JOHAN 7
7
Jesu Leh A-unaute
1Huai khit in Galili gam ah Jesu avak a; Judate'n amah hihlup atup ziak un Judia gam apha nuam kei hi. 2Judate Biakbuk Ankuangluina anaita hi. 3Huchi in a-unaute'n akiang ah, “Hiai a kipan in Judia gam ah va hoh in, na nungzuite'n na thilhih amuhtheihna ding un,” achi uhi. 4“Kuamah in aguk in thil bangmah ahih kei ua, amah mah in alangtang in mite theih ding in ahih hi. Hiai thilte na hih ngalleh khovel kiang ah kimusak in,” achi uhi.
5A-unaute nangawn in leng amah agingta kei uhi. 6Huan Jesu'n akiang uah, “Ka hun atung nai kei; nou hun zaw chik lai peuh in atung gige hi. 7Khovel in nou ahon ho thei kei, kei zaw hon ho nak uh, athilhihte uh gilou ahi chih ka theihsak ziak in. 8Nou ankuangluina ah va hohtou unla, kei zaw tu ankuangluina ah ka hohtou tadih kei ding, ka hun atun nai louh ziak in,” achi hi. 9Huai thu akiang uah gen in Galili gam ah a-om nilouh hi.
Ankuangluina A Jesu Thuhilh
10Himahleh a-unaute ankuangluina a ahohtouh nung un, amah leng vantang theih louh in, aguk bang in ahohtou sam hi. 11Judate'n ankuangluina ah amah azong ua, “Koi a om ahia?” achi uhi.
12Atung ah mipite lak a mi aphun sim supsup ua, khenkhat in, “Mihoih ahi,” achi ua; khenkhat in, “Hi dek kei e, mipi khem ahi,” achi uhi. 13Himahleh Judate akihtak ziak un kuamah in alangtang in atungtang thu agenlang ngam kei uhi.
14Ankuanglui san laitak in, tempul ah Jesu ahohtou a, thu ahilh hi. 15Huan Judate'n, “Hiai mi'n zil ngeiloupi a bang achia hichi theih ahia?” achi ua, lamdang asa mahmah uhi.
16Huan Jesu'n amau adawng a, “Ka thuhilh kei a hilou in, hon sawlpa thu ahi zaw. 17Kuapeuh ama deihlam hih ut in ka thuhilh Pathian a kipan hia, keimah phuahtawm a ka gen chih athei ding hi. 18Kuapeuh ama phuahtawm thu gen zaw, ama hoihna zong ahi; asawlpa hoihna zongmi mitak ahi, amah ah diklouhna himhim a-om kei hi. 19Mosi in na kiang uah dan ahon pe kei a hia? Himahleh na lak uah kuamah in dan na zui kei uh. Nou bang achia hon hihlup tum na hi ua?” achi hi.
20Mipi'n, “Dawi zawl na hi ve; kua'n ahia hon hihlup tum?” chi in adawng uhi.
21Jesu'n adawng a akiang uah, “Thil khat ka hih nou tengteng in lamdang na sa uh. 22Ahi a, Mosi in zeksum thu nou ahon piak ziak in Sabbath ni in leng mi zek na sum zel uhi. Huai pen Mosi a kipan hilou in pipute a kipan ahi zaw hi. 23Mosi Dan a tatleklouhna ding a Sabbath ni a pasal in azek asum ngalleh, ke'n Sabbath ni a mi ka hihdam ziak in ka tung ah na heh tuam uh maw? 24Akilatdan in ngaihtuah kei unla, diktattak in ngaihtuah zaw un,” achi hi.
Khrist, Messia Hihna
25Huan Jerusalem a mi khenkhat in, “Hiai mi thah atuppa uh hilou hia? 26En dih uh, alangtang in hiai ah thu agen a, akiang ah bangmah agen kei uhi. Amah Khrist ahi chih vaihawmte'n thei taktak uh ahita diam? 27Hiai mi ahong kipatna lam nangawn i thei ngal a. Khrist ahong kilat chiang in ahong kipatna lam kuamah in athei kei ding uh,” achi uhi.
28Huaiziak in tempul a Jesu'n thu ahilh kawm in akikou a, “Nou na hon thei ua, ka hong kipatna lam leng na thei uh. Himahleh keimah thu a hong pai ka hi kei, amah kei hon sawlpa midik ahi, amah lah na thei ngal kei ua. 29Ke'n amah ka thei; amah a kipan a hong pawt ka hi a, ama'n lah ahon sawl ngal a,” achi hi.
30Huchi in amah mat atumta ua, himahleh ahun atun nai louh ziak in kuamah in akhoih thei kei uhi. 31Mipi akhen tampite'n bel amah agingta ua, “Khrist ahong kilak chiang in, hiai mi hih sang in chiamtehna tamzaw ahih tuan dia hia?” achi uhi.
Jesu Man Ding A Sawlna
32Huan Pharisaite'n atung a mipi phunna thute aza ua; huchi in siampu liante leh Pharisaite'n amah man ding in heutute asawlta uhi. 33Jesu'n, “Sawt lou kal na kiang uah ka om phot ding a, hon sawlpa kiang ah ka pai ding hi. 34Nou na hon zong ding ua, na hon mu kei ding uh; ka omna ah leng na hong thei kei ding uh,” achi hi.
35Huan Judate akihou ua, “I muh louh ding in hiai mi koi a hoh dek ahi ding? Grik pemdalhte kiang a hoh in Grikte thu va hilh ding adiam aw? 36Nou na hon zong ding ua, na hon mu kei ding uh, ka omna ah leng na hong thei kei ding uh achih, bang achihna adiam maw?” achi uhi.
Tuihing Lui Jesu Ahi
37Huan ankuanglui ni nanungpen, ni thupi ni in, Jesu adingh a, akikou a, “Kuapeuh adangtakleh ka kiang ah hong henla, dawn hen. 38Kuapeuh kei hon gingta Laisiangthou gen bang in tuihing luite asung a pan ahong luangkhe ding,” achi hi. 39Hiai thu agingtate'n Kha atan ding thu uh agenna ahi; Jesu pahtawi a a-om nai louh ziak in Kha lah piak ahi nai tadih ngal kei ua. 40Huchi in mipi lak a khenkhat in huai thu azak un, “Hiai zaw zawlnei hi petmah e,” achi uhi.
41Khenkhat in, hiai zaw, “Khrist ahi,” achi ua, khenkhat in bel, “Bang ding in Galili gam ah Khrist ahong pawt tel dia? 42Khrist zaw David suante lak ah, David omna khua Bethlehem a apawt ding ahi, chih Laisiangthou in agen kei a hia?” achi uhi. 43Huchi in amah ziak in mipi akikhen ua, akilangta uhi. 44Khenkhat in mat a-ut ua, himahleh kuamah in akhoih tuan kei uh.
Juda Makaite Ginlouhna
45Huan heutute, siampu liante leh Pharisaite kiang ah ahong pai nawn ua akiang uah, “Bang achia hon tonpih lou?” achi uhi.
46Heutute'n, “Hiai mi bang in kuamah in thu agen ngei kei,” achi ua, adawng uhi.
47Pharisaite'n akiang uah, “Nou leng pimang a om sam na hita uh maw? 48Vaihawmte leh Pharisaite lak a mi amah gingta a-omta a hia? 49Huai dan thei lou mipite sop lai, hamsethuak ei ve ua,” achi ua, adawng uhi.
50Nikodem, tuma a Jesu kiang a hong, alak ua pang sam ahi a, ama'n akiang uah, 51“Amah kam ngei a thu zak leh athilhih theih ahih ma, i dan un mi siam louh atangsak ngei a hia?” achi hi.
52Amau akiang ah, “Nang leng huai Galili mi na hi sam maw? Zong lechin, Galili gam ah zawlnei kuamah pawt ding a-om kei uh chih thei tanla,” achi ua, adawng uhi. 53Huan michih ama inn chiat ah apaita uhi.
Pilihan Saat Ini:
JOHAN 7: PAITBSI
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
