Matiyu 2

Zang ɓɔɔ ri zili sang ri a Yeesɔ zinang

1Zang yi Yeesɔ tɔ ka gari Bɛtalami ɓɔɔ ka tipi Yahudi, ka diki ɓɔɔ Hiridu roo kpanti ɓɛɛ. A zang ɓɔɔ ri zi naa ɓɔɔ sang nwang ɓɛɛ, ri seepaa kaa nɛɛ paa ɓɔɔ laa nwang nɔng, ri a ka gari Urushalima. A ri hɛ̃ɛ zang tɔɔ, 2“Jaa ɓɔɔ zang yirɛ nɛɛ wu naa nwang kpanti zang Yahudi ɓɛɛ, ɓu kiya? Ruu zi sang ɓiɓɛ ka paa ɓɔɔ laa nwang nɔng ɓɛɛ. Ka ruu nɔngkɔ, ruu arɛ, ruu tɔɔ ruu naa bang wu.”

3Ɓu doo ɓɔɔ Kpanti Hiridu tãa naa weɓe, yeti ɓiɓɛ lasɛ dɔɔli nɛɛ ɓɔ̀ɔ́ zang ɓɔɔ ri ka Urushalima nandon. 4A Hiridu kpalɛ Kpanti zang ɓɔɔ ri dɔɔ vuu ka Gãa Laa nɛɛ zang ɓɔɔ ri túsú zang labeenang nyaa dannang Laa, a hɛ̃ɛ ri tɔɔ, Labeenang nyaa dannang Laa tɔ̀ɔ́, zang naa yi Kirisi, zang ɓɔɔ naa a ɓɛɛ, ɓu ka niya?

5A ri kɔɔ wu tɔɔ, “Ka Bɛtalami ɓɔɔ ka tipi Yahudi ɓɛɛ. Zang nyaa shonang Laa bée nɔngkɔ ka tĩng tɛ̃ɛ tɛ̃ɛ. Zang nyaa shonang Laa beeyi tɔɔ,

6“ ‘Bɛtalami kɔ ka tipi Yahudi ɓee,

wu mɔkɔ tɔkɔlɔng ka teteng gari bang bang

ɓɔɔ ri ka tipi Yahudi kpang,

ka ruu ɓɔɔ Kpanti ɓɔɔ náa gãng jĩng ka zang mɛɛ Isirela

naa nwang ditɔ nɛɛ yeti ɓaaɓɛ ɓɛɛ.’ ”

7A Hiridu ɓáa nyaa ka zang ɓɔɔ ri zili sang ɓɛɛ dang gbete, nɛɛ wu tãa diki ɓɔɔ sang nwang nyaa tĩng shɔɔnang ka bii ɓarɛ ɓɛɛ. 8A shong ri ka Bɛtalami, nɛɛ, “Nɔɔ dita, nɔɔ daa kãa nɔng jaa keɓe tɔ̃ɔ tɔ̃ɔ. Nɔɔ nɛɛ ĩi wu tɔ, nɔɔ naa kɔɔ m, tɔɔ n daa bang wu kaa jong.”

9-10Ri tãa ruu ɓɔɔ Kpanti Hiridu kɔɔ ri tɔ, a ri yi gbalang daanang ɓarɛ kati. Ɓɔɔ ri zi sang ɓɔɔ ri zi tĩng shɔɔnang, ri tãa tĩnang dɔɔli. Sang kaɓa daa ka tĩng ɓarɛ sasak, a naa shii ka nɔng ɓɔɔ jaa kagn ɓɛɛ. 11A ri a ka yeti gãa, ri naa zi jaa rɛ̃ɛting kaa nɛɛ niiɓɛ Marayamu. A ri tang nɛɛ gutu, ri bang wu. Ri puu nyaa duku ɓarɛ, ri see saka ɓɔɔ kɔlɔ katɔ, ɓɔɔ zang ɓáa nɛɛ zinariya, nɛɛ nung ɓɔɔ a sɛ̃ɛ tɔ̃ɔ ɓɛɛ, a ɓɔɔ nung ɓɔɔ zang ɓáa nɛɛ muru ɓɛɛ, ri a jaa. Ri tɔɔ, ri gbãayu kaa tɔ, 12a ri sɔɔ gbalang ɓɔɔgn, ri daa gãa ɓarɛ kati, ka ruu ɓɔɔ, Kpanti Laa shaarɛ ri nyaa ka yeti rɔ̃kɔnang, nɛɛ ri sɔ̀ɔ bii kpanti Hiridu takpang ɓɛɛ.

Naa ɓɔɔ rɛɛ Yusufu ri yurɛ ri daa ka tipi Masara ɓɛɛ

13Ɓɔɔ zang ɓɔɔ ri zili sang kaɓa, ri daa tɔ, zang nyaa shonang Kpanti Laa ɓɔɔ ka lapa ɓɛɛ naa nwang nyaa kaa Yusufu ka yeti rɔ̃kɔnang tɔɔ, “Seepaa mɔɔ tuu jaa nɛɛ niiɓɛ, mɔɔ yurɛ, mɔɔ daa nwang nɛɛ ri ka tipi Masara. N naa kɔɔ mɔɔ diki ɓɔɔ mɔɔ yaa nɔng kaɓa ditɔ, ka ruu ɓɔɔ kpanti Hiridu naa kãa jaa keɓe ditɔ, nɛɛ tɔɔ wu nyɔ jaa vɔrɔ ɓɛɛ.”

14A Yusufu seepaa tuu jaa nɛɛ niiɓɛ, nɛɛ zĩi, a daa nɔng ka tipi Masara. 15Yusufu nwang ka tipi Masara sasak, kpanti Hiridu naa vɔ kati. Vuu keɓe nwang ka naa ɓɔɔ Kpanti Laa kɔɔ nɛɛ nyaa zang nyaa shonang ɓiɓɛ ka tĩng tɛ̃ɛ tɛ̃ɛ ɓɛɛ. Kpanti Laa kɔɔyi tɔɔ, “N naa ɓáa jaa mɛɛ nyaa nɛɛ tipi Masara.”

Ruu wujɛ seseere ɓɔɔ Hiridu nyɔkɔ ri vɔrɔ ɓɛɛ

16Ɓɔɔ Hiridu naa zirɛ nɛɛ, zang ɓɔɔ ri zili sang ri nwãarɛ wu tɔ naa weɓe, gnvɔ shàa wu dɔɔli. Shong zang nɛɛ zang daa nyɔkɔ wujɛ varɛ nandon ɓɔɔ saa ɓarɛ ɓa ziti gn kpang ɓɛɛ vɔrɔ, ka gari Bɛtalami nɛɛ nɔng ɓɔɔ kiiri Bɛtalami nyaa naabm. Hiridu palɛ nɔngkɔ ka naa ɓɔɔ wu tãa nyaa diki ɓɔɔ sang nwang nyaa ting shɔɔnang ka bii zang ɓɔɔ ri zili sang ɓɛɛ. 17Vuu keɓe nwang, ka naa vuu ɓɔɔ Irimiya zang nyaa shonang Laa kɔɔ ka tĩng tɛ̃ɛ tɛ̃ɛ ɓɛɛ. Irimiya kɔɔyi tɔɔ,

18“Zang tãa nyavɔ ka Rama.

Rahila kaa nyavɔ wujɛ ɓiɓɛ,

ɓɔɔ vɔlɔ ɓɛɛ.

Kasɛ nɛɛ zang bakɛ wu kpang.”

Naa ɓɔɔ rɛɛ Yusufu ri gbãayu nɛɛ tipi Masara ɓɛɛ

19Hiridu naa vɔ tɔ, a zang nyaa shonang Kpanti Laa ɓɔɔ ka lapa naa nwang nyaa kaa Yusufu tɔkn, ka yeti rɔ̃kɔnang ka Masara, 20a kɔɔ wu tɔɔ, “Seepaa ta mɔɔ tuu jaa nɛɛ niiɓɛ, mɔɔ daa nɔng tipi Isirela. Zang ɓɔɔ ri kãa yuu jaa keɓe nyɔnang, ri vɔlɔ tɔ.”

21A Yusufu seepaa tuu jaa kaa nɛɛ niiɓɛ, daa kaa nɔng tipi Isirela. 22Ɓɔɔ Yusufu naa tãa nyaa tɔɔ, Akeliyu jaa Hiridu kɔ roo kpanti ka nyaa tipi Yahudi ka nɔng diiɓɛ, a kaa vɔrɔ Yahudi daanang kati. Kpanti Laa ti naa kɔɔ wu ka yeti rɔ̃kɔnang, nɛɛ wu daa ka tipi Galili. 23A Yusufu daa nwang ka nɔng ɓɔɔ zang ɓaa nɛɛ Nazara ɓɛɛ. Vuu keɓe nwang kaa naa ɓɔɔ zang nyaa shonang Laa kɔɔ ka tĩng tɛ̃ɛ tɛ̃ɛ ɓɛɛ. Zang nyaa shonang Laa kɔɔyi tɔɔ, “Zang naa ɓaa wu nɛɛ yɔɔ Nazara.”

Pilihan Saat Ini:

Matiyu 2: mzmNT

Sorotan

Berbagi

Salin