Mariko 4
4
Lusimo luluwamba khu mumiitsi
(Mat 13.1-9; Luk 8.4-8)
1 #
Luk 5.1-3
Kumulundi kukuundi kukwelakho, Yezu waleekela babaandu nga ali khu ndulo khwe nyaantsa. Lwe lituuli lye babaandu khuuba likali naabi, waniina mu likhoŋolo lilyaba nga lili mu meetsi waliikhalamo. Lituuli lye babaandu nilyo lyarama nga lyemikhile khu liloba, khundulo khwe nyaantsa. 2Wabaleekela bibiindu bikali nga araambisa tsisimo.#4.2 Tsisimo tsili isaambo yeesi umuundu akanikhamo shishiindu, ne kamakhulu ke shishiindu isho kaaba nga kebisile mu saambo yeesi ashilomamwo. Mu khuleekela khweewe waloma ari: 3“Abawo umumiitsi mutweela uwatsya khumiitsa bumiitso mu mukuunda kweewe. 4Nga n'aba amiitsa, bumiitso bulala bwakwa khu ntsila, binywiinywi bye mu ngaaki byabulya. 5Bumiitso bubuundi bwakwa khu lwanda lulukhabakho liiloba likali ta, lubaluba bwarura khulwekhuba abe liiloba lifwiiti. 6Ne inyaanga ni yarura, bibyaba byarurire byooma khulwekhuba sibyaba ni tsiindi tsitsitsya aleeyi ta. 7Bumiitso bubundi bwakwa mu mawa. Kamawa ni katsowa kasindakilila bibyarura tsana, byalekha khwama bibyaamo byoosi ta. 8Bumiitso bubundi bwakwa khu liiloba lilayi, bwarura bwama bibyaamo. Bibyarura ni byahangala bilala byaamakho bibyaamo kamakhumi kataru, bibindi kamakhumi kasesaba, ni bibindi shitoondo shitweela.”
9Kila Yezu aloma ari, “Uyo yeesi uli ni kamaru ke khuwulila, n'awulile.”
Shitsiililwa she tsisimo
(Mat 13.10-17; Luk 8.9-10)
10Lwanyuma nga Yezu ali yenyene, ni baleekelwa beewe liikhumi na babili atweela ni babaandu babaandi, kila bamuloomba abasontsoole tsisimo tseesi aba nga araambisa. 11Kila abelamo ari, “Inywe mwawebwele shimoonyo shishiwamba khu Buyiinga bwa Wele. Ne isi babaandu babaandi boosi bibiindu bili mu simo busa. 12#Isay 6.9,10Shitsiililwa shili indi, babaandu bano khulola kane balole, ne balekhe khubona ta. Khurekeeresa kane barekeerese, ne balekhe khubimanya ta. Abe ni bakhola baryo banyala bakobola isi Wele, wabeyakhila bibyonako byabwe.”
Yezu asontsoola lusimo lwatsana
(Mat 13.18-23; Luk 8.11-15)
13Yezu wabareeba ari, “Inywe si mwamanyile lusimo luno ta? Ne tsisimo tsitsiramile kane mutsimanye muryeena? 14Umumiitsi amiitsa burume bubuwamba khu Buyiinga bwa Wele. 15Bumiitso bubwakwa khu ntsila nibo babaandu babarekeeresa burume buno. Ne khangu akho Sitaani etsa wawutula shilomo sheesi babamiitsilemo washibarusakho. 16Bumiitso bubwakwa khu lulwanda, nibo babaandu babawulila shilomo bashakaanila ni abweene. 17Ne khulwe khutaamba kimili, burume buno sibumenya ta. Khukhwaama bulamu bubahangalakho busa buri, namwe burume buno ni bubareerera bihangafu, babwantsukha.
18“Bumiitso bubwakwa mu mawa buli nibo babaandu babawulila shilomo. 19Ne barakikha khukhwiyembelela khulwe bibiindu bibikanibwa mu bulamu bwe mu shiibala muno, nga bakana buyiindifu ni bibiindu bibindi. Ni nashiryo bino byeera burume bweesi bafuna, bwalekha khwamakho shishiindu shoosi ta. 20Ne bumiitso bubwakwa khu liiloba lilayi nibo babaandu babawulila shilomo bashifukiilila. Babeene abo baama bibyaamo balala bibyoolisa kamakhumi kataru, babaandi kamakhumi kasesaba, ni babaandi shitoondo shitweela.”
Yezu akanikha khu buwaanga
(Luk 8.16-18)
21 #
Mat 5.15; Luk 11.33 Yezu wabaloma lundi ari, “Umuundu n'awaambisa itaala, s'akira mu nyuungu namwe wakira munguriri ta. S'akira khu shisiindi shayo, esi bakira khukhwaburukha? 22#Mat 10.26; Luk 12.2Khulwekhuba buli shiindu shoosi shishebisa shilireerebwa ibulafu mu lubuula. Nalundi buli shimoonyo shoosi shikhareerebwe ibulafu mu lubuula. 23Uyo yeesi uli ni kamaru, n'arekeerese.”
24 #
Mat 7.2; Luk 6.38 Yezu weloosela wabalomela ari, “Sheesi muwulila ni mushirekeerese bulayi bubweene. Khulwekhuba isaambo yeesi ubirisamo bashoowo, niyo isaambo yeesi nawe ulibirisibwamo; khaba ni khuminyisakho. 25#Mat 13.12; 25.29; Luk 19.26Umuundu yeesi ulikho ni shishiindu balimulooselakho bibiindu bibindi; ne uyo ukhalikho na shoosi ta, akhaba khafwiiti kheesi ali ni nakho khalimurusibwakho.”
Lusimo luluwamba khu bumiitso
26Yezu waloma lundi ari, “Buyiinga bwa Wele buli busa nga umuundu n'amiitsa bumiitso mu mukuunda. 27Mu shilo aba alikho akona, ne kumuusi aba alikho akhola bibiindu bibindi. Niye s'amanya isaambo yeesi bumiitso bururamo nalundi bwatsowa ta. 28Liloba khubwalyo nilyo liliikhola bumiitso bwarura, bwatsowa, khukhwolisa ni bwama bibyaamo. 29#Yow 3.13Likyesa ni lyoola nga byeesi amiitsa byamala khulaba, uwamiitsa atsya wabikyesa.”
Lusimo lwe khamiitso Kaladaali
(Mat 13.31-32; Luk 13.18-19)
30Ikhumalilisa Yezu wareeba ari: “Buyiinga bwa Wele kane khubulekhanisile khushiina? Lusimo shiina lwesi khunyala khuraambisa khusontsoola Buyiinga bwa Wele? 31Buli busa nga khamiitso kaladaali, nikho khakhaali khamiitso khakhafuurayo bufwiiti mu shiibala, kheesi umuundu abukula wakhabyaala asi mwiloba. 32Ne lwanyuma kharura, khatsowa khekyelamo kusaala kuboofu, kharakho tsisakya, ni binywiinywi bye mu ngaaki byeetsa byombekhamo biiswi byabyo.”
Shitsiililwa she tsisimo
(Mat 13.34-35)
33Yezu araambisa tsisimo tsingali nga aleekela babaandu, wabaleekela musaambo yeesi abe banyala bashimanyamwo. 34S'abakanikhatsakayo busa akhali khuraambisa tsisimo ta. Ne n'abatsaka nga ali yenyene ni baleekelwa beewe, abe abasontsoola buli shitweela.
Ikhuungu khu nyaantsa
(Mat 8.23-27; Luk 8.22-25)
35Ni bwola angoloobe khu shifukhu sheene isho, Yezu walomela baleekelwa beewe ari, “Khayo khwambukhe inyaantsa khutsye shanjelekha.” 36Kila balekha awo lituuli lye babaandu, baloondeleli ba Yezu baatsya ni naye mu likhoŋolo. Kamakhoŋolo kakandi kaatsya ni nabo. 37Lubaluba, abalukhawo ikhuungu iye kamaani. Kameetsi karakikha khukhwinjila mu likhoŋolo lyaaba nga lili ambi khukhwisiikha mu meetsi.
38Ne Yezu aba wekhaale mu likhoŋolo inyuma, wetikiyile kusisinwe nga alikho akona. Kila bamusiisimusa nga baloma bari, “Umuleekeli, iwe s'ubona uri khukana khukhwisiikha mu meetsi ta?”
39Yezu wenyukha walakila ikhuungu khusila, walomela ni inyaantsa ari, “Yakama khutumbuukha.” Ikhuungu yakama khuwutsa, antsye elelela busa.
40Kila abareeba ari, “Shiina kila mubeele ni khuurya? Inywe si muli ni khufukiilila ta?” 41Ari nibo baaba ni khukhwiyaanga ni khufuurisakho nga bereeba bonyene bari, “Ne naanu yuno? Akhaba ikhuungu ni khutumbuukha khwe inyaantsa bimuwulila!”
Pilihan Saat Ini:
Mariko 4: LCE
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
