Luka 21
21
Shiwaanwa sha namulekhwa
(Mrk 12.41-44)
1Yezu wenyusa tsimoni wabona bayindifu nga bara biwaanwa byaawe mu sanduukhu iye Lisaayilo Likhulu. 2Aryo wabona namulekhwa umutaambi nga naye aramo bu nusu bweewe bubili bwonyene. 3Yezu waloma ari, “Ilala imbaboolela ndi, namulekhwa yuno umutaambi warelemo shikali khufuurisa babaandi babaramile boosi. 4Lwekhuba bano boosi babukuule khu bikali byeesi bali nabyo baara mu sanduuku, ne umukhasi yuno mu butaambi bweewe, wawanileyo byoosi by'ali nabyo bye bulamu bweewe bwoosi.”
Yezu ni khu khwonakisibwa khwe Lisaayilo Likhulu
(Mat 24.1-2; Mrk 13.1-2)
5Ulwo batweela khu baleekelwa beewe ni baaba bakanikha khu Lisaayilo Likhulu, nga ni lyaba lyayombekhebwa bulayi, ni kamabaale kamamiliwu naabi, ni n'ebyo bibyawaanibwayo isi Wele; Yezu waloma ari, 6“Bino byoosi byeesi mubona ari, imbuka kane yoole, esi akhalibonekhawo ni libaale na litweela lilirama nga lyemile khu lyashe ta. Kamabaale kano koosi katsya khutuumibwa asi.”
Bukosi ni khutaambisibwa
(Mat 24.3-14; Mrk 13.3-13)
7 #
2 Esid 4.51—5.19
Baryo bareeba Yezu bari, “Umuleekeli, bino byoosi bilibawo liina? Nalundi khabonelo shiina khakhalyokesana khari ibyo byoosi bili ambi khukhwoolelesebwa?”
8Yezu welamo ari, “Ni mwitsililise, mulekhe khukosaasibwa ta. Lwekhuba bakali baliitsa mu lisiina lyase, nga baloma bari, nibo ise, lundi nga baloma bari, ‘imbuka yoolile.’ Mukhabaloondelelatsaka ta. 9Ne ni muliwulila busoolo ni khutabukha, mukharyatsaka ta. Bibiindu bino byoosi byaakha khunyoowa khubawo, ne intsakamo shiili iyawangu ta.”
10Lwanyuma waloselakho ari, “Linaambo lilinyukhila linaambo lyashe, ni buyiinga bulinyukhila buyiinga bubuundi. 11Ilibawo khunikina khukali khwe shiibala, ni mu bifwo bikali mulibamo intsala ni tsindwale. Nalundi ilibawo bibiriisa bikali, ni bye kamakaanga khukhwaama mwikulu.
12“Ne bino byoosi nga bishiili khubawo ta, balibawamba inywe, babakubyeenge, babawaneyo mu muntsu tsye khukhwisaayilamo, ni khubowebwa mu mapuusu. Balibayila isi bayiinga n'isi bawuli lwe lisiina lyase. 13Ne yino iliba ikhabi yeenywe khubawa nibo bujulilwa. 14#Luk 12.11,12Kale muryo ni mumalilile mu myoyo kyeenywe khulekha khurya ta, nga mwambaasa muri kane mwiwotsekho muryeena ta. 15Lwekhuba ise samweene indibawa inywe bilomo ni kamakyesi byeesi basiku beenywe bakhalinyala khukhaandisa namwe khubiloba ta. 16Inywe mulilibwamo luwomelo ni basaali beenywe, ni babandaayeenywe, ni balebe beenywe, ni basaale beenywe. Ni babaandi khwiinywe baliribwa. 17Babaandu boosi balibabiiyila lwe lisiina lyase. 18Ne mbaawo ni lutsuune lwe khu mirwe kyeenywe na lutweela lulihela na khafwiiti khoosi ta. 19Mukhwikhalilikha khweenywe mulinyoola bulamu.
Yezu akanikha khu khwonakisibwa khwa Yerusalemu
(Mat 24.15-21; Mrk 13.14-19)
20“Ne ni mulibona Yerusalemu nga shebotokhelelwe ni kamaye ke basilikhale, ulwo mumanya muri khuhela khwasho khuli ambi. 21Ulwo babaaliba mu Yuda baakha belukhile mu bisiintsa bye tsingoongo; ne ibo babaaliba mu shiriimba bashiruremo; ni naabo babaaliba mu shaalo bakhenjila mu shiriimba ta. 22#Hos 9.7Lwekhuba bino nibyo bifukhu bye shitaambiso khukhwoolelesa bibyaronebwa. 23Isi bakhasi babaaliba bisoombo, ni naabo babaaliba nga banuunisa mu bifukhu ibyo, nga kuliba kumutaambo. Lwekhuba ilibawo kumutaambo kumukali mu shiibala, ni lirima lya Wele isi babaandu be linaambo lino. 24Baliribwa ni lurima, lundi baliyilibwa nga babowe mu manaambo koosi, ni Yerusalemu shilisambililwa ni Banaambo khukhwoolesa imbuka yaawe inyene iyarobolebwa n'iliwakho.
Khukhwiitsa khw'Omwaana w'Omuundu
(Mat 24.29-31; Mrk 13.24-27)
25 #
Isay 13.10; Ezek 32.7; Yow 2.31; Bimb 6.12,13 “Ne alibawo bubonelo khu nyaanga ni khu mweesi, ni khu nieniesi, ni khu shiibala kamanaambo koosi kaliiba mu khwiyembelela, ni khuurya lwe khuwoolela ni khukululukha khwe nyaantsa. 26Babaandu baliyengukhaka lwe shiriisa, ni lwe khukhwiyembelela ibyo byoosi bibiitsya khubawo mu shiibala shoosi, lwekhuba kamaani ke mwikulu kalitengasibwa. 27#Dan 7.13; Bimb 1.7Khu mbuka iyo, nio babone Umwaana w'Omuundu nga etsila mu namufweeli ni kamaani ni shiriifwa shikali. 28Ne bino byoosi ni biba nga birakikha khubawo, mukangamukha mwinyuse kimirwe kyeenywe, lwekhuba khuwonesebwa khweenywe khuba khuli ambi.”
She khukhwiyika khu kusaala ku figi
(Mat 24.32-35; Mrk 13.28-31)
29Lwanyuma Yezu wababoolela lusimo luno ari, “Ni mubonele khu kusaala ku figi ni khu bisaala bibiindi byoosi. 30Muryo ni mubona nga bisisinakho lundi kamasaafu, mumanya muri biseela bye kumunaane bili ambi. 31Musaambo niyo ndweela, ni nanywe ni mulibona ibyo nga bibawo, mumanyatsaka muri Buyiinga bwa Wele buli ambi.
32“Ilala imbaboolela ndi kumuboolo kuno sikuliwawo na khafwiiti ta, khukhwoolesa ibyo byoosi ni bilibawo. 33Likulu ni shiibala biliwawo, ne bilomo byase sibiliwawo na khafwiiti khoosi ta.
Mwaakha khuuba meeso
34“Ni mwiliinde kimyoyo kyeenywe kilekhe khukhwimalila khu mulyulyu, ni khumeela, ni khukhwiyembelela bibiindu bye mu bulamu buno ta, nio shifukhu isho shilekhe khuboolakho nga akhumanya ta. 35Lwekhuba shilyoola khu baandu be mu shiibala shoosi nga kumureko. 36Ni nashiryo, ni mube meeso imbuka yoosi, nga muloomba Wele busheele, nio munyale khukhwilukha ibyo byoosi bibiitsya khubawo, ni khunyalisa khukhwimikha mu moni tsy'Omwaana w'Omuundu.”
37 #
Luk 19.47
Aryo Yezu buli shifukhu kumuusi ekhalaatsaka mu Lisaayilo Likhulu nga aleekela, ne ni bwelabulatsaka aruratsaka n'atsya khu lukiingi lulaangiwa bari lwe kimisaala Kimizeyituni. 38Babaandu boosi bawuunatsaka kumutikhinyi khuutsya is'ali mu Lisaayilo Likhulu khumurekeeresa.
Pilihan Saat Ini:
Luka 21: LCE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
