Mariko 12
12
Lusimo lwe balimi mu mukuunda
(Mat 21.33-46; Luk 20.9-19)
1 #
Isay 5.1,2 Yezu wababoolela lusimo nga aloma ari, “Aabawo umusaani mutweela uwabyaala kumukuunda kwe kimisabibu. Nga wamalile, wombekha lumako webotokhelesa, lwanyuma walima lilowo mweesi basuurira iviini. Nalundi wombekha kusiindi kwesi beemakho nga bebuula. Kumukuunda kuno wakupaangisa, umwene watsya mu shiibala she aleeyi.
2“Bifukhu bye khukyesa ni byoola, warumana umwakaanisi weewe, isi abo beesi apaangisa kumukuunda, ari bamuwekho bitweela khu byaamo khukhwaama mu mukuunda ukwo. 3Balimi beesi ara mu mukuunda ukwo, bakulushila umwakaanisi uyo, bamuwamba bamukhupa, bamutimisa welayo kamakhono kameene busa.
4“Kila umwene uwe kumukuunda arumana umwakaanisi ukuundi. Uyuno bamukhupa likuma nalundi bamubirisa musaambo iwambisa kamaŋaanyu. 5Kila arumana umwakaanisi ukuundi. Uyuno bamuwamba bamwiira. Ni musaambo niyo ndweela babirisa babaandi baryo, nga bakhupa balala ne nga beera babaandi.
6“Aba nga ashiiliyo n'umuundu ukuundi uwe khurumana, nga yuno aba niye umwaana weewe umukanwa. Ikhumalilisa wabarumanayo umwaana uyo, nga ambaasa ari, ‘Umwaana wase kane bamwisemo shiriifwa.’ 7Ne baraambi abo bekuta bonyene baloma bari, ‘Imbo yuno niye umusikha. Ni mwitse khumwiire, busikha bube bubweefwe.’ 8Nashiryo bawamba umwaana uyo bamwiira. Batuuma kumulaambo ibulafu we kumukuunda.”
9Kila Yezu areeba ari, “Mwambaasa muri umwene uwe kumukuunda n'aliitsa, alikhola aryeena? Aliwamba babaandu bano abeere, lwanyuma apaangisise babaandu babaandi kumukuunda ukwo. 10#Zab 118.22,23Ilala mwakhusomatsakakho bibyaronebwa bikhosefu bibiloma biri,
‘Libaale lyeesi babombekhi bekaana khuraambisa,
nilyo lilishuukhile lyekyela nilyo lilitikiya musoonda?
11Umukasya niye umwene uwakhola shino,
nalundi shili shishiyaangisa mu moni tseefwe.’ ”
12Baraangilisi bamanya busa bari Yezu abe alikho abakanikha khu nibo, nashiryo bakana bari bamuwambe batsye bamubowe. Ne khulwe khuurya babaandu, bamulekha baatsya.
Shireebo khu bye khuwaanda kumusolo
(Mat 22.15-22; Luk 20.20-26)
13Bafarisaayo atweela ni naabo abe babaali baloondeleli ba Herode, bekutila atweela kila barumana babaandu khuutsya khukhakilisa Yezu musaambo yeesi akanikhamo bari nio bamisilekho bamuwambe. 14Baatsya isi Yezu bamuloma bari, “Umuleekeli, ifwe khwamanya nga iwe ukanikha bibiindu bya ŋali. Nalundi babaandu boosi iwe ubabirisa ni shiriifwa, akhali khuromboola ta. Iwe uleekela bya ŋali bya Wele, byeesi akana babaandu bakhole. Khuboolele: Khuwanayo kumusolo isi Kayisaali,#12.14 Kayisaali abe niye umuyiinga uwe Baroma khu mbuka iyo, ne abe awula Yuda nayo. shiba she khulondelela kamakaambila, namwe shiba shifuniaka kamakaambila? Khuwaneyo kumusolo, namwe khukhawanayo kumusolo ta?”
15Ne Yezu waba nga wamanyile luwomelo lwaabwe. Wabareeba ari, “Khulwashiina kila mukhakilisa ise? Ni mundereere idinari ingibone.”
16Ni bareera idinari bamuwa, Yezu wabareeba ari, “Shifwani ni lisiina bibilikho bili bya naanu?”
Bamukobolamo bari, “Bili bya Kayisaali.”
17Kila Yezu abalomela ari, “Aso, bya Kayisaali ni mubiwe Kayisaali, bya Wele ni mubiwe Wele.” Babaandu bano beyaanga naabi isaambo yeesi Yezu abelamo.
Shireebo khu bye khulamukha mu bafu
(Mat 22.23-33; Luk 20.27-40)
18 #
Bur 23.8
Abawo Basadukaayo, nga nibo babakhafukiilila bari lwanyuma lwe khufwa iliyo khulamukha khukhwaama mu bafu ta. Beetsa isi Yezu kila bamureeba bari: 19#Maka 25.5“Umuleekeli, ifwe Musa akhuronela ari, umusaani n'aba wayilile umukhasi, ne wafwa busa nga wakhusaala umwaana n'umukhasi uyo ta, wandaaye w'omusaani uyo ela khu namulekhwa, wasaalila wandaaye babaana. 20Lutweela abawo basaani musaafu nga boosi bali wandaaye ni wandaaye. Umukiboole wakhwa umukhasi, ne wafwa busa nga bashiili khusaala umwaana ta. 21Uwe khabili wela khu namulekhwa, ne naye wafwa busa nga bashiili khusaala babaana ta. Akhaba uwe khataru naye aryo wafwa busa, nga umwaana twa, 22khukhwolisa boosi musaafu ni bafwa bawawo nga mbaawo usaalile ni namulekhwa uyo umwaana ta. Lwanyuma umukhasi naye umweene waafwa. 23Ari mu khulamukha khwe baafu, umukhasi uyo aliba mwene wa naanu? Khulwekhuba abakho umukhasi uwa boosi musaafu.”
24Yezu wabelamo ari, “Ilomo ikila mwakoraana ili ndi simwamanya bibyaronebwa bikhosefu ta! Nalundi simwamanya bibiwaamba khu maani ka Wele ta. 25Khulwekhuba babaandu ni baba nga balamukha khukhwaama mu bafu, si bayila bakhasi namwe bakhwalikha ta. Baba nga bamalayika be mwikulu. 26#Luky 3.6Ne bibiwaamba khu bye khulamukha khukhwaama mu bafu, inywe simwasomakho mu burone bwa Musa byeesi buloma ta? Khasiintsa khakhawaamba khu shitsakha she kamawa sheesi niye abona nga shilikho shisha, Wele amulomela ari, ‘Ise ndi Wele wa Ibulayimu, Wele wa Isaaka, nalundi ndi Wele wa Yakobo.’ 27Ni nashiryo inywe Basadukaayo kila bibakhaasa, si mumanya muri Wele s'ali Wele uwe baafu ta, ne ali Wele we balamu.”
Likaambila lilifuura bukhulu
(Mat 22.34-40; Luk 10.25-28)
28Abawo mutweela khu baleekeli be Kamakaambila ka Musa, uwetsa warekeeresa nga Basadukaayo balikho bakhabisana ni Yezu. Umuleekeli uwe Kamakaambila yuno n'awulila nga Yezu elamo bireebo bulayi, kila amureeba ari, “Likaambila shiina nilyo liliminyisa koosi bukhulu?”
29 #
Maka 6.4,5 Yezu welamo ari, “Likaambila likiboole liloma liri, ‘Babaandu ba Isiraeli, ni murekeerese: Umukasya Wele wefwe, niye uli Umukasya yenyene; 30uli ni khukanatsaka Umukasya Wele woowo ni kumwoyo kwoowo kwoosi, ni bulamu bwoowo bwoosi, ni kamakyesi koowo koosi, ni kamaani koowo koosi.’ 31#Lev 19.18Likaambila liliikhola khabili nilyo lino, ‘Kanatsaka umwesanwa woowo nga iwe ni wikana wamweene.’ Imbaawo likaambila lilindi lilifuura kano bukhulu ta.”
32 #
Maka 4.35
Umuleekeli uwe Kamakaambila ka Musa welamo ari, “Umuleekeli, uli mutufu khuloma uri, mu ŋali ali Wele ali mutweela yenyene, nalundi mbaawo Wele ukuundi ta. 33#Hos 6.6Nalundi khuli ni khukanatsaka Wele ni kumwoyo kwoosi, ni kamakyesi koosi, ni kamaani koosi, ni khukana umwesanwa woowo nga wamwene ni wikana. Kamakaambila kano kafuura tsisaayilo tsoosi ni biwaanwa byoosi byeesi umuundu awaanayo.”
34 #
Luk 10.25-28
Yezu n'abona nga umuleekeli yuno welilemo bulayi aryo, kila amulomela ari, “Uli ambi ni Buyiinga bwa Wele.” Ni khukhwamila abweene awo, imbaawo umuundu yeesi uwakhakakho khumureeba shireebo shoosi lundi ta.
Shireebo shishiwamba khu Kristu
(Mat 22.41-46; Luk 20.41-44)
35Yezu n'aba nga aleekela mu Lisaayilo Likhulu, kila areeba ari, “Baleekeli be Kamakaambila ka Musa banyala baryeena khuloma bari Kristu ali umwitsukhulu wa Daudi? 36#Zab 110.1Daudi umwene, Umwoyo Umukhosefu n'amuraangilila aloma ari,
‘Umukasya alomela Umukasya wase ari,
Yikhala khu mukhono kwase kumulayi,#12.36 Khu mukhono kumulayi shimanyisa shifwo she bunyala ni shiriifwa.
khukhwolisa ise n'indiwaamba basiku boowo imbekyelise
shitsoloŋo sheesi usambakho bikyele byoowo.’
37“Daudi umwene amulaanga ari ‘Umukasya’; ni nashiryo ama aryeena ndi waba umwitsukhulu weewe?”
Babaandu babaabawo ni bawulila bino baaba ni kumwikhoyo kumukali.
Yezu ni baleekeli be Kamakaambila ka Musa
(Mat 23.1-36; Luk 20.45-47)
38Yezu n'aba nga alikho aleekela kila aloma ari, “Muli ni khukhwiliinda khulwe baleekeli be Kamakaambila ka Musa. Khulwekhuba nibo bakana khukyenda nga bakwaarire tsingubo tsindeeyi naabi, nalundi bakana bari babaandu babakaanile mu khatale, babasheese ni shiriifwa shikali. 39Nga batsiile mu ntsu tsye khukhwisaayilamo ni khu mayiiya, bakana bekhale mu bifwo bye shiriifwa. 40Ne nibo babaandu tsana batweela babaatsya mungo tsye banamulekhwa babanuulakho byeesi bali ni nabyo; nalundi mu khuloomba khwaabwe bakana busa khukhwiyokesana bari baloomba lukali. Babeene abo nibo babaalifuna shitaambiso shishiminyisawo.”
Shiwaanwa sha namulekhwa
(Luk 21.1-4)
41Yezu wekhala mu Lisaayilo Likhulu, ambi n'isanduukhu iye libikhilo lye tsinusu. Wabona nga babaandu bakali bara tsinusu tsingali naabi mu libikhilo lino. 42Abawo namulekhwa umutaambi naye uwetsa waramo bunusu bubili bwonyene. 43Yezu walaanga baleekelwa beewe kila abalomela ari, “Ilala imbaboolela indi namulekhwa umutaambi yuno wareremo shiwaanwa shishifuurisa bukali khufuura boosi babareere tsinusu mu sanduukhu iye libikhilo. 44Khulwekhuba babaramile boosi babukulekho khukhwaama khu biindu bikali byeesi bali ni babyo. Ne namulekhwa yuno mu butaambi bweewe, wareremo byoosi byeesi abeele ni nabyo, byoosi bye mu bulamu bweewe.”
Pilihan Saat Ini:
Mariko 12: LCE
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
