Yohana 1

Ilomo yekyela Umuundu

1Makiboole abawo ilomo, n'ilomo iyo yaba ni Wele, n'ilomo iyo yaba Wele. 2Khukhwamila ilala makiboole Ilomo iyo yaba ni Wele. 3Wele abuumba bibiindu byoosi khubirira mu'lomo iyo.

Mbaawo shishiindu na shitweela shoosi shishabuumbibwa ta akhali khubirira mu niye. 4Bulamu bwaba bwama mu niye, ni bulamu buno bwaba buwaanga bwe babaandu. 5Buwanga bumulikha ali shishiilima, ni shishiilima shalekha khunyalisa khubusimisa ta.

6 # Mat 3.1; Mrk 1.4; Luk 3.1,2 Abawo umuundu uweetsa nga arumanibwa khukhwaama isi Wele, nga lisiina lyeewe bari Yohana.

7Niye etsa nga umujulisi, khuwanayo bujulisi khu buwaanga buno, ari nio akile babaandu boositsana bafukiilile mu Wele nga babirira mu niye.

8Niye s'aba buwaanga ta, ne khurusakho ndi etsa khuwanayo bujulisi khu buwaanga ubwo.

9Ilomo yino niyo iyaba buwaanga bwa ŋali, buwaanga bubweetsa mu shiibala khukhwaburukhila buli mutweela.

10Ilomo yaba mu shiibala, ni shiibala shabuumbibwa khubirira mu'lomo nyeene. Ne shiibala shalekha khumanya Ilomo yino ta.

11Ilomo yeetsa mu baandu baayo babeene, ne babaandu beewe balekha khumwakaanila ta.

12Ne abo babamwakaanila, abo baaba ni khufukiilila mu lisiina lyeewe, abawa bunyala bwe khukhwikyela babaana ba Wele, 13nga s'ali bari basaalikha nga babaandu ni basaalikha ta, namwe khulwe khukana khw'omundu ta, ne khurusakho ndi khu lwe khukana khwa Wele.

14Ilomo yino yekyela umuundu, wekhala akari musiifwe, nga wetsuule bubweela ni bwa ŋali. Ni nafwe khwabona shiriifwa sheewe, shiriifwa nga shili sh'Omwaana natweela yenyene khukhwaama isi Paapawe.

15Yohana okesanisa bujulisi bubumuwambakho, nga akukuulila angaaki ari, “Yuno niye isi ise nalomakho nga ni naloma indi, ‘Uyo ulikhukhwiitsa lwanyuma lwase, aminyisa ise shiriifwa. Lwekhuba niye anyoowa khubawo nga ise ishiili khubawo ta.’ ”

16Ni khukhwaama mu bwitsufu bwe bubweela bweewe, ifwe fweesi khwafuna tsikhabi tsya khutweela khutweela. 17Lwekhuba Wele arawo kamakaambila nga abirira mu Musa, ne bubweela ni bwa ŋali byeetsa nga bibirira mu Yezu Kristu. 18Mbaawo umuundu na mutweela uwabonakho Wele ta, akhali Umwaana uwasaalikha mutweela yenyene. Umweene uyo niye uba ambi ni Paapa, uyo niye ukila babaandu bamanya Paapa.

Burume bwa Yohana Umubatisa

(Mat 3.1-12; Mrk 1.1-8; Luk 3.15-18)

19Khuno nikhwo khurumbula khwa Yohana, nga Bayudaaya be mu Yerusalemu ni barumana basaayi ni Balevi khureeba Yohana bari, “Iwe naanu?”

20Naye walekha khwibisa ta, ne wabuula lubuula ari, “Ise s'indi niye Kristu ta.”

21 # Mal 4.5 Maka 18.15,18; Sir 48.10,11 Bamureeba lundi bari, “Ne iwe uli naanu? Iwe niye Eliya?” Yohana welamo ari, “Taawe.” Bamureeba lundi bari, “Iwe niye Umuŋoosi?”

Welamo lundi ari, “Taawe.”

22Kila bamureeba bari, “Ne iwe naanu? Lwekhuba khuli ni khubakho ni sheesi khuutsya khuboolela abo babakhurumanile. Wamweene ni wikanikhekho.”

23 # Isay 40.3 Yohana wabaloma ari, “Ise ndi likono ly'oyo ukukuulila mu mubiimbi, nga Umuŋoosi Yisaaya n'aloma ari ‘Ni mukwalaase intsila yeesi Umukasya kane akyeendelekho.’ ”

24Abo beesi barumana khureeba Yohana baryo, baaba batweela khu Bafarisaayo. 25Bareeba Yohana lundi bari, “Ne noola iwe s'uli Kristu ta, namwe Eliya ta, namwe Umuŋoosi tsana ta, khulwashiina kila ubatisa?”

26Yohana wabelamo ari, “Ise imbatisa nga niyeetisa kameetsi. Ne mus'iinywe mulimo uyo isi inywe mukhamanyile ta; 27Uyo uli khukhwiitsa lwanyuma lwase, uyo is'ise ikhaakhila ni khukangulula lukhoba lwe bilaalo byeewe ta.”

28Bino byoosi byakholekhela i Besaniya, shishiili nga wambukhile luluutsi Yorudaani, mu shifwo mweesi Yohana aba nga abatisila babaandu.

Khasheese kha Wele

29Shifukhu shishelakho, Yohana n'abona Yezu nga alikho etsa is'ali waloma ari, “Bona Khasheese kha Wele, uwinyusawo shishonako she shiibala! 30Yuno niye yeesi ise nakanikhakho, nga ni naloma ndi, ‘Aliwo umuundu uli khukhwiitsa inyuma wase, ne niye afuurakho ise shiriifwa. Lwekhuba niye abawo nga ise ishiili khusaalikha ta.’ 31Akhaba nga ise ni neetsa nga imbatisa ni kameetsi, ndi nio akile ise imurumbule isi babaandu be mu Isiraeli, ise samweene abe sinamumanya ta.”

32Yohana wekanikhakho nga awandalasa ari, “Nabona Umwoyo ekha nga liwuusi, nga ama mwikulu, wamuwolelakho. 33Ni nase samweene sinamumanya ta, ne uyo uwanduma khubatisa nga inaambisa kameetsi wanoma ari, ‘Kane ubone Umwoyo nga ekha ekhale khu mundu uyo. Umweene uyo niye ubatisa nga araambisa Umwoyo Umukhosefu.’ 34Ise samweene nashibona, nalundi imandalasa ndi ali Umwaana uwa Wele.”

Baleekelwa ba Yezu baakiboole

35Khu shifukhu shishelakho, Yohana ndi lundi aba wemikhile ni babili khu baleekelwa beewe. 36Ne n'abona Yezu nga abira wamulolelela, kila aloma ari, “Bona Khasheese kha Wele.” 37Baleekelwa beewe babili bano ni bawulila shino, baloonda khu Yezu. 38Ne Yezu n'eshebukha wabona nga babili bano bamuloondakho, wabareeba ari, “Muweentsa shiina?”

Bamukobolamo bari, “Rabbi, umenya waheena?”

“Rabbi” shishimanyisa shiri Umuleekeli.

39Yezu wabaloma ari, “Ni mwiitse mwabeene kane muboneyo.” Tsyaba abe tsili tsinyaanga nga liikhumi tsye angoloobe. Baryo batsya ni naye babona esi abe amenya, barama n'ibweene iyo.

40Mutweela khuubo babawulila nga Yohana aloma bino, aba Andereya, wandaaye wa Simoni Petero. 41Ni bwasha, Andereya wanyoowa khuweentsa yaaya weewe Simoni, wamuboolela ari, “Khwanyoolile Kristu.” 42Andereya wayila Petero isi Yezu. Yezu n'abona Petero, wamulolelela, waloma ari, “Iwe niye Simoni umwaana uwa Yohana? Kane ulaangibwe uri Kefa.” (Lisiina lino lili shitweela busa ni Petero, shishimanyisa shiri lulwanda).

Yezu alaanga Filipo ni Nasanaeli

43-44Khu shifukhu shishelakho, Yezu wakhalawo khuutsya i Galilaaya. Wanyoola Filipo abe uwama mu shiriimba she Besusaida, mweesi abe Andereya ni Petero bamenya. Yezu wamuloma ari, “N'unondekho.”

45Filipo n'anyoola Nasanaeli wamuloma ari, “Khwanyoolile uwatsana yeesi Musa aronakho mu makaambila, n'isi baŋoosi nabo baaronakho. Niye Yezu uwama i Nazareti, ali umwaana uwa Yozefu.”

46Nasanaeli wareeba Filipo ari, “Shilayi shiina shishinyala shaama i Nazareti iyo nayo?”

Filipo wamwiilamo ari, “Yiitsa wibonelekho.”

47Yezu n'abona Nasanaeli nga amwiitsayo, wamulomakho ari, “Ilala bona umu Isiraeli umweene, ukhalimo khukhwikanakana khwoosi ta.”

48Nasanaeli wareeba Yezu ari, “Wamanyila waheena?”

Yezu welamo ari, “Ise ikhuboone nga wekhaale asi e kusaala ku figi, nga Filipo ashiili khukhulaanga ta.”

49Nasanaeli wamwiilamo ari, “Umuleekeli, iwe uli Umwaana uwa Wele! Uli Umuyiinga uwa Isiraeli!”

50Yezu wamuloma ari, “Ufukiilila khulw'esho shonyene, nga ni nomile ndi ikhuboone nga wekhaale asi e kusaala ku figi? Kane ubone bibiindu bye kamaani khuminyisa bino.” 51#Rak 28.12Yezu weloosela ari, “Mu ŋali, ilala ikhuboolela ndi, ukhaabone likulu nga lyabaayukhile, nga angaaki w'Omwaana w'Omuundu, bamalayika ba Wele nga beekha ni baniina.”

Pilihan Saat Ini:

Yohana 1: LCE

Sorotan

Berbagi

Salin