Lucas 18
18
Ang Palaanggiran Nahanungod sa Babayi nga Balo kag ang Hukom
1Dayon si Jesus nagsugid sa iya mga gintuton-an sining palaanggiran, sa pagtudlo sa ila nga dapat sila magpangamuyo pirme kag indi magpakaluya. 2“Sa isa ka banwa may isa ka hukom nga wala nagakahadlok sa Dios ukon nagatahod sa tawo. 3Kag may babayi nga balo sa sadto man nga banwa nga wala patay ang kadto sa iya kag nagasiling, ‘Apini ako batok sa akon kasumpong!’ 4Sa malawig nga tinion indi gid magbulig ang hukom, pero sang ulihi nagsiling sia sa iya kaugalingon, ‘Bisan nga wala ako nagakahadlok sa Dios kag wala man nagatahod sa tawo, 5pero tungod sang kasabad sining babayi nga balo, tinguhaan ko nga maapinan sia, basi kon matak-an ako sang iya pagbalikbalik diri!’”
6Kag ang Ginoo nagpadayon sa pagsiling, “Pamatii ninyo ang ginsiling sang hukom nga di-matarong. 7Karon,#Sir. 35:19. indi bala nga ang Dios magaapin sa iya pinili nga mga tawo nga nagapangayo sa iya sing bulig sa adlaw kag gab-i? Magapabuyanbuyan bala sia sa pagbulig sa ila? 8Nagasiling ako sa inyo, magaapin sia sa ila sa gilayon. Pero kon mag-abot ang Anak sang Tawo, makakita bala sia sing mga tawo nga may pagtuo diri sa duta?”
Ang Palaanggiran Nahanungod sa Fariseo kag sa Manugsukot sang Buhis
9Sa mga tawo nga nagakabig sang ila kaugalingon nga matarong kag nagatamay sa iban, si Jesus nagsugid man sini nga palaanggiran, 10“May duha ka tawo nga nagkadto sa Templo sa pagpangamuyo: ang isa Fariseo kag ang isa manugsukot sang buhis. 11Ang Fariseo nagtindog kag nagpangamuyo,#18:11 nagtindog kag nagpangamuyo: Ang iban nga mga manuskrito maynagtindog kag nagsiling sini nga pangamuyo sa iya kaugalingon. ‘Nagapasalamat ako sa imo, O Dios, nga indi ako pareho sang iban nga mga tawo nga sakon, madaya, babayidor, ukon pareho sining manugsukot sang buhis. 12Nagapuasa ako sing makaduha sa isa ka simana, kag nagahatag ako sa imo sang ikapulo sang tanan ko nga kinitaan.’ 13Pero ang manugsukot sang buhis nagtindog sa malayo, kag indi gani sia magtangla sa langit, kundi nagpamukpok sang iya dughan kag nagsiling, ‘O Dios, kaluoyi ako nga makasasala!” 14Dayon#Mat. 23:12; Luc. 14:11. si Jesus nagsiling, “Nagasiling ako sa inyo nga ining tawo nagpauli sa iya balay nga ginpakamatarong sang sa isa. Kay ang tagsatagsa nga nagapakataas sang iya kaugalingon pagapauboson, kag ang tagsatagsa nga nagapaubos sang iya kaugalingon pagapataason.”
Ginbendisyunan ni Jesus ang Magamay nga mga Kabataan
(Mat. 19:13-15; Mar. 10:13-16)
15May mga tawo nga nagdala sang ila mga lapsag kay Jesus agod nga tungtongan niya sila sang iya kamot. Sang pagkakita sini sang mga gintuton-an ginsaway nila ang mga tawo. 16Pero si Jesus nagtawag sang mga kabataan nga magpalapit sa iya kag nagsiling, “Tugoti ang mga kabataan sa pagpalapit sa akon. Indi sila pagdumilii, tungod kay sa kasubong nila nagahari ang Dios. 17Dumdoma ninyo ini! Ang bisan sin-o nga indi magpasakop sa paghari sang Dios kaangay sining bata nga diutay, indi makasulod sa amo nga Ginharian.”
Ang Tawo nga Manggaranon
(Mat. 19:16-30; Mar. 10:17-31)
18Ang isa ka pangulo sang mga Judio nagpamangkot kay Jesus, “Maayo nga Manunodlo, ano bala ang akon dapat himuon agod maangkon ko ang kabuhi nga wala sing katapusan?”
19Si Jesus nagsiling sa iya, “Ngaa ginatawag mo ako nga maayo? Wala sing bisan sin-o nga maayo, kundi ang Dios lamang. 20Nahibaluan#Exo. 20:14; Deut. 5:18; Exo. 20:13; Deut. 5:17; Exo. 20:15; Deut. 5:19; Exo. 20:16; Deut. 5:20; Exo. 20:12; Deut. 5:16. mo ang mga kasugoan: ‘Indi ka magpanginbabayi ukon magpanginlalaki, indi ka magpatay, indi ka magpangawat, indi ka magsaksi sang butig, tahura ang imo amay kag iloy.’”
21Ang tawo nagsabat, “Gintuman ko ini tanan nga mga sugo halin pa sang akon pagkapamatan-on.”
22Sang pagkabati ni Jesus sini nagsiling sia sa iya, “Isa pa ka butang ang dapat mo himuon. Ibaligya ang tanan mo nga mga pagkabutang kag ipanagtag ang kwarta sa mga imol, kag may manggad ka sa langit. Dayon dali ka kag magsunod sa akon.” 23Pero sang pagkabati sini sang tawo nagkasubo sia, tungod kay manggaranon gid sia.
24Sang pagkakita ni Jesus nga nagkasubo ang tawo, nagsiling sia, “Daw ano kabudlay para sa mga manggaranon ang magpasakop sa paghari sang Dios! 25Kay mas mabudlay para sa isa ka manggaranon ang magsulod sa Ginharian sang Dios sang sa isa ka kamelyo nga maglusot sa buho sang dagom.”
26Ang mga tawo nga nakabati sa iya nagpamangkot, “Karon, sin-o na lang ang maluwas?”
27Si Jesus nagsabat, “Ang indi mahimo sang mga tawo, mahimo sang Dios.”
28Dayon si Pedro nagsiling, “Tan-awa bala! Ginbayaan namon ang tanan kag nagsunod kami sa imo.”
29Si Jesus nagsiling sa ila, “Huo, nagasiling ako sa inyo sini: ang bisan sin-o nga nagabiya sang iya balay ukon asawa ukon mga utod ukon mga ginikanan ukon mga kabataan tungod sang paghari sang Dios, 30magabaton sa sini nga panag-on sing mas madamo pa sang sa iya ginbayaan, kag magabaton man sang kabuhi nga walay katapusan sa panag-on nga palaabuton.”
Ikatlo nga Paghambal ni Jesus Nahanungod sang Iya Kamatayon
(Mat. 20:17-19; Mar. 10:32-34)
31Ginpain ni Jesus ang dose ka mga gintuton-an, kag ginsingganan, “Pamati kamo! Makadto kita sa Jerusalem sa diin matuman ang tanan nga ginsulat sang mga propeta nahanungod sa Anak sang Tawo. 32Igatugyan sia sa mga Hentil nga magayaguta sa iya, magapakahuya sa iya kag magadupla sa iya. 33Pagabunalon nila sia kag pagapatyon, pero sa ikatlo nga adlaw mabanhaw sia.”
34Pero ang mga gintuton-an wala makahangop sini nga mga butang, kay ang kahulogan sini nga mga pulong nalipdan sa ila kag wala sila makahangop sang ginhambal ni Jesus.
Gin-ayo ni Jesus ang Bulag nga Manugpakilimos
(Mat. 20:29-34; Mar. 10:46-52)
35Sang nagahinampot si Jesus sa Jerico, may isa ka bulag nga nagapungko sa higad sang dalan nga nagapakilimos. 36Sang pagkabati sang bulag nga may madamo nga mga tawo nga nagaagi nagpamangkot sia, “Ano ang nagakatabo?”
37Nagsabat sila, “Si Jesus nga taga-Nazaret nagaagi.”
38Nagsinggit sia, “Jesus! Anak ni David, kaluoyi ako!”
39Ang mga tawo nga yara sa una nagsaway sa iya kag ginsingganan sia nga maghipos. Sa baylo sini, nagsinggit pa gid sia sing mabaskog, “Anak ni David, kaluoyi ako!”
40Gani si Jesus nagdulog kag nagsugo nga ang bulag dalhon sa iya. Sang malapit na sia, si Jesus nagpamangkot sa iya, 41“Ano ang luyag mo nga himuon ko sa imo?”
Nagsabat sia, “Sir, luyag ko nga makakita liwat.”
42Dayon si Jesus nagsiling sa iya, “Makakita ka na! Ang imo pagtuo nag-ayo sa imo.”
43Sa gilayon makakita na sia, kag nagsunod sia kay Jesus, nga nagapasalamat sa Dios. Sang pagkakita sang mga tawo sini, nagdayaw sila tanan sa Dios.
Pilihan Saat Ini:
Lucas 18: MBBHIL12
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Maayong Balita nga Biblia © Philippine Bible Society, 2012
