LUCAS 20
20
Ang Pagbulut-an ni Jesus Ginapamatokan
(Mat. 21:23-27; Mar. 11:27-33)
1Isa ka adlaw, sang nagapanudlo sia sang katawohan sa templo kag nagawali sang maayong balita, nagpalapit sa iya ang puno nga mga sacerdote kag ang mga escriba upud sang mga tigulang 2kag nagpamolong sila sa iya, “Sugiri kami kon sa ano nga pagbulut-an nagahimo ka sining mga butang, ukon sin-o ang naghatag sa imo sining pagbulut-an.” 3Nagsabat sia sa ila, “Ako man magapamangkot sa inyo; karon sugiri ninyo ako, 4Ang bautismo ni Juan gikan bala sa langit ukon sa mga tawo?” 5Kag nagbinaisay sila, nga nagasiling, “Kon magsiling kita, ‘Gikan sa langit,’ magasiling sia, ‘Ngaa bala wala kamo magtoo sa iya?’ 6Apang kon magsiling kita, ‘Gikan sa mga tawo,’ batohon kita sang tanan nga katawohan; kay nagapati sila nga si Juan manalagna.” 7Gani nagsabat sila nga wala nila mahibaloi kon diin ini nagikan. 8Kag si Jesus nagsiling sa ila, “Indi man ako magsugid sa inyo kon sa anong pagbulut-an ginahimo ko ining mga butang.”
Ang Paanggid nahanungud sa Ulubasan kag sa mga Mangunguma
(Mat. 21:33-46; Mar. 12:1-12)
9Kag nagsugud sia sa pagpamolong sa katawohan sining paanggid: “Ang isa ka tawo naghimo sing ulubasan,#Isa. 5:1-2. kag ginpaagsahan ini sa mga mangunguma, kag nagpanlakatan sa iban nga duta sing madugay. 10Sang nag-abut ang tion, nagpadala sia sing ulipon sa mga mangunguma, agud nga maghatag sila sa iya sang bunga sang ulubasan; apang ginbunal sia sang mga mangunguma, kag ginpapauli sia nga walay dala. 11Kag nagpadala sia sing isa pa ka ulipon; sia man ginbunal nila kag ginpakahuy-an, kag ginpapauli sia nga walay dala. 12Kag nagpadala pa sia sang ikatlo; sia man ginpilas nila kag ginsobol sia. 13Niyan ang agalon sang ulubasan nagsiling, ‘Ano bala ang akon himoon? Ipadala ko ang akon anak nga hinigugma; ayhan tahoron nila sia.’ 14Apang sang nakita sia sang mga mangunguma, nagsinilingay sila, ‘Ini among manunubli; patyon ta sia, agud ang panublion mangin-aton.’ 15Kag ginsobol nila sia sa gowa sang ulubasan kag ginpatay sia. Busa ano bala ang himoon sa ila sang agalon sang ulubasan? 16Magakari sia kag laglagon ining mga mangunguma, kag ihatag ang ulubasan sa iban.” Sang nabatian nila ini, nagsiling sila, “Pahilayoon sang Dios!” 17Apang nagtolok sia sa ila kag nagsiling, “Ano bala niyan ining nasulat:
‘Ang bato gid nga ginsikway sang mga manunukud
amo ang ginhimo nga pangolo sang pamag-ang’?#Sal. 118:22.
18Ang tagsatagsa nga maholog sa sadtong bato mawas-ag; apang ang kon bisan kay sin-o ini maholog sa iya ini magapusa.”
Ang Pagbayad sing mga Buhis kay Cesar
(Mat. 22:15-22; Mar. 12:13-17)
19Ang mga escriba kag ang puno nga mga sacerdote nagtinguha sa pagdakup sa iya sa sadto gid nga takna, apang nahadluk sila sa katawohan; kay nahantupan nila nga ginpamolong niya ining paanggid batok sa ila.#Mat. 21:45-46; Mar. 12:12. 20Gani ginpanilagan nila sia, kag ginpadalhan sia sing mga lampitaw, nga nagpakita sila nga matarung, agud nga madakup nila sia sa iya polong, sa katuyoan nga matugyan nila sia sa kagamhanan kag sa pagbulut-an sang pangolo-puud. 21Nagpamangkot sila sa iya, “Manunudlo, nahibaloan namon nga ikaw nagasiling kag nagatudlo sing matarung, kag wala ka nagapasulabi, kondi matuud gid nagatudlo ka sang dalanon sang Dios. 22Tugut bala sa amon ang paghatag sing buhis kay Cesar, ukon indi?” 23Apang nahantupan niya ang ila daya, kag nagsabat sia sa ila, 24“Pakita-i ako sing denario. Kay sin-o bala dagway kag sinulat ang yara dira?” Nagsiling sila, “Kay Cesar.” 25Nagsiling sia sa ila, “Niyan ihatag kay Cesar ang mga butang nga iya ni Cesar, kag sa Dios ang mga butang nga iya sang Dios.” 26Kag sa atubangan sang katawohan wala nila madakpi sia sa iya pinamolong; kondi natingala sila sa iya sabat kag naghipus sila.
Ang Pamangkot nahanungud sa Pagkabanhaw
(Mat. 22:23-33; Mar. 12:18-27)
27Nagpalapit sa iya ang pila sang mga Saduceo, sila nga nagasiling nga walay pagkabanhaw,#Binu. 23:8. 28kag nagpamangkot sila sa iya, nga nagasiling, “Manunudlo, si Moises nagsulat sa amon nga kon ang utud sang isa ka tawo mapatay, nga may asawa kag wala sing mga anak, ang iya utud magpangasawa sang asawa niya kag magbangon sing kaliwat sa iya utud.#Deut. 25:5. 29Karon may pito ka mag-ulutud nga lalaki; ang nahauna nagpangasawa, kag napatay nga walay mga anak; 30kag ang ikaduha 31kag ang ikatlo nagpangasawa sa iya, kag sa amo nga bagay ang pito walay ginbilin nga mga anak kag nagkalamatay. 32Sang olihi ang babayi napatay man. 33Busa sa pagkabanhaw, mangin kay sin-o bala asawa sia? Kay ang pito nakapangasawa sa iya.”
34Kag si Jesus nagsabat sa ila, “Ang mga anak sining panuigon nagapangasawa kag ginapabanhan; 35apang ang mga ginakabig nga takus sa pagdangat sa sadtong panuigon kag sa pagkabanhaw wala nagapangasawa ukon ginapabanhan, 36kay indi na sila sarang mapatay, kay kaangay sila sa mga manugtunda kag mga anak sila sang Dios, sanglit nga mga anak sang pagkabanhaw. 37Apang nga ang mga patay ginabanhaw, si Moises gid nagpakita, sa bahin nahanungud sa sapinit, sang pagtawag niya sang Ginoo nga Dios ni Abraham kag Dios ni Isaac kag Dios ni Jacob.#Ex. 3:6. 38Karon indi sia Dios sang mga patay, kondi sang mga buhi; kay ang tanan nagakabuhi sa iya.’ 39Kag ang pila sang mga escriba nagsabat, “Manunudlo, nakasiling ka sing maayo.” 40Kay wala na sila magpangahas sa pagpamangkot pa sa iya.
Ang Pamangkot nahanungud sa Anak ni David
(Mat. 22:41-46; Mar. 12:35-37)
41Apang nagpamangkot sia sa ila, “Paano bala nga nagasiling sila nga ang Cristo anak ni David? 42Kay si David gid nagsiling sa Tolon-an sang mga Salmo,
‘Ang Ginoo nagsiling sa akon Ginoo,
Lingkod ka sa akon too,
43tubtub nga mahimo ko ang imo mga kaaway nga palatungan sang imo mga tiil.’#Sal. 110:1.
44Busa si David nagatawag sa iya nga Ginoo; gani paano bala nga sia anak ni David?”
Si Jesus Nagapakamalaut sang mga Escriba
(Mat. 23:1-36; Mar. 12:38-40; Luc. 11:37-54)
45Kag sa palamatin-an sang bug-os nga katawohan nagsiling sia sa iya mga gintoton-an, 46“Andam kamo sa mga escriba, nga maluyag maglakat nga may mga kunup nga malaba, kag nagahingamo sang mga pag-abiabi sa mga balaligyaan kag sang pinasulabi nga mga lingkoran sa mga sinagoga kag sang pinasulabi nga mga duug sa mga sinalosalo, 47nga nagahalunhon sang mga balay sang mga babaying balo kag sa pamalibad nagahimo sing malawig nga mga pangamuyo. Ini sila magabaton sing daku pa nga katagudilian.”
Pilihan Saat Ini:
LUCAS 20: ABHIL82
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Ang Biblia ©1982 Philippine Bible Society
