Luka 3
3
Yohana Umubatisa aŋoonaŋoona intsila
(Mat 3.1-12; Mrk 1.1-8; Yoh 1.19-28)
1Mu mwiiko kwe liikhumi na kiraano kwe buwuli bwa Kayisaali Tiberiya, nga Pontiyo Pilato abe niye uwula Yuda, ni Herode nga niye uwula Galilaaya, wandaaye Filipo aba niye uwula bisiintsa bye Ituriya ni Trakoniti; ni Lisaniya nga niye umuwuli wa Abilene, 2nga Anasi ni Kayafa nibo basaayi bakhulu; shilomo sha Wele shetsila Yohana umwaana wa Zekariya, nga ali mu mubiimbi. 3Aryo Yohana watsya mu bisiintsa bibibotokhelele Yorudaani nga aboolela babaandu khu khubatisibwa khwe khukhwibiiyisa nio akile Wele abeyakhile bibyonako byaawe. 4#Isay 40.3-5Bino byoosi byaba nga ni sharonebwa mu burone bw'omuŋoosi Yisaaya shiri:
“Iliwo likono ly'oyo ulomela angaaki mu mubiimbi liri;
‘Ni muŋoone
kumukhoosi kw'Omukasya,
mukwalaase tsintsila tseewe.
5Buli litila lyoosi litsusiwe,
buli lukiingi ni lukoongo bikwalaasibwe,
kimikhoosi kikyaborokha kiteresebwe,
tsintsila tse kamatikwi tsikwalasibwe.
6Ni babaandu boosi balibona buwonesi bwa Wele.’ ”
7 #
Mat 12.34; 23.33 Yohana waloma kamatuuli ke babaandu babeetsa is'ali khubatisibwa ari, “Inywe tsindemu, naanu ubarewuule khukhwilukha burafu bwa Wele bubuuli khukhwiitsa? 8#Yoh 8.33Nimwane bibyaamo bibyokesanisa khukhwibiiyisa khwe bibyonako, nalundi mukharakikha khuloma muri, inywe muli ni Ibulayimu nga Umukuuka wenywe ta. Lwekhuba imbaboolela ndi, Wele anyala khukalusila Ibulayimu babaana khukhwaama mu mabaale kano. 9#Mat 7.19Ni alunaari inywe mufwanana ni bisaala; iyaywa yareerewele khaale khu shisina she bisaala, nabuli kusaala kukhaana bibyaano bilayi, kane bakureme bakutuume mu mulilo.”
10Kila babaandu bamureeba bari, “Ne ari ifwe kane khukhole khuryeena?”
11Yohana kila abelamo ari, “Umuundu uli ni tsingubo tsibili, akabilekho uyo ukhalikho nayo ta, ni nooyo uli ni biilyo naye nakhole aryo.”
12 #
Luk 7.29
Ni babusanisi be kumusolo nabo biitsa khubatisibwa. Bamureeba bari, “Umuleekeli nafwe khukhole khuryeena?”
13Kila abalomela ari, “Mukhabusaanisatsaka kumusolo khubiririsa isho sheesi babalakila ta.”
14Ari basilikhale nabo bamureeba bari, “Ne ifwe, kane khukhole khuryeena?” Naye wabelamo ari, “Mukhariisariisa babaandu ni khubarusakho tsinusu tsaawe ni kamaani ta, namwe khuwayilisa babaandu khubikhalimo ta, ne kumukheemba kweenywe kubamalatsake.”
15Mu mbuka nyene iyo, babaandu baaba bayisuunga khukhwiitsa khw'Omukasya, baryo barakikha khukhwikanakana ni khukhwireeba mu myoyo kyaawe noola Yohana Umubatisa anyala khuuba niye Kristu.
16Yohana Umubatisa wabelamo ari, “Ise mbabatisa inywe ni kameetsi busa, ne iliwo uli khukhwiitsa uwufuura ise kamaani, ni nase isi ikhaakhila khukangulula lukhoba lwe bilaalo#3.16 Khukangulula lukhoba kwabatsaka kumulimo kw'omukulwa. byeewe ta. Umweeneyo alibabatisa n'Umwoyo Umukhosefu ni kumulilo. 17Ali ni lulweelo lweewe mu mukhono kweewe, khu kyekyendula iŋaano yeewe ili khu lwaanyi, ni khukibuunga mu shiirara, likhuutsi alyooshe ni kumulilo kukhasima ta.”
18Aryo musaambo iyo, ni khubirira musaambo tsitsindi tsingali busa, Yohana waleekela babaandu nga abaleekela kamakhuuwa kamalayi, nga abesamo kamaani. 19#Mat 14.3,4; Mrk 6.17,18Ne Yohana n'ekiitsa Herode Umuwuli lwe khubeyisa Herodiya umukhasi wa wandaaye Filipo, ni lwe biibi bibindi swa byeesi Herode akhola, 20ni khwiibyo byoosi, Herode waloselakho shiibi shishindi shifuurira ilala: wawamba Yohana Umubatisa wamubowa mu mapuusu.
Khubatisibwa khwa Yezu
(Mat 3.13-17; Mrk 1.9-11)
21Lulwoola babaandu boosi nga bamalile khubatisibwa, Yezu naye weetsa wabatisibwa. Ne lwanyuma lwe khubatisibwa nga alikho aloomba, likulu lyabayuukha, 22#Rak 22.2; Zab 2.7; Isay 42.1; Mat 3.17; Mrk 1.11; Luk 9.35Umwoyo Umukhosefu wamwikhakho mu shifwani she liwuusi, ni likono lyarura khukhwaama mwikulu nga liloma liri, “Iwe uli Umwaana wase isi ingana, musiiwe ndi ni kumwikhoyo.”
Bakuuka ba Yezu
(Mat 1.1-17)
23Yezu aba ni kimiiko nga kamakhumi kataru kye bukhulu, khu mbuka isi arakikhila buraambi bweewe. Babaandu abe bamwambasilisa khuuba umwaana wa Yozefu, uwaba umwaana wa Heli. 24Heli aba umwaana wa Matati, Matati umwaana wa Levi. Levi aba umwaana wa Meleki, Meleki umwaana wa Yanayi. Yanayi aba umwaana wa Yozefu, 25Yozefu umwaana wa Matatiya. Matatiya aba umwaana wa Amosi, Amosi umwaana wa Nahumu. Nahumu aba umwaana wa Esuli, Esuli umwaana wa Nagayi. 26Nagayi aba umwaana wa Mahati, Mahati umwaana wa Mahatatiya. Mahatatiya aba umwaana wa Semeyi, Semeyi umwaana wa Yoseki. Yoseki aba umwaana wa Yoda.
27Yoda aba umwaana wa Yohanani, Yohanani umwaana wa Resa, Resa umwaana wa Zerubabeli. Zerubabeli aba umwaana wa Seyaluteli, Seyaluteli umwaana wa Neri, 28Neri umwaana wa Meleki, Meleki umwaana wa Adi, Adi umwaana wa Kosamu, Kosamu umwaana wa Elumadamu, Elumadamu umwaana wa Eri, 29Eri umwaana wa Yoshwa, Yoshwa umwaana wa Eliyazari, Eliyazari umwaana wa Yorimu, Yorimu umwaana wa Matati, Matati umwaana wa Levi. 30Levi umwaana wa Simeoni, Simeoni umwaana wa Yuda, Yuda umwaana wa Yozefu, Yozefu umwaana wa Yonamu, Yonamu umwaana wa Eliyakimu, 31Eliyakimu umwaana wa Meleya, Meleya umwaana wa Mena, Mena umwaana wa Matata, Matata umwaana wa Natani, Natani umwaana wa Daudi, 32Daudi umwaana wa Yese, Yese umwaana wa Obedi, Obedi umwaana wa Bowazi, Bowazi umwaana wa Salumoni, Salumoni umwaana wa Nahasoni. 33Nahasoni umwaana wa Aminadabu, Aminadabu umwaana wa Adumini, Adumini umwaana wa Aruni, Aruni umwaana wa Kezironi, Kezironi umwaana wa Perezi, Perezi umwaana wa Yuda, 34Yuda umwaana wa Yakobo, Yakobo umwaana wa Isaaka, Isaaka umwaana wa Ibulayimu, Ibulayimu umwaana wa Tera, Tera umwaana wa Nakori, 35Nakori umwaana wa Serugi, Serugi umwaana wa Rewu, Rewu umwaana wa Pelegi, Pelegi umwaana wa Eberi, Eberi umwaana wa Sela.
36Sela umwaana wa Kayinani, Kayinani umwaana wa Arupakusadi, Arupakusadi Semu, Semu umwaana wa Nowa, Nowa umwaana wa Lameka, 37Lameka umwaana wa Mesusela, Mesusela umwaana wa Enoka, Enoka umwaana wa Yaredi, Yaredi umwaana wa Malaleli, Malaleli umwaana wa Kayinani, 38Kenani umwaana wa Enosi, Enosi umwaana wa Sezi, Sezi umwaana wa Adamu, Adamu umwaana wa Wele.
Pilihan Saat Ini:
Luka 3: LCE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
