Luka 18
18
Lusimo lwa namulekhwa n'umukayi
1Lwanyuma Yezu wababoolela lusimo luno, nga abaleekela ari, bakhila khuloomba busheele akhali khuluwa ta. 2Waloma ari, “Abawo umukayi we kimisaango mu shiriimba shitweela uwaba nga s'arya Wele ta, namwe khukhwinaanayo isi umuundu yeesi ta. 3Ne abaawo namulekhwa mutweela mu shiriimba sheene isho, uwabuya nga etsa is'ali, nga amuloma ari, ‘N'ungaye isi umusiku wase.’
4“Khumala imbuka ndeeyikho, umukayi yuno s'akana khushikhola ta. Ne lwanyuma waloma mu mwoyo kweewe ari, ‘Ne ikhaba nga s'indimo khuurya Wele ta, namwe khukhwiinaanayo isi umuundu yeesi ta, 5ne lwekhuba namulekhwa yuno wanduwisile lukali, kane imukaye nio alekhe khukhwiitsatsaka khukhundambisa ta.’ ”
6Kila Umukasya eloosela nga abaloma ari, “Ni muwulile umukayi yuno ukhola bye bubwonaki sheesi aloma. 7#Sir 35.19Aso, Wele s'aliyeeta khukaya barobole beewe babamulilila kumuusi ni mu shiilo? Kane ayile imbuka indeeyi nga siwabayeetile ta? 8Mbaboolela ndi alibakaya khaangu naabi. Ne Umwaana w'Omuundu n'aliitsa alinyoola khufukiilila khu shiibala?”
Umufarisaayo n'umubusanisi we kumusolo
9Lundi ndi Yezu waboolela lusimo luno isi babaandu babeyambaasatsakakho khulwawe babeene khuuba bakhosefu, nga baleekelesa babaandi.
10Waloma ari, “Babaandu babili baatsya mu Lisaayilo Likhulu khuloomba. Mutweela khu nibo aba Umufarisaayo, n'ukuundi aba umubusanisi we kumusolo. 11Umufarisaayo weema waloomba bilomo bino ari, ‘Wo Wele ise ikhusiima iwe, lwekhuba ise s'indi nga babaandu babaandi ta, babaali banuuli, si bali babeyikinwa ta, bayeyani, namwe nga umubusanisi we kumusolo yuno ta. 12Ise Imbuya ntsala bifukhu bibili mu Sabiti, lundi ise imbaanayo shisiintsa shitweela she liikhumi, khu byoosi byeesi ndi nabyo.’
13“Ne umubusanisi we kumusolo weema aleeyikho, walekha khukana ni khukhwinyusa tsimoni tseewe mu ngaaki mwikulu ta, ne wekhupa mu shifuba mweewe, nga aloma ari, ‘Wo Wele, n'umambile shiisa, ise umwonaki.’
14 #
Mat 23.12; Luk 14.11 “Imbaboolela ndi, umusaani uyu akobolayo ingo weewe nga Wele wamwililemo, khuminyisa ukuundi uyo Umufarisaayo. Lwekhuba buli uwiniinisa angaaki, alisibwa asi, ni nooyo uwiyisa asi, aliniinisibwa angaaki.”
Yezu akaanila babaana bafwiiti
(Mat 19.13-15; Mrk 10.13-16)
15Babaandu babaandi bareera babaana baawe isi Yezu abarekho kamakhono keewe. Ne baleekelwa beewe ni baabona baryo babarafuyila. 16Ne Yezu walaanga babaana bafwiiti is'ali nga aloma ari, “Ni mulekhe babaana bafwiiti beetse is'indi, mukhabareesa ta, lwekhuba Buyiinga bwa Wele buli bwe babaali nga bano. 17Ilala mbaboolela ndi, umuundu yeesi ukhakaanila Buyiinga bwa Wele nga Umwaana umufwiiti, s'alibwingilamo na khakyeekhe ta.”
Umusaani umuyindifu
(Mat 19.16-30; Mrk 10.17-31)
18Umuraangilisi mutweela Umuyudaaya wareeba Yezu ari, “Umuleekeli umulayi, ikhole shilayi shiina, nio ninjile mu bulamu bukhawawo?”
19Yezu wamwiilamo ari, “Lwashiina unaanga ise uri umulayi? Mbaawo na mutweela yeesi umulayi ta, khurusakho Wele yenyene poli. 20#Luky 20.14; Maka 5.18 Luky 20.13; Maka 5.17 Luky 20.15; Maka 5.19 Luky 20.16; Maka 5.20 Luky 20.12; Maka 5.16Kamakaambila wakamanya: ‘Ukhayeyana ta, ukheera ta, ukheeba ta, ukhaapa umuundu washoowo liyino ta, wisatsakemo paapawo ni maayiwo shiriifwa.’ ”
21Umusaani welamo ari, “Ibyo byoosi naabiwamba khukhwaama mu busooleli bwase.”
22Ne Yezu n'awulila aryo wamwiilamo ari, “Ushitaambakho shishiindu shitweela shonyene: n'utsye, ukulise bibiindu byoosi byeesi uli nabyo, ukabile bataambi, ni nawe uliba ni buyiindifu mwikulu. Lwanyuma wiitse unondekho.”
23Ne umusaani n'awulila aryo, kumutaambo kwamuwamba lwekhuba aba umuyindifu naabi.
24Yezu wamulolelela, wamuloma ari, “Nga shihangafu, umuundu umuyindifu khukhwinjila mu Buyiinga bwa Wele. 25Shili shaangu naabi iŋamya khubirira mu mwanya kwe mpiso, khuminyisa umuyindifu khukhwinjila mu Buyiinga bwa Wele.”
26Ne babaandu bababawo ni bawulila shino, bareeba bari, “Ari naanu, unyala khuwonesebwa?”
27Ne Yezu wabelamo ari, “Bibikhanyalikha isi babaandu, binyalikha isi Wele.”
28Lwanyuma Petero wamwiilamo ari, “Bona ifwe khwalekha tsiingo tseefwe, khwetsa khukhulondelela iwe.”
29Yezu wamuloma ari, “Ilala mbaboolela ndi, mbaawo umuundu uwalekha tsiingo tseewe, namwe umukyelema, namwe babandaaye, namwe basaali, namwe babaana, lwe Buyiinga bwa Wele, 30ukhaliwebwa bikali khufuurakho mu muboolo kuno, nalundi mu muboolo kukwiitsa, khufuna bulamu bukhawawo ta.”
Yezu akanikha khu khufwa khweewe
(Mat 20.17-19; Mrk 10.32-34)
31Yezu wayila baleekelwa beewe liikhumi na babili andulo, wabaloma ari, “Bona, khulikho khuniina i Yerusalemu, na buli shiindu shoosi sheesi baŋoosi baarona shishiwamba khu Mwana w'Omuundu, shilyoolelela. 32Aliwaanibwayo isi babaandu Banaambo, balimutyabila, bamubirise musaambo ikhaakhila ta, bamufuutsekho kamare. 33Balimunyweekha tsikhoba, lwanyuma bamwiire. Ne khu shifukhu she khataru, alilamukha khukhwaama mu bafu.”
34Baleekelwa beewe balekha khumanyakho khu bilomo ibyo na shitweela ta, lwekhuba kamakhulu kaabyo kaaba kababisiwilekho, balekha khumanya byeesi aloma ta.
Yezu awonesa umubofu usabilisa
(Mat 20.29-34; Mrk 10.46-52)
35Ne Yezu n'aba nga ali ambi khukhwoola i Yeriko, abaawo umusaani umubofu abe uwikhaale khu ndulo khwe ntsila nga asabilisa. 36Umubofu yuno n'awulila lituuli lye babaandu libirawo, wareeba nga akana amanye shishiitsya mu moni. 37Bamuboolela bari, “Yezu uwe Nazareti, niye uli khubirawo.”
38Kila alookhela angaaki ari, “Yezu Umwitsukhulu wa Daudi, n'umambile shiisa.”
39Ne babaandu babaaba baraangile, bamukhookhela bari asile busa. Ne niye weloosela khulookha naabi nga aloma ari, “Mwana wa Daudi! N'umambile shiisa!”
40Yezu wemikha, walakila ari bamureere is'ali. Ne umubofu n'etsa ambi, Yezu wamureeba ari, 41“Ukana ise ikhukholele shiina?”
Umusaani umubofu wamwiilamo ari, “Umukasya ingana khubona.”
42Yezu wamwiilamo ari, “Mbo n'ubone, lwe khufukiilila khwoowo wawonesebwile.”
43Lubaluba, tsimoni tseewe tsabimbukha, waloonda khu Yezu, nga aruuya Wele. Ni babaandu boosi ni babona shino, nabo baruuya Wele.
Pilihan Saat Ini:
Luka 18: LCE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
