Matyu 7

Yesu Tyiet tazwa Nyia̱ Á̱ghyang Á̱niet Shi̱ri̱ya

(Luk 6:37-38,41-42)

1“Nyi yok nyia̱ á̱ghyang nyin shi̱ri̱ya bah.#7:1a Ku: “Nyi ni̱ ngyok nwuan a̱bun á̱ghyang nyin bah.” Ku: “Nyi yok kyiak á̱ghyang nyin nang á̱ka̱tuk á̱niet a̱ni bah.” A̱wot nyin meang, á̱ ma na nyia̱ nyin shi̱ri̱ya bah.#7:1b Ku: “A̱wot nyin meang á̱ ma na nwuan a̱bun nyin wu bah.” Ku: “A̱wot nyin meang, á̱ ma na kyiak nyin nang á̱ka̱tuk á̱niet a̱ni bah.” 2Shi̱ri̱ya nang nyi nyia̱ á̱ghyang á̱niet ndyo a̱ni, jija nang á̱ na nyia̱ nyin ndyo. A̱wot kweanghyi ji nang nyi mmak á̱ghyang á̱niet ndyo a̱ni, jija á̱ na mmak nyin ndyo.

3“Yihwa mbyia̱ nang a nwuan a̱bachinchyat ma̱ a̱li a̱kpa̱ndang swat ang ka, a̱wot a̱gut nkwon ka̱ shya̱ mi̱ si̱ nwan tswa a̱li ji̱ a̱ni, a li nka baa? 4Ma a̱nia wa, a na nyia̱ ni a ndam a hyia̱ ma̱ng a̱kpa̱ndang swat ang wu nyia̱, ‘Yok n beang ang ti̱n a̱bachinchyat ma̱ a̱li ang ka,’ a̱wot nang a̱gut nkwon nyim tswa a̱li ang ji? 5Nwan a̱bubuk a̱yin! Ya nti̱n a̱gut nkwon ka̱ shya̱ mi̱ ntswa a̱li ang ji a̱ni, a ka li shansham, a sii ti̱n a̱bachinchyat ka̱ shya̱ mi̱ ntswa a̱li a̱kpa̱ndang swat ang ji a̱ni.

6“Nyi yok nwuak á̱niet ba̱ nwai yet á̱za̱za̱rak a̱ni#7:6a Lyuut cha̱chaat: “A̱ka̱bwu.” á̱za̱za̱rak nkyang bah, ku nyi koot a̱yaakusuru á̱tsatsak nfang, kalak ba̱ na shai naa ma̱ng a̱ti̱tak. A̱wot ba̱ bwuak ba̱ sam nyin di̱ chunchong.#7:6b Wa̱i a̱lyiat: Shimba Á̱za̱za̱rak nkyang ma̱ng Á̱tsatsak nfang ma̱ a̱da̱dei zwunzwuo wuni yet kidee tazwa a̱chuchuk A̱sham Nkhang Yesu ka. A̱wot A̱yaakusuru si̱ yet kidee si̱sak nang á̱niet á̱ka̱tuk nyia̱ ni̱ ndak a̱chuchuk wu a̱ni.

Yesu Tyiet nang A̱gwaza na Nshim Naai nzi̱t hu

(Luk 11:9-13)

7“Nyi lyip,

á̱ na nang nyin.

Nyi kup á̱ghyi di̱ chat,

nyi na shya̱.

Nyi tsot nyinyiit hu,

á̱ na khwuk nyin dyo.

8Mat konyan wa lyip,

á̱ na nang gu.

Ma a̱nia wa, a̱tyu a̱ kup á̱ghyi di̱ chat a̱ni,

a̱ na shya̱;

ma̱ng a̱tyu a̱ tsot nyinyiit hu a̱ni,

á̱ na khwuk gu ndyo.

9“A̱nyan wa ma̱ nyin ki̱ nggwon nggu naai nggu burodi, a̱ nang ka a̱fang? 10Ma a̱nia wa, kee ki̱ ka̱ ma naai a̱fa̱n, gu nang ka zwak a? Kaai, ku si̱ mi̱n di a̱nia bah! 11Ka̱ nyin á̱niet á̱ka̱tuk nyia̱ lyen si̱sak nang nyi na nka̱u mman nyin na a̱tan nkyang a̱ni, ku fa A̱tyia̱ nyin wu a̱ shya̱ tswazwa ka a̱ni, a̱ na nang á̱niet ba̱ lyip gu a̱ni a̱tan nkyang a̱ swaak. 12Mat a̱nia, kuzang kyang nang nyi chat á̱niet ba̱ nyia̱ nyin ndyo a̱ni, nyi nyia̱ mba ndyo a̱nia. Si̱ huni hwa yet a̱tyin a̱lyiat nang doka ma̱ng a̱yaata̱m a̱kwonu A̱gwaza ba tyiet a̱ni.

Yesu Gba Á̱niet Khwi nggu ba di̱ Nwuo A̱bafa̱fap A̱na̱nwuai

(Luk 13:24)

13“Nyi nwuo da̱ a̱bafa̱fap a̱na̱nwuai ka̱ vwuo a̱khwu a̱ni, kikya naat ma̱ng a̱nyin mi̱ Tyok Ma A̱gwaza tswazwa hu. Mat vak hu ku naat ma̱ a̱khwu ka a̱ni, shi á̱kpai ku si̱ byia̱ nyinyang di̱ chyet. A̱wot a̱na̱nwuai ka bu shi á̱kpai, á̱niet ba̱ nwuai da̱ nka a̱ni, shi á̱kpa. 14Vak hu ku naat a̱mali swuan ka a̱ni vwuo a̱khwu, a̱wot a̱na̱nwuai ka si̱ yet a̱tsak a̱fa̱fap wa. Á̱niet ba̱ shyat vak hu ma̱ng a̱na̱nwuai a̱kya a̱ni, shi á̱kpa bah.

Yesu Gba Á̱niet Khwi ba̱ Ta̱bam ma̱ng Á̱niet tyiet A̱ka̱laa

(Luk 6:43-44)

15“Nyi ta̱bam ma̱ng a̱yaata̱m ba̱ kyiak pyipyia̱ mba ba̱ yet á̱tsak a̱yaata̱m a̱kwonu A̱gwaza bya, ba̱ chong da̱ a̱vwuo nyin ma̱ng á̱kukwa zón seap ji̱ sang lyen a̱ni, a̱wot mami nfwuo mba na, ba̱ yet a̱ka̱bwu a̱yit nia na̱ byia̱ lyen na̱ ghwut á̱ kat á̱ chat kyayak nang ba̱ na ya di̱ wuwok a̱ni. 16Mat nta̱m ba ni̱nia nyi na nfi̱k baa.

“Á̱ si̱ mi̱n kpa̱i sum a̱na̱p da̱ a̱kwon dundu a; ku á̱ kpa̱i a̱bwabwap da̱ a̱kwon babanyak a? 17Ma a̱nia wa, kuzang a̱tan a̱kwon ni̱ tyia̱ a̱tan sum, a̱wot a̱bombwon a̱kwon a̱ tyei a̱bombwon sum. 18A̱tan a̱kwon si̱ mi̱n tyei a̱bombwon sum bah, da̱ a̱bombwon a̱kwon a̱ si̱ mi̱n tyei a̱tan sum bah. 19Kuzang a̱kwon di̱ ka̱ tyei a̱tan sum a̱ni bah, á̱ ni̱ tyap kaa á̱ tyia̱ nka mi̱ ndong. 20Mat a̱nia, ma̱nang nyi ni̱ nfi̱k a̱kwon di̱ nsum nka hu a̱ni, ma a̱nia wa nyi na nfi̱k á̱niet ba mat nta̱m mba na.

Yesu Gba Á̱niet Khwi nggu ba ba̱ Yok Laai A̱pyia̱ mba bah

(Luk 13:25-27)

21“Mi̱ kuzang a̱yin wa na nwuak a̱lyoot nung ka shi ma̱ng a̱nu a̱nchi̱ri̱ng nang A̱tyoli nggu wa a̱ni,#7:21 Lyuut cha̱chaat: “Mi̱ kuzang a̱yin wa na yei nung, ‘A̱tyoli, A̱tyoli!’ ” a̱ na shya̱ nwuo Tyok Ma A̱gwaza tswazwa hu bah; si̱ a̱tyu a̱ khwi kyang hu nang A̱tyia̱ nung wu a̱ shya̱ tswazwa ka chat a̱ni, nggu wa na nwuo ma̱nyin gu.

22“A̱tuk shi̱ri̱ya A̱gwaza ka, á̱niet ma̱ a̱di̱di̱t na nwuak a̱lyoot nung ka shi nang A̱tyoli mba wu a̱ni,#7:22 Lyuut cha̱chaat: “Mi̱ kuzang a̱yin wa na yei nung, ‘A̱tyoli, A̱tyoli!’ ” nyia̱, ‘A̱tyoli, da̱ a̱lyoot ang kya nang zi̱ ku nshei a̱lyiat A̱gwaza na. A̱wot da̱ a̱lyoot ang kya zi̱ si̱ nkhai á̱ka̱tuk ntswá ba ba̱ ghwut ma̱ á̱niet, ma̱ng nyia̱ a̱cha̱chet nkyang a̱ri̱bi̱di na baa?’ 23A̱wot nung meang, n na nwuak ba shim nyia̱, ‘N dyen nyin bah,#7:23 Wa̱i a̱lyiat: N dyen nyin bah. Shimba, si̱ huni fa nang Yesu byia̱ a̱ka̱ta ma̱ng á̱niet a̱bya bah. nyi tyong nyi ghwon nung, nyin á̱niet lak khwi doka A̱gwaza.’

Yesu Chat Á̱niet Khwi nggu ba ba̱ Khwi Tyiet Nggu hu

(Luk 6:47-49)

24“Mat a̱nia, konyan wa fa̱k a̱lyiat nung na a̱ si̱ nyia̱ ta̱m ma̱ng á̱na, á̱ na tyan gu nang a̱tyu mumwang a̱ nok a̱li nggu ka tazwa a̱fang a̱ni. 25Jen nang za nva a̱sa̱khwot a̱ri̱giwa si̱ ghwut na̱ si̱ hyaai a̱chi̱chen a̱ni, wun si̱ hyap a̱li ka mi̱ chet bwum bwum bwum a̱ni! A̱mgba̱m ma̱ng a̱nia, a̱li a̱kya si̱ kwa bah. Mat a̱ kpaat ka tazwa a̱fang kya. 26A̱wot konyan wa fa̱k a̱lyiat nung na da̱nang gu nyia̱ ta̱m ma̱ng á̱na a̱ni bah, á̱ na tyan gu ma̱ng a̱bwuon a̱yin a̱ nok a̱li nggu ka tazwa a̱ji̱jak a̱ni. 27Jen nang za nva a̱sa̱khwot a̱ri̱giwa si̱ hyaai a̱chi̱chen ba, wun si̱ hyap a̱li ka mi̱ chet bwum bwum bwum a̱ni, a̱li a̱kya si̱ kwa ma̱ wurum!”

28Jen nang Yesu ntyak tyiet gu hu a̱ni, á̱kpa á̱niet ka si̱ fa̱k a̱ga̱de di̱ tyiet gu hu. 29Mat Yesu ku tyiet mbaa ma̱ng a̱tsatsak tyok. Tyiet gu hu si̱ vwuon ma̱ zan ma̱ng si̱ á̱niet tyiet doka Musa ji.

Pilihan Saat Ini:

Matyu 7: TyapNT

Sorotan

Berbagi

Salin