Mose I 8
8
Tsiɖɔɖɔ wu nu.
1Eye Mawu ɖo ŋku Noa kple gbemelã kple aƒemelã, siwo katã le egbɔ le aɖakaʋua me la dzi, eye Mawu na ya ƒo ɖe anyigba dzi, ale bena tsia de asi miemie me. 2Eye anyigbatu me tsiwo nu tso, eye dziƒo nu tu; ale wɔ tsi la ke. 3Eye tsia le miemiem le anyigba la dzi ʋeʋeʋe. Edze miemie gɔme le ŋkeke alafa ɖeka kple blaatɔ̃ megbe. 4Le ɣleti adrelia ƒe ŋkeke wuiadrelia dzi aɖakaʋu la va xa ɖe Ararat-towo dometɔ ɖeka ta me. 5Eye tsia le miemiem ʋeʋeʋe vaseɖe ɣleti ewolia dzi; le ɣleti ewolia ƒe ŋkeke gbãtɔ dzi towo ƒe tagbɔ dze. 6Le ŋkeke blane megbe la Noa ʋu aɖakaʋua ƒe fesre, si wòwɔ la. 7Eye wòʋu nu le akpaviãa ɖe nu ɖo ɖa, eye wòle dzodzom tso afi yi afi, vaseɖe esime tsia mie le anyigba dzi vo. 8Tete wòʋu nu le ahɔnea ɖe nu ɖo ɖa, ne yeakpɔ bena, tsia mie vo le anyigba blibo la katã dzi hã? 9Ke esi ahɔne la mekpɔ afisi wòadze ɖo o la, egatrɔ va egbɔ le aɖakaʋu la me, elabena tsi le anyigba blibo la katã dzi, eye wòdo asi ɖa lée de aɖakaʋu la me. 10Emegbe wòlala ŋkeke adre, eye wòʋu nu le ahɔnea nu le aɖakaʋu la me. 11Eye ahɔne la va egbɔ le fiẽ me, eye kpɔ ɖa, amitiɖɔmee le enu. Azɔ Noa dze sii bena, tsia mie le anyigba dzi. 12Eye wògalala ŋkeke adre bubu, eye wògaʋu nu le ahɔnea nu, ke megado va egbɔ o. 13Le ƒe alafa ade kple ɖeka me le ɣleti gbãtɔ ƒe ŋkeke gbãtɔ dzi tsia mie le anyigba dzi. Eye Noa fo aɖakaʋu la tame ɖa, eye wotsa ŋku, eye kpɔ ɖa, anyigba dzi ƒu. 14Le ɣleti evelia ƒe ŋkeke blave vɔ adrelia dzi anyigba dzi ƒu keŋkeŋ.
Noa me nu na Mawu.
15Eye Mawu ƒo nu kple Noa gblɔ bena: 16Do go le aɖakaʋu la me, wò ŋutɔ kple srɔ̃wo kple viwòŋutsuwo hekpe ɖe viwòŋutsuawo srɔ̃wo ŋuti! 17Lã vovovo, siwo katã le gbɔwò; xe dzodzoewo kple aƒemelãwo kpakple nu tata, siwo katã tana le anyigba dzi la, nado go kpakpli wò, ne woaʋã wo ɖokui le anyigba dzi, eye wòadzi asɔ gbɔ le anyigba dzi! 18Tete Noa do go, eye viaŋutsuwo kple srɔ̃a kpakple viaŋutsuawo srɔ̃wo hã kpe ɖe eŋuti. 19Lãwo katã, nu tata wo katã kple xe dzodzoewo katã kpakple nusi wo katã zɔna le anyigba dzi la, wodo go le aɖakaʋu la me hamehame.
20Tete Noa ɖi vɔsamlekpui, eye wòtsɔ lã matsrimatsriwo kple xe matsrimatsriwo ƒe ɖewo na Yehowa hemè wo le vɔsamlekpui la dzi.
Yehowa ƒe ŋugbedodo.
21Ke esi Yehowa se ʋeʋẽ lililia la, egblɔ le eƒe dzi me bena: Nyemagaƒo fi ade anyigba akpɔ le amegbetɔ ta o. Elabena ame ƒe dzimesusu enye vɔ̃ tso ɖevime ke, eye nyemagatsrɔ̃ nu gbagbewo katã, abe alesi mewo ene o. 22Tso esia dzi, ŋkeke alesi anyigba li la, nuƒaƒã kple nuŋeŋe, viwo kple fifia, dzomeŋɔli kple pepi, ŋkeke kple zã nu matsi o.
Pilihan Saat Ini:
Mose I 8: EWERV
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Bible in Éwé Revised Version © Bible Society of Ghana, 1913, 2006.