GENESE 10
10
Noa ena natuna bona ena tubuna
1Noa ena natuna toi, Sema bona Hamo bona Iapeta, edia natuna bona edia tubuna be inai, abata ia daekau murinai idia havaraia:
2Iapeta ena natuna be inai: Gomere bona Magoga bona Madai bona Iavana bona Tubala bona Meseka bona Tirasi. 3Gomere ena natuna be inai: Asakena bona Ripata bona Togarama. 4Iavana ena natuna be inai: Elisa bona Tarasisi, bona Kitima ena bese bona Dodana ena bese danu ia ese ia havaraia. 5Idia dekena amo kone noho taudia bona motumotu noho taudia ibounai idia vara, edia bese idauidau dekenai, edia tano idauidau dekenai, bona edia gado idauidau dekenai.
6Hamo ena natuna be inai: Kusu bona Aigupito bona Putu bona Kanana. 7Kusu ena natuna be inai: Seba bona Havila bona Sabata bona Rama bona Sabateka. Rama ena natuna be inai: Sieba bona Dedana. 8Kusu ese Nimiroda ia havaraia danu, ia be lohia tauna badana ginigunana tanobada dekenai. 9Ia danu be labana tauna mai goada danu Lohiabada ena vairana dekenai, unai dainai taunimanima edia hereva ta ia gwau, “Labana tauna mai goada danu Lohiabada ena vairanai, Nimiroda bamona.” 10Nimiroda ena basileia ginigunana ena hanua badadia be Babela, bona Ereke, bona Akada, bona Kalena, idia ibounai be Sinara tano dekenai. 11Unai tano dekena amo Nimiroda ia raka siri, Asuria tano dekenai ia lao. Unuseni Nineva hanua bona Rehoboto Ira hanua bona Kala hanua ia haginidia, 12bona Resene hanua, Nineva bona Kala edia huanai. Kala be hanua bada herea.
13Aigupito ese ia havaraia besena be inai: Ludima bona Anamima bona Lehabima bona Napatuhima, 14bona Patarusima bona Kasaluhima bona Kapatorima. Pilistia taudia be Kasaluhima ena bese dekena amo idia vara.
15Kanana ena natuna be inai: Sidono, ia vara guna tauna, bona Heta, 16bona Iebusu taudia bona Amoro taudia bona Girigasa taudia, 17bona Hivi taudia bona Araka taudia bona Sini taudia, 18bona Aravada taudia bona Semara taudia bona Hamata taudia.
Gabeai Kanana taudia edia iduhu ia makohia, idia lao gabu idauidau dekenai idia noho. 19Kanana taudia edia tano be Sidono dekena amo ia lao bona Gasa, Gerara ena kahana dekenai, bona ia lao bona Lasa, Sodoma, bona Gomora bona Adima bona Seboimi edia kahana dekenai. 20Inai ibounai be Hamo ena bese taudia, edia iduhu idauidau bona edia tano idauidau dekenai idia noho, edia orea ta ta be mai edia gado idauidau.
21Sema danu, Iapeta ena kakana, ese iena natuna tatau haida ma ia havaraia. Sema be Ebere ena natuna ibounai edia tubuna. 22Sema ena natuna be inai: Elama bona Asuru bona Apakasada bona Luda bona Arama. 23Arama ena natuna be inai: Usu bona Hulu bona Getere bona Masa. 24Apakasada ese Sela ia havaraia, bona Sela ese Ebere ia havaraia. 25Ebere ena natuna tatau be rua. Ta ena ladana be Pelega, ena anina be “Parara”, badina be iena nega dekenai, tanobada ena bese idia makohia parara. Iena tadina ena ladana be Iokatana. 26Iokatana ena natuna be inai: Alamodada bona Selepe bona Hasaramavete bona Iera, 27bona Hadorama bona Usala bona Dikila, 28bona Obala bona Abimaela bona Sieba, 29bona Opiri bona Havila bona Iobaba. Inai ibounai be Iokatana ena natuna. 30Edia tano be Mesa dekena amo ia lao bona dina ia daekau kahana ena ororo ladana Separa ena kahana dekenai. 31Inai ibounai be Sema ena bese taudia, edia iduhu idauidau, bona edia tano idauidau dekenai idia noho, edia orea ta ta be mai edia gado idauidau.
32Noa ena natuna edia tubuna be inai, edia uru dekenai bona edia bese dekenai. Idia dekena amo tanobada ena bese ibounai idia vara, abata ia daekau murinai.
Pilihan Saat Ini:
GENESE 10: HMOTU93
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk