dabisili dali ka Yisa daa gari tandi n-zaŋ neeg’ o nina maa. 15Ka Farisiinim’ maa gba ti bɔh’ o yaha, “Wula ka a lee niŋ ka a nina maa neei?”
Ka o yɛli ba, “O zaŋla tandi ʒe n nina maa, ka m paɣi li ka neei.”
16Ka Farisiinim’ maa ni shɛb’ yɛli, “Dindina doo maa pala Naawuni nira, dama o bi doli Vuhim Dabisili dali zaligu.”
Ka bɛ ni shɛb’ mi bɔhi, “Ka wula ka alahichilana ni tooi wuhi shihira ŋɔ tatabo?” Ka bɛ noya woli.
17Ka bɛ daa lan bɔhi zom’ maa yaha, “O ni neeg’ a nina maa, a lee tɛhiya ni o nyɛla ŋuni?”
Ka o yɛli ba, “O nyɛla anabi.”
18Yɛhudianim’ maa daa bi niŋ yɛda ni doo maa daa nyɛla zoma ka ti neei maa faashee bɛ ni daa ti bol’ o ba min’ o ma na 19ti bɔhi ba, “Yi ni yɛli ni yi daa dɔɣi yi bi’ so zom’ la m-bɔŋɔ? Di yi nyɛla ŋuna, ka bɔ n-lee chɛ ka o nina maa neei pumpɔŋɔ ŋɔ?”
20Ka doo maa ba min’ o ma maa yɛli ba, “Ti mi ni ti bia m-bɔŋɔ, ka ti daa dɔɣ’ o la zoma, 21amaa ti bi mi din chɛ ka o nina maa neei pumpɔŋɔ ŋɔ, ti mi bi mi ŋun neeg’ o nina maa. O mi pala bia; bɔhimiy’ o; omaŋmaŋ’ ni yɛli ya.” 22Din daa chɛ ka bɛ yɛl’ lala maa nyɛla bɛ daa zɔrila Yɛhudianima, dama Yɛhudianim’ maa daa pun yɛli ni so yi ti yɛli ni Yisa nyɛla Masia, bɛ ni kar’ o bɛ jɛmbu duu. 23Lala zuɣu ka o ba min’ o ma maa daa yɛli ni o gba lan pala bia, dinzuɣu ni bɛ bɔhim’ o maa.
24Ka bɛ daa lan boli do’ so ŋun daa nyɛ zom’ maa na m-pahi buyi nti yɛl’ o, “Paɣimi Naawuni; amaa ti lee mi ni doo ŋɔ nyɛla alahichilana.”
25Ka o yɛli ba, “O yi nyɛ alahichilana bee o pa alahichilana n ku tooi baŋ. Bin’ yini kɔŋko ka n naɣ’ mi: N daa nyɛla zoma, amaa pumpɔŋɔ n neeya.”
26Ka bɛ lan bɔh’ o yaha, “Wula ka o daa lee niŋ a? Wula ka o daa lee niŋ neeg’ a nina maa?”
27Ka o garigi yɛli ba, “Ka mami m pun yɛli ya ka yi zaɣisi wumbu. Ka bɔzuɣu ka yi lan bɔri ni yi wum yaha? Yi gba bɔrimi ni yi leeg’ o nyaandoliba yɔɣɔ?”
28Ka bɛ gbaag’ o zilima yɛlibu yɛra, “Nyini n-nyɛ o nyaandola, amaa tinim’ nyɛla Anabi Musa nyaandoliba. 29Ti mi ni Naawuni mini Anabi Musa daa tɔɣisi taba yɛtɔɣa, amaa ti bi mi doo maa ŋun’ ni yi shɛl’ na.”
30Ka o yɛli ba, “Dimbɔŋɔ gari ma pam! Yi bi mi doo maa ni yi shɛl’ na, amaa o neegi n nina. 31Ti mi ni Naawuni bi deeri alahichilan’ suhigu, amaa so yi jɛmdi ŋun’ Naawuni ka tumd’ o yubu, o deeri dilan’ suhigu. 32Tun dunia piligu ni hal ni zuŋɔ so na ʒi n-wum ni so neei zoondɔɣirili nina. 33Doo maa yi di pala Naawuni nira, o naan ku tooi niŋ shɛli.”
34Ka bɛ yɛl’ o, “Bɛ daa dɔɣ’ a la alahichi puuni, ka nyin’ ti lee nyɛ ŋun wuhiri ti?” Ka bɛ daa kar’ o bɛ jɛmbu duu maa ni.
Suhu ni zoontali
35Ka Yisa daa wum do’ so ŋun daa yi nyɛ zom’ maa karibu yɛla, ka daa ti bo n-nya o bɔh’ o, “A niŋ Daadam Bia la yɛda?”
36Ka o yɛli Yisa, “N dana, wuhim’ ma o ni nyɛ so, ka n niŋ o yɛda.”
37Ka Yisa yɛl’ o, “A pun nya o, hal ŋuna n-dir’ a alizama ŋɔ.”
38Ka o yɛl’ o, “N Duuma, n niŋ yɛda! Ka dii gbaag’ o jɛmbu.”
39Ka Yisa daa yɛli, “N ka dunia ŋɔ ni na ni n ti karila saria ka di chɛ ka bɛn bi nyari nya, ka bɛn nyari mi leei zoomba.”
40Ka Farisiinim’ shɛb’ bɛn daa be nimaani wum o ni yɛli shɛm maa ka bɔh’ o, “Ka daɣila ti gba nyɛla zoomba?”
41Ka Yisa yɛli ba, “Yi yi di nyɛla zoomba, yi naan ku mali taali, amaa pumpɔŋɔ yi yɛliya ni yi nyara, dinzuɣu yi taali kpalim ʒi yi zuɣu.”
Pilihan Saat Ini:
Jɔn 9: DBwDB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Dagbani Bible with Deuterocanonical Books © Bible Society of Ghana, 2011.
