Yohana 4
4
Yezu akanikha n'umukhasi Umusamariya
1Bafarisaayo bawulila bari Yezu alikhukalusa nalundi ali khubatisa baleekelwa bakali khufuura Yohana. 2Akhaba nga Yezu umweene s'abatisa umuundu yeesi ta, khurusakho baleekelwa beewe nibo bababatisa.
3Yezu n'ashimanyakho aryo, warura mu Yuda, wakobolayo i Galilaaya. 4Nga atsya, wakana khubirira mu Samariya. 5#Rak 33.19; Yos 24.32Aryo woola mu shiriimba she mu Samariya, shishilaangibwa shiri Sukure, nga shili ambi ni kumukuunda kweesi Yakobo awa umwaana weewe Yozefu. 6Mu bweenemwo mwabamo isebele ya Yakobo. Ne Yezu n'aba nga waluwile khu lwe lukyeendo, wikhala asi ambi n'isebele iyo. Tsisaawa tsyaba nga tsisesaba tsye mwihangilwe.
7Lwanyuma umukhasi Umusamariya nga wetsile khutaha kameetsi, Yezu wamuloma ari, “N'umbekho kameetsi inywe.” 8Baleekelwa beewe baaba batsiile mu shiriimba khukula biilyo.
9 #
Ezira 4.1-5; Neh 4.1,2 Umukhasi Umusamariya uyo welamo Yezu ari, “Shinyalikha shiryeena iwe ubeele Umuyudaaya, khukhunoomba ise, umukhasi Umusamariya, kameetsi?” Lwekhuba Bayudaaya ni Basamariya si bakholakana ta.
10Yezu wamuloma ari, “Uba nga umanyile shiwaanwa sha Wele nga ni shili, nalundi uba nga umanyile uyo ukhuloombile ari, ‘imbekho kameetsi inywe,’ Iwe wandimuloombile she khuunywa, ni naye yandikhuweele kameetsi kakareera bulamu.”
11Umukhasi wamwiilamo ari, “Paapa, iwe s'uli ni she khutayila kameetsi ta, nalundi isebele iyi, ili indeeyi naabi, ne kameetsi kano kakareera bulamu, kane ukaamiise wahe? 12Iwe uli uwe angaaki naabi khufuura kuuka weefwe Yakobo uwakhuwa ifwe isebele yino, mweesi niye umweene anywatsaka, ni babaana beewe, atweela ni bibyaayo byaawe?”
13Yezu wamuloma ari, “Umuundu yeesi unywa kameetsi ke isebele yino, bulesa buli mulya lundi. 14Ne umuundu yeesi unywa kameetsi keesi ise imuwa, bulesa sibulimulya lundi ta. Ilala kameetsi keesi ise imuwa kalikyela mu niye isebele itubukha, nga kamuwa bulamu bubukhawawo ta.”
15Umukhasi wamwiilamo ari, “Paapa n'umbe kameetsi ako, nio bulesa bulekhe khuundya lundi ta. Nalundi nio indekhe khukhwiitsatsaka ano khutaha kameetsi ta.”
16Yezu wamulomela ari, “N'utsye, ulaange umuseetsa woowo, ukobole ano.”
17Umukhasi kila amwiilamo ari, “Ise s'indi n'umuseetsa ta.”
Yezu wamwiilamo ari, “Khuloma uri s'uli n'umuseetsa ta, walomele sha ŋali. 18Lwekhuba wakhwalikha khu baseetsa baraano. Ni nooyo esi uli ni naye ari, s'ali umuseetsa woowo ta. Mu shino, walomele bya ŋali.”
19Umukhasi wamwiilamo ari, “Paapa, iwe uli umuŋoosi! 20Bakuuka beefwe besaayilatsaka khu lukiingi luno, ne inywe Bayudaaya muloma muri, mu Yerusalemu mwonyene nimwo mweesi khwakha khukhwisaayila.” 21Yezu wamuloma ari, “Mukhas'iwe, n'ufukiilile uri imbuka ili khukhwiitsa isi mulisaayila Paapa, akhuba khu lukiingi luno namwe mu Yerusalemu ta. 22Inywe Basamariya si mumanya naanu isi mwisaaya ta, ne ifwe Bayudaaya khumanya isi khwisaaya. Lwekhuba buwonesi bwama mu Bayudaaya. 23Ne imbuka ilyoola, ne khanome ndi yoolile khaale, isi babesaaya mu bwa ŋali, balisaaya Paapa mu Mwoyo ni mu ŋali, khulwekhuba Paapa akana babaandu babaali nga abo khumwisaaya. 24Wele ali Umwoyo, nashiryo abo babamwisaaya, bamwisaaya mu Mwoyo ni mu Ŋali.”
25Umukhasi wamuloma ari, “Uyo isi baamala khubiitakho tsikhabi (ulaangibwa ari Kristu), alikhukhwiitsa. Ni naye nga wetsile, ifwe alikhuboolela byoosi.”
26Yezu wamuboolela lubuula ari, “Ise niy'oyu isi ulikho ukanikha ni naye.”
27Ni abweene awo, baleekelwa beewe bakobola. Ne beyaanga khubona nga abe Kristu alikho akanikha n'umukhasi. Ne mbaawo na mutweela uwareeba umukhasi ari shiina sheesi akana, namwe khureeba Yezu bari lwashiina aba ali khukanikha ni naye ta.
28Umukhasi walekha isoongwe yeewe, wakobolayo mu shiriimba, waboolela babaandu ari, 29“Ni mwiitse mubone umuundu uwumboolele byoosi byeesi ise nakhola. Manya umweene uyu anyala khuuba niye Kristu?” 30Ni abweene awo babaandu bakali baama mu shiriimba baatsya isi Yezu aba.
31Ne bino byoosi biba biryo, baleekelwa ba Yezu abe balikho bamwikontselela bari, “Umuleekeli, n'ulyekho biilyo.”
32Ne niye wabelamo ari, “Ise ndi ni biilyo byeesi indya, byeesi inywe mukhamanyile ta.”
33Lwanyuma baleekelwa bekuta bonyene bari, “Manya ikhabawo umuundu umurereere biilyo?”
34Yezu wabaloma ari, “Biilyo byase nikhwo khukhola sheesi uyo uwanduma akana, ni khukhwoolelesa kumulimo kweewe kweesi amba. 35Inywe simuloma muri ishiramayo kimyeesi kine nio likyesa lyoole ta? Imbaloma ndi ni mwinyuse tsimoni tseenywe mubone kimikuunda! Kyamalile khaale khulaba, kyoolile likyesa. 36Ni aluno, uyo ukyesa balikho bamuwa kumukheemba kweewe, nalundi abusanisa bibyaamo khulwe bulamu bubukhawawo ta. Nio manya umumiitsi ni nooyo ukyesa banyale khukhwikhoyela atweela. 37Aluno iliwo shilomo shino sha ŋali shishiloma shiri, ‘Mutweela amiitsa, ukuundi wakyesa.’ 38Ise nabarumanile khukyesa ibyo byeesi mukhakhalabanila ta. Babandi busa babaraamba kumulimo, ne inywe mukyesa bibyaama mu maani kaabwe.”
39Bakali khu Basamariya babaama mu shiriimba umwo, bafukiilila mu Yezu khu lwe bujulisi bw'omukhasi uyo uwaloma ari, “Amboolele byoosi byeesi ise nakhola.” 40Baryo Basamariya beene ni beetsa isi Yezu, bamuloomba bari amenyekho ni nabo. Naye warama ibweene iyo khumala bifukhu bibili.
41Babandi bakali busa bamufukiililamo khu lwe bilomo byeewe. 42Baryo baloma umukhasi tsana bari, “Ari khufukiilila akhuba bari khu lweebyo byeesi iwe ukhuboolele ta, ne khulwekhuba fwabeene khwamuwulile, lundi khwamanyiile ilala khuri umusaani yuno niye Umuwonesi we shiibala.”
Yezu awonesa umwaana w'omundu uwe shiriifwa
43Lwanyuma lwe bifukhu bibili ibyo, Yezu warurayo watsya i Galilaaya. 44#Mat 13.57; Mrk 6.4; Luk 4.24Lwekhuba Yezu umweene aloma ari, “Umuŋoosi s'ali ni shiriifwa khu shaalo she waabwe ta.” 45#Yoh 2.23Aryo n'ola i Galilaaya, babaandu be Galilaaya bamwikhoyela, lwekhuba baaba baboone buli shiindu sheesi akhola mu Yerusalemu, khu Mayiiya ke Khubirakho. Nabo baaba batsiile khu mayiiya keene ako. 46#Yoh 2.1-11Yezu ndi lundi wakyeniyakho mu shaalo isho she Kana, mu Galilaaya. Ibweene iyo esi akalusila kameetsi khukhwikyela iviini. Ne i Kaperunaumu, abayo umusaani umukhulu mu buwuli, uwe shiriifwa, uwaba n'umusoleeli weewe, nga umulwaale. 47Umusaani uyo n'awulila ari Yezu wamile i Yuda wolile i Galilaaya, watsya isi Yezu ali, wamuloomba ari atsye awonese umusoleeli weewe, lwekhuba abe atsya khufwa.
48Yezu wamuloma ari, “Inywe ni mukhalibona bubonelo bubwiyangisa, ni bye kamakaanga, si mulifukiilila na khakyeekhe ta.”
49Ne umuundu uwe shiriifwa uyo, waloma ari, “Musakhulu, ni wiitse khutsye nga umwaana wase ashiili khufwa ta.”
50Ne Yezu wamulomela ari, “N'utsye, umusoleeli woowo kane awone.” Umusaani uyo wafukiilila sheesi Yezu amulomela, watsya.
51Ne n'aba nga ashiili khu ntsila atsya, babakaanisi beewe, beetsa bamwakaanana, bamuboolela bari, “Umusooleli woowo wawonile.”
52Kila abareeba tsinyaanga tseesi umusoleeli awonelamo. Bamuloma bari, “Kamayima kamururirekho ingoloobe, khu saawa musaafu.”
53Aryo paapa w'omusooleli washebulila ari isaawa nyene iyo, nimwo mweesi Yezu alomela ari, “Umusooleli woowo kane awone.” Ni abweene awo, umusaani uyo umweene ni be mu ntsu mweewe boosi bafukiilila mu Yezu.
54Akhano nikho khabonelo khakheyangisa, khe khaabiili kheesi Yezu akhola nga n'ama i Yuda wiitsa i Galilaaya.
Pilihan Saat Ini:
Yohana 4: LCE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
