Juan 7
7
Si Jesus kag ang Iya mga Utod
1Sa tapos sini, si Jesus nagpanglakaton sa kadutaan sang Galilea. Indi sia luyag magpanglakaton sa Judea, tungod kay ang mga pangulo sang mga Judio nagatinguha sa pagpatay sa iya. 2Malapit#Lev. 23:34; Deut. 16:13. na ang piesta sang mga Judio nga ginatawag Piesta sang mga Palasilungan. 3Gani ang mga utod ni Jesus nagsiling sa iya, “Halin ka diri kag magkadto sa Judea, agod makita sang imo mga gintuton-an ang mga buhat nga imo ginahimo. 4Kay wala sing tawo nga nagatago sang iya ginabuhat kon luyag sia makilala sang tanan. Tungod kay nagahimo ikaw sini nga mga butang, ipakilala sa bug-os nga kalibutan ang imo kaugalingon!” (5Kay bisan gani ang iya mga utod wala magtuo sa iya.)
6Si Jesus nagsiling sa ila, “Ang akon tion wala pa mag-abot, pero ang bisan ano nga tion bagay para sa inyo. 7Ang kalibutan indi makadumot sa inyo, pero nagadumot ini sa akon, tungod kay ako nagabuyagyag sing padayon sang iya malaut nga mga buhat. 8Magpamiesta kamo. Indi ako magkadto#7:8 Indi ako magkadto: Ang iban nga mga manuskrito mayIndi pa ako magkadto. sa sini nga piesta, tungod kay ang akon tion wala pa mag-abot.” 9Ginsiling niya ini kag nagpabilin sia sa Galilea.
Si Jesus Nagkadto sa Piesta sang mga Palasilungan
10Sang makalumbos na ang mga utod ni Jesus sa pagpamiesta, nag-apas man sia sa tago lamang, kag wala mahibaloi. 11Ginpangita sia sang mga pangulo sang mga Judio sa piesta. Nagpamangkot sila, “Diin bala sia?”
12Madamo nga mga tawo ang naghinuringhuring nahanungod sa iya. Ang iban nagsiling, “Maayo sia nga tawo.” Pero may iban man nga nagsiling, “Indi ina matuod, tungod kay ginapatalang niya ang mga tawo.” 13Pero wala sing naghambal nga hayag nahanungod sa iya, tungod kay nahadlok sila sa mga pangulo sang mga Judio.
14Sang nagatungatunga na ang piesta, nagkadto si Jesus sa Templo kag nagpanudlo. 15Ang mga pangulo sang mga Judio nga natingala gid nagsiling, “Ngaa bala kaalam gid sini nga tawo nga wala man gani ini sia makaeskwela?”
16Si Jesus nagsabat, “Ang akon ginatudlo wala naghalin sa akon, kundi naghalin sa Dios nga nagpadala sa akon. 17Ang bisan sin-o nga luyag magtuman sang kabubot-on sang Dios makahibalo kon ining akon ginatudlo halin sa Dios ukon akon-akon lamang. 18Ang tawo nga nagahambal sa iya kaugalingon nga kaalam nagapasidungog sa iya lamang kaugalingon. Pero ang nagapasidungog sa nagpadala sa iya, amo ang mapatihan kag indi butigon. 19Indi bala nga ginhatag ni Moises sa inyo ang Kasugoan? Pero wala sing bisan isa sa inyo nga nagatuman sang Kasugoan. Ngaa man nagatinguha kamo sa pagpatay sa akon?”
20Nagsabat ang mga tawo, “Ginagamhan ka sang demonyo! Sin-o bala ang nagatinguha sa pagpatay sa imo?”
21Si Jesus nagsabat, “Isa gid lang ka buhat nga gamhanan ang akon nahimo kag natingala kamo tanan. 22Ginatuli#Lev. 12:3; Gen. 17:10. ninyo ang bata nga lalaki bisan sa Adlaw nga Inugpahuway, tungod kay si Moises nagsugo sini sa inyo (bisan nga indi si Moises, kundi ang inyo mga katigulangan amo ang nagsugod sini.) 23Kon#Juan 5:9. sa Adlaw nga Inugpahuway ang bata ginatuli agod indi malapas ang Kasugoan ni Moises, ngaa bala naakig kamo sa akon tungod kay gin-ayo ko sing bug-os ang isa ka tawo sa Adlaw nga Inugpahuway? 24Indi kamo maghukom suno sa inyo makita sa gwa, kundi maghukom kamo suno sa nagakaigo nga talaksan.”
Sia bala ang Cristo?
25Gani may iban sang mga taga-Jerusalem nga nagsiling, “Indi bala amo ini nga tawo ang ila ginahingabot nga patyon? 26Tan-awa ninyo, nagahambal sia sa atubang sang mga tawo, kag wala gid sing may nagahambal batok sa iya! Nahibaluan gid ayhan sang mga pangulo nga sia amo ang Cristo? 27Pero kon ang Cristo mag-abot wala sing may makahibalo kon diin sia maghalin. Kag kita nakahibalo kon taga-diin ini nga tawo.”
28Sang nagatudlo si Jesus sa Templo nagsiling sia sa mabaskog nga tingog, “Nakilala gid bala ninyo ako, kag nakahibalo bala kamo kon diin ako maghalin? Wala ako mag-abot sa akon kaugalingon nga luyag. Pero sia nga nagpadala sa akon amo ang matuod. Kamo wala makakilala sa iya, 29pero ako nakakilala sa iya, tungod kay ako nagikan sa iya, kag sia nagpadala sa akon.”
30Gani gintinguhaan sang iban nga mga tawo didto nga dakpon sia, pero wala sing may nagdakop sa iya, tungod kay ang iya tion wala pa mag-abot. 31Madamo sa sadto nga mga tawo ang nagtuo sa iya kag nagsiling, “Kon mag-abot ang Cristo, magahimo bala sia sing gamhanan nga mga buhat nga labi pa sang sa ginahimo sini nga tawo?”
Ginpadala ang mga Gwardya sa Pagdakop kay Jesus
32Nabatian sang iban nga mga Fariseo ang hinuringhuring sang mga tawo nahanungod kay Jesus, gani sila kag ang pangulo nga mga pari nagpadala sing mga gwardya sa pagdakop kay Jesus. 33Si Jesus nagsiling, “Malip-ot na lang ang tion sang akon pagpakig-upod sa inyo, kag dayon magabalik ako sa iya nga nagpadala sa akon. 34Magapangita kamo sa akon, pero indi ninyo ako makita, tungod kay kamo indi makakadto sa akon pagakadtuan.”
35Ang mga pangulo nga mga Judio nagsinilingay, “Diin bala sia makadto nga indi na naton sia makita? Magakadto bala sia sa mga siudad sang mga Griego sa diin may nagaestar nga mga Judio, kag magapanudlo sia sa mga Griego? 36Kay nagasiling sia, ‘Magapangita kamo sa akon, pero indi ninyo ako makita,’ kag ‘Indi kamo makakadto sa akon kadtuan.’ Ano bala ang buot niya silingon?”
Mga Sapa sang Tubig nga Nagahatag sang Kabuhi
37Sa#Lev. 23:36. katapusan nga adlaw sang piesta nga amo ang labing importante nga adlaw, nagtindog si Jesus kag naghambal sa mabaskog nga tingog, “Ang bisan sin-o nga ginauhaw magpalapit sa akon kag mag-inom.#7:37 Ang mga ginhambal ni Jesus sa mga bersikulo 37-38 sarang mabadbad sa masunod: “Ang bisan sin-o nga ginauhaw magpalapit sa akon, kag ang bisan sin-o nga nagatuo sa akon mag-inom. 38 Subong nga ginasiling sang kasulatan, ‘Ang mga sapa sang tubig nga buhi nagailig gikan sa iya tagipusoon.’” 38Subong#Ezeq. 47:1; Zac. 14:8. sang ginasiling sang kasulatan, ‘Ang bisan sin-o nga nagatuo sa akon, magailig halin sa iya tagipusoon ang mga sapa sang tubig nga nagahatag sang kabuhi.’” 39Karon ginhambal ini ni Jesus nahanungod sang Espiritu nga pagabatunon sadtong mga nagtuo sa iya. Sadto nga tion wala pa mahatag ang Espiritu, tungod kay si Jesus wala pa mabayaw kag mapasidunggan.
Ang Pagbinahinbahin sa Tunga sang mga Tawo
40Madamo nga mga tawo ang nakabati sang iya ginhambal kag ang iban sa ila nagsiling, “Ini nga tawo amo gid ang Propeta!”#7:40 ANG PROPETA: Tan-awa ang 1:21.
41Ang iban nagsiling, “Sia amo ang Cristo!”
Pero may iban pa nga nagsiling, “Ang Cristo indi magagikan sa Galilea! 42Ang#2 Sam. 7:12; Miq. 5:2. kasulatan nagasiling nga ang Cristo magahalin sa kaliwat ni Haring David, kag matawo sa Betlehem, ang banwa nga gin-estaran ni David.” 43Gani may pagbinahinbahin sa mga tawo tungod kay Jesus. 44Ang iban luyag nga magdakop sa iya, pero wala sing isa nga nagtandog sa iya.
Ang Pagkadi-matinuohon sang mga Pangulo nga Judio
45Sang ang mga gwardya nagbalik, ang pangulo nga mga pari kag mga Fariseo, nagpamangkot sa ila, “Ngaa bala wala ninyo sia pagdalha diri?”
46Ang mga gwardya nagsabat, “Wala pa sing tawo nga nakahambal subong sang ginpanghambal sini nga tawo!”
47Ang mga Fariseo nagpamangkot sa ila, “Ginbuang man bala kamo sini nga tawo? 48May isa bala sang aton mga pangulo ukon Fariseo nga nagatuo sa iya? 49Ining mga tawo wala makahibalo sang Kasugoan ni Moises, gani ginpakamalaut sila sang Dios!”
50Ang#Juan 3:1-2. isa sang mga Fariseo didto amo si Nicodemo nga nagpakigkita anay kay Jesus. Nagsiling sia sa ila, 51“Suno sa aton Kasugoan indi kita makakondenar sang isa ka tawo sa wala pa naton sia mabatii kag mausisa kon ano ang iya nahimo.”
52Nagsabat sila, “Ano, taga-Galilea man bala ikaw? Usisaa ang mga Kasulatan kag masapwan mo nga wala sing propeta nga magagikan#7:52 wala sing propeta nga magagikan: Ang isa ka manuskrito mayang Propeta indi magagikan. sa Galilea.”
Pilihan Saat Ini:
Juan 7: MBBHIL12
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Maayong Balita nga Biblia © Philippine Bible Society, 2012
